اللي بيحصل في إسرائيل دلوقتي ده زي ما يكون مسلسل عربي غريب من مسلسلات رمضان اللي بنشوفها .. هو صحيح مسلي بس غريب .. غريب في إنك أحياناً بتقول لنفسك أصل أكيد يعني الأحداث دي دراما من خيال مؤلف .. مستحيل الأحداث دي تكون بتحصل هي هي في الحقيقة .. أنا حتكلم بالتفصيل في المقالة دي عن اللي بيحصل بس خليني في الأول كده أحرقلك القصة كلها بسرعة أوي عشان لو معندكش وقت أديك إستفدت بالزتونة بتاعة إيه اللي بيحصل بالضبط هناك .. إسرائيل عقبال عندك داخله علي رابع إنتخابات برلمانية خلال سنة .. متحاولش تستغرب خد المعلومات علي صدرك و حفسرهالك بعدين .. في الإنتخابات اللي فاتت المفروض يعني إن أكتر حزب خد كراسي في البرلمان كان حزب الليكود اليميني المتطرف اللي ماسكه إبن الو*&^ (بنيامين نتنياهو) و تاني أكتر حزب خد كراسي هو حزب إسمه أزرق و أبيض ماسكه رجل طويل عريض تحس إن والدته كانت بتنيمه في رده و هو صغير إسمه (بيني جانتز Benny Gantz) .. كان المفروض إن (نتنياهو) هو اللي يشكل الحكومة و نخلص بس (جانتز) قدر يقنع كذا حزب خدوا كراسي جوه البرلمان إنهم ينضموا ليه و بكده فعلياً (جانتز) رغم إنه خسر الإنتخابات إلا إن بقي تحت إيده أغلبية تخليه هو اللي يشكل حكومه .. جميل .. متفهمش إيه اللي حصل بس (نتنياهو) أقنع (جانتز) إنهم يتحالفوا مع بعض في حكومة وحدة وطنية تحت شعار إن ده مش الوقت اللي نختلف فيه و لازم نبقي إيد واحدة خصوصاً قصاد أزمة فيروس كورونا .. أووه ماااي جاااد سوو كيووت .. شوية و الإتنيين إتحانقوا مع بعض .. (نتنياهو) مش عايز يخش السجن .. قلتلك حفهمك كل حاجة بعدين خد الزتونة بس دلوقتي .. و هو كان عايز يطلع قانون يخلي كلمته تمشي فوق كلمة المحاكم .. (جانتز) معجبوش الكلام و بالتالي إتفاق حكومة الوحدة الوطنية دي إترمي في الزبالة و يوم 4 أغسطس حتتعمل الإنتخابات البرلمانية الرابعة علي أمل إن النتيجة بتاعتها تدينا حزب عنده أغلبية تخليه يشكل حكومة و نخلص.
كده إنت لميت الدنيا .. لو عايز تقفل المقالة علي كده فإنت زي الفل .. نيجي بقي نفهمك الحكاية بالتفصيل أهو عشان تبقي واعي برده بالأسباب اللي ورا الخناقة.
لأكتر من 11 سنة و (نتنياهو) ماسك في الكرسي بإيديه و سنانه .. بعد السنين دي كلها بيجي البني أدم اللي أخيراً كان عنده فرصة إنه يقلشه و الشخص ده كان (بيني جانتز) .. (جانتز) كان رئيس أركان حرب القوات المسلحة الإسرائيلية و لما طلع معاش قرر يخش السياسة .. و شوف يا أخي الجنرالات عندهم بيخشوا السياسة عادي جداً .. هو أسس حزب سياسي إسمه Blue and White أو أزرق و أبيض .. الحزب ده علي فكرة إتولد من سنة و نص يعني مبقالوش كتير .. حتي هو مش حزب واحد فرداني كده .. حزب أزرق و أبيض ده تحالف 3 أحزاب في بعض .. حزب الصمود الإسرائيلي Israeli Resilience و اللي بيرأسه (بيني جانتز) و معاه حزب تاني إسمه ييش عتيد Yesh Atid بيرأسه واحد إسمه (يائير لابيد Yair Lapid) و معاهم كمان حزب تيليم Telem اللي بيرأسه (موشيه يعالون) وزير دفاع إسرائيل السابق .. (جانتز) و (نتنياهو) هزقوا بعض و مسحوا بكرامة بعض في الإنتخابات اللي فاتت .. (نتنياهو) شتم (جانتز) و قال عليه مجنون و مش فاهم حاجة في الحكم و أخره إنه يقول حاضر و نعم .. و (جانتز) هزق (نتنياهو) و وصفه بإنه مجنون و إنه صدق أو لا تصدق يبقي (رجب طيب أردوغان) بتاع إسرائيل .. و في إسرائيل و سبحان الله زي عندنا برده لو سياسي إتقال عليه إنه شبه (أردوغان) فدي زي إنك تقول لواحد أهلاوي إنه مش بيحب (محمود الخطيب) .. إتهام شنيع .. وحش .. يااااع.
