لينك التسجيل الصوتي للمقالة علي Sound Cloud:
https://soundcloud.com/user-112011687-312727988/xxdhfhlknbjn
حاول لثواني تبص للأرقام اللي في الصورة دي و تستوعب هي بتقولك إيه و إسمحلي إني أساعدك تفهم أنا عايز أوصلك إيه .. نادي بايرن ميونيخ بالنسبة للألمان ميفرقش كتير عن النادي الأهلي في مصر .. نفس المكانة تقريباً في قلوب مشجعينه .. تاريخ كبير و ثقافة و روح الفانلة الحمرا .. عادة إنت مش بيجي في دماغك إن ممكن يوم واحد بس يهز كيان كبير زي نادي بايرن ميونيخ أو النادي الأهلي .. إنت بتتخيل إن كيان كبير زي ده عشان يتحرك فهو عامل زي الديناصور لازم يتحرك ببطء بالنظر لإزاي ده كيان ضخم و عمرك ما بتتوقع إن ممكن اللي حصل في يوم واحد يشقلب حال الديناصور ده .. في حالة بايرن ميونيخ اليوم ده كان 2 نوفمبر 2019 .. في اليوم ده بايرن ميونيخ بيتداس علي وشه في الدوري الألماني من فرقة إينتراخت فرانكفورت 5-1 .. تاني يوم اللي هو 3 نوفمبر إدارة النادي بتقرر إن جه الوقت إن المدير الفني الكرواتي (نيكو كوفاتش Nico Kovac) يروح في أي ستين داهية تاخده .. لما الإعلام سأل الإدارة هو أنتوا بالصلاة علي النبي مشيتوا (كوفاتش) عشان خاطر ماتش؟ كان رد الإدارة لا .. إحنا مشيناه عشان الأرقام الموجودة في شمال الصورة اللي عندك.
قبل يوم 3 نوفمبر بايرن ميونيخ لعب 16 ماتش .. كسبوا 10 ماتشات و إتعادلوا 3 ماتشات و خسروا 3 ماتشات .. جابوا 43 جون و دخل فيهم 24 جون .. حلو أوي الأرقام دي كلها بس دي معناها إيه؟ .. معناها إن بايرن ميونيخ كان في المركز السابع في الدوري الألماني اللي بيسموه البونديزليجا و اللي كانت صدارته وقتها كانت عليها خناقة بين أر بي لايبزج و بروسيا دورتموند و يمكن عشان كده أنا شخصياً كتبت مقالة عن أر بي لايبزج توقعت فيها إنهم إذا ماكانوش حياخدوا الدوري فهم علي الأقل حينافسوا لحد أخر ماتش خصوصاً إن واضح كده إن لأول مرة من سنين الدوري الألماني مش حيكون من ضمن المنافسين علي لقبه بايرن ميونيخ و اللي حصل بعد كده أثبت إني كنت غلطان في توقعي ده.
اللي حصل إن إدارة النادي جابت واحد ناس كتير مكنتش عارفه تنطق إسمه أصلاً اللي هو (هانسي فليك Hansi Flick) .. مهم تبقي فاهم أوي في المرحلة دي إن إدارة بايرن ميونيخ مكانتش حاطة تارجيت ل(هانسي فليك) غير إنك تعدل الحال المايل لحد ما نجيب مدير فني أول الموسم الجاي .. يمكن ناس كتير و أخص بالذكر اللي مش ألمان بس بيشجعوا بايرن ميونيخ مكانوش يعرفوا يطلع مين بالصلاة علي النبي (هانسي فليك) ده؟ .. الحقيقة إن الألمان عارفينه كويس لإن الرجل ده كان هو كابتن (شوقي غريب) لمنتخب مصر أيام ما كان ماسكه المعلم (حسن شحاته) .. (هانسي فليك) كان مساعد و الدراع اليمين للمدير الفني (يواكيم لوف Joachim Low) لما الألمان كسبوا بطولة كأس العالم 2014 في البرازيل .. لو لسه بتسأل برده أيوه يعني عمل إيه (هانسي فليك) ده في دنيته قبل ما يمسك بايرن ميونيخ؟ فخليني أحكيلك قصة غريبة أوي.
