لينك التسجيل الصوتي للمقالة علي Sound Cloud:
https://soundcloud.com/user-112011687-312727988/k2rvsdr7f3fm
في فيلم World War Z المتاخد عن رواية بنفس الإسم كتبها (ماكس بروكس Max Brooks) حتشوف شخصية (جاري لاين Garry Lane) اللي جسدها الممثل (براد بيت Brad Pitt) اللي راح القدس عشان يشوف هم إزاي الإسرائيليين زي ما تقول كده شافوا كارثة الزومبي قبل ما تحصل و عملوا سور داير ما يدور يحمي القدس .. علي أساس يعني إن القدس دي العاصمة بتاعتهم بس مش دي قضيتنا دلوقتي .. في الفيلم (جاري لاين) بيتكلم مع مدير الموساد اللي هي تبقي المخابرات العامة الإسرائيلية عن إيه اللي خلي الإسرائيليين يشوفوا الكارثة قبل ما تحصل؟ و هنا مدير الموساد حكاله عن أسطورة اسمها الرجل العاشر .. الأسطورة بتقول إن لو الحاكم كان عنده 10 مستشارين و تسعة منهم إتفقوا علي حاجة بس العاشر طلع قال حاجة تانية فالحاكم لازم يبقي حكيم بما يكفي إنه يسمع كلام الرجل العاشر لإنه غالباً شايف حاجة الناس مش شايفاها و غالباً الرجل العاشر ده بيكون عنده حق .. إيه علاقة ده بأزمة جائحة فيروس كورونا فيروس؟ .. الحقيقة إن العالم مكنش قدامه رجل عاشر واحد .. العالم كان قدامه كذا رجل عاشر و في كل مرة العالم كان بينفض و ولا كأنه سامع حاجة .. اللي حنتكلم عنه النهاردة هو شوية حكاوي للناس اللي شافت القطر جاي و حاولوا يحذرونا بس محدش سمع كلامهم .. حكاوي لما تسمعها حاول تتعلم حكمة الرجل العاشر يمكن في يوم من الأيام ربنا يفتح عليك و تبقي في منصب كبير و ساعتها الدرس ده ممكن مش بس ينقذ حياتك إنما ينقذ حياتنا كلنا.
الحكاية الأولي .. تقرير مؤسسة RAND سنة 2012:
سنة 2012 فيه مؤسسة محترمة أوي في أميركا إسمها راند Rand Corporation و دي تقدر تقول عليها Think Tank يعني ناس من مختلف التخصصات من هندسة لطب لتاريخ لفيزياء قاعدين مع بعض عشان يشوفوا إيه هو الخازوق اللي ممكن أميركا تلبسه في المستقبل؟ .. الناس دي في سنة 2012 قالوا إن هم مش شايفين خازوق ممكن تلبسه أميركا أكتر من إن يضربها وباء .. التقرير قال إن التهديد الحقيقي للأمن القومي الأميريكي لا هو الإرهاب ولا هو الصين ولا روسيا .. التهديد الحقيقي هو إن فيروس مميت يضرب مش بس أميركا إنما العالم كله.
التقرير ده كان مرعب لإنه قال إن وباء زي الأنفلونزا أو فيروس نقص المناعة المكتسبة اللي إنت عارفه باسم الإيدز AIDS هو اللي يقدر يدمر المجتمع الأميريكي في المستقبل القريب .. علي فكرة ده معناه إن مش بس الفيروسات الطبيعية هي اللي ممكن تعمل مصيبة إنما كمان الفيروسات المُخلقة اللي ممكن لو إتحطت في إيد منظمات إرهابية تستخدمها عشان تنفذ هجمات بيولوجية .. من 2012 و مؤسسة Rand بتتكلم عن نفس المشاكل اللي العالم كله بيواجهها في التعامل مع فيروس Covid-19:
- أهم خازوق لبسناه بخصوص فيروس Covid-19 هو إن فيه ناس مبتظهرش عليها الأعراض أو زي ما بيتسموا Asymptotic بس في نفس الوقت يقدروا يعدوا غيرهم .. التقرير كان بيتكلم إن لو ظهر نسخة جديدة من الأنفلونزا زي كده فالمصيبة إن إجراءات الحجر الصحي و الحظر زي اللي بتتطبق دلوقتي مش حتجيب نتيجة أوي .. بسبب النقطة دي بالذات الفيروس حيبقي عامل زي لعبة Assassin’s Creed كده بيقتل من غير ما حد يحس بيه.