في الإنتخابات اللي فاتت زي ما قلت في المقدمة حزب الليكود كان هو اللي معاه أكتر عدد من الكراسي و كان المفروض إنه يشكل حكومة لحد ما عرب 48 قلبوا الطرابيزة علي الكل .. عرب 48 دخلوا الإنتخابات تحت مظلة واحدة إسمها القائمة المشتركة و ده التحالف السياسي اللي بيضم كل عرب 48 في إسرائيل و كان معاهم 15 كرسي ..الناس بتوع القائمة المشتركة إتفقوا مع (بيني جانتز) علي إنه يتحالف معاهم .. هوبا بعد ما كان (نتنياهو) معاه 59 كرسي و كان حيشكل حكومة إذا ب(جانتز) بقي معاه 61 كرسي .. ريمونتادا محدش في إسرائيل كان عامل حسابه عليها و حتي الرئيس الإسرائيلي شخصياً هو اللي كلف (جانتز) إنه يشكل الحكومة و هنا بدأت توضح المشكلة .. مفيش حد في إسرائيل عايز يتقال عليه إنه داخل في تحالف جواه عرب 48 .. حتي الناس اللي بتلعن سلسفين (نتنياهو) و نفسهم يغور في ستين داهية زي (أفيجادور ليبرمان) .. الرجل ده علي قلبه زي العسل إن (نتنياهو) يكمل في منصبه ولا إنه يتقال عليه قاعد مع عرب 48 علي نفس الطرابيزة .. رغم إن (جانتز) فعلياً إتقاله روح شكل حكومة إلا إنه لقي نفسه في الإمتحان و مش عارف يحل.
يوم 26 مارس 2020 و من غير أي مقدمات و من غير لا إحم ولا دستور بيطلع (جانتز) يقول إنه إتفق مع (نتنياهو) إنه حيشكل معاه حكومة وحدة وطنية .. و لإن الكلام لازم يتفسر معناه فإنت لازم تفهم إيه معني البقين دول .. من دلوقتي لحد ما الحكومة دي تتشكل (نتنياهو) حيفضل رئيس الوزراء و (جانتز) حيبقي رئيس البرلمان .. حلو .. بعد ما الحكومة تتشكل (نتنياهو) حيفضل رئيس الوزراء و (جانتز) حيمسك وزير الدفاع .. وزارة الخارجية اللي كان (نتنياهو) متوليها بشكل مؤقت حتروح لواحد إسمه (جابي أشكينازي Gabi Ashkenazi) .. صحيح هو من تلاميذ (نتنياهو) بس مش مشكلة .. المهم إن الوزارة حتخرج بره إيد (نتنياهو) .. مش بس كده .. وزارتي الإتصالات و العدل مش حيتعين فيهم حد من حزب الليكود بتاع (نتنياهو) .. ناس كتير تخيلت إن دي بادرة حسن نية من (نتنياهو) عشان يوري (جانتز) قد إيه هو عايز إقتراح حكومة الوحدة الوطنية ده ينجح .. الحكومة دي حتفضل مكملة لحد شهر سبتمبر 2020 و لما يجي المعاد ده (نتنياهو) حيتنحي عن منصبه كرئيس للوزراء و يجي مكانه (جانتز) .. الفكرة كلها إنك تفهم ليه؟ .. حتفرق إيه إن (نتنياهو) يمشي من منصبه دلوقتي من إنه يمشي من منصبه شهر سبتمبر؟ .. يعني هو الكام شهر دول هم اللي حيفرقوا معاه أوي؟
