يُحكي أن في يوم كان (تيم كوك Tim Cook) وده يبقي المدير التنفيذي بتاع شركة أبل Apple قاعد سرحان بيفكر إزاي يا واد يا قرمط تزود من أرباح الشركة؟ .. إزاي تخلي الفلوس اللي داخله مش بس جايه من مبيعات iPhone و iPad وأي حاجة أولها i؟ .. متفهمش هو كان ساعتها فاتح التليفيزيون بيتفرج علي حاجة علي قناة نيتفليكس Netflix ولا إيه عشان الفكرة اللي طلعت في دماغه إن ليه لا Apple تخش مجال إنتاج المسلسلات؟ .. ليه لا منعملش بيزنس إسمه Apple TV Plus بخطة إنه إن شاء الله علي سنة 2020 البيزنس ده يكون بيدخلنا في السنة 50 مليار دولار وعلي فكرة الحوار الوجودي ده اللي دار في دماغ (تيم كوك) حصل في بدايات 2017 يعني مش اليومين دول.
في نفس السنة (تيم كوك) .. اللي هي 2017 .. كان (تيم كوك) عين إتنين واحد إسمه (جايمي إيرليخت Jamie Erlicht) والتاني إسمه (زاك فان أمبورج Zack Van Amburg) والإتنين منتجين مسلسلات كانوا شغالين في شركة Sony Picture Television وحط تحت إيدهم مليار دولار كميزانية عشان خلال سنة يكونوا أنتجوا كذا مسلسل أصلي عشان يتعرض علي قناة Apple TV Plus الجديدة .. متفهمش إزاي ميزانية المليار دولار دي فرقعت في وشهم وبقت 6 مليار دولار؟ .. مش دي المشكلة .. المشكلة إن 6 مليار دولار حيتصرفوا علي مسلسلين بس وهنا أنا عايزك تبدأ تهرش في شعرك وتسأل نفسك طب إزاي؟ هو ده مش كتير؟
الحقيقة اه .. المسلسل الأولاني اللي قناة Apple أنتجته إسمه The Morning Show إتحطله طاقم عمل جامد زحليقة من الثلاثي (جينيفر أينستون Jennifer Aniston) و(ريس ويذرسبون Reese Witherspoon) و(ستيف كاريل Steve Carell) .. القناة قالت إنها حتنتج موسمين كل موسم 10 حلقات بتكلفة إجمالية 300 مليون دولار بحيث إن بطلتي المسلسل (جينيفر أينستون) و(ريس ويذرسبون) حياخدوا 1.25 مليون دولار كمرتب عن الحلقة الواحدة .. بس لما تيجي تحسب تكلفة المسلسل ده تلاقي إن الحلقة الواحدة فيه متكلفة أكتر من أي حلقة من الموسم الثامن من مسلسل Game of Thrones اللي أنتجته شركة HBO واللي الحلقة الواحدة فيه معدتش تكلفتها 15 مليون دولار بس .. بلاش HBO .. عندك مسلسل زي The Crown اللي أنتجته Netflix الموسم الأول بتاعه كان 10 حلقات بتكلفة 130 مليون دولار .. طب بلاش Netflix .. كان يا مكان فيه مسلسل جاحد زمان إسمه E.R. الموسم الواحد عدد حلقاته بتعدي 20 حلقة وتكلفة الحلقة مبتوصلش 13 مليون دولار .. المسلسل الثاني اللي حتنتجه قناة Apple TV Plus هو See من بطولة (جايسون موموا Jason Momoa) اللي يمكن إنت تعرفه من فيلم Aquaman واللي كتب المسلسل ده واحد إسمه (ستيفن نايت Steven Knight) وده الرجل اللي كتب مسلسل Peaky Blinders.
الفكرة اللي في دماغ (تيم كوك) إنه يعمل حاجة أجمد من Netflix و HBO و Disney Plus وده في حد ذاته حاجة صعبة لسبب وهو إن Netflix مثلاً بتصرف في السنة 15 مليار دولار ودي ميزانية كبيرة بس علي الناحية الثانية الSystem بتاع Netflix إنها بتدفع للممثلين والمخرجين بتوعها بالتقسيط بس Apple الSystem بتاعها إنها بتدفع المرتبات مقدم.
المصادر:
- مقالة بعنوان Apple splashes $6bn on new shows in streaming wars نشرت في جريدة Financial Times وده لينك المقالة الأصلية:
https://www.ft.com/content/4f7f4326-c2bf-11e9-a8e9-296ca66511c9 - مقالة بعنوان Apple’s ‘The Morning Show’ will reportedly be one of the most expensive TV series in history, costing $150 million per episode نشرت في مجلة Business Insider وده لينك المقالة الأصلية:
https://www.businessinsider.com/apple-morning-show-reportedly-one-of-most-expensive-tv-shows-2019-8
I appreciate the data on your web sites. Thnx.