- مشكلة تانية هي إن الأنفلونزا مختلف عن الإيدز في حاجة و هي إنك لو مشيت في الشارع سألت أي حد هو إزاي ممكن بني أدم يتصاب بالإيدز فتقريباً 99% من الناس حتقولك يا إما ده رجل شاذ أو مارس الجنس مع حد مصاب أو مدمن مخدرات و خد حقنة هروين ملوثة .. دي وجهة النظر الشعبية المتاخدة عن المصابين بالإيدز إن اللي بيجيله إيدز ده حد ماشي في سكة بطالة .. بالنسبة للإنفلونزا إنت مش محتاج غير إنك تبقي ماشي في الشارع و حد يعطس جنبك .. ده حيحطك في مشكلة إنك لازم بسرعة أوي تلاقي أجهزة كشف عن الفيروس عشان تحدد مين اللي مصاب و بمجرد ما تحددهم تحطهم في حجر صحي عشان ميعدوش حد.
من 2012 و الناس دي بتقول إن لو ظهرت نسخة جديدة من الأنفلونزا زي مثلاً SARS اللي ضرب العالم سنة 2003 و اللي فيروس Covid-19 يبقي إبن عمه فإنت بتتكلم إن من وقت ظهور أول حالة لحد ما العالم يفهم هو إيه اللي بيحصل فإنت بتتكلم في حوالي 3 شهور .. ده حصل فعلاً .. زود عليهم شهر كمان عشان الفيروس يتفهم طبيعته و نعرف هو مين و جه منين .. ده برده حصل .. التقرير كمان قال إن بمجرد ظهر الفيروس فكل دكتور و كل ممرضة علي مستوي العالم لازم نتعامل معاهم علي إنهم جواسيس في حرب .. أي معلومة هم يلاقوها لازم توصل بسرعة و بدقة للعلماء اللي حيبقي دورهم إنهم يلاقوا مصل .. من 2012 و الناس دي بتحذر .. من 2012 و هم الرجل العاشر اللي محدش سمع تحذيراته.
الحكاية الثانية .. برنامج Microsoft اللي تنبأ بكورونا من سنة 2015:
سنة 2015 (بيل جايتس Bill Gates) مؤسس شركة مايكروسوفت Microsoft اللي إنت ممكن تكون عارفها من أهم إختراع هي قدمته للبشرية اللي هو ويندوز خلي الشركة تكتب برنامج كومبيوتر أو Algorithm عشان يشوف هو لو نسخة جديدة من الأنفلونزا ضربت العالم إزاي ممكن تنتشر بسرعة أوي عن طريق شبكة الإتصالات و المواصلات اللي العالم عملها دلوقتي؟ .. وقتها (بيل جايتس) لما نشر نتيجة البرنامج كتب و قال إن الأمراض عموماً و الفيروسات خصوصاً هي أكبر تهديد لحياة البشر مش لسبب غير إن الأمراض كانت هي السبب ورا المصايب اللي حصلت لينا في تاريخنا .. لو فيه حاجة إحنا كبشر ممكن نعملها عشان نحمي حياة أطفالنا و أطفال أطفالنا هي إننا نستعد قدر الإمكان لجائحة الإنفلونزا الجاية.
نتيجة البرنامج اللي Microsoft كتبته كانت مرعبة .. خلال 60 يوم بس فيروس الإنفلونزا الجديد حيقدر ينتشر في كل المدن الكبيرة علي مستوي العالم .. ده رقم خزعبلي .. رقم موصلوش حتي فيروس الأنلفونزا الإسبانية اللي داس علي وش العالم سنة 1918 .. ده سببه حاجة واحدة و هي إن فعلياً العالم بقي أوضة و صالة .. المشكلة كانت إن البرنامج قال إن معدل سفر البشر حول العالم وقتها اللي هو سنة 2015 كان 500% معدلات السفر سنة 1918 .. جاهز إنك تقول أحيييه .. البرنامج بتاع Microsoft قال إن خلال 250 يوم حيموت 33 مليون بني أدم لو ظهر فيروس جديد من الأنفلونزا .. تاني (بيل جايتس) كان هو الرجل العاشر و برده محدش سمع كلامه.
