إنفجار ميناء بيروت إنت صعب تتخيل مدي الدمار اللي هو سببه .. إن يبقي عندك إنفجار مش ناتج عن تفجير قنبلة و تلاقيه سمع في بلد زي قبرص اللي هي أساساً بعيدة عن الساحل اللبناني ب240 كيلومتر و إنه يكون هو السبب في إن تحصل هزة أرضية قوتها 3.3 علي مقياس ريختر فدي حاجة مش سهلة .. الإنفجار كان يوم الثلاثاء 5 أغسطس الساعة 6:07 مساءاً بتوقيت بيروت و لحد دلوقتي الأرقام الرسمية بتقول إن عدد الوفيات وصل 135 و الإصابات عدت 4,000 .. أي مبني جوه دايرة نص قطرها 10 كيلومتر من مركز الإنفجار إتعرض لدمار علي حسب مدي قربه أو بعده.
في حالة إنك بتسأل عن سبب الإنفجار فالإجابة بناء علي الكلام الرسمي اللي طلع من مكتب رئيس الوزراء اللبناني (حسن دياب) إن كان فيه 2,750 طن من مادة نترات الأمونيوم Ammonium Nitrate اللي بتستخدم في صناعة السماد و المتفجرات فضلوا متخزنين في الميناء في واحد من المستودعات لمدة 6 سنين مستنيين إنهم ينفجروا في أي لحظة .. البيان قال إن دي طبعاً غلطة و إن حتتشكل لجنة حتطلع تقريرها كمان 5 أيام .. اللي أنا أقدر أقوله ليك إن سنة 2013 كانت فيه سفينة روسي متحمله بشحنة نترات الأمونيوم دي و رايحه موزمبيق .. وقت ما السفينة كانت راسيه في بيروت حصلت خناقة عشان مرتبات طقم السفينة متدفعتش .. طاقم السفينة سابها و مشي و الجمارك في الميناء مبقوش عارفين يعملوا إيه في الحمولة دي كلها اللي إتقرر إن إحنا حنخزنها في مستودع في الميناء لحد ما نشوفلها صرفة .. لك أن تتخيل إن كل كام شهر رئيس الجمارك بتاع الميناء (بدري ضاهر) يبعت جواب يحذر فيه إن الشحنة دي مينفعش تتساب كده و محدش بيسأل فيه.
أساساً نترات الأمونيوم مادة شديدة الإنفجار بس التعامل معاها مش صعب .. دول كتير بتنتج منها ألاف الأطنان كل سنة و محدش سمع عنها حاجة وحشة بس هي الفكرة إنها عشان تتخزن لفترات طويلة بيبقي ليها قيود كتير عشان تضمن إن نترنات الأمونيوم متتفاعلش كيميائياً مع أي مادة .. يعني مثلاً .. مينفعش تخزنها في مكان معدن .. مينفعش تحط جنبها بنزين .. مينفعش تحطها في مكان الحيطان و الأرضيات بتاعته مش Fire Rated يعني لو قامت حريقة ميقدرش يستحمل علي الأقل لمدة ساعتين .. خد دي كمان .. مينفعش تخزن نترات الأمونيوم في مكان مش مكيف عشان تتحكم في درجة حرارته .. نترات الأمونيوم مش بتولع .. هي بس لو إتعرضت لحرارة بتسيح و لو ساحت بتطلع أبخرة و الأبخرة دي هي اللي بتكون قابلة للإنفجار .. عشان كده مينفعش تخزن كمية كبيرة من المادة دي في حتة واحدة عشان لو حبة منهم بس ساحوا و الأبخرة اللي طالعه فرقعت فالحرارة ممكن تسبب إن باقي المستودع كله ينفجر.
عايزك تعرف إن أسوأ كارثة معروفة لنترات الأمونيوم حصلت في إبريل 1947 لما سفينة متحملة ب2,087 طن نترات الأمونيوم راسية في ميناء تكساس ولعت و الحريق سبب إنفجار قتل 400 بني أدم و دمر 1,000 مبني .. حادثة تانية بس المرة دي إرهابية كانت في مدينة أوكلاهوما الأميريكية برده سنة 1995 لما واحد بعربية مفخخة ب1.8 طن نترات أمونيوم فرقعها و قتل 169 بني أدم و أصاب 467 تانيين.
الحقيقة إن لبنان فعلياً مش ناقصة .. بغض النظر عن الأزمة الإقتصادية اللي هم بيعيشوها دلوقتي اللي خلت معدل البطالة يوصل فعلياً 50% و إتكلمنا عنها قبل كده فإنت عندك حزب الله اللي قال يعني مشاكله خلصت و دلوقتي شكله داخل في مواجهة ملهاش أي ستين لازمة دلوقتي مع إسرائيل .. و لو في رأيك ده مش كفاية فبكره إن شاء الله لجنة الأمم المتحدة اللي إتشكلت عشان تحقق في جريمة إغتيال رئيس الوزراء السابق (رفيق الحريري) الله يرحمه و اللي إتقتل بسيارة مفخخة سنة 2005 لسه فاكرين ينشروا نتايج التقرير بعد 15 سنة من موت الرجل .. المشكلة إن أغلب التوقعات بتقول إن التقرير حيطلع حزب الله هو المسئول عن إغتيال (رفيق الحريري) و ده حيزود أساساً من التوتر .. لا توتر إيه .. قصدك شرخ في المجتمع اللبناني .. فوق ده كله يجي الإنفجار اللي أقل التقديرات بتقول إن خسايره ممكن توصل 5 مليار دولار.
المصادر:
مقالة بعنوان Satellite images of Beirut explosion show massive crater at port نشرت في موقع وكالة أنباء CNN و ده لينك المقالة الأصلية:
https://edition.cnn.com/2020/08/05/world/satellite-images-beirut-explosion-before-after-trnd/index.html
مقالة بعنوان Lebanon explosion: Thousands injured across capital Beirut نشرت في موقع وكالة أنباء CNN و ده لينك المقالة الأصلية:
https://edition.cnn.com/2020/08/04/middleeast/beirut-explosion-port-intl/index.html
مقالة بعنوان What we know about the Beirut blast نشرت في موقع وكالة أنباء CNN و ده لينك المقالة الأصلية:
https://edition.cnn.com/2020/08/05/middleeast/beirut-blast-explainer-intl-hnk/index.html
