لينك التسجيل الصوتي للمقالة علي Sound Cloud:
https://soundcloud.com/user-112011687-312727988/f-35
عارف حضرتك لما تقرر تشتري عربية مستعملة و تجمع فلوسها بعد ما دخلت في جمعية بلعت أغلب مرتبك و لما تستلمها تلاقي نفسك مفلس؟ .. طب عارف لما تيجي تجرب تمشي بعربيتك اللي إنت لسه شاريها و تلاقيها مبتطلعش علي الرابع؟ .. تروح بيها للميكانيكي اللي إنت أساساً سالف الفلوس اللي هو حياخدها عشان يكشف علي عربيتك و تلاقيه بيقولك إن و الله يا باشا الفتيس بتاع عربيتك محتاج يتغير .. بتسأله طب و الحل يا أسطي؟ فيقولك والله يا باشا هي يتمشي بيها كده بس مش حتعرف تجري بيها بس أنصحك تغيرلها الفتيس .. عشان حضرتك فلست فإنت بتاخد القرار اللي إنت بتشوفه أشجع قرار خدته في حياتك .. أنا حمشي بالعربية زي ما هي كده و أمري لله .. قصة قصيرة حزينة أنا عارف بس صدقني لو قلتلك إن القصة دي هي هي حصلت مع الأمريكان بس بدل ما كانت عربية كانت الطيارة F-35 Lightening II .. أيوه قبل ما تقول إزاي يا جدع عايزك توحد الله في قلبك و خليني أفهمك.
الطيارة F-35 زي ما إنت صرفت دم قلبك عشان تجيب عربيتك المستعملة فالأمريكان كمان إتفحتوا فلوس عشان الطيارة دي تطير و تشتغل و تتباع .. وبعد كل الصرف ده إكتشفوا إنها مش بتطلع علي الرابع اللي هو برده عشان لازم أبقي دقيق في كلامي لازم أوضحلك إن النسختين F-35C اللي حتستلمها القوات البحرية و F-35B اللي حيستلمها سلاح مشاة البحرية لما بيطيروا علي إرتفاعات عالية أوي و الطيار بيحب يدوس بنزين و يكسر حاجز الصوت اللي هو بيتسمي إنه يطير Supersonic فبيلاقي إن الطيارة بتترج منه .. ليه؟ .. لما بيعمل كده الديل بتاع الطيارة بيبدأ يفك من جسمها و الطلاء بتاع إمتصاص موجات الرادار و اللي بيحافظ علي خاصية Stealth أو التخفي من الرادار في الطيارة بيبدأ يقع .. مش بس كده .. لما الطيار بيقرر إنه يكسر سرعة الصوت فبيلاقي إن كتير من Antennas ودي اللي هي الإريال اللي انت بتركبه في عربيتك عشان يلقط إشارة الراديو بس في الطيارات بيبقي ليهم وظايف تانية كتير مبيثبتوش في مكانهم و بيقعوا.
المشكلة دي الأمريكان مكتشفوهاش أول إمبارح .. المشكلة دي إتلاحظت في نوفمبر 2011 لما في مناورة بإستخدام الطيارتين F-35B و F-35C الطيارين بتوعها طاروا بسرعات Mach 1.3 و Mach 1.4 حسوا إن الطيارة بتترج منهم زي ما قلت .. لما الطيارات هبطت و المهندسين بصوا عليها لقوا إن الطلاء بتاع المادة الخارجية اللي بتمتص أشعة الرادار في ديل الطيارة قابب و بسهولة أوي بيقع .. مش بس كده .. في ديسمبر 2011 طيارة F-35C برده طارت بسرعة أعلي من سرعة الصوت الطيار حس إن الديل بتاع الطيارة حيقع .. لما إتعمل إختبار إجهادات علي الشاسيه بتاع الطيارة لقوا فعلاً إن الديل كان قرب يوصل لمرحلة الإنهيار.