منتخب ألمانيا و هو رايح البرازيل عشان البطولة جالهم خبر إن (ماركو رويس Marco Rues) جناح بروسيا دورتموند إتصاب و مش حيلعب .. الحقيقة إنت مش متخيل إزاي (يواكيم لوف) كان مخطط إنه يعتمد علي سرعة (رويس) في الهجوم و يمكن عشان كده (هانسي فليك) إقترح حاجة غريبة أوي .. هو إقترح علي (يواكيم لوف) إن ليه لا نخصص 40 دقيقة من كل تمرينة للفرقة قبل أي ماتش في البطولة عشان ندربهم علي الكرات الثابتة؟ .. أول ما الفكرة إتقالت للاعيبه منتخب ألمانيا كلهم بصوت واحد قالوا ياختاااااااااي .. بالنسبة للاعيب الكورة إنك تقوله النهاردة حنتمرن علي الكرات الثابتة فده بيبقي يوم أسود .. يحكي إن (بير ميرتيساكر Per Mertesacker) قلب الدفاع و كابتن أرسنال وقتها و اللي كان ضمن تشكيلة منتخب ألمانيا و يمكن من أكبر اللاعيبه سناً قال يا جدعان في تدريب الكرات الثابتة إحنا بنفضل واقفين نص ساعة نهرش في شعرنا من الملل .. هو الحقيقة مقالش شعرنا هو قال حتة تانية فيها شعر برده بس مشيها شعرنا دلوقتي .. بس نتايج التدريب ده خلت اللاعيبه فعلاً تقدر دماغ (هانسي فليك) .. فاكر ماتش 7-1 في نص النهائي ضد البرازيل؟ .. أول جون جابته ألمانيا كان من كورنر في الدقيقة 11 و يمكن ده الجون اللي فتح الماتش .. ألمانيا في دور المجموعات إتعادلت مع غانا من كرة ثابتة .. كسبت فرنسا 1-0 في في ربع النهائي من كرة ثابتة.
مش دي الحاجة الوحيدة اللي خلت لاعيبه المنتخب يحسوا إن معاهم مساعد مدرب دماغه متكلفة و بيفكر بطريقة مختلفة عن باقي المديرين الفنيين .. يحكي أن كباتن منتخب ألمانيا (فيليب لام Philip Lahm) و (بير ميرتيساكر) كان (هانسي فليك) بيقعد معاهم قبل كل ماتش يسألهم إيه رأيكوا في التشكيلة و إيه رأيكوا في الخطة؟ .. هل أنتوا شايفين إنها صح؟ .. لو شايفينها غلط إيه في رأيكوا الصح اللي يتعمل؟ .. اللي كان (هانسي فليك) بيعمله وقتها سببه إنه كان مقتنع بيه جداً إن أهم حاجة في الشغل هي الثقة .. بمجرد ما اللاعيب أو الموظف حس إن المدير بتاعه بيثق فيه لدرجة إنه يطلب رأيه فدي حاجة بترفع ثقة اللاعيب في نفسه جداً.
بمناسبة نقطة الثقة دي فيه موقف تاني حصل في كأس العالم 2014 برده و كان (بير ميرتيساكر) طرف فيه .. اللي حصل إن ألمانيا لعبت ماتشات دور المجموعات و ماتش دور ال16 ب(فيليب لام) كلاعيب إرتكاز مش باك يمين زي ما هو متعود و كان الباك اليمين اللي بيلعب هو (جيروم بواتينج Jerome Boating) و ده كان معناه إن في الأربع ماتشات بتوع دور المجموعات (ميرتيساكر) لعب أساسي .. في ماتش ربع النهائي قصاد فرنسا (يوكايم لوف) قرر إنه يرجع تاني (فيليب لام) يلعب باك يمين و (جيروم بواتينج) يرجع تاني قلب دفاع و (ميرتيساكر) يقعد علي الدكة .. قبل يوم ماتش فرنسا (يواكيم لوف) و معاه (هانسي فليك) قعدوا مع (ميرتيساكر) عشان يفهموه .. (يواكيم لوف) هو اللي إتكلم الأول و شرحله إنك حتقعد دكة عشان (فيليب لام) و (جيروم بواتينج) حيبدأوا .. طبعاً (ميرتيساكر) بدأ يعترض و يقول طب ليه؟ .. هو أنا قصرت في حاجة؟ .. في لحظة دي (يواكيم لوف) بص ل(هانسي فليك) و قاله كلمه إنت .. (هانسي فليك) بدأ يتكلم مع (ميرتيساكر) براحة و يقوله المشكلة مش فيك هو بس تغيير تكتيكي بس إنت زي الفل و إن شاء الله حترجع تلعب أساسي .. إذا كانت طريقة (يواكيم لوف) في الكلام خلت اللاعيب يحس بالإحباط فالكلام الحلو اللي بيطلع من بق (هانسي فليك) خلته يحس إنه في سابع سما و دي تبقي أهم ميزة في (هانسي فليك) .. جبر الخواطر .. دي مش مجرد كلمة بتتحط في بوست علي سوشيال ميديا .. جبر الخواطر من أهم Tools أو الأدوات اللي في إيد أي مدير شاطر.
