اللي حنتكلم عنه النهاردة هو الإجابة عن سؤال هو إيه اللي بيحصل بالضبط لمسلمي الصين؟ .. اللي أقدر أقوله ليك وأنا متؤكد منه إن وفق تقديرات الأمم المتحدة والحكومة الأميريكية ففيه أكثر من مليون مواطن مسلم صيني أغلبهم بينتموا لأقلية مسلمة عايشة جوه الصين اسمهم الإيجور Uighur محتجزين دلوقتي في معسكرات بيفضلوا محبوسين فيها بالشهور وخلال الشهور دول بيُجبروا إنهم يكفروا بالإسلام ويعلنوها صراحة إنهم بقوا مش مقتنعين بتعاليم الدين الإسلامي وكل يوم يفضلوا يغنوا أغاني وطنية بتمجد في الحزب الشيوعي الصيني .. فيه تقارير قالت إن المحتجزين بيُجبروا إنهم يشربوا خمور وياكلوا لحم خنزير وفيه تقارير تانية قالت إنهم بيتعرضوا لأعمال تعذيب وفيه منهم مات في المعسكرات دي .. لإن الموضوع فيه هبد وهري كتير فإحنا حنحاول إلي حد ما نبسط الموضوع لشوية أسئلة نحاول نجاوب عليها:
أول سؤال و يمكن أهم سؤال هو إيه حجم أو Scale المعسكرات دي؟ هل بتتكلم عن قسم شرطة يعني ولا حاجة زي معسكرات تعذيب اليهود أيام الهولوكوست؟
بناء علي كلام جرنان أمريكاني اسمه The Wall Street Journal فأغلب معسكرات الاعتقال دي موجوده في ولاية صينية اسمها جين-يانج Xinjiang في شمال غرب الصين وخلال سنة واحدة مساحة معسكرات الاعتقال دي تضاعفت .. الجرنان قال إن الموضوع بدأ بإن الحكومة الصينية كانت بتستهدف معتادي الإجرام اللي هم مسلمي الإيجور بس المعروف عنهم إنهم مشيوا في سكة العنف ومقاومة سلطة الحكومة الصينية بالسلاح .. بس دلوقتي الموضوع شمل أي حد ماشي في الشارع بس مربي دقنه .. بلاش كلام الصحافة عشان فيه ناس مبتصدقوش .. خلينا في كلام حد زي اللجنة التنفيذية لكل ما يتعلق بالصين في الكونجرس الأميريكي واللي وصفت اللي بيحصل إنه أكبر عملية اعتقال جماعي لأقلية عرقية في العالم دلوقتي.
الوثائق الرسمية الصينية بتسمي معسكرات الاعتقال دي Reeducation Center أو مراكز إعادة تأهيل .. ده الكلام اللي مكتوب علي الورق عندهم .. لو جيت سألت أي مسئول صيني انتوا بتعملوا إيه في الReeducation Centers دي؟ حيقولك إحنا معندناش حاجة اسمها كده إحنا بس عملنا مدارس إعادة تأهيل للمجرمين .. لو أي مواطن صيني بقي راح سأل حكومته انتوا بتعملوا إيه هناك؟ حتلاقي إن الحكومة الصينية بتقول لمواطنيها إنها بتعمل حاجة تانية خالص وهي إن معسكرات الاعتقال دي مستشفيات عشان تعالج الإيجور من مرض الإسلام .. أيوه زي ما سمعت كده الحكومة الصينية رسمياً لما تيجي تبرر قدام شعبها هي بتعمل إيه بتقولهم إن المسلمين دول مرضي ولازم نعالجهم.
أنا عارف إنك بتهز راسك وبتهرش في شعرك بتحاول تستوعب انت إيه اللي انت قريته ده بس خليك معايا وأنا حفهمك .. الصين شايفه إن الدين مرض وبناء عليه لو انت من الإيجور المسلمين اللي طهقوا من القمع اللي انت وأهلك بتتعرضوله وقررت إن مفيش حل غير إنك تشيل سلاح فانت من وجهة نظر الحكومة الصينية انت مش إرهابي .. لا انت شخص عيان بمرض معدي اسمه التشدد الديني ولازم نعملك حجر صحي .. انت بقيت زيك زي اللي أُصيب بأنفلونزا الخنازير أو الايبولا كده .. من هنا جت تسمية إن الصينيين بيسموا معسكرات الاعتقال دي مستشفيات وإن اللي محجوزين فيها مش معتقلين دول مرضي.
مش بس الصين بتعتبر الإسلام مرض معدي .. الحكومة هناك عشان تبرر قدام شعبها ليه أفضل حابسه أكتر من مليون بني أدم لأكثر من 6 شهور بدون وجه حق فهم قالوا للشعب إن والله الإسلام ده مرض علاجه صعب حبتين اللي هو حاجة كده شبه الأمراض العقلية Mental Illness زي الاكتئاب أو الإدمان .. انت عمرك شفت حد عنده اكتئاب اتعالج وبقي يمشي يغني ويرقص في الشارع .. فلو انت مسلم من الإيجور فالحكومة الصينية خدتك في معسكرات الاعتقال أو Reeducation Hospitals زي ما بيحبوا يسموها وفضلوا وراك لحد ما تكفر بالله وأفرجوا عنك انت برده حتفضل متراقب مستنيين مرة تغلط وتروح تصلي في الجامع أو إن أي حد يبلغ عنك إنك بتصلي وساعتها حيقبضوا عليك تاني وحتترمي في معسكرات الاعتقال دي تاني .. تقارير حكومية كتير جوه الصين لما بتيجي تتكلم عن معسكرات الاعتقال بتاعة الإيجور تلاقيهم بيستخدموا ألفاظ طبية أوي زي Mental Illness أو Poison in the Brain أو Eradicating Tumors يعني الإسلام ده مرض عقلي وسم في المخ ولازم يتم إزالة الورم اللي اسمه الإسلام.
