لما بلد تخش حرب ويتقال إن البلد دي إتداس علي وشها للتعبير عن إزاي البلد دي خسايرها كانت أكبر من اللي أي حد يتوقعه فالتشبيه ده في رأيي مثالي جداً عشان تفهم بيه هو إيه اللي حصل سنة 2014 بين روسيا و أوكرانيا .. في السنة دي لو تفتكر روسيا خدت حتة من أوكرانيا اللي هي شبه جزيرة القرم أو Crimea وضع يد بس أنا عايز أقف قدام إحصائية حاول بس عشان خاطري تستوعبها و تفهمها قبل ما تكمل قراية .. أوكرانيا دخلت الحرب دي و هي تحت إيدها 400 طيارة مختلفة في قواتها الجوية سواء بقي طيارات مقاتلة أو هليكوبتر أو نقل .. لما جت سنة 2015 أوكرانيا بقي تحت إيدها 222 طيارة بس .. ده معناه إن خلال سنة واحدة فيه بلد راح منها 178 طيارة .. محصلش في التاريخ العسكري الحديث من ساعة ما الطيارات بقت جزء أساسي من تسليح الجيوش إن بلد أيا كانت هي مين تخسر كل العدد ده من طياراتها في سنة واحدة .. ولا حتي سوريا و العراق .. ال178 طيارة اللي خسرتهم أوكرانيا دول يعتبروا تلت إجمالي عدد الطيارات اللي طلعت علي المعاش في العالم كله خلال سنة 2014 .. طبيعي إن واحد من أكتر الأسئلة اللي إنت بتسألها لنفسك دلوقتي هو معلش يعني إزاي ده حصل؟ .. إزاي بلد تخسر 55% من إجمالي عدد الطيارات اللي عندها في سنة؟
لو جيت سألت الأوكرانيين السؤال ده حتلاقيهم بيقولوا والله إن فيه طيارات الروس أستولوا عليها .. فيه طيارات تانية حصل فيها أعطال و وقعت وهي في الجو .. فيه طيارات تالتة الروس وقعوها .. وفيه كتير بسبب سوء الصيانة و إنهم إتركنوا لسنين فالأوكرانيين لقوا إنهم مش نافعين و لازم يطلعوا بره الخدمة و يتباعوا خردة .. ولو رحت سألت الروس أنتوا إزاي تعملوا كده حتلاقيهم بيقولوا عليا الطلاق كدب إحنا ملناش عساكر أصلاً في شبه جزيرة القرم .. تسألهم طب مين اللي وقع الطيارات الأوكرانية دي؟ يقولوك دول ناس أوكرانيين بس مش عايزين شبه جزيرة القرم تفضل تبع أوكرانيا و عايزينها ترجع تاني لحضن روسيا الدافي .. و هي دي المشكلة .. سميهم متمردين أو إرهابيين أو إنفصاليين أو حتي سميهم وطنيين مش حتفرق .. الناس دي تحت إيدها أنظمة دفاع جوي روسي فعلياً بهدلت قدرات سلاح الجو الأوكراني.
علي الأقل 21 طيارة مقاتلة أوكرانية وقعت بصواريخ أرض- جو مضادة للطيارات خلال سنة وفيه علي الأقل طيارة MiG-29 أوكرانية وقعت بصاروخ جو – جو ضربته طيارة MiG-29 برده بس روسية من جوه المجال الجوي الروسي .. أوكرانيا كمان خسرت طيارة سوخوي-24 و 6 طيارات سوخوي-25 ده غير طيارتين MiG-29 .. إنت رايح فين أنا لسه مخلصتش .. الأوكرانيين وقعلهم كمان 5 طيارات هليكوبتر Mi-8/17 و برده خمس طيارات هليكوبتر Mi-24 .. ومش بس سلاح الجو الأوكراني .. الناس دي وقعت طيارة مدنية تابعة للخطوط الجوية الماليزية في يوليو 2014 و قتلوا 298 راكب عليها اللي زي ما يكونوا بيقولوا لأي حد طاير فوق سماء شبه جزيرة القرم اللي حلمحه حمرجحه.
زي ما قلتلك في المجمل مقدرش أقول إن روسيا أو القوات التابعة لروسيا في شبه جزيره القرم هم المسئولين عن كل طيارة من 178 طيارة اللي خسرتها أوكرانيا في 2014 .. فيه طيارات كتير طلعت بره الخدمة بسبب سوء الصيانة .. بس ده ميمنعش إن الأوكرانيين سلاح الجو بتاعهم إتحط عليه جامد خصوصاً طياراتهم المقاتلة .. خلال سنة واحدة أوكرانيا خسرت 80 طيارة MiG-29 .. خسرت 36 طيارة سوخوي-27 .. خسرت 36 طيارة سوخوي-25 .. خسرت 24 طيارة سوخوي-24 .. بداية من 2015 و سلاح الجو الأوكراني فعلياً مبقاش تحت إيده غير 19 طيارة MiG-29 .. معاهم 16 طيارة سوخوي-27 .. 15 طيارة سوخوي-25 .. و عليهم 11 طيارة سوخوي-24 .. لما جت سنة 2019 الوضع إتحسن شوية و الأوكرانيين بقي معاهم 21 طيارة MiG-29 .. و 35 طيارة سوخوي-27 .. 12 طيارة سوخوي-24 .. 13 طيارة سوخوي-25.
المصدر:
مقالة بعنوان How Russia nearly wiped out the Ukrainian air force نشرت في مجلة The National Interest و ده لينك المقالة الأصلية:
https://nationalinterest.org/blog/buzz/how-russia-nearly-wiped-out-ukrainian-air-force-141857