طب ده معناه إيه؟ .. معناه إن الطيارتين F-35C و F-35B مينفعش تقولهم إطلعوا طيروا بسرعة عشان تعترضوا سرب طيارات معادية جاي يضربنا .. ولو حصل و الطيار جري أسرع من الصوت الطيارة حتحتاج تتعملها صيانة كاملة .. أحب أفكرك إن النسخة F-35C دي اللي حتشتغل علي متن حاملات الطائرات .. بدأت تفهم المصيبة فين؟ .. المشكلة إن الطيارات المقاتلة اللي علي حاملة الطائرات هي خط الدفاع الأول عنها فيعني إيه تقولي إن لو حصل و روسيا مثلاً هاجمت علي حاملة طائرات بسرب طيارات فالطيارات F-35 مش حينفع تطلع تطير بسرعة عشان تعترض الطيارات الروسي قبل ما توصل للحاملة؟ .. و يعني إيه طيار مقاتل يتقاله إن انت عشان طرت بطيارتك فوق سرعة الصوت فاحنا لازم نعملها عمرة كاملة و العمرة دي مينفعش تتعمل في الورشة اللي في حاملة الطائرات فمعلش بقي حنلغي باقي المهمة بتاعة الحاملة و نرجع بيها تاني للورش بتاعة شركة لوكهيد مارتن اللي هي الشركة اللي صنعت الطيارة F-35 عشان تتصلح .. حاجة في منتهي النكد اللي في الدنيا.
عشان المشكلة دي تتحل فانت لازم تلاقي مادة تنفع Coating أو طبقة خارجية علي جسم الطيارة تكون أولاً بتمتص موجات الرادار و تكون بتتحمل الإجهادات Stresses بتاعة إنك تبقي طاير علي إرتفاع عالي و كمان بتطير بسرعة أعلي من سرعة الصوت .. بعد ما تلاقي المادة دي و تعرف تركبها علي جسم الطيارة تبدأ تختبرها .. حتختبرها و الطيارة فاضية .. حتختبرها و الطيارة متحملة أسلحة .. حتختبرها صبح و ليل .. حتختبرها صيف و شتاء .. و نفس الخطوات دي حتعيدها هي هي عشان تحل مشكلة الديل .. حتصمم ديل جديد .. و حتصنعه .. و حتختبره .. حتختبره و الطيارة فاضية و الطيارة محملة أقصي حمولة ليها .. حتختبره صبح و ليل .. حتختبره صيف و شتاء .. ليلة كبيرة أوي سعادتك.
يوم 17 ديسمبر 2019 طلع بيان من حاجة إسمها Joint Program Office و دي الهيئة أو الكيان المسئول عن مشروع الطيارة F-35 قالوا و انا مش بهزر ومش بتريق .. فعلياً البيان قال الأتي .. الموضوع إتقفل يوم 17 ديسمبر 2019 من غير ما نقرر إننا ناخد أي إجراء و دي حاجة وافقت عليها الأفرع الرئيسية للقوات المسلحة و المشكلة دي محدش حيفتح سيرتها تاني لإنها إتحطت تحت بند المشاكل اللي ملهاش أي خطة للحل .. عشان برده تفهم يعني إيه الكلام ده فبمنتهي البساطة الأمريكان قالوا إن حل المشكلة دي غالي فشخ و إحنا معناش فلوس فالله غالب و لا يكلف الله نفسا إلا وسعها و حنطير بالطيارات علي عيبها.
عشان برده مبقاش متحامل أوي علي الطيارة F-35 و يتقال إني بطلع فيها القطط الفطسانة فلازم أعرض وجهة النظر التانية .. في رأي واحد زي (برايان كلارك Bryan Clark) وده كان طيار بحري سابق يعني كان بيطير بطيارات من علي حاملات طيارات و دلوقتي شغال باحث في معهد هدسون Hudson Institute واحد من المعاهد البحثية العسكرية اللي بتشتغل مع شركات الأسلحة في أميركا إن يا جماعة انتوا فاهمين الموضوع غلط .. الطيارة F-22 Raptor إتصممت عشان تطير بسرعات أعلي من سرعة الصوت بس في حالة F-35 هي مش حتلجأ إنها تكسر حاجز الصوت إلا في حالات نادرة لإن الطيارة إتصممت عشان تطير بسرعات أقل من سرعة الصوت عشان تحافظ علي قدرة Stealth بتاعتها .. لما الطيار بيدوس بنزين و بيشغل حاجة إسمها Afterburner وده حاول تتخيل إنه التربو تشارجر Turbocharger في عربيتك اللي بيخلي طيارته تطير أسرع من الصوت فهو أولاً بيلغي خاصية Stealth و ثانياً بيحرق كمية بنزين فشيخة لدرجة إن الطيارة مش بتطير لمسافات طويلة.