جميل أوي الكلام ده .. بس أرجع و أقولك إن رغم كل الكلام الرومانسي اللي أنا لسه قايله ده فالكلام جوه مجلس الإدارة بتاع بايرن ميونيخ إن (هانسي فليك) ده مجرد حد مؤقت جايبينه سد خانة لحد ما الموسم الجاي إن شاء الله ممكن نجيب مدير فني تقيل زي مثلاً (ماوريسيو بوتشتينو Mauricio Pochettino) و الله أعلم حنعرف ندفعله مرتبه العالي اللي كان بياخده في توتنهام ولا لا أو يمكن نعرف نقنع (جوليان نيجلزمان Julian Nagelsmann) إنه يسيب أر بي لايبزج و يجي يمسك الفرقة .. أيا كان فالسر اللي كان عارفه الألمان كلهم إن (هانسي فليك) ماشي ماشي .. إدارة النادي كانت عارفه إن الجماهير مش حيعجبها الوضع .. الناس كلها عارفه إن (هانسي فليك) رجل محترم و علي العين و الراس بس ده ميمنعش إن في ال14 سنة اللي إشتغل فيها في التدريب عمره ما مسك مدير فني لفرقة في الدوري الممتاز .. تجربته الوحيدة كمدير فني كانت في هوفينهايم وقت ما كانوا في دوري المظاليم و إتشال من منصبه في 2005 بعد ما فشل يصعد بيهم دوري ممتاز .. تلف الأيام و تدور الأيام و عايزك تبص بقي علي النص اليمين من الصورة اللي في الأول خالص.
بايرن ميونيخ بداية من يوم 3 نوفمبر 2019 لحد دلوقتي لعبوا 35 ماتش .. كسبوا 32 ماتش .. خسروا ماتش يتيم .. إتعادلوا ماتشين .. جابوا 116 جون و دخل فيهم 26 جون .. معلش زود عليهم لقب الدوري و الكأس و دوري الأبطال .. يعني بتتكلم عن ريكورد مكسب 94% و ده ريكورد أحسن من بتاع بايرن ميونيخ وقت ما كان ماسكهم (بيب جوارديولا Pep Guardiola) و أحب أفكرك إن وقت ما الرجل ده كان ماسكهم الفرقة كانت بتدوس علي وش أجدعها فرقة فيكي يا ألمانيا .. الحقيقة ده أحسن ريكورد يعمله أي مدير فني مسك نادي بايرن ميونيخ من ساعة ما النادي إتعمل .. في دوري أبطال أوروبا هم أول فرقة في التاريخ تكسب ال11 ماتش بتوعها من أول دور المجموعات لحد الفاينال و في السكة جابوا 43 جون .. أظن دلوقتي أنا عارف إن مفيش غير سؤال واحد في دماغك .. إزاي؟ .. هل (هانسي فليك) ده ساحر ولا مشعوذ؟ .. هل (نيكو كوفاتش) كان وحش أوي للدرجة دي؟ .. إيه اللي حصل؟
الحقيقة إن الإجابة بمنتهي البساطة هي إنك عشان تبقي مدير ناجح و أنا هنا بتكلم عن الإدارة بصفة عامة مش بس إنك تبقي مدير فني لفرقة كرة قدم قايمة في الأساس علي نقطتين .. أول نقطة إنك تفهم إنك بتتعامل مع بني أدمين و بالتالي إنت محتاج تتكلم مع الموظفين أو اللاعيبه اللي تحت إيدك كبني أدمين و تفهم هم بيفكروا في إيه و عايزين إيه و يبقي بينك و بينهم نقاش مفتوح و دي حاجة نادر أوي إنك تلاقيها في مدير .. النقطة الثانية و دي اللي أندر من النقطة الأولانية إنك تلاقي مدير يبص للموظفين اللي معاه و يبدأ يشوف هم شاطرين في إيه و يحط خطته علي هذا الأساس .. النقطتين دول هم اللي أنا عايز أتكلم عنهم شوية.
