لبنان .. حكاية إنفجارين في قلب بيروت.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/sfp63c0h11as

الدنيا دي أوضة و صالة .. ده حقيقي علي فكرة .. انت مش متخيل كم الأحداث اللي بتحصل في حياتنا اللي لما تفكر فيهم شوية تلاقيهم ليهم علاقه ببعض .. خد عندك لبنان مثلاً .. يوم 14 فبراير 2005  أهل بيروت صحيوا علي صوت إنفجار رهيب عرفوا بعد كده إنه إستهدف إغتيال رئيس الوزراء وقتها (رفيق الحريري) الله يرحمه .. تلف الأيام و تدور الأيام و يصحي أهل بيروت برده علي صوت إنفجار مرعب يوم 4 أغسطس 2020 عرفوا بعد كده إنه إنفجار شحنة نترات أمونيوم فضلت متسابه في مستودع في مرفأ بيروت لمدة 6 سنين كامله محدش عارف يعملوا فيها إيه .. إنفجارين بينهم تقريباً 15 سنة و صدقني لو قلتلك إن الإنفجارين دول ليهم علاقة ببعض و العلاقة دي تتلخص في كلمة واحدة .. المصلحة.

تعالي نبدأ من أخر حاجة اللي هو إنفجار 4 أغسطس .. اللي إحنا عارفينه زي ما قلت إن شحنة 2,750 طن نترات أمونيوم فضلوا مركونين في مستودع في مرفأ بيروت 6 سنين كاملة لحد ما فرقعوا .. المفروض بحق ربنا يعني إن كارثة زي دي يطير فيها رقاب و هنا انا عايز أعيش دور الفنان (أحمد ذكي) الله يرحمه لما قال كلنا مذنبون ولا أستثني أحدا .. كارثة إنفجار مرفأ بيروت دي مينفعش بأي حال من الأحوال يشيلها بني أدم واحد .. الكلام دلوقتي علي إن كبش الفداء اللي حيشيل الليلة هو رئيس الوزراء (حسن دياب) .. حق ربنا إن كل المسئولين في الحكومة اللبنانية في الست سنين اللي فاتوا لازم يتحاسبوا .. من الرئيس لرئيس الوزراء لوزير المواصلات لرئيس هيئة المواني للناس اللي ماسكه الجمارك .. و هي دي المشكلة .. لو جيت تكر الخيط من أوله لأخره عشان تكتب أسامي المسئولين حتلاقي نفسك غصب عنك بقيت بتجيب في سيرة كيان عامل زي الأهلي كده في مصر اللي هو حزب الله .. مش بقول إن الأهلي زي حزب الله لا سمح الله .. انا بقول إن زي ما الأهلي ككيان له مريدين و محبين مستعدين يعملوا أي حاجة عشان يدافعوا عن إسمه فبرده حزب الله في لبنان له ناس لو حد جرب ينتقد الحزب تلاقيهم بيصرخوا في وشه إخرس يا كلب .. إحنا حزبنا أشرف من الشرف .. ليه هم بيعملوا كده؟ ليه بيدافعوا عن كيان مسئول زيه زي جهات كتير عن كارثة إنفجار مرفأ بيروت؟ .. الإجابة كلمة واحدة .. المصلحة.

