برشلونة .. اللي مش بيفكر في مستقبله بيلبس في الحيط.

شايف الصورة اللي قدامك دي في الأول دي؟ .. دول لاعيبة برشلونة و هم بيحتفلوا بفوزهم علي مانشستر يونايتد في نهائي Champions League سنة 2011 .. مش شايف حاجة غريبة؟ .. حارس المرمي الأساسي في الفرقة (فيكتور فالديز Victor Valdes) بطّل كورة .. في خط الدفاع (كارلوس بويول Carlos Puyol) و (إيريك أبيدال Eric Abidal) و (خافيير ماسكيرانو Javier Mascherano) بطّلوا هم كمان كورة و (داني ألفيز Dani Alves) بينهي Career بتاعه في فرقة ساو باولو في البرازيل .. في خط النص (تشافي Xavi) و (يايا توريه Yaya Toure) و (أندريس إنييستا Andres Iniesta) بطّلوا كورة .. في الهجوم (تييري هنري Thierry Henry) و (صامويل إيتو Samuel Etoo) و (ديفيد فيا David Villa) بطّلوا كورة هم كمان و (بيدرو Pedro) بيحاول يلعب كام ماتش في تشيلسي مش عارف .. من الفرقة الطويلة العريضة دي مفيش إلا 3 لاعيبه بس هم الي مكملين في برشلونة .. (ليونيل ميسي Lionel Messi) و (جيرارد بيكيه Gerard Pique) و (سيرجيو بوسكيتس Sergio Busquets) .. أحسن لاعيب كورة جه في تاريخ النادي و يمكن في تاريخ البشر.. أحسن قلب دفاع بيعرف يلعب برجله .. أحسن لاعيب ارتكاز جه مش بس في تاريخ النادي إنما في تاريخ إسبانيا و مش حبالغ لو قلت إنه من أحسن لاعيبه الإرتكاز في تاريخ الكورة كلها بس صدقني لو قلتلك إن التلاتة دول هم أهم 3 لاعيبه في الفرقة ضمن العتاولة اللي عندك في الصورة .. مش لإنهم أحسن لاعيبه كورة .. لا .. عشان دول العمود الفقري للفرقة .. أي فرقة كورة جامدة لازم يبقي ليها عمود فقري .. حارس مرمي مبيتغيرش .. قلب دفاع مبيغلطش .. لاعيب إرتكاز بيشغل مخه .. مهاجم فشيخ .. لو معندكش العمود الفقري ده يبقي معندكش فرقة كورة.

من الشمال لليمين .. (سيدو كايتا Seydou Keita) .. (بوسكيتس Busquets) .. (تشافي Xavi) .. (صامويل إيتوو Samuel Etoo) .. (داني ألفيز Dani Alves) .. (بويول Puyol) .. من الليلة دي كلها مفيش إلا (بوسكيتس Busquets) بس اللي لسه بيلعب.

خد (بوسكيتس) مثلاً .. هل تعلم سيدي القاريء إن برشلونة الموسم ده خسر 3 ماتشات بره أرضهم و في ال3 ماتشات (بوسكيتس) مكنش في الملعب .. المشكلة يا حضرات إن زي ما قال (ميسي) و هو مش غلطان إن الجسد لا يرحم .. (ميسي) عنده 32 سنة و بقي مش منطقي خالص إن إحنا نفضل نستني منه نفس الأداء اللي هو كان بيقدمه من 10 سنين .. (بوسكيتس) عنده 31 سنة و ده رجل بيعب أساسي في الفرقة من ساعة ما طيب الذكر (بيب جوارديولا Pep Guardiola) صعده للفرقة الأولي سنة 2008 .. (بيكيه) عنده 33 سنة و اللي غير إنه كبر في السن و غير إنه متجوز (شاكيرا Shakira) و دي لوحدها بتحرق بنزين بليل فهو عنده شركة إسمها كوزموز Kosmos شغالة علي إنها تعمل مسابقة جديدة في التنس اللي هي كأس العالم للمنتخبات أو Davis Cup و دي لوحدها شغلانة ساحبه كل وقته غير إن شركة Kosmos دي كمان بتملك نادي إسمه FC Andorra بيلعب في دوري الدرجة الثالثة الإسباني .. مفيش رئيس نادي عايز يبقي هو اللي في عهده (ميسي) بطّل كورة .. (جوزيب ماريا بورتمويو Josep Maria Bartomeu) رئيس برشلونة عايزه يجدد عقده اللي حيخلص في 2021 بس اللي إدارة برشلونة لازم تفهمه إن اليوم اللي (ميسي) حيبطل فيه كورة قرب و لازم هم يفكروا إزاي يبدلوا العمود الفقري للفرقة .. (بيكيه) و (ميسي) و (بوسكيتس) .. الحقيقة إنك لو بصيت علي هو النادي بيعمل إيه عشان يحل الأزمة دي حتكتشف إن برشلونة داخل علي أيام سودا و محدش خالص بيتكلم في النقطة دي.