انا فعلياً متفهم كلام الناس اللي بتقول كده .. انا مستوعب إنك صممت طيارة عشان تضرب قبل ما حد يحس بيها بس ده مش معناه إن مش حيجي اليوم اللي حتحتاج فيه ان الطيارة تسعفك .. زي ما انت لو رضيت ترضي بالأمر الواقع و متغيرش فتيس عربيتك و تفضل ماشي أخرك النقلة الثالثة إن مش حيجي اليوم اللي تحتاج فيه تجري فيه في الشارع لظرف طاريء حصلك و ساعتها مش حتعرف .. وعلي فكرة الموقف ده حصل هو هو في الستينات .. في الوقت ده الأمريكان نزلوا طيارة قالوا عليها إنها الطيارة اللي مجاش ومش حيجي زيها .. الطيارة فانتوم F-4 Phantom و لبست نفس الخازوق برده.
الطيارة F-4 Phantom إتحط فيها تقريباً كل التكنولوجيا الجديدة لانج اللي كانت في المطبخ .. أحدث رادار إتحطلها .. أقوي محرك إتركب فيها .. بس الأهم إن إتحط فيها لأول مرة صواريخ جو- جو .. وقتها إتقال إن الصواريخ دي حتخلي طيار الفانتوم يوقع الطيارات المعادية قبل ما حد يشوفه .. وقتها إتقال إن تكنولوجيا صواريخ جو- جو دي فشيخة لدرجة إن إحنا حنشيل المدفع الرشاش الأساسي من الطيارة الفانتوم لإنه مبقاش له أي لازمة .. نفس البق الحمضان بتاع F-35 خلي بالك .. هوبا تقوم حرب فييتنام .. هوبا تقوم معركة المنصورة في حرب أكتوبر و الطيارة الفانتوم تسقط في إمتحان الإشتباكات الجوية Dogfighting ضد طيارات سوفيتية إمكانياتها صحيح أقل من الفانتوم زي MiG-21 بس أسرع بكتير لدرجة إن الطيار الأمريكاني أو الإسرائيلي مبقاش لاحق ينشن علي الطيارة المعادية.
الخسائر الرهيبة اللي إتعرضت ليها الفانتوم في حربين حصلوا ورا بعض خلت الأمريكان يعملوا 3 حاجات .. أول حاجة إنهم طلعوا الطيارة فانتوم بره الخدمة بدري .. ثاني حاجة إن من ساعتها و المدفع الرشاش الرئيسي بقي موجود في كل موديلات الطيارات اللي بتصنعها أميركا عشان اليوم الأسود اللي الطيارات دي تخش في إشتباك جوي ضد الطيارات الروسي اللي عادة بتكون أسرع و ليها قدرة أعلي المناورة .. ثالث حاجة و دي الأهم إن إتعملت مدرسة Top Gun و دي حاجة شبه فصول التقوية أو الدروس الخصوصية إن القوات البحرية بقت بتجيب أحسن طيارين عندها توديهم المدرسة دي عشان يتعلموا فن الإشتباكات الجوية.