هل دي افتكاسة جديدة للصين؟ يعني هل موضوع اعتبار الدين مرض معدي محتاج علاج ده اتطبق قبل كده مع أي حد تاني؟
دي أول مرة الصين تستخدم الاسلوب ده علي Scale ضخم يشمل أقلية عرقية .. بمعني .. سنة 2000 ظهرت ديانة جديدة اسمها فالون جونج Falon Gong في الصين برده والحكومة اترعبت لما ظهرت فلموا كل الناس اللي مؤمنة بيها ورموهم في معسكرات اعتقال برده .. الفكرة اللي الصين عايزاها إن السكان كلهم يبقوا حاجة واحدة .. هم عايزين الصينيين يبقوا ولا كأنهم طالعين من خط إنتاج واحد .. كلهم منتمين لنفس عرق الهان وكلهم شيوعيين وكلهم بيسبحوا بحمد الحزب الشيوعي.
أنا بس عايزك وسط مشاعر الغضب أو الحزن اللي جواك إنك مش بس تدعي للإيجور المسلمين اللي جوه معسكرات الاعتقال إنما كمان تدعي للناس اللي بره المعسكرات أو بره الصين أساساً .. تخيل نفسك مسلم من الإيجور قدرت تهرب بره الصين بس عرفت إن باباك ومامتك معتقلين وانت مش عارف تعملهم حاجة .. تخيل حجم الاكتئاب واليأس والإحباط اللي هو/هي حاسس بيه وعلي فكرة هم كتير أوي اللي قدروا يهربوا بره الصين ومش عارفين يعملوا أي حاجة يساعدوا بيها أهلهم.
طب ليه محدش من الدول الإسلامية أو الكيانات الإسلامية الكبيره فتح بقه واتكلم عن اللي بيحصل للإيجور زي ما اتكلموا عن اللي بيحصل للروهينجا مثلاً في ميانمار؟
أول وأهم سبب هو الفلوس .. كتير أوي من الدول الإسلامية بتربطها علاقات اقتصادية قوية مع الصين .. الفكرة إن اللي بيفرق دولة عن التانية هو مدي قوة العلاقات الاقتصادية دي مع الصين .. عندك دول إسلامية كتير من وسط أسيا والشرق الأوسط أعضاء في مبادرة حزام واحد و طريق واحد Belt & Road Initiative او BRI ودي عبارة عن مبادرة بتجمع 78 دولة وبدأت سنة 2013 عشان الصين تعمل شبكة طرق وبنية تحتية تربط بيها دول أوروبا وأسيا مع بعض .. عندك دولة زي باكستان مثلاً .. دي دولة أساساً تقييمها الائتماني زي الزفت يعني لو باكستان راحت طلبت قرض من صندوق النقد الدولي أو البنك الدولي حيترفض لإن أرقام الاقتصاد الباكستاني بتقول إنه عمره ما حيعرف يسدد فوايد القرض .. الفكرة إن الصين بتعرض علي باكستان وغيرها إنها تديلهم قروض هم محتاجينها أوي فعمر ما باكستان حتنتقض أي حاجة تعملها الصين خوفاً من إن الصين ترجع في كلامها و تسحب الفلوس اللي هي عطتها ليها.
عندك دولة زي مصر بتاكل عيش من BRI ومتستحملش إن الصين تزعل منها لدرجة إن الحكومة المصرية أحياناً بتجود من عندها عشان ترضي الصين .. في صيف 2018 منظمة Human Rights Watch كانت بتشد شعرها من قرار الحكومة اعتقال حوالي عشرات الطلبة من الإيجور اللي بيدرسوا في الأزهر الشريف من غير ما تقول أي أسباب وجريدة The New York Times قالت قبل كده إن الحكومة رحلت 12 طالب من الإيجور للصين.
سبب تاني هو إن كتير من الدول الإسلامية مش فارق معاها حقوق الإنسان أصلاً .. لما انت تلاقي الحكومة الصينية طالعه تقولك إن الهجمات الإرهابية اللي عملها شوية من الإيجور من سنة 2009 لحد سنة 2014 هم السبب ورا اللي بيعملوه فلما يجي حاكم عربي يؤيد موقف الصين أبسط حاجة يعملها يقولك أصلهم بيحاربوا الإرهاب هو أنتوا عايزني أبان قدام العالم إني بيؤيد اللإرهاب ولا إيه؟
المصادر:
- مقالة بعنوان China is treating Islam like a mental illness يعني الصين بتعامل الإسلام علي إنه مرض عقلي .. نشرت في مجلة The Atlantic الأميريكية وده لينك المقالة الأصلية:
https://www.theatlantic.com/international/archive/2018/08/china-pathologizing-uighur-muslims-mental-illness/568525/ - مقالة بعنوان Why the Muslim World isn’t Saying Anything About China’s Repression and ‘Cultural Cleansing’ of its Downtrodden Muslim Minority نشرت في مجلة Business Insider وده لينك المقالة الأصلية:
https://www.businessinsider.com/why-muslim-countries-arent-criticizing-china-uighur-repression-2018-8