النقطة الأولانية .. أوعي تنسي انك كمدير بتتعامل مع بني أدمين:
عشان تتعلم الدرس ده من (هانسي فليك) عايزك تبص علي إتنين لاعيبه .. الأولاني هو (كينجلسي كومان Kingsly Koman) و الثاني يبقي (مانويل نوير Manuel Neuer) .. عارف إنهم مش الأسامي اللي إنت كنت متوقعها بس إستناني للأخر .. (كومان) جناح شاطر .. هو مش فلتة زمانه بس شاطر .. (كومان) لاعيب إتربي في أكاديمية باريس سانجيرمان بس سواء في ماتش دور الثمانية قصاد برشلونة أو ماتش نص النهائي قصاد ليون ملعبش أساسي .. إذا فجأة من غير لا إحم ولا دستور (هانسي فليك) يلعبه أساسي في ماتش الفاينال و الغريب إن الواد بيؤدي زي الفل و هو اللي بيجيب الجون اللي كسب فرقته .. اللاعيب التاني هو (نوير) .. أنا عارف إن الناس اليومين دول بقي عندهم ذاكرة السمكة بس إسمحلي أفكرك بأيام إنت تقريباً نسيتها اللي هي ما قبل الكورونا .. قبل الكورونا كان فيه كلام إن خلاص كده يا جدعان أيام (نوير) كحارس أساسي لمنتخب ألمانيا خلصت .. دلوقتي فيه سور برلين اللي بحق و حقيقي (أندري تير شتيجين Andre ter Stegen) بتاع برشلونة ..أنا كتبت قبل كده عن (أولي هوينس Ole Hoenes) رئيس نادي بايرن ميونيخ لما طلع هزق المدير الفني للمنتخب (يواكيم لوف) عشان قرر إنه يستبعد (نوير) و يجيب مكانه (تير شتيجين) عشان يبقي هو الحارس الأساسي للمنتخب.
اللي أنا عايز أوصله ليك إن (هانسي فليك) كل اللي هو عمله إنه عطي لكل لاعيب حقنة ثقة .. اللاعيبه القديمة في الفرقة اللي مش بس الناس اللي بتتابع بايرن ميونيخ إنما الألمان عموماً اللي نفسهم يشوفوا منتخبهم بيرجع ينافس تاني بعد ما إتداس علي وشه في كأس العالم 2014 كانوا بيقولوا إن لاعيبه زي (نوير) و (توماس مولر Thomas Muller) و (جيروم بواتينج) خلاص جابت أخرها و مبقاش ينفع علي الأقل إن المنتخب يعتمد عليهم تاني .. الاعيبه القديمة دي (هانسي) كل اللي عمله إنه إداهم جرعة ثقة .. اللاعيبه الصغيرة في السن زي (جوشوا كيميتش Joshua Kimmich) و (ألفونسو ديفيز Alphonso Davies) برده كانوا محتاجين جرعة ثقة و كمان محتاجين إن المدير اللي ماسكهم يقولهم أنا واثق فيكوا .. خليني أقول إن يمكن أكتر إتنين مديرين فنيين بيعرفوا يزرعوا حتة الثقة دي في اللاعيبه بتاعتهم حالياً هم (يورجين كلوب Jurgen Klopp) و دلوقتي (هانسي فليك).
النقطة الثانية .. طريقة اللعب:
خطة لعب بايرن ميونيخ أتفه مما تتخيل .. إحنا حننزل الماتش نخنق الفرقة اللي قدامنا .. المهاجمين بتوعنا حيضغطوا علي المدافعين بتوع الخصم .. لاعيبه خط النص بتاعنا حيبقوا بيتنفسوا في قفا لاعيبه خط النص بتوع الخصم .. المدافعين بتوعنا حيتقدموا فشخ لدرجة إنهم تقريباً حيقفوا علي خط النص .. ده في علم الكورة إسمه Pressing Sequence و ده معناه إن أول لاعيب في خط دفاع بايرن حيبقي بينه و بين الحارس بتاعه اللي هو (مانويل نوير) 40 متر .. ليه هم بيعملوا كده؟ .. عشان لو ربنا كرمهم و عرفوا يقطعوا الكرة يكونوا خدوها في نص ملعب الخصم و بالتالي لاعيبه بايرن متبقاش محتاجة تجري كتير و يتقطع نفسها عشان يجيبوا جون .. علي فكرة سبحان الله يعني متفهمش دي صدفة ولا إيه بس المدربين الألمان هم أكتر ناس بتطبق الفكر ده .. لك أن تتخيل إن أكتر 3 أندية في دوريات أوروبا الكبيرة اللي عملوا Pressing Sequence في الموسم اللي فات كانوا ليفربول و ساوثهامبتون و بايرن ميونيخ و الثلاثة بيدربهم مدربين ألمان (الحقيقة إتنين ألمان و واحد نمساوي بس إحنا حنعتبرهم كلهم ألمان) .. طبعاً إنت عارف إن (يورجين كلوب) بيدرب ليفربول و (هانسي فليك) بيدرب بايرن ميونيخ بس اللي بيدرب ساوثهامبتون إسمه (رالف هوزينهوتيل Ralph Hasenhuttl) و ده النمساوي اللي فيهم.
