لما أجيب سيرة أفلام مارفل أو زي ما بتتسمي MCU و دي إختصار Marvel Cinematic Universe فإنت بتتكلم عن لحد دلوقتي 23 فيلم و زود عليهم 8 أفلام كمان جايين في السكة .. ده غير المسلسلات .. بيزنس بيجيب فلوس بالمليارات .. بس لو جيت سألتك إيه كانت البداية؟ .. إمتي قلت إن أفلام MCU إتولدت؟ .. فيه ناس وجهة نظرها إن البداية كانت مع عرض أول فيلم للعالم ده اللي هو Iron Man سنة 2008 .. و مش بس الفيلم .. الناس بتقول إن بداية مشوار MCU بدأ مع المشهد اللي بعد التتر أو End Credit Scene لما شخصية (نيك فيوري Nick Fury) اللي جسدها الممثل (صامويل جاكسون Samuel Jackson) راح إتكلم مع شخصية (توني ستارك Tony Stark) اللي جسدها الممثل (روبيرت داوني جونيور Robert Downey Jr.) و قاله أنا عايز أكلمك في موضوع مبادرة المنتقمين Avengers Initiative .. لو إنت من الناس اللي مقتنعة بالرأي ده فإسمحلي أختلف معاك .. الوقت اللي ينفع بحق و حقيقي إنك تقول إنه ميلاد سلسلة أفلام MCU مش Iron Man إنما كان الجزء الأول من سلسلة The Avengers و قبل ما تعترض إسمحلي أشرحلك وجهة نظري.
الحقيقة فيه كذا سبب ورا رأيي ده .. السبب اللي ممكن يكون حيجي في دماغ أي حد يسمعني أقول إن فيلم The Avengers هو بداية ميلاد أفلام MCU هو عشان دي أول مرة نشوف أبطال السلسلة كلهم متجمعين مع بعض في فيلم واحد سواء بقي Iron Man أو Captain America أو Thor أو Black Widow أو The Hulk و معاهم Hawkeye .. و برده في End Credit Scene لما كانت أول مرة نشوف فيها شخصية (ثانوس Thanos) .. و شوف يا أخي رغم إن السببين دول مقنعين لوحديهم من غير أي إضافات عليهم بس صدقني لو قلتلك إن مش دول هم السببين اللي مخلييني أقول إن فيلم The Avengers هو بداية ميلاد أفلام MCU .. فيه سببين تانيين.
السبب الأول إن من سنة 2003 يعني قبل عرض فيلم Iron Man ب5 سنين و فكرة The Avengers بتلعب في دماغ الناس اللي ماسكه أستوديوهات مارفيل .. في إبريل 2006 مارفل أعلنت إنها حتشتغل علي 6 أفلام مرة واحدة .. أول فيلم كان Iron Man و اللي حيمسك المشروع ده المخرج و السيناريست (جون فافرو Jon Favreau) .. ثاني فيلم هو Captain America و اللي حيكتبله السيناريو واحد إسمه (ديفيد سيلف David Self) و ده اللي كتب السناريو بتاع فيلم Road to Perdition .. الفيلم الثالث هو Ant-Man و اللي حيمسك المشروع ده المخرج و السيناريست (إيدجار رايت Edgar Wright) .. الفيلم الرابع هو Nick Fury و اللي حيكتب السيناريو بتاعه (أندرو مارلو Andrew Marlow) و ده اللي كتب سيناريو فيلم Air Force One .. الفيلم الخامس هو Thor و اللي حيكتبله السيناريو (مارك بروتوسفيتش Mark Protosevich) و ده اللي كتب سيناريو فيلم Poseidon .. و أخيراً فيلم The Incredible Hulk و اللي حيكتب السيناريو بتاعه (زاك بين Zak Penn) و ده اللي كتب سيناريو الجزء الثاني من سلسله X-Men.