طبيعي إن تسأل نفسك طب هو كل ده حصل إزاي؟ .. هل اللبنانيين صحيوا من النوم لقوا إن الطبقة الحاكمة مينفعش حد يحاسبها؟ .. يعني هم دخلوا الحمام مثلاً و خرجوا لقوا إقتصاد بلدهم رايح في ستين داهية كده بفعل عوامل التعرية؟ .. الحقيقة هي لا .. فيه نقطة في تاريخ لبنان تقدر تعتبرها النقطة اللي بدأت عندها الدنيا تبوظ .. النقطة دي هي نفس اللي بيحصلك لما تتجوز و تدوق أكل مراتك لأول مرة و تكتشف إنك لما كنت بتزورها و أنتوا مخطوبين إن دي كانت أمها اللي بتطبخ و بالتالي انت محتاج من هنا و رايح تتغدي عند مامتك قبل ما تروح عشان أكل مراتك غير صالح للإستخدام الأدمي .. النقطة دي في حياة اللبنانيين كانت سنة 1975 .. قبل السنة دي لبنان كانت حماده و بعدها بقت حماده تاني خالص .. قبل السنه دي لبنان كان بيتقال عليها جنة التهرب الضريبي علي الأرض .. لو انت تاجر مخدرات أو تاجر سلاح و عايز تغسل فلوسك كل اللي انت محتاج تعمله إنك تروح لبنان تحط فلوسك في أي بنك و هم حيتصرفوا .. فجأة الحرب الأهلية قامت و هنا انت محتاج تفهم نقطة و هي إنك مهما حاولت تقرأ في تاريخ الفترة دي من لبنان و مهما حاولت تعرف عن الحرب الأهلية اللبنانية فصدقني وفر مجهودك .. دي حرب محدش عارف هي قامت ليه ولا حد عارف هي خلصت ليه .. دي حقيقة علي فكرة .. مفيش أي سبب منطقي إن الحرب دي تقوم و برده مكنش فيه أي سبب منطقي إنها تخلص .. بس انا أقدر أقولك هي خلصت علي إيه لإن إجابة السؤال ده إحنا عارفينه؟ .. شطور عرفت الإجابة اللي برده من كلمة واحدة .. المصلحة.

سنة 1989 اللبنانيين بيصحوا علي خبر إن بلدهم إتقسمت زي ما الست والدتك بتقسم الفرخة عشان كل واحد ياخد منابه .. الإتفاق ده مهم تبقي فاهم إنه إتعمل برعاية سعودية سورية  .. طب ده كان معناه إيه؟ .. اللي كان ماسك سوريا وقتها كان (حافظ الأسد) الله يرحمه اللي هو أبو (بشار) اللي ماسك دلوقتي .. الرجل ده كان مفتري و دي حاجة مينفعش حد يجادلني فيها .. بس في نفس الوقت كان رجل عملي جداً .. قدام الناس هو بيحكم علي راس حزب علماني إسمه حزب البعث .. قدام الناس حزب البعث السوري يعتبر النص الثاني من حزب البعث العراقي اللي بيرأسه (صدام حسين) الله يرحمه .. قدام الناس المفروض إن (حافظ الأسد) و (صدام حسين) مش بس صحاب دول أخوات بس كل ده إتغير بداية من سنة 1989 و خصوصاً السنة اللي وراها لما حصل الغزو العراقي للكويت والسوريين رضوا علي نفسهم إنهم يبقوا ولو إسماً جزء من التحالف الدولي اللي كانت مهمته هي طرد العراق من الكويت .. معلش انا سرحت بيك شوية بس كان مهم إني أحطك في سياق الأحداث عشان تبقي فاهم بس معني اللي بقوله .. المهم .. الإتفاق اللي تم برعاية السعوديين و السوريين كان بيقول الأتي .. لبنان حيحكمها إتنين .. الأولاني هو الرجل بتاع السعودية في لبنان اللي هو (رفيق الحريري) .. الثاني يبقي الرجل بتاع سوريا في لبنان اللي هو (غازي كنعان) .. (رفيق) كان بيزنس مان .. (غازي) كان مدير المخابرات .. الأولاني كان المخ .. الثاني كان العضلات .. الفكرة إن لبنان تفوق بسرعة من أثار الحرب الأهلية و إنها بأي حال من الأحوال مينفعش تعيش التجربة المره دي تاني.