الحكاية الثالثة .. لما المستشارين بتوع (دونالد ترامب Donald Trump) سقطوا في إمتحان الأوبئة قبل إستلامه الرئاسة بأسبوع:
قبل أسبوع من تسلم (دونالد ترامب) رئاسة أميركا سنة 2017 إتعمل إجتماع بين واحدة إسمها (ليزا موناكو Lisa Monaco) و دي كانت مستشارة الأمن القومي للرئيس (باراك أوباما Barack Obama) مع طقم مستشارين الأمن القومي اللي حيبقوا مع الرئيس الجديد اللي هو (ترامب) .. في الإجتماع ده (ليزا) عملت إمتحان بسيط كده للناس اللي المفروض يعني إنهم حيكونوا اللي بيساعدوا رئيس أقوي دولة في العالم و الإمتحان ده كان عن أهم تهديد بيواجه الأمن القومي الأميريكي .. لا مش داعش .. و لا برده مش الصين .. الإجابة كانت الأنفلونزا .. (ليزا) قبل الإمتحان إتكلمت مع الناس و قالتلهم إن خلال 8 سنين بتوع (أوباما) هم بقي عندهم شبه إيمان إن مفيش مصيبة سودا ممكن تضرب أميركا أكتر من الأوبئة و خصوصاً الأنفلونزا .. الإدارة بتاعة (أوباما) شافت و تعاملت مع كذا وباء في 8 سنين من أول إنفلونزا الخنازير مرورا بالإيبولا و نهاية بفيروس زيكا.
تجربة الأمريكان مع الإيبولا بالذات كانت هي السبب في إنهم بقوا مرعوبين من إن نسخة جديدة من الأنفلونزا تضرب أميركا .. لما العالم بدأ يفهم إن فيه حاجة إسمها إيبولا الرئيس الأميريكي (أوباما) وقتها كلف واحد إسمه (رون كلاين Ron Klain) عشان يمسك هو ملف التعامل مع إيبولا .. ده كان مدير مكتب نائب الرئيس وقتها (جو بايدن Joe Biden) بس ده كان رجل أولاً بيفهم و صحابه كتير فحيقدر يتعامل مع الموضوع بسهولة .. مكالمة تليفون منه حتحل مشاكل كتير .. صحيح قدام الناس (رون كلاين) نجح في مهمته .. هو قدر يحمي أميركا من الإيبولا .. بس فعلياً (رون كلاين) إكتشف إن لو أميركا ضربها فيروس بحق ربنا زي الأنفلونزا مثلاً فالبلد كلها حتلبس في الحيط.
هو بني رأيه ده علي كذا نقطة .. أولاً الإيبولا هو صحيح فيروس صعب بس قدر يقتل 10,000 بني أدم بس .. ثانياً هو بينتقل بصعوبة بين البني أدمين .. ثالثاً و ده الأهم إنه ظهر في دول أفريقية فقيرة محدش بيسافر منها كتير لأوروبا و أميركا فتقدر تقول فعلياً إن ربنا ستر مع العالم .. ده مش حيحصل لو بدل إيبولا جه نسخة جديدة من الأنفلونزا .. كل الحاجات اللي بسببها ربنا ستر مع إيبولا مش حتلاقيها مع الأنفلونزا .. ناس كتير مبيظهرش عليها أي أعراض بس ممكن تعدي ناس تانية .. حينتقل بسهولة أوي و بسبب إن وسائل المواصلات مربطة العالم ببعضه فحيبقي سهل إنه ينتشر .. في تقدير (رون كلاين) أميركا مكنش عندها أي فرصة إنها تصمد قدام الأنفلونزا و ده اللي (ليزا موناكو) حاولت تفهمه لمستشارين (ترامب).