لما إتعرض فيلم Iron Man و كسر الدنيا بدأ التنفيذ علي مشروع The Avengers بس بشكل مختلف خالص عن الفكرة الأصلية .. فيه اتنين إتجابوا عشان يكتبوا السيناريو اللي هم (جوس ويدون Joss Whedon) و (زاك بين Zak Penn) و إتقالهم إن الفيلم حيتعرض في 2011 و بما إنكوا بدأتوا شغل في 2008 فأنتوا قدامكوا سنة بس تخلصولنا السيناريو .. الإتنين حيشتغلوا تحت إشراف واحد إسمه (كيفن فايجي Kevin Feige) و ده اللي حيمسك مشروع MCU من أوله لأخره .. تاني ركز معايا .. سيناريو فيلم The Avengers بدأ يتكتب سنة 2008 يعني قبل حتي ما ينزل فيلم Captain America: The First Avenger ولا حتي الجزء الأول من سلسلة Thor .. تخيل معايا حضرتك لو كان أي فيلم من الإتنين سواء Captain America أو Thor فشلوا .. هم مفشلوش بس في نفس الوقت الفيلمين دول معلقوش مع الناس لا زي Iron Man ولا زي Iron Man 2 .. بس تفتكر لو الفيلمين فشلوا مش كان مشروع The Avengers حيترمي في الزبالة؟ .. تخيل حضرتك لو كان (إيدوارد نورتون Edward Norton) اللي عمل دور The Hulk في فيلم The Incredible Hulk وافق علي إنه يشارك في فيلم The Avengers و بعد كده معجبوش السيناريو بحجة إن دوره صغير .. مش كان برده المشروع كله حيترمي في الزبالة؟ .. طب إنت تعرف إن اللي كانت حتقوم بدور Black Widow مش الممثلة (سكارليت جوهانسين Scarlet Johansen) و إن اللي كانت خلاص حتمضي العقد عشان تقوم بالدور الممثلة (إيميلي بلانت Emily Blunt)؟ .. كمية حاجات كانت ممكن تمشي غلط بتوريك قد إيه إن فيلم The Avengers كان Risk أو مخاطرة كبيرة و فعلاً البداية الحقيقية لأفلام MCU لإن خلينا نكون صرحاء مع بعض إن ولا واحد فينا كان مقتنع بإن أفلام MCU دي ليها أي معني قبل عرض الفيلم ده.
السبب الثاني هو إن فيلم The Avengers فعلياً فيلم حلو جداً .. قلتها قبل كده و حفضل أقولها إن العمود الفقري لأي فيلم هو السيناريو .. لو السيناريو بايظ الفيلم حيطلع بايظ بغض النظر إنت جايب ممثلين مين .. و بما إن سيناريو أي فيلم بيعتمد علي إنك تحدد مين هم الأبطال و مين هم الأشرار فده كان السؤال اللي بيدور في دماغ الثنائي (جوس ويدون) و (زاك بين) اللي كانوا بيكتبوا السيناريو و علي فكرة (جوس ويدون) هو اللي أخرج الفيلم في الأخر .. المهم .. إنت فعلياً لازم تقسم مشكلة السيناريو دي لحاجتين: إزاي تجمع الأبطال بتوع الفيلم؟ و تقرر مين حيكون الشرير؟
مشكلة تجميعة الأبطال دي مفيش حد عبر عنها زي (جوس ويدون) نفسه اللي في أول إجتماع مع الناس بتوع مارفيل كان جايب معاه 5 ورقات فلوسكاب A4 شارح فيهم هم الأبطال حيقابلوا بعض إزاي و كان عنوان الشرح ده Avengers: Some Assembly Required يعني محتاجين نعرف إزاي حنجمع المولد ده .. عندك 6 شخصيات هم الأبطال .. كل شخصية ليها حياتها و تاريخها المستقل .. المفروض نلاقي طريقة يتجمعوا بيها بحيث المشاهد ميملش و ميحسش إنه تايه و الأهم إن الفيلم ميتملاش شخصيات ثانوية ملهاش أي ستين لازمة .. اللي زود من صعوبة المهمة كمان إن فعلياً كل بطل جاي من عالم مختلف خالص عن الثاني .. Iron Man مثلاً جاي من عالم التكنولوجيا و الهندسة و كمان هو بني أدم طبيعي ملوش قدرات خارقة .. Captain America أساساً كان عايش وقت الحرب العالمية الثانية بطريقة تفكير و طريقة كلام و معتقدات ممكن متبقاش مناسبة لسنة 2012 و غير ده كله إنه عسكري أولاً و أخيراً و له قدرات خاصة بسبب التجربة العلمية اللي إتعملت عليه فبالتالي بما إنه عسكري و (توني ستارك) مهندس فالإتنين ميكونوش طايقين بعض .. Thor جاي من عالم أساطير الفايكينج يعني أساساً شايف نفسه فوق مستوي البشر و طبيعي إنه يبص لIron Man و Captain America علي إنهم أقل منه .. فتاني .. إزاي تجمع الشخصيات دي مع بعضها بشكل المشاهد يقبله و يحبه؟ .. طب أزيدك من الشعر بيت .. لما (جوس ويدون) كان بيكتب السيناريو بتاعه كان لسه فيه كلام إن (سكارليت جوهانسين) اللي خلاص كانوا إختاروها عشان تبقي Black Widow مش حتبقي فاضية وقت تصوير فيلم The Avengers و بناء عليه شخصية Black Widow كان فيه كلام إنها حتتشال خالص من السيناريو و حيدخلوا مكانها شخصية Wasp اللي إنت شفتها في فيلم Ant-Man .. في البداية الدنيا مكنتش متظبطة خالص عشان السيناريو يطلع عدل .. بس بمجرد ما إتفقوا مع الممثلين و بقي معروف مين حيعمل أنهي شخصية الدنيا مشيت زي القطر اللي مبيقفش في محطات.
بالنسبه لحتة مين حيكون الشرير ف(جوس ويدون) في البداية خالص كان عايز شرير مختلف شوية و ممكن ميخطرش علي بالك .. فاكر فيلم Iron Man؟ .. فاكر الشرير اللي فيه (أوبيدايا ستاين Obadiah Stane)؟ .. أهو (جوس ويدون) كان عايز إبنه (إيزيكيال ستاين Ezekiel Stane) يبقي هو الشرير بتاع فيلم The Avengers بس الناس بتوع مارفل رفضوا .. الناس دي كان في دماغها تصور محدد .. الشرير حيكون (لوكي Loki) .. طول الفيلم الأبطال بتوعه حيتخانقوا مع بعض لحد ما في الأخر حيتوحدوا سوا في معركة الدفاع عن نيويورك .. دول الشرطين اللي المنتجين حطوهم و غير كده إلعب يا (جوس ويدون) في السيناريو بتاعك و إعمل ما بدالك .. و علي فكرة .. الفيلم إتحددله معاد عرض في 2012.
(جوس ويدون) خد طلبات مارفيل بإن طول الفيلم الأبطال بتوعه حيكونوا مش طايقين بعض و كل شوية يقصفوا جبهات بعض و بدأ يكتب السيناريو .. السيناريو و الحوار إتكتب بحيث إنه جاب فيلمين حربيين و ضربهم في الخلاط مع بعض .. الفيلم الأولاني قديم شوية إسمه The Dirty Dozen .. الفكرة إن بيبقي عندك فريق (سرية عساكر) كله لاعيبه حريفة و كل واحد فيهم يقدر يشيل فرقة لوحده و بتقولهم إشتغلوا مع بعض .. طبيعي إن كل واحد يكون شايف نفسه أحسن من الباقي و ده حيخلق توتر و صراعات داخلية كتير .. الفيلم الثاني كان Black Hawk Down .. (جوس ويدون) كان عايز يخلق حالة إن الأبطال اللي هم الSuperheroes بتوعنا إتحطوا في موقف إنهم لازم يقفوا جنب بعض في معركة و نشوف تأثير إنك تتحط في موقف حياة أو موت علي شخصياتهم .. يا تري حيتعاملوا مع بعض إزاي؟ .. يا تري إزاي التوتر و الصراعات اللي بينهم حتتحول واحدة واحدة لإحساس إنهم خايفين علي بعض؟ .. ده معناه خلي بالك إن و إنت بتختار الممثلين اللي حيقوموا بالأدوار لازم يكونوا فاهمين بعض و صحاب عشان و إنت بتتفرج علي الفيلم و تلاقيهم بيقلشوا علي بعض تحس إنهم جد جداً .. قبل تصوير The Avengers كان الممثلين اللي خلاص ضمنوا أدوارهم هم (روبيرت داوني جونيور) و (كريس إيفانز Chris Evans) و (كريس هيمزوورث Chris Hemsworth) .. إختيار الثلاثة الجداد اللي هم (مارك رافلو Mark Ruffalo) و (سكارليت جوهانسين) و (جيريمي رينر Jeremy Renner) كان لازم يتم بالشوكة و السكينة.