فضلت الدنيا ماشية في هدوء من سنة 1989 لحد سنة 2003 .. (رفيق) كان بيزنس مان شاطر و كان رئيس وزراء شاطر .. صحيح هو مخلاش لبنان كيان إقتصادي واقف علي رجله بس تقدر تقول إنه خلي القرش يجري في اإيد اللبنانيين و عشان كده فعلياً سنه 2003 (رفيق) كان هو لبنان و لبنان كانت هي (رفيق) .. في السنة دي حصلت حرب الخليج الثالثة أو غزو أميركا للعراق و هنا بدأت الدنيا تبوظ .. إذا كانت سوريا سنة 1990 رضت إنها تبيع العراق و تنضم للتحالف الدولي ضد (صدام حسين) إلا إن (بشار الأسد) رفض إنه يبقي جزء من غزو العراق .. وقتها إدارة الرئيس (جورج بوش الإبن) كان ماسكها ناس غلاوين أوي .. الناس دي قالت عليا الطلاق لأجيب مناخيرك الأرض يا سوريا .. الامريكان بدأوا يضغطوا بشكل رهيب عشان يجبروا السوريين يسحبوا قواتهم من لبنان .. القوات السورية في لبنان كان دورها إنها تحافظ علي الإتفاق اللي إتعمل سنة 1989 و اللي مخلي لبنان يدوبك متصلبه و ماسكه في نفسها .. سنة 2004 أميركا بتجبر مجلس الأمن إنه يطلع القرار رقم 1559 اللي بيقول إن لازم سوريا تسحب قواتها من لبنان .. الدنيا باظت خالص يوم 14 فبراير سنه 2005 لما إتقتل (رفيق الحريري) بإنفجار سيارة مفخخة في قلب بيروت.

طبعاً حضرتك بتسأل دلوقتي مين اللي قتل (رفيق الحريري) الله يرحمه؟ .. أو بمعني أخر مين اللي له مصلحه إنه يتقتل؟ .. فيه ناس بتقول إن حزب الله هو اللي قتله .. ناس تانية بتقول لا إسرائيل هي اللي قتلته .. ناس تالتة بتقول طب إيه رأيكوا بقي إن السعوديين هم اللي قتلوه بس انا أقدر أقولك الحقيقة اللي مينفعش حد يجادل فيها و هي إن محكمة العدل الدولية كانت فاتحه تحقيق بقاله أكتر من 5 سنين عشان يعرفوا مين اللي قتل (رفيق)؟ .. النيابة قدمت رسمياً الإتهام ل3 بني أدمين و الثلاثة محسوبين علي حزب الله اللي هم (سليم عياش) و (حسين العنيسي) و (أسد صبرا) .. في الأخر خالص المحكمة طلعت حكمها بإن (سليم عياش) هو الوحيد اللي ثبت إدانته بإنه هو العقل المدبر لعملية الإغتيال و الإتنين التانيين خدوا براءة.

الفكرة إن أكيد (سليم عياش) مكنش من نفسه كده حيقرر إنه يخلص من (رفيق الحريري) .. قرار زي ده أكيد جه من فوق و هي دي المشكلة .. مفيش دليل يثبت إن قيادة حزب الله هي اللي عطت الأمر ل(سليم عياش) .. علي فكرة .. المحكمة مقالتش إن (سليم عياش) كان شغال لوحده .. لا خالص هي مقالتش كده .. هي قالت إن كان معاه (مصطفي بدر الدين) و ده كان القائد الميداني لقوات حزب الله و اللي مات في مايو 2016 في سوريا و كان معاه برده واحد إسمه (وسام عيد) قيادي جوه حزب الله و ده برده إتقتل سنة 2008 في تفجير سيارة مفخخة و غالباً الإسرائيليين هم اللي قتلوه .. انا عارف إن الموضوع مسلي بالنسبة لناس كتير بس خلينا منقفش كتير قدام النقطة دي .. اللي أقدر أقوله ليك إن مقتل (رفيق الحريري) و اللي بفكرك إنه كان الرجل بتاع السعودية في لبنان عمل كذا حاجة:

• أول حاجة إن موجة الغضب الشعبي في الشارع اللبناني أجبرت سوريا إنها فعلاً تسحب قواتها من لبنان زي ما الأمريكان كانوا عايزين.
• ثاني حاجة إن إتفاق سنة 1989 بقي كأنه لم يكن موجود و حل محله إتفاق تاني ناس بتسميه التحالف الثلاثي و الإتفاق ده مهم أوي تبقي فاهم إن السعوديين مكانوش جزء منه.
• حرب سنة 2006 بين حزب الله و إسرائيل في جنوب لبنان و وراها سيطرة مليشيات حزب الله علي بيروت في 2008 فعلياً هي اللي خلت السيد (حسن نصر الله) الأمين العام لحزب الله هو أهم بني أدم في لبنان.

حاول تفهم إن إغتيال (رفيق الحريري) خلي سوريا و حزب الله يضربوا كرسي في الكلوب و يقولوا بااااااس لبنان بقت بتاعتنا و ده بقي واضح أوي من الإتفاق اللي الحكم في لبنان بقي ماشي عليه و اللي قايم علي مثلث أضلاعه هم الأتي .. أول ضلع هي حركة أمل و دي حركة مسلحة شيعية تقدر تقول إنها النسخة الدايت من حزب الله و حركة أمل دي ماسكها بني أدم إسمه (نبيه بري) و بناء علي الإتفاق فهو بقي رئيس البرلمان اللبناني مدي الحياة ولا تخرج قبل أن تقول سبحان الله .. الضلع الثاني كان حزب الله و اللي ولاءهم تقدر تقول إنه لإيران أكتر منه لسوريا و دي مشكلة حتبان كمان شوية .. الضلع لثالث كان (ميشيل عون) اللي كان زمان بينه و بين حزب الله ما صنع الحداد بس دلوقتي بقي حبيبهم و بناء عليه سنة 2006 السوريين خلوه يبقي رئيس لبنان .. إذا كان اللي داس علي زرار تفجير القنبلة اللي قتلت (رفيق الحريري) كان من حزب الله إلا إن اللي قال لحزب الله انا عايز أخلص منه كان (بشار الأسد) .. ناس كتير متعرفش إن في اغسطس 2004 حصل إجتماع بين (بشار) و (رفيق) و تقريباً الإتنين كانوا حيمسكوا في خناق بعض .. غزو أميركا للعراق غير حاجات كتير .. أميركا كانت قالبه جامد علي سوريا و ده في الوقت اللي (رفيق) كبيزنس مان كان شايف إن مصلحة لبنان إنها تترمي في حضن أميركا و دي كانت الحاجة اللي سوريا مش مستعدة تقبلها .. جري الشريط 6 شهور من بعد الإجتماع ده و كان (رفيق) إتقتل.

ده معناه إن التحالف الثلاثي في إيده البرلمان ممثلة في (نبيه بري) .. في إيده الرئاسة ممثلة في (ميشيل عون) .. في إيده الحكومه ممثلة في حزب الله اللي هو يعتبر أقوي حزب سياسي في لبنان .. مفاضلش غير منصب رئيس الوزراء و اللي لو فكرت فيها حتكتشف إنه فعلياً منصب ملوش أي ستين لازمة .. يمكن عشان كده السوريين رموا عظمة رئاسة الوزراء للسعوديين اللي مسكوا فيها و قالوا باااااس إحنا عايزين إبن الرجل بتاعنا اللي إتقتل اللي هو (سعد الحريري) يبقي هو رئيس الوزراء .. السوريين قالوا أمين .. شبطانين في منصب رئاسة الوزراء خدوه إشبعوا بيه.

