لما أجيب سيرة فرقة باريس سانجيرمان مين أول الأسامي اللي بتيجي في دماغك .. (نايمار Neymar)؟ .. (كيليان إمبابي Kylian Mbappe)؟ .. (إدينسون كافاني Edinson Cavani)؟ .. طب (أنخل دي ماريا Angel Di Maria) أو (كيلور نافاس Keylor Navas)؟ .. الحقيقة إن التشكيلة دي لوحدها تجري ريق أي حد بيلعب FIFA إنه يختار باريس سانجيرمان تبقي فرقته .. دي فرقة ماسكها مدرب بيفهم زي (توماس توخيل Thomas Tuchel) ودايسه علي وش كل فرق فرنسا ومحدش عارف ياخد منها لا حق ولا باطل .. بس إيه رأيك لو قلتلك إن أهم لاعيب في الفرقة دلوقتي مش ولا واحد من اللي جبت أساميها .. إسأل أي حد بيتفرج علي باريس سانجيرمان كتير وأنا عارف معلش إنهم يتعدوا علي الصوابع حيقولك إن حالياً الفرقة كلها قايمة علي كتاف (إدريسا جايي Idrissa Gueye) .. أيوه عارف إن فيه ناس بتهرش في شعرها بتقول هو مين بالصلاة علي النبي (إدريس) اللي جاي اللي إنت بتقول عليه ده؟
ده لاعيب إرتكاز سنغالي الجنسية كان بيلعب في فرقة اسمها إيفرتون بتلعب في الدوري الإنجليزي عنده 30 سنة .. إيفيرتون نادي تقدر تسميه علي قد حاله وأنا شخصياً شايفه نادي غلبان لحد ما يغيروا المدير الفني بتاعهم .. (توماس توخيل) حط عينه عليه في يناير اللي فات يعني في نص الموسم اللي خلص لإن بصراحة كتير أوي كانوا شايفين (إدريسا جايي) شايل فرقة إيفرتون كلها جنب المصايب اللي بيعملها (أندري جوميز Andre Gomes) في نص الملعب .. فاكرينه لورد (جوميز) يا بتوع برشلونة؟ .. الحقيقة إن الواد كان Professional جداً وكان عارف إن لسه عقده مخلصش مع إيفرتون ومحبش يعمل مشاكل وكمل الموسم عادي خالص .. في الصيف باريس سانجيرمان خبطوا علي باب إيفرتون وخدوا (إدريسا جايي) عافية ب30 مليون جنيه إسترليني .. كل ده والمُلاك بتوع باريس سانجيرمان بيبصوا ل(توماس توخيل) وبيسألوه إنت متؤكد إن ده هو اللي إنت عايزه؟ أصل إحنا ممكن نجيبلك أي حد أغلي منه لو حبيت؟
عارف إن فيه ناس كتير ممكن تقرأ الكلام ده وتقول إيه يا عم اللي إنت بتقوله ده .. إنت عايزنا نتفرج علي فرقة عشان نشوف لاعيب الإرتكاز بتاعها؟ .. الحقيقة إن أنا شخصياً مكنتش شفت (إدريسا جايي) ولا عمري سمعت عنه قبل كده بس لما قريت عنه دخلت علي YouTube وإتفرجت علي ملخص الماتش بتاع دور المجموعات من Champions League بين باريس سانجيرمان وريال مدريد و اللي باريس داس فيه علي وش ريال مدريد وكسبوهم 3-0 بس مش ده المهم .. المهم إن وأنا بتفرج حتي علي الملخص خدت بالي إزاي إن (إدريسا جايي) بيجري في كل حتة في الملعب رغم إن الماتش ده كان أول ماتش يلعبه في البطولة من 7 سنين بس تشوفه في الملعب تحسه بيلعب في Champions League كل سنة .. يا راجل ده حتي صنع جون جابه (دي ماريا) وعمل هجمتين خطر .. لمس الكورة 91 مرة وعمل 74 تمريرة بنسبة تمريرات ناجحة 93.2% .. إتزحلق علي الكورة 4 مرات قطع فيهم الكورة 3 مرات من الأربعة .. لما الكورة إتقطعت من فرقته هو اللي رجعها تاني 6 مرات في الماتش .. لا وكمان عمل 3 محاولات ترقيص كلهم ناجحين .. بعد الماتش عجبني أوي إن (توماس توخيل) بعد الماتش نزله الملعب ودونا عن باقي زمايله حضنه وباسه علي خده وهناه علي أداء مش لاعيبه إرتكاز كتير في العالم بيعرفوا يعملوه .. لو صادف وإتفرجت علي ماتش لباريس سانجيرمان بعد كده إبقي حط عينك عليه حيجعبك.
الموسم ده (توماس توخيل) بقي بيقول للدنيا كلها أنا صح أنا صح .. باريس سانجيرمان في الدوري لعبوا 9 ماتشات مدخلش فيهم إلا 4 إجوان .. من ال9 ماتشات منهم 8 ماتشات لعب فيهم (إدريسا جايي) أساسي مدخلش فيهم ولا جون .. حتي إيفرتون من غيره متبهدلين .. في 8 ماتشات دخل فيهم 13 جون .. (ماركو سيلفا Marco Silva) المدير الفني لإيفرتون إحتمال يمشي و سبب إنه حيمشي إنه خلي (إدريسا جايي) يروح باريس من غير ما يجيب حد مكانه.
المصدر:
- مقالة بعنوان He ran the show against Real Madrid and has won every game he has played with zero goals conceded .. نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-7550309/Idrissa-Gueyes-incredible-start-life-PSG-proves-Galactico-signing-policy-wrong.html