الإمتحان اللي (ليزا) عملته لمستشارين (ترامب) هو يا تري حتعملوا إيه لما البلد يضربها نسخة مميتة من فيروس الأنفلونزا؟ .. حتعملوا إيه لما تلاقوا إن مفيش حل غير وقف الرحلات الجوية من و إلي أميركا؟ .. حتعملوا إيه لما التجارة الخارجية تقف؟ .. حتعملوا إيه لما تصحوا الصبح تلاقوا البورصة بتنهار؟ .. الأهم حتتعاملوا إزاي مع الشلل اللي حيضرب القطاع الطبي و إنتوا لسه مستنيين فرج ربنا لما اللقاح أو المصل بتاع الفيروس يبقي متاح؟
الحكاية الرابعة .. سنة 2018 لما مستشفي John Hopkins عملت محاكاة لإزاي Covid-19 حيدوس علي وشنا:
سنة 2018 مركز أمن الصحة Center for Health Security التابع لمستشفي جون هوبكينز John Hopkins اللي تعتبر أشهر و أهم مستشفي جامعي في العالم و اللي موجودة في أميركا عملت ندوة عزموا فيها أهم الدكاترة و رجال أعمال و ناس من جوه الحكومة الأميريكية عشان يوروهم نتيجة محاكاة أو Simulation دكاترة المستشفي عملوها عشان يحذروا إن لو فيروس من عيلة كورونا فيروس يعني فيروس بيضرب الجهاز التنفسي للبني أدمين ضرب العالم فإحنا قصاد كارثة حقيقية و لازم أميركا تبدأ تستعد من دلوقتي.
حتي المخابرات الأميريكية قالت إن فيه مصيبة جايه .. كل سنة جهاز المخابرات الوطنية و ده اللي بيشرف علي شغل كل أجهزة المخابرات في أميركا بيطلع تقرير إسمه Worldwide Threat Assessment أو تقييم المخاطر علي مستوي العالم .. في سنين 2014 و 2015 و 2016 و 2017 و 2018 و حتي 2019 فيه جزء من التقرير بيبقي مخصوص عن إزاي لو ظهرت نسخة جديدة من فيروس الأنفلونزا فالعالم كله و معاهم أميركا حيشيل أوبح .. يُقال إن نسخة السنة دي من نفس التقرير و اللي كان المفروض يطلع في يناير 2020 إتمنعت من النشر و فيه ناس بتقول إنها إتمنعت من النشر لإن المخابرات الأميريكية غالباً توقعت إن دي السنة اللي القطر حيكون وصل و حيشيلنا كلنا من علي القضبان في سكته.
عارف أميركا إستعدت إزاي رغم كل التحذيرات دي؟ .. عارف كان إيه موقف مستشارين (دونالد ترامب) لما إتقالهم فيه قطر جاي علينا؟ .. في 2018 مستشار الأمن القومي ل(دونالد ترامب) وقتها (جون بولتون) أمر بحل إدارة التعامل مع الأوبئة و الأمراض المعدية التابعة لمجلس الأمن القومي .. لما إتسأل وقتها ليه عملت كده يا عم (جون)؟ كان رده إن إيران و روسيا و الصين تهديدات أهم من شوية برد لمستقبل أميركا.
علي فكرة أنا مش جاي أقول إن شايفين الأمريكان فشلة إزاي .. أنا جاي أقول الحكومات كلها فشلة ولا أستثني أحداً .. لسبب ما أنا مش فاهمه الحقيقة الحكومات علي قلبها زي العسل إنها تصرف و تكع فلوس عشان تحمي نفسها مما يسمي تهديدات الأمن القومي زي الإرهاب أو الحروب بس تيجي عند صحة البني أدمين و الفلوس مش بتطلع غير بعد فوات الأوان .. عشان أقربهالك حاول تتخيل إن الإرهاب ده عامل زي الكويز أو الريبورتات اللي بتقدمها عشان أعمال السنة .. إنت كل أسبوع بيبقي عندك كويز أو ريبورت .. إنت الترم كله تقريباً مقضي وقتك تكتب في ريبورتات و تسلمها .. بس متنساش إن فيه خازوق مستنيك في أخر الترم إسمه الفاينال .. أهو الفاينال ده هو الأوبئة أو الأمراض اللي ممكن تضرب البلد .. الفاينال هو اللي عليه أغلب الدرجات .. ده اللي يا بسقطك يا بينجحك .. بس عشان هو بيجي في الترم مرة و الريبورتات بتيجي كل أسبوع فإنت يا عيني بتتخيل إن لسه بدري علي الفاينال لحد ما بتلاقيه في وشك.