ناس كتير بتقع في غلطة إنها تتخيل إن لبنان بيحكمها نظام الكوتة الطائفية .. ده مش حقيقي .. هي صدفة مش أكتر .. صادف إن التحالف الثلاثي اللي إتعمل عشان يحكم لبنان في 2005 كان مبني علي إن حركة أمل الشيعية تمسك البرلمان و الرئاسة تروح ل(ميشيل عون) المسيحي الماروني و يفضل منصب رئاسة الوزراء اللي السعودية شبطت فيه و أصرت إن اللي يمسكه يبقي (سعد الحريري) ابن (رفيق) واللي لأجل الصدف يعني كان مسلم سني .. تاني .. اللبنانيين مقعدوش مع بعض في جلسة و كل طائفة خدت حتة من التورتة .. ده محصلش .. الإتفاق كان سياسي بحت .. سوريا و رجالتها في لبنان قعدوا مع بعض و شافوا مين يمسك إيه عشان الدنيا تمشي زي ما (بشار الأسد) عايز .. صادف إن أغلبية كراسي البرلمان راحت لحزب الله الشيعي .. منصب رئيس البرلمان راح ل(نبيه بري) الشيعي برده .. الرئاسة راحت ل(ميشيل عون) الماروني المسيحي .. و فضلت حتة من التورتة اللي هي رئاسة الوزراء مسكها مسلم سني.

من هنا و إقتصاد لبنان .. و مش بس إقتصادها .. كل حاجة فيها بدأت تروح في ستين داهية .. حزب الله بيكسب الإنتخابات مش لإنه حلو .. هو بيكسب عشان زيه زي الأهلي و زيه زي الزمالك مريدينه عايزينه يكسب مع إنه فيه العبر و بيعمل مصايب بس مش مهم .. أهم حاجه الكيان .. رئيس برلمان متعين مدي الحياة و وجوده في منصبه مرتبط بإن حزب الله يفضل يكسب الإنتخابات .. مؤسسة رئاسة عايشه في اللالاند .. و وسط ده كله رئيس وزراء ملوش أي صلاحيات .. الوزراء بتوعه مش هو اللي بيعينهم .. ميقدرش يعترض ولا يغير .. أبسط مثال علي كده هو إن شخصية زي (رياض سلامي) يفضل ماسك منصب محافظ البنك المركزي اللبناني من سنة 1992 لحد دلوقتي .. طب إزاي؟ ..  .. المشكلة مش بس في كده .. إذا كان السوريين إلي حد ما كانوا مش عايزين لبنان تقع فبداية من 2011 لما قامت الثورة في سوريا و بدأت سوريا تخرج بره لبنان و حل محلها إيران و الوضع في لبنان بقي زي الزفت .. التدخل الإيراني في لبنان فعلياً بوظ كل حاجة في البلد .. سنة 2016 رجعوا (ميشيل عون) تاني يبقي رئيس .. سنة 2017 ولي العهد السعودي (محمد بن سلمان) حب قال يعني يعمل للإيرانيين كش ملك فحبس (سعد الحريري) في الرياض عشان خاطر يجبره يقدم إستقالته بس الحركة فرقعت في وشه و دي الحقيقة قصة محتاجه تتحكي لوحدها في مرة تانية.

كل اللي حكيته ده يفسرلك ليه اللبنانيين لما لقوا الرئيس الفرنساوي (إيمانويل ماكرون Emanuel Macron) جاي يزورهم بعد الإنفجار بتاع مرفأ بيروت سمعنا علي سوشيال ميديا إن ناس هناك بتقول ليه لا ترجع لبنان تاني تحت الإنتداب الفرنساوي .. تفتكر ده ليه؟ .. عشان الناس دي فعلياً إقتنعت إن مفيش أمل للتغير .. حزب الله حيفضل في السلطة و حتي قراره مش منه ده من إيران .. البرلمان حيفضل في إيد ايران برده .. مفيش أي أمل للتغيير من جوه .. حط ده قصاد الوضع الإقتصادي اللي زي الزفت للبنان وانت حتفهم بنفسك ليه اللبنايين بقوا متعلقين في قشاية (ماكرون) حتي لو هو فعلياً ميقدرش يعملهم حاجة.