أنا كمان عايز أقف شوية قدام معركة نيويورك في فيلم Avengers .. أنا أقدر أتفهم إن ناس كتير دمعت و هيصت مع مشهد الأفينرجز و هم بيجوا واحد ورا التاني عشان يواجههوا جيوش (ثانوس) في فيلم Avengers: Endgame بس صدقني لو قلتلك إن كتير من أحداث الفيلم ده إتبنت بشكل أو بأخر علي فيلم The Avengers .. مشهد Avengers: Endgame و هم بيتجمعوا عشان يواجههو (ثانوس) هو هو بس بالعكس مشهد هجوم التشيتاوري Chitauri علي مدينة نيويورك في فيلم Avengers .. لما Iron Man ضحي بنفسه عشان يهزم (ثانوس) و وقع علي الأرض و جري عليه Spider Man عشان يقوله يا مستر (ستارك) إحنا كسبنا .. هو هو نفس اللي حصل في الجزء الأول لما برده Iron Man فجر الصاروخ النووي و وقع علي الأرض و Captain America جري عليه و قاله نفس البق الحمضان بتاع إحنا كسبنا .. حتي نهاية فيلم The Avengers كانت هي المنط اللي سلسلة أفلام MCU طلعت منه و إنتشرت .. الفيلم خلص بإن (توني ستارك) جاتله حالة نفسية هي إضطراب ما بعد التعرض لأزمة أو PTSD و ده الأساس اللي فيلم Iron Man 3 إتبني عليه إن (توني ستارك) نفسياً بقي مش مستقر .. نهايه فيلم The Avengers كانت هي بداية الخناقة اللي مش عايزه تخلص بين Thor و Loki و اللي عليها إتبنت أحداث فيلمين اللي هم Thor: Ragnarok و Avengers: Infinity Wars .. بسبب معركة نيويورك و اللي حصل فيها بقي حلم (توني ستارك) إنه يخلق حالة سلام عالمي و ده خلاه يبدأ مشروع ألترون Ultron و اللي باظ منه في فيلم Avengers: Age of Ultron .. معركة نيويورك دي صحيح هي معركة واحدة بس نقلت سلسلة MCU لعالم تاني خالص و فتحت عليهم أبواب أفلام كتير وصلوا لحد دلقتي 23 فيلم.
اللي تتعلمه من فيلم The Avengers حاجات كتير جداً الصراحة .. أول درس و يمكن أهم درس إنك لما تحب تعمل فيلم عن سلسلة روايات إختار مخرج و سيناريست عارفين الروايات و قروها كويس .. دي رسالتي للناس اللي حتعمل مسلسل ما وراء الطبيعة المبني علي سلسلة الروايات بتاعة دكتور (أحمد خالد توفيق) الله يرحمه .. إختاروا سيناريست صح عشان يكتب سيناريو يكون بيحترم المادة العلمية اللي تحت إيده و في نفس الوقت يطلع حاجة جديدة بالنسبة لينا .. عارف إنه مش حاجة سهلة بس بتتعمل .. تاني درس الحقيقة هي إن المخرج يكون بيحترم شغل غيره .. (جوس ويدون) إشتغل قبله مخرجين كتير أسسوله شغله زي (جون فافرو) اللي أخرج Iron Man بجزئيه الأولانيين .. زي (كينيث برانا Kenneth Branagh) اللي أخرج الجزء الأول من Thor .. فكرة إن شغل بيتبني علي شغل دي مش حاجة سهلة .. و يمكن عشان كده أنا من الناس اللي بتقول إن دور حد زي (كيفن فايجي) إنه يمسك هو المشروع من أوله لأخره و يفضل مشرف عليه حاجة في منتهي الأهمية .. وجود حد زي (كيفن فايجي) بيبص علي المشروع من فوق أحياناً بيكون له كومنتات الناس اللي عايشة جوه الفيلم متبقاش واخدة بالها منها .. يعني مثلاً.
