لينك التسجيل الصوتي للمقالة علي Sound Cloud:
https://soundcloud.com/user-112011687-312727988/pdwfavdfqpsk?utm_source=clipboard&utm_medium=text&utm_campaign=social_sharing
يحكي أن الإخوة الكوايتة حبوا يلاقوا حل لمشكلة قارفاهم في عيشتهم و هي إن المرتبات اللي الحكومة بتدفعها للموظفين بتوعها بتاكل حوالي نص الميزانية العامة الكويتية .. أنا عارف إن ده رقم مبالغ فيه حتي بمعايير الخليج بس ده حقيقي .. السنة اللي فاتت حصل فعلاً إن الحكومة الكويتية ركبت ماكينات البصمة اللي بتتحط علي الباب عشان الموظفين يسجلوا حضور و إنصراف .. أنا عارف إنك مش فاهم إيه العلاقة بس أصبر معايا حتفهم دلوقتي .. جري الشريط 3 شهور و إذا بمساعد وزير المالية الكويتي اللي إسمه (خليفه حماده) يطلع يقول إن فيه 5000 موظف حكومي كويتي قدموا إستقالتهم .. ليه؟ .. أصلهم مبيجوش الشغل و لما لقوا إن فيه مكن بيسجل الحضور و الإنصراف قدموا علي معاش مبكر.
اللي منكوا مسافرش الخليج و معاشش هناك (و أنا منكوا) إحتجت شوية وقت عشان أستوعب اللي أنا قريته ده بس بالنسبة للي منكوا سافر الخليج و إشتغل هناك شاف بنفسه إن زي ما يكون فيه إتفاق غير معلن بين العائلات المالكة و الشعوب الخليجية و الإتفاق ده بيقول بمنتهي البساطة إن أنا كمواطن خليجي مليش رأي في الحكم و مفيش إنتخابات ولا حتي ليا صوت في أي حاجة بس ده في مقابل إن الحكومة ملزمة إنها لما أتخرج بالسلامة من كليتي تلاقيلي شغل و تديني مرتب كويس يعيشني ملك زماني .. الإتفاق ده فضل شغال و محدش بيشتكي لحد ما جت سنة 2014 و حصل الإنهيار العالمي في أسعار البترول .. ساعتها الحكومات الخليجية لقت إن فاتورة المرتبات بقت بتبلع الميزانية و عشان الميزانية تتضبط لازم مشكلة المرتبات تتعالج و ده شيء منطقي .. المشكلة إن عشان حكومات الخليج مش حكومات منتخبة و مش ديموقراطية و مش جايه بإرادة الشعب فهي متقدرش تخل بالإتفاق الغير معلن اللي إتكلمنا عنه و هنا بيجي دور العك اللي بتعمله حكومات الخليج دلوقتي.
دلوقتي أغلب شركات القطاع الخاص في الخليج عموماً و في السعودية خصوصاً بتدي مرتبات قليلة مقارنة بالحكومة و لإنها بتدي مرتبات قليلة فأغلب اللي بيشتغلوا فيها أجانب .. اللي يضحكك إن الحكومة السعودية في سعيها لحل مشكلة البطالة قامت هبدت الهبدة التمام و قالت لشركات القطاع الخاص هناك مشي الموظفين الأجانب بتوعك و إبدأي عيني سعوديين اللي هي السياسة اللي إنت ممكن تكون عارفها بإسم سعودة الإقتصاد لدرجة إنهم طلعوا قرارات بإن فيه شغلانات معينة بقي ممنوع يتعين فيها أجانب و حتي الأجانب اللي عايشين هناك بقي يتعمدوا يقرفوهم في عيشتهم و يزودوا الضرايب عليهم و علي عائلاتهم عشان يجبروهم يمشوا من البلد .. طب ليه بقول إن ده هبد؟ .. لإن فيه شركات قطاع خاص كتير في السعودية حتبطل شغل و حتفلس لو أٌجبرت إنها تعين سعوديين بمرتبات قريبة من المرتبات الحكومية ده غير إن أي شاب سعودي صعب أوي يقبل يشتغل شغلانة بنص المرتب اللي حيتعرض عليه في الحكومة و بضعف ساعات الشغل .. فيه واحدة إسمها (مونيكا مالك) شغالة كبيرة المحللين الإقتصاديين في بنك أبوظبي التجاري الدولي عملت حسبة بسيطة كده إن السنة اللي فاتت فيه 466,000 أجنبي مشوهم من شغلهم في السعودية في مقابل إن عدد المواطنين السعوديين اللي إتعين مكانهم معداش ال103,000.
