القوات الجوية الألمانية اللي بتتسمي لوفت-فافي Luftwaffe عندها مشكلة غريبة شوية .. هي تبان سهلة بس عاملة جو عكننة منكد علي حلف شمال الأطلسي كله .. بص يا سيدي .. أحدث موديل طيارات مقاتلة تحت إيد سلاح الجو الألماني هو طيارات إسمها إيوروفايتر تايفوون Eurofighter Typhoon .. دي طيارة تصنيع مشترك بين بريطانيا و ألمانيا و إيطاليا و إسبانيا و إتعملت بحيث تبقي طيارة متخصصة في الإشتباك الجوي .. هي مفيهاش قدرة التخفي من الرادار زي F-22 Raptor بس قدرتها في Dogfighting أو الإشتباكات الجوية عالية أوي .. القوات الجوية للأربع دول بتستخدمها بالإضافة للنمسا اللي علي فكرة حتطلع الطيارات دي بره الخدمة علي اخر السنة دي .. طيارات تايفوون إتطلبت من دول خليجية من ضمنها السعودية علي فكرة.. المفروض إن ألمانيا عندها 128 طيارة منها .. بناء علي كلام جرنان ألماني إسمه دير شبيجل Der Spiegel فمن 128 طيارة مفيش إلا 10 طيارات بس جاهزين يخشوا حرب بكره الصبح .. طبعاً إنت بتسأل المشكلة فين اللي تخلي 118 طيارة مقاتلة مينفعش يخشوا حرب؟ .. زي ما قلتلك هي مشكلة غريبة شوية.
الطيارات تايفوون بيتركب علي الجناحين بتوعها حساس أو Sensor بيلقط لو الطيارة إتضرب عليها صاروخ .. واضح من الوظيفة اللي بيقوم بيها Sensor ده إن وجوده ضروري لحماية الطيارة ومن غيره الطيار مش حيعرف إنه إتضرب عليه صاروخ إلا لما طيارته تروح في ستين داهية .. من حوالي 6 شهور إكتشفوا إن Sensors دي في الطيارات اللي عند الألمان فيها مشكلة في دايرة التبريد بتاعتها .. طب ايه المشكلة دي؟ .. السكس بالف أو Non-Return Valve اللي هو محبس عدم الراجع في دايرة التبريد عايز يتغير .. طب متغيروه إيه المشكلة برده مش فاهم يعني؟ .. قالك إن قطعة الغيار دي بالذات مش موجودة في مخازن القوات الجوية عشان الشركة اللي بتصنعها إتباعت قبل ما وزارة الدفاع تشتري منها كمية كافية يخزنوها للمستقبل.
لو إتكلمت مع قيادة سلاح الجو الألماني حيقولولك لا بقي إحنا طياراتنا أشرف من الشرف .. إحنا 128 طيارة تايفوون اللي عندنا بيطيروا و زي الفل .. تقولهم بس مفيهمش Sensor إنذار للطيار يقولولك مش مهم ما أحنا بنطلعهم طلعات جوية للتدريب فمش محتاجين Sensor ده دلوقتي .. زي ما قلتلك هي مشكلة غريبة عامله زي ما تكون متجوز و مراتك تقولك مبعرفش أعمل رز .. هي ممكن تعمل فراخ بانيه و بتطلع حلوه بس الغدا مفيهوش رز .. هل ده يعتبر غدا؟ .. هي دي مشكلة إسطول طيارات تايفوون اللي تحت إيد الألمان.
المصدر:
مقالة بعنوان Germany is running out of time to save its air force نشرت في مجلة The National Interest وده لينك المقالة الأصلية:
https://nationalinterest.org/blog/buzz/germany-running-out-time-save-its-air-force-108906