نرجع تاني للطيارة F-35 .. كون إني أقول للطيار المقاتل إن و الله للأسف انت مش حينفع تشغل Afterburner و تطير أسرع من الصوت إلا يدوبك دقيقة واحدة بس بعد كده تطفيه و ترجع تشغله تاني دقيقة و تطفيه تاني و هكذا فانا فعلياً بنكد علي الطيار عيشته .. إفرض لو إتحط في Dogfight .. حيبقي فاضي هو بقي يهرب من الطيارة المعادية ولا ينشن عليها و لا يبقي فاكر هو شغل Afterburner بتاعه دقيقة ولا أكتر؟
علي فكرة مشاكل العربية المستعملة اللي انت إشتريتها مش بس خلصت علي الفتيس اللي مش بينقل علي الرابع .. لا ده فيه مصايب تانية و الغريب إن المصايب دي الأمريكان أو خليني أكمل في مود الدقة اللي انا ماشي فيه مكتب Joint Program Office قرر إن ما بيد الحيلة و إن المصايب دي ملهاش حل و حنضطر نطير بF-35 علي عيبها .. دي مصيبة من المصايب اللي زي ما قلتلك إتقرر خلاص إنها مش حتتحل و حتفضل موجودة في طيارات F-35 اللي حتدخل الخدمة:
الطيار مش بيشوف كويس و هو بيهبط علي حاملة الطائرات بتاعته بليل بسبب ظاهرة الطيارين الأمريكان سموها Green Glow أو الإضاءة الخضرا .. ليه كفي الله الشر؟ .. قالك إن حاملة الطائرات بالليل زيها زي المطارات بيبقي فيها لمض LED متوزعة علي المدرج بتاع الإقلاع و الهبوط و علي برج الحاملة عشان الطيار وهو بيهبط بالليل يبقي شايف .. جميل .. قالك فيه لمض من اللي بتبقي منورة دي بتطلع ضوء لونه أخضر .. طب إيه المشكلة برده؟ .. المشكلة حضرتك في الشاشة اللي بتتركب في خوذة الطيار قدام عينه .. الإخوة اللي صمموا الشاشة دي اللي بتتسمي HMD و دي إختصار Helmet Mounted Display بحيث يبقي فيها هي كمان لمض LED بس اللمض دي متصنعة من مواد عضوية عشان قال إيه متبقاش مضرة للبيئة و هي بتتصنع و اللمض دي إسمها OLED ودي إختصار Organic Light Emitting Diode فلما الطيار بيجي يهبط الطول الموجي بتاع الضوء من لمض LED الخضراء اللي علي حاملة الطائرات بتشوش علي الطول الموجي لOLED اللي في الشاشة اللي في خوذة الطيار فبيلاقي نفسه مش شايف حاجة قدامه.
في يوليو 2019 طلع قرار من Joint Program Office إن خلاص شاشات HMD اللي فيها لمض OLED إتطلبت و إتسلمت خلاص و مش حنطلب غيرها و طبعاً مش حنغير لمض LED اللي علي كل حاملات الطائرات .. طب و الحل؟ .. حنبقي نعلم الطيارين إزاي يهبطوا علي حاملات الطائرات بليل من غير ما يستخدموا شاشات HMD .. تاني .. مش بهزر ولا بتريق .. ده حصل فعلاً.
تقديري الشخصي إن الأمريكان بيلبسوا نفسهم خازوق شبه اللي هم لبسوه مع الطيارة الفانتوم .. ناس كتير قالت إن تصميم الفانتوم فيه حاجة غلط .. ناس كتير قالت إن يعني إيه طيارة مقاتلة ميبقاش فيها مدفع رشاش بس الأمريكان أو خليني أقول القيادة اللي وافقت علي إن الفلوس دي كلها تتصرف مبقاش قدامها حل غير إن تكمل في السكة الغلط .. ده في رأيي حيكون نفس مصير الطيارة F-35 .. طيارة مع أول تجربة رسمية ليها في مواجهة جوية مع طيارات تانية حتسقط و كل اللي إشتروها حيقولوا لنفسهم ياريتنا ما سمعنا كلام الأمريكان.
المصادر:
- مقالة بعنوان The Pentagon will have to live with the limits on F-35’s supersonic flights نشرت في مجلة Defense News وده لينك المقالة الأصلية:
https://www.defensenews.com/air/2020/04/24/the-pentagon-will-have-to-live-with-limits-on-f-35s-supersonic-flights/ - مقالة بعنوان Supersonic speeds could cause big problems for the F-35’s stealth coating نشرت في مجلة Defense News وده لينك المقالة الأصلية:
https://www.defensenews.com/air/2019/06/12/supersonic-speeds-could-cause-big-problems-for-the-f-35s-stealth-coating/ - مقالة بعنوان Amid ‘green glow’ concerns, another issue has emerged for pilots flying the F-35 at night نشرت في مجلة Defense News وده لينك المقالة الأصلية:
https://www.defensenews.com/smr/hidden-troubles-f35/2019/06/12/amid-green-glow-concerns-another-issue-has-emerged-for-pilots-flying-the-f-35-at-night/
