لما المخرج التقيل أوي (مارتن سكورسيزي Martin Scorses) طلع قال إن أفلام مارفيل Marvel دي مش سينما و إن ده إسمه عك ناس كتير هاجت عليه .. خناقة ولعت ما بين ناس بتقول إن عمر ما سلسلة أفلام زي Iron Man حيكون ليها نفس التأثير ولا المكانة بتاعة سلسلة أفلام زي The Godfather مثلاً و ناس تانية تقولك إن عمر ما فيلم زي The Departed اللي أخرجه (سكورسيزي) و خد عنه أوسكار أحسن إخراج حيكون له نفس الشعبية ولا الشهرة بتاعة فيلم Black Panther .. أيا كان رأيك إيه سواء شايف إن (سكورسيزي) عنده حق أو شايفه رجل كبير في السن و خرف فأنا النهاردة جاي أعترف إن الرجل ده عنده حق بس مش للسبب اللي هو اللي قاله .. هو كان بيتكلم إن أفلام مارفيل مش سينما زي ما أنا كده بقول علي المهرجانات مش فن بس اللي أنا مقتنع به إن أفلام مارفل خربت بيت الممثلين اللي كانوا أبطالها .. عارف إنك بتقرأ و مستغرب بس براحة خليني أفهمك انا قصدي إيه؟
أكبر ضحية لأفلام مارفل هو أهم ممثل فيها .. (روبيرت داوني جونيور Robert Downey Jr.) .. ما تيجو نبص علي أخر فيلم هو عمله اللي هو Dolittle .. ده فيلم من إنتاج شركة يونفيرسال Universal و إتصرف عليه 175 مليون دولار و ده رقم خزعبلي بشكل مستفز الصراحة لإن مثلاً شركة يونيفرسال دي صرفت 170 مليون دولار علي فيلم Jurassic World: Fallen Kingdom و السبب اللي خلي الشركة متتردتش إنها تدفع المبلغ ده علي الفيلم إن ده يبقي الجزء الثاني لفيلم Jurassic World اللي حقق أرباح علي مستوي العالم وصلت 1.671 مليار دولار و ده في حد ذاته شيء منطقي .. اللي مش منطقي إني أصرف نفس المبلغ تقريباً علي فيلم معمول للأطفال .. اللي مش منطقي أكتر هو إن شركة إنتاج تدفع المبلغ ده كله لإنتاج فيلم من بطولة (روبيرت داوني جونيور).
الرجل موهبته تتشال علي الراس بس خلينا نكون صرحا مع بعض إن الناس علي قلبها زي العسل تروح تتفرج عليه في دور Iron Man بس غير كده لو عمل أي فيلم تاني بيقولوا لنفسهم إستنوا لما نشوفه علي Egy Best أحسن .. أفلام مارفل دمرت أي فرصة ل(روبيرت داوني جونيور) إنه يشيل فيلم لوحده علي كتافه .. هو حالياً مش في مكانة ممثلين عتاولة زي (ليوناردو دي كابريو Leonardo DiCaprio) أو (دينزيل واشنطن Denzel Washington) اللي ولا واحد فيهم علي فكرة عمل أي فيلم من أفلام السوبرهيروز سواء مع مارفل أو DC .. أفلام مارفل بقت ماركة أو Brand و الناس بقت بتروح السينما تتفرج علي البراند مش علي الممثل .. خد عندك مثلاً (كريس هيمزوورث Chris Hemsworth) اللي عمل دور ثور Thor .. الرجل ده وزنه يتاقل بالذهب طول ما هو بيؤدي شخصية Thor غير كده لا .. من سنة 2011 اللي هي السنة اللي قدم فيها شخصية Thor لحد دلوقتي أي فيلم هو يعمله بره أفلام مارفل بيفشل .. سواء بتتكلم عن أفلام زي Rush أو Blackhat أو In the Heart of the Sea أو 12 Strong أو حتي Huntsman: Winter’s War .. يا راجل ده حتي فيلم Black Panther اللي الناس اللي بتحب أفلام مارفل طايرة بيه ولا واحد فيهم شاف بطل الفيلم (تشادويك بوزمان Chadwick Boseman) الله يرحمه في فيلمه الأخراني 21 Bridges مع إنه كان فيلم حلو جداً و الكاست بتاعه تقيل أوفر.
لو جيت تبص من فوق حتلاقي إن أفلام البراندات عموماً و السوبرهيروز خصوصاً خربت بيوت حتي الممثلين اللي شاركوا فيها .. مارفل مش هي بس الغلطانة .. الثقافة دي كلها محتاجة تتغير .. طب خود دي .. (توم هاردي Tom Hardy) .. الرجل ده عمل فيلم متشافش إسمه Lawless .. مش لإن الفيلم وحش .. لا .. لإن الفيلم فعلياً محدش راح شافه في السينمات .. عمل وراه فيلم متشافش برده إسمه Child 44 و إن كان فعلياً فيلم Child 44 فيلم ميتشافش و الناس فعلاً مراحتش تشوفه في السينمات .. بس كنا قاعدين متسمرين و إحنا بنتفرج علي موهبته اللي بتخر من كل حتة في أفلام سوبرهيروز زي Venom و Mad Max و The Dark Knight Rises .. يعني عايز تقولي إن موهبة (توم هاردي) مكنتش باينه في Child 44 بس كانت متفجرة في دور (باين Bane)؟ .. نفس الفكرة لو حبيت تتكلم عن (ويل سميث Will Smith) .. فيلم Aladdin جاب أكتر من مليار دولار أرباح في شباك التذاكر العالمي عشان هو براند بس لما عمل فيلم مش براند زي Gemini Man مجابش حتي 200 مليون دولار أرباح اللي يغطوا تكلفة إنتاجه .. خلاصة كلامي إن أفلام البراندات سواء ديزني أو مارفل أو DC فعلياً بتقتل أي فرصه لأي ممثل شارك فيها إنه يعمل أي فيلم تاني لوحده .. أحياناً بقول لنفسي هو (توم كروز Tom Cruise) كان شايف حاجة مكناش شايفينها لما طول السنين اللي فاتت دي معملش أي فيلم سوبرهيرو؟ .. يمكن.
المصدر:
- مقالة بعنوان ‘Dolittle’ bombed because Robert Downey Jr. is not a movie star نشرت في مجلة Forbes وده لينك المقالة الأصلية:
https://www.forbes.com/sites/scottmendelson/2020/01/20/box-office-dolittle-bombed-because-robert-downey-jr-is-not-a-movie-star/#48a7c81b4247