حط نفسك قصاد المواطن اللبناني البسيط و حاول تستوعب حجم معاناته .. هو عايش في بلد بتستورد كل شيء و مش بتصدر غير المغنيات .. بلد تعتبر من أكتر دول العالم المديونه .. زمان و زمان ده اللي هو من 10 سنين مثلاً أيام الله يرحمه (رفيق الحريري) الموضوع كان مبلوع و يمكن بالعكس كان جاي بفايدة علي الإقتصاد اللبناني .. أيام (رفيق الحريري) معدل النمو في الناتج الوطني الإجمالي GDP بتاع لبنان و اللي تقدر تمثله بإنه إجمالي كل الفلوس اللي بتخش للإقتصاد اللبناني في السنة كان بيزيد بمعدل ما بين 8-9%  .. في حالة إنك بتسأل هي الفلوس دي كانت بتيجي منين فاللي بيحصل إن لبنان وقتها كان ليها مهاجرين في حتت كتير في العالم خصوصاً الخليج .. أي حد مصري شغال في الخليج شاف بعنيه إزاي الموظفين اللبنانيين واخدين وضعهم أوي هناك و الناس دي كانت بتحول فلوس بالدولارات لأهاليهم في لبنان .. البنوك اللبنانية بتاخد الدولارات دي تحطها عندها و بتحط عليها نسبة فايدة فلكية و عشان نسبة الفايدة الفلكيو دي فبقي أي حد جايب فلوسه بالحرام أحسنله إنه يحطها في بنوك لبنان .. دلوقتي الكلام ده بح خلاص .. عشان أبقي منصف برده و مراعي ضميري قدام ربنا فيه أسباب السياسيين اللبنانيين ملهمش دعوة بيها زي الحرب الأهلية السورية و سعر برميل البترول اللي إتخسف بيه الأرض .. دلوقتي الدولارات اللي بتخش لبنان مبقتش زي الأول .. شوية و معدل النمو في GDP قل بقي ما بين 1-2% و دلوقتي وصل للصفر خالص .. إلزق المعلومة دي جنب معلومة إن إذا كان GDP بتاع لبنان سنوياً ممكن يوصل 55 مليار دولار فدي بلد حضرتك مديونه ب85 مليار دولار .. هو يبان رقم صغير و ده حقيقي هي المشكلة إن الرقم ده يمثل 150% من إجمالي الفلوس اللي بتخش البلد في السنة .. بإختصار شديد البلد مفيهاش فلوس .. فهمت ليه بقي هم مقضيينها بوس و أحضان في (ماكرون)؟

المصادر:

مقالة بعنوان Beirut’s devastating blast has not shaken the ruling class’s grip on Lebanon نشرت في جريدة The Guardian و ده لينك المقالة الأصلية:
https://www.theguardian.com/commentisfree/2020/aug/25/lebanon-beirut-ruling-class

مقالة بعنوان Hezbollah member found guilty over killing of Rafik Hariri نشرت في جريدة The Guardian و ده لينك المقالة الأصلية:
https://www.theguardian.com/world/2020/aug/18/hezbollah-member-found-guilty-over-killing-rafik-hariri-lebanon

مقالة بعنوان In Lebanon, Macron dangles sanctions to push for change نشرت في جريدة The New York Times و ده لينك المقالة الأصلية:
https://www.nytimes.com/2020/09/01/world/middleeast/lebanon-macron-sanctions.html

مقالة بعنوان Explainer – Why is Lebanon in an economic and political mess? نشرت في موقع بورصة Nasdaq و ده لينك المقالة الأصلية:
https://www.nasdaq.com/articles/explainer-why-is-lebanon-in-an-economic-and-political-mess-2019-11-06