الأمل جوه برشلونة إن (أنسو فاتي Ansu Fati) يكون هو (ميسي Messi) الجديد اللي بقي عنده 32 سنة و معدل إصاباته عمال يزيد.

(بوسكيتس Busquets) يعتبر من أهم اللاعيبه في الفرقة بس هو دلوقتي عنده 31 سنة و طبيعي إن جسمه يحتاج يستريح و يمكن عشان كده في برشلونة (فرانكي دي يونج Frankie de Jong) بيتبصله علي إنه البديل بتاعه في المستقبل.

(بيكيه Pique) عنده مشكلتين .. الأولانية إن عنده 32 سنة و الثانية إنه بقي بيركز في البيزنس الخاص بتاعه كتير .. (دي ليجت De Ligt) قبل ما يروح يوفينتوس و برشلونة حاطين عينهم عليه كبديل مستقبلي ل(بيكيه Pique).

برشلونة كان عايز ياخد (ماتياس دي ليجت Matthias de Ligt) بتاع أياكس أمستردام عشان يحل محل (بيكيه) بس بسبب إن يوفينتوس قدم عرض أعلي و بسبب إن فعلياً (بيكيه) و (دي ليجت) مينفعش يلعبوا مع بعض لإن الإتنين بيلعبوا برجلهم اليمين و الإتنين بطاء و تحسهم نسخة بالكربون من لعب بعض ف(دي ليجت) قال إنه لو جه برشلونة حيقعد دكة فالأحسن أجرب حظي في يوفينتوس .. مع إن فيه كلام إنه مش عاجبه وضعه في يوفينتوس و ممكن يمشي .. (دي ليجت) لسه عنده 19 سنة و لو قرر إنه يسيب يوفينتوس كمان سنة فبرشلونة حيبقي قدامهم قلب دفاع فشيخ بس هل ده حيحصل؟ هل هو حيسيب يوفينتوس؟ و لو ساب يوفينتوس هل مفيش حد حيبقي موجود عشان يقدم Offer أعلي من برشلونة؟ .. بلاش دي .. برشلونة جابوا (فرانكي دي يونج Frankie de Jong) عشان يحل محل (بوسكتيتس) ..بيعرف ياخد الكورة من نص ملعبه و يلف بيها يشوف مين فاضي من زمايله عشان يبني هجمه .. شغلانة صعبة فشخ و عايزه لاعيب عينه في وسط راسه بس المشكلة إن (دي يونج) بيسرح كتير و ده طبيعي في سنه هو لسه صغير و محتاج وقت يتعلم .. المشكلة بقي إن (إيرنيستو فالفيردي Ernesto Valverde) بتطلب معاه يلعب ب(دي يونج) صانع ألعاب صريح مع إن ده مش مركزه ولا ده المركز اللي هو جه برشلونة عشانه .. فكده برشلونة عندهم بديل (بوسكتيس) بس عم (فلفل) يبطل يطلع الفرارجي اللي جواه و حاطين عينهم علي بديل (بيكيه) بس علي أمل إن مفيش حد يخطفه منهم .. المصيبة بقي في مين حيحل محل (ميسي)؟ .. الأمل كان محطوط علي (أنسو فاتي Ansu Fati) الواد الأسمراني أبو 17 سنة اللي من ساعة ما جبت سيرته و هو مستواه واقع متفهمش ده عين مني ولا إيه .. برشلونة محتاجه تلاقي بديل للعمود الفقري للفرقة لإن لما الفرقة يغيب عنها الثلاثة دول (بيكيه) و (بوسكيتس) و (ميسي) بيبقي يوم أسود علي إقليم كاتالونيا كله.

المصدر:
مقالة بعنوان Barcelona are hurtling towards the end of their greatest era نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-7697707/Barcelona-hurtling-end-greatest-era-plan.html