اللي عمل Soundtrack أو الموسيقي التصويرية لفيلم The Avengers كان واحد إسمه (ألان سلفستري Alan Silvestri) .. الرجل ده كان ممكن يقول أنا حجيب مثلاً التيمة الموسيقية بتاعة (رامين ديجاوادي Ramin Djwadi) اللي عمل الموسيقي التصويريه لفيلم Iron Man و أيوه هو هو اللي عمل الموسيقي التصويرية بتاعة مسلسل Game of Thrones و أشغلها كل ما يطلع (توني ستارك) .. نفس الكلام مع كل الشخصيات .. كل ما شخصية تظهر نشغل التيمة الموسيقية بتاعتها .. (كيفين فايجي) قال لا .. كده المشاهد حيتوه .. إحنا نعمل تيمة موسيقية موحدة للأفينجرز و قد كان .. نقطة تانية برده أضافها (كيفن فايجي) هي شاشة العرض في خوذة Iron Man اللي بيسموها HUD ليه لا نخليها بتتلون علي حسب الموقف .. يعني لو مفيش خطر تبقي أزرق و بمجرد ما يتحط في موقف خطير تبقي أحمر و قد كان برده .. حاجة تانية عارف مشهد مطعم الشاورما في أخر الفيلم؟ ده برده من أفكار (كيفن فايجي) و إتصور صدق أو لا تصدق قبل العرض الرسمي للفيلم بساعات و المخرج (جوس ويدون) بمعجزة عرف يعمله المونتاج بتاعه و يبعته للسينمات علي مستوي العالم قبل عرضه.
فيلم The Avengers من أهم الأفلام اللي إتعملت في تاريخ السينما .. أنا فاكر كويس أوي إن الفيلم ده نزل في نفس السنة اللي نزل فيها فيلم The Dark Knight Rises و الناس قعدت تقارن بينهم و مين أحسن من مين و مين جاب فلوس أكتر من مين بس في رأيي إن ده هبد .. ده حاجة و ده حاجة تانية خالص .. و إنت ممكن برده تكون من الناس اللي مش مقتنعة بإن أفلام مارفل دي ينفع يتقال عليها سينما أساساً و إنت رأيك علي عيني و علي راسي بس فيه نقطة .. كون إن فيلم سواء إنت شايفه حلو أو وحش مش دي القضية بس يكون هو بداية إنتاج أكتر من 23 فيلم فده يخليك تقف قدام الفيلم ده و تدرسه و تفهم هو عمل كده إزاي .. دي برده نصيحة للمنتجين اللي ناويين يقلدوا فكرة مارفل و يعملوا عالم سينمائي مشتق من سلسلة أفلام (ولاد رزق) .. إتعلموا سر الصنعة بتاعة الحكاية دي من (جوس ويدون) و (زاك بين) .. الموضوع صعب بس يتعمل.
المصادر:
- مقالة بعنوان 8 Years of ‘The Avengers’: How Joss Whedon’s Risk Became Crucial to Marvel’s Endgame نشرت علي موقع Mashable و ده لينك المقالة الأصلية:
https://in.mashable.com/entertainment/13726/8-years-of-the-avengers-how-joss-whedons-risk-became-crucial-to-marvels-endgame - مقالة بعنوان The Battle of New York: An Avengers Oral History نشرت علي موقع Thrillist و ده لينك المقالة الأصلية:
https://www.thrillist.com/entertainment/nation/the-avengers-battle-of-new-york-joss-whedon