مش بس كده .. أنا قلتلك إن في المعتاد Pressing Sequence بيكون إن المسافة بين أول مدافع و بين الحارس بتاعه حوالي 40 متر .. لو جيت تشوف مين أكتر 3 فرق في العالم زودت علي حاجز ال40 متر حتلاقيهم فرق ماسكها مديرين فنيين ألمان برده .. بايرن ميونيخ أصحاب الرقم القياسي الموسم ده بPressing Sequence خلت المسافة وصلت 45.5 متر .. وراهم ليفربول ب45.3 متر .. و في المركز الثالث باريس سانجيرمان اللي بيدربهم الألماني (توماس توخيل Thomas Tuchel) بمسافة وصلت 45.1 متر.
حلو أوي الكلام ده .. بس إفرض هم عايزين يدافعوا ويريحوا شوية؟ .. بسيطة هم حيعرفوا يدافعوا و يقفلوا الدنيا في وش الخصم مع العلم إن في أي لحظة ممكن يرزعوهم علي قفاهم هجمة مرتدة .. عمرك شفت خطة لعب أبسط من كده؟ .. هي دي الفكرة .. فرقة بايرن ميونيخ فيها لاعيبه تقيلة فشخ و اللاعيبه التقيلة عشان تديك نتيجة لازم تبقي الدنيا واضحة بالنسبة ليهم و ده الفرق الجوهري بين (هانسي فليك) و بين (نيكو كوفاتش) .. (هانسي فليك) بص علي لاعيبته شافهم شاطرين في إيه و بني طريقة لعبه علي هذا الأساس .. علي بلاطة كده .. (هانسي فليك) مكنش جاي يخترع و عشان كده هو نجح.
يمكن أخر حاجة عايز أختم بيها هي الخناقة اللي دايماً بتشوفها علي سوشيال ميديا لما حد يعمل إنجاز محدش كان متوقعه إن يتسأل دايماً ها بقي هل الحد ده أحسن حاجة حصلت في التاريخ يعني؟ .. بمجرد ما الحكم صفر عشان ينهي ماتش نهائي Champions League و يعلن فوز بايرن ميونيخ بالثلاثية بدأت الناس تخش في مقارنات .. يا تري مين كان أحسن؟ .. فرقة بايرن ميونيخ 2013 ولا بايرن ميونيخ بتاعة السنة دي؟ .. طب مين أحسن فرقة بايرن ميونيخ دي ولا فرقة برشلونة موسم 2008-2009 أيام (بيب جوارديولا) و برده خدوا الثلاثية؟ .. طب في رأيك مين أحسن فرقة بايرن ميونيخ دي ولا فرقة برشلونة 2014-2015 اللي كان ماسكها (لويس إنريكي Luise Enrique) و برده خدت الثلاثية؟
الحقيقة بما إن موضوع المقالة هو (هانسي فليك) فخلينا نقيم أداء الرجل ده وسط المديرين الفنيين اللي سبقوه و اللي خدوا الثلاثية في أول موسم ليهم .. يعني خليني أسألك يا تري مين أحسن: (هانسي فليك) ولا (لويس إنريكي) ولا (بيب جوارديولا)؟ .. الثلاثة زي ما قلت خدوا الثلاثية في أول موسم تدريبي ليهم .. طب إيه الفرق؟ .. يمكن الفرق إن (هانسي فليك) إدارة بايرن ميونيخ كانت بتعتبره مسكن ألم مؤقت .. هو إستلم الفرقة في نص الموسم .. محدش إداله 100 مليون دولار و قاله بعزق براحتك .. بس اللي يمكن مخليني أقول إن (هانسي فليك) فعلاً مدير فني بيفهم و بني أدم محترم مش النتائج أو البطولات قد ما هو رأي الناس فيه .. لما (بير ميرتيساكر) إتسأل إيه رأيه في (هانسي فليك) كان رده إنه بني أدم فعلاً متواضع و منطقي و بيعرف يتعامل مع البني أدمين .. بني أدم واثق في نفسه لدرجة إنه ممكن يسألك طب إيه رأيك و إيه الغلط اللي أنا عملته .. الثقافة دي لما بتبقي موجودة في مدير فهي بتبقي زي ريحة البرفان الحلوة اللي بتلاقيها إنتشرت في المكان كله.