هنا بقي يبان قد إيه (نتنياهو) ده بني أدم إبن وس*& .. حسب الإتفاق بتاع حكومة الوحدة الوطنية ده ف(نتنياهو) حيفضل في منصبه زي ما إتفقنا لحد شهر سبتمبر .. بداية من شهر مايو اللي إحنا فيه دلوقتي كان المفروض إن النيابة العامة حتوجهله تهم فساد و كان حيتحاكم في المحاكم الإسرائيلية .. ناس كتير مكنتش متخيله إزاي ده حيحصل؟ .. إزاي تبقي رئيس وزراء مؤقت و مش جاي بالصندوق و المفروض إن ليك حصانة قضائية بس برده تتحاكم عادي في المحاكم ؟ .. تيجي إزاي دي؟ .. لو كان (نتنياهو) ناوي يفلت من حبل المشنقة مكنش قال ل(جانتز) خلاص بلاش وزارة العدل يبقي فيها حد من رجالتي .. فيه حاجة غلط .. (نتنياهو) مش ملاك عشان يعمل كده .. و هي دي الفكرة .. إقتراح حكومة الوحدة الوطنية ده مجرد فخ و (جانتز) وقع فيه زي شوال الرز .. (نتنياهو) مكنش ناوي يتنحي ولا يسيب منصبه .. هو حسبها كالأتي .. دلوقتي عرب 48 لما وقفوا مع (جانتز) عطوله أغلبية يشكل الحكومة .. ده معناه إني حمشي من منصبي و الحصانة حتتشال من عليا و حتحاكم .. طب ما أنا أعرض علي (جانتز) حكومة وحدة وطنية بحيث أغريه بإني أفضل مكمل كام شهر و بعد كده حتنحي .. فعلياً ده خلي قدام (جانتز) إختيار من إتنين:
- الإختيار الأول يرفض الOffer و ينشف دماغه إن هو اللي يشكل الحكومة حتي لو تحالف مع عرب 48 .. بس مشكلة الإختيار ده زي ما حكيت من شوية إن مفيش ولا حزب سياسي في إسرائيل حيخاطر بشعبيته في الشارع و يخش في حكومة مع عرب 48 حتي لو ده كان معناه إن (نتنياهو) يترمي في السجن .. ساعتها (جانتز) هو اللي شكله حيبقي وحش قدام الناس.
- الإختيار التاني إن (جانتز) يوافق علي Offer بتاع حكومة الوحدة الوطنية و ده اللي حصل فعلاً .. دلوقتي الشارع الإسرائيلي بقي عارف إن(جانتز) مش عارف يشكل حكومة لإن خلينا نكون صرحاء مع بعض إن حتي لو (نتنياهو) هو اللي مكان (جانتز) مكنش حيعرف يشكل حكومة بأغلبية 3 كراسي في البرلمان .. ال3 كراسي دول ميعملوش حاجة .. مشكلة الحل ده إن طب لو (جانتز) وافق في الأول و بعد كده الحكومة برده متشكلتش؟ ساعتها (نتنياهو) يقوم قايله طب يلا بقي نعمل إنتخابات جديدة و أرشح نفسي ليها و غالباً حكسبها و حبقي رئيس وزراء تاني و الحصانة مش حتتشال من عليا.
طبعاً قدام الناس المبرر اللي إتقال ملوش علاقة بإن (نتنياهو) مش عايز يتحاكم .. قدام الناس المبرر اللي إتقال إن و الله البلد و العالم كله عايش أزمة فيروس كورونا ولازم نتوحد كلنا .. ده مش الوقت اللي السياسيين الإسرائيليين يمسكوا في خناق بعض قال يعني الدكاترة قالوا إن فيروس كورونا نقطة ضعفه هي حكومات الوحدة الوطنية.