دي الغلطة اللي حكومات العالم كله بتقع فيها .. سنة 2016 مثلاً أميركا صرفت فوق 100 مليار دولار علي مكافحة الإرهاب و مصرفتش غير يدوبك مليار دولار علي الإستعداد لإحتمالات إن يحصل وباء .. عارف إيه المشكلة؟ .. المشكلة إن Covid-19 ده قتل عدد أمريكان أكتر من اللي ماتوا بسبب الإرهاب .. أرجع تاني لتشبيه إن الأوبئة هي إمتحان الفاينال .. الإرهاب و الحروب دول أعمال السنة .. ده يفسرلك ليه مثلاً ميزانية مركز مكافحة الأوبئة Center for Disease Control أو CDC إختصاراً ودي الإدارة المسئولة عن حماية أميركا من الأوبئة ميزانيتها لسنة 2020 كانت 1.2 مليار دولار في حين إن أميركا صرفت 460 مليون دولار بس علي تطوير فكرة الصواريخ الأسرع من الصوت Hypersonic Missiles .. يعني الفلوس اللي صرفوها علي تطوير سلاح واحد بس تعتبر نص ميزانية الكيان اللي المفروض إنه بيحمي أميركا من Covid-19 .. إنت متخيل.
محدش قال إن بلد زي مصر تقدر تحمي نفسها من كارثة زي كورونا .. محدش عاقل يقدر يهبد الهبداية دي .. بس إنت محتاج يبقي عندك كيان لما بدأ يشوف ملامح فيروس كورونا بتنتشر في الصين إنه يسأل نفسه هل إحنا عندنا أجهزة فحص كافية عن المرض؟ بما إنه مرض بيضرب الجهاز التنفسي فهل المستشفيات بتاعتنا فيها أجهزة تنفس صناعي كافية؟ .. طب لو مفيش إزاي نقدر نوفرها بأقصي سرعة؟ .. هل عندنا سراير في المستشفيات حتكفي المرضي؟ .. طب لو معندناش حنعمل إيه؟ ..لازم يبقي عندك ناس بتسأل نفسها الأسئلة دي و لو فيه سؤال إجابته لا يسألوا نفسهم طب نعمل إيه؟ و يبدأوا يحطوا خطوات عشان الحكومة تمشي عليها.
علي فكره إنت مش محتاج تبقي بلد غنية و كبيرة عشان تعرف إزاي تتفادي أزمة زي دي .. أميركا عندك أهي .. أقوي بلد في العالم و لبست في الحيط .. دول تانية زي كوريا الجنوبية و سنغافورة عرفوا يتعاملوا مع الأزمة رغم إنهم قريبين جداً من الصين مش لسبب غير إنهم بيسمعوا كلام الرجل العاشر .. الحكمة اللي لو حتي فعلاً الإسرائيليين هم اللي حطوها فمش عيب إننا نتعلم من عدونا حاجة مفيدة يمكن تنفعنا في يوم من الأيام.
المصادر:
- مقالة بعنوان We were Warned نشرت في مجلة The Atlantic وده لينك المقالة الأصلية:
https://www.theatlantic.com/politics/archive/2020/03/pandemic-coronavirus-united-states-trump-cdc/608215/ - تقرير بعنوان Threats without Threateners? Exploring Intersections of Threats to the Global Commons and National Security نشرته مؤسسة RAND وده لينك التقرير:
https://www.rand.org/content/dam/rand/pubs/occasional_papers/2012/RAND_OP360.pdf - مقالة بعنوان The Most Predictable Disaster In the History of the Human Race نشرت في مجلة Vox وده لينك المقالة الأصلية:
https://www.vox.com/2015/5/27/8660249/bill-gates-spanish-flu-pandemic