واحد تاني زي (أرني فريدريش Arne Friedrich) و ده كان لاعيب يمكن مش مشهور بس كان ضمن تشكيلة منتخب ألمانيا اللي لعبت أمم أوروبا 2008 و كأس العالم 2010 و دلوقتي هو مدير نشاط الكرة في نادي هيرتا برلين و اللي قال عن (هانسي فليك) إنه بني أدم واضح و صريح خصوصاً لو حد بينتقده .. بيقول عنه كمان إنه مش من المديرين اللي كل حاجة عنده الشغل الشغل الشغل .. هو بيعرف إزاي يتعامل مع اللاعيبه .. نقطة التعامل مع اللاعيبه دي اللي قالها (أوليفر كان Oliver Kahn) حارس المرمي الأسطوري لبايرن ميونيخ و دلوقتي عضو في مجلس الإدارة و اللي لما إتسأل عن رأيه في (هانسي فليك) قال إنك نادر أوي لما تلاقي مدير عارف إيه الكلمة الصح اللي تطلع من بقه في الأوقات الصعبة .. أرجع تاني و أأكد علي نقطة جبر الخواطر.
(ميرتيساكر) كان بيقول إن (هانسي فليك) دايماً وقت ما كان مساعد (يواكيم لوف) في المنتخب إن أول ما الماتش يخلص يروح يسلم علي اللاعيبه اللي قعدت علي الدكة .. (ميرتيساكر) كان بيستغرب أوي من الحكاية دي إن أول ما الحكم يصفر يلاقي (يواكيم لوف) و (هانسي فليك) راحوا يسلموا علي اللاعيبه اللي ملعبتش قبل اللاعيبه اللي في الملعب .. دي النقطة اللي خلت (يورجين كلوب) في المكانة اللي هو فيها دلوقتي .. دي النقطة اللي مخليه سيرة (يوب هاينكس Jupp Heynckes) لما تتقال في النادي الناس تفتكره بكل خير .. الناس إتعلمت إن الإدارة هي مش فن إزاي تعصر الموظفين عشان يطلعوا شغل .. الإدارة هي فن إزاي تخلي الموظف مبسوط و هو شغال عشان يطلعلك أحلي شغل.
المصادر:
- فيديو بعنوان How Hansi Flick took l Munich from 7th in the Bundesliga to a Champions League title نشر علي YouTubeوده لينك الفيديو:
https://www.youtube.com/watch?v=1kigXtSBAs4&t=315s - مقالة بعنوان Hansi Fleck’s treble with Bayern Munich unparalleled in the modern era نشرت في موقع جريدة Deutsche Welle و ده لينك المقالة الأصلية:
https://www.dw.com/en/opinion-hansi-flicks-treble-with-bayern-munich-unparalleled-in-the-modern-era/a-54668150 - مقالة بعنوان Hansi Fleck’s attention to detail helped mastermind Germany’s 7-1 demolition of Brazil نشرت في جريده The Daily Mail و ده لينك المقالة الأصلية:
https://www.dailymail.co.uk/sport/football/article-8640897/Hansi-Flick-helped-mastermind-7-1-rout-Brazil-Bayern-Munich-charging-European-glory.html - مقالة بعنوان The Muller whisperer: How a personal touch revived Bayern Munich نشرت في جريدة The New York Times و ده لينك المقالة الأصلية:
https://www.nytimes.com/2020/08/14/sports/soccer/bayern-barcelona-champions-league.html - مقالة بعنوان Hansi Fleck: The latest advocate of the German high press نشرت في موقع Stats Perform و ده لينك المقالة الأصلية:
https://www.statsperform.com/resource/hansi-flick-the-latest-advocate-of-the-german-high-press/