اللي فعلاً لازم تقف قدامه هو ليه .. ليه (بيني جانتز) يعمل كده؟ .. مقلب الحرامية اللي هو عمله ده دمر ناس كتير أوي .. اللي عمله (بيني جانتز) بإنه فعلياً إختار يقتل الحزب بتاعه عشان يعيش هو .. حزب أزرق و أبيض إنهار و مبقاش موجود بمجرد إنه قبل يخش مع (نتنياهو) في حكومة الوحدة الوطنية .. حزب كامل كيانه إتشقلب بسبب قرار .. عندك واحد زي (يائر لابيد) اللي بعد ما كان المفروض إنه يبقي ضمن التحالف الحاكم و إحتمال يمسك وزارة لقي نفسه زعيم المعارضة ب17 كرسي في البرلمان الإسرائيلي اللي بيسموه الكنيسيت .. (جانتز) كمان ضحي بعرب 48 .. فتاني .. ليه (جانتز) يعمل كده؟
الحقيقة هم كذا سبب مش سبب واحد .. عندك مثلاً إن حزب أزرق و أبيض ده حزب عامل زي السموذي كده .. حزب لامم كذا حد ملهمش علاقة ببعض و مفيش بينهم حاجة مشتركة إلا إنهم مش طايقين (نتنياهو) .. طب إفرض لو كان (بيني جانتز) شكل الحكومة فعلاً هل كان (جانتز) و (موشي يعالون) و (يائير لابيد) حيعرفوا يحكموا؟ .. إسرائيل بتعيش أيام سودا سواء بسبب فيروس كورونا أو بسبب الظروف الإقتصادية اللي زي الزفت اللي حتعيشها البلد بعد ما الأزمة دي حتعدي .. هل (بيني جانتز) عايز يبقي هو الرجل اللي يشيل الليلة؟ .. دي نقطة .. النقطة الثانية هي إن إسرائيل مجتمع عنصري ضد عرب 48 .. عرب 48 دول صعبانين عليا فعلاً .. الإسرائيليين معتبرينهم خونة و الفلسطينيين كمان معتبرينهم خونة .. كون إن (بيني جانتز) تحالف معاهم فده عطاله أغلبية في البرلمان بس خسره كتير في الشارع .. وقت الجد .. وقت تشكيل الحكومة مفيش حد في إسرائيل حيضحي بمستقبله السياسي عشان يبقي ضمن حكومة فيها حد من عرب 48 .. حتي (نتنياهو) كان عارف النقطة دي و لعب عليها حلو أوي .. بمجرد ما إتقال إن (جانتز) كان حيعرض علي عرب 48 منصب وزاري و إتقال إن وزارة المحاربين القدامي هم اللي حيمسكوها طلع (نتنياهو) كتب تويتة قال فيها إن عشنا و شفنا الإرهابيين يمسكوا الوزارة اللي بتخلي بالها من العساكر بتوعنا ..كم الحاجات الغلط اللي هو قالها في التويتة دي إنت لا تتخيلها .. عرب 48 معاهم جنسية إسرائيلية فمينفعش تقول عليهم إرهابيين.
فيه ناس رفعت قضية في المحكمة الدستورية عشان تقول إن إتفاق حكومة الوحدة الوطنية ده مش دستوري بس المحكمة قالت إن مفيش حاجة قانونا غلط في الإتفاق و هم فعلياً عندهم حق .. الإتفاق ده مش غلط قانونا .. ده غلط أخلاقياً .. (جانتز) و (نتنياهو) أنا شايف إنهم مستحيل يعرفوا يشتغلوا مع بعض .. الأهم إن الناس كلها عرفت إن الإتنين نسخة من بعض .. الإتنين ملهمش أمان .. تقديري الشخصي إن الدنيا حتكمل زي ما الرئيس الإسرائيلي قال لإنتخابات مبكرة رابعة في سنة .. رقم قياسي جديد تحققه إسرائيل .. الناس دي بتعمل إنتخابات زي ما إنت بتقرر ترجع تاني تكلم الإيكس بتاعتك .. محدش قال إنه غلط بس لما تسيبها و ترجع تكلمها 4 مرات في سنة فده كتير و يوريك إنكوا فيكوا حاجة غلط .. زي الإسرائيليين بالضبط.
المصادر:
- مقالة بعنوان Israel heading towards record fourth election نشرت علي موقع هيئة الإذاعة البريطانية BBC و ده لينك المقالة الأصلية:
https://www.bbc.com/news/world-middle-east-52322379 - مقالة بعنوان Shock, Betrayal and Fear: Why Gantz Killed his Party to Join Netanyahu نشرت في موقع Middle East Eye و ده لينك المقالة الأصلية:
https://www.middleeasteye.net/news/gantz-israel-netanyahu-blue-white-coronavirus-corruption-democracy