فيه رسم بياني عندك بالأسود إسمه Public Sector Dominance ده بيوريك نسبة الناس اللي شغالين في القطاع العام .. حتلاقي إن علي مستوي العالم المتوسط بتاع الناس اللي شغالة في القطاع العام مش بيعدي 7% من إجمالي الناس اللي شغالة عموماً في حين إن في الامارات الرقم بيوصل 9% و هوبا في السعودية بينط جامد ل33% .. الرسم البياني ده يقدر يوريك إن السعودية لبست نفسها في الحيط و أنا مش ببالغ في الوصف ده .. دول زي قطر و الكويت عدد سكانها صغير و الأرباح اللي بتخش الميزانية العامة للدولة كبيرة و بالتالي الناس دي قدامها وقت تلاقي حل للمشكلة دي لكن السعودية وضعها حرج أوي .. السعودية مشكلتها بمنتهي البساطة في الأرقام .. إنت عندك 70% من إجمالي تعداد سكان المملكة سنهم أقل من 30 سنة يعني بتتكلم إن إن شاء الله علي سنة 2022 فيه أكتر من 1.2 مليون شاب سعودي المفروض إن الدولة تلاقيلهم شغل و ده لوحده بيشكل 4 أضعاف إجمالي تعداد سكان قطر كله .. فهمت بقي ليه السعودية لبست في الحيط؟ .. أزيدك من الشعر بيت .. طبعاً مش غريب عليك إن اللي ماسك السعودية دلوقتي مش الملك (سلمان) إنما إبنه ولي العهد (محمد بن سلمان) لإنه هو الحاكم الفعلي للمملكة و الرجل ده هبد هبداية كده إنه عامل خطة لإزاي يخلي الإقتصاد السعودي يبطل يعتمد علي عائدات النفط و يبدأ يعتمد علي شركات القطاع الخاص و دي الخطة اللي إنت ممكن تكون عارفها بإسم رؤية 2030 أو Vision 2030 اللي هو حاجة كده زي الإقتصاد الألماني او الياباني .. سامعك يا اللي بتضحك ورا بس إستني معايا شوية.
(محمد بن سلمان) اللي هو عايز يقنعنا إنه جامد زحليقة في علم الإدارة و هو اللي حيقود السعودية و الخليج كله لبر الأمان شايف بنفسه إن الحكومة السعودية معينه تلتين سكان المملكة في القطاع العام و شايف بنفسه إن من سنة 2014 و إنهيار أسعار النفط و العجز في الميزانية عمال يزيد يوم عن يوم لحد ما بقي 16% .. هو شايف كل ده و عارف إن أول خطوة هي إنه يبدأ يقلل شوية من فاتورة المرتبات اللي بتتدفع لموظفين حكوميين ملهمش لازمة و مش بيعملوا حاجة .. عشان بس أحطك في الصورة .. السعودية كل سنة بتصرف 926 مليار ريال منهم 440 مليار ريال رايحين بس لمرتبات الموظفين الحكوميين .. هو شاف كل ده و إذا بأول خطوة له عشان يقلل من الإنفاق الحكومي إنه بدأ يقلل من المشاريع الإستثمارية اللي الحكومة بتعملها مع إنه عارف إن ده حيزود من معدلات البطالة مش حيقللها و مع إنه عارف برده إن خطته الإقتصادية اللي المفروض إنها حتطبق علي 2030 بتقول إنه محتاج يضخ إستثمارات بقيمة 4 ترليون دولار عشان يخلق 6 مليون فرصة عمل هو عارف كل ده و رغم كده قرر يقلل من كم و حجم المشاريع اللي بتتعمل.
تاني خطوة إنه بدأ يشيل الدعم الحكومي علي البنزين و الكهرباء و المياه و بدأ يطبق ضريبة القيمة المضافة .. الناس إستحملت و عدت و هو بدأ يدخل فلوس زيادة للميزانية .. لحد دلوقتي حلو .. لما الأخ (محمد بن سلمان) بدأ يفكر يقلل شوية من العلاوات اللي بتتدفع للموظفين الحكوميين إذا به بعد كام شهر لما لقي الشارع بيغلي قام عامل زي (علاء ولي الدين) الله يرحمه في فيلم الناظر صلاح الدين لما قال لف و أرجع تاني .. الرجل قام قرر ينزل علاوة 266 دولار لكل موظف و هوبا كل الفلوس اللي هو لمها من الضرايب و رفع الدعم راحت تاني .. مش بقولك عايز يقنعنا إنه جامد زحليقة في إدارة الأزمات.
فيه قصص كتير إنت ممكن تسمعها من زمايلك اللي شغالين في الخليج إن إزاي ممكن تلاقي موظف سعودي مثلاً مبيجيش إلا 3 مرات بس في الأسبوع .. فيه موظفة بتحكي إن في يوم جاتلها في الشغل زيارة من الوزير السعودي فلقت إن جه ناس زمايلها عمرها ما شافتهم قبل كده .. فيه شباب سعودي كتير معندوش أي مشكلة إنه يقعد في البيت بعد ما يتخرج لحد ما يجيله تعيينه الحكومي أصل من وجهة نظره إيه اللي يخليه يشتغل في القطاع الخاص و يتعب نفسه بدل ما ممكن يستني الشغلانة الحكومي اللي مرتبها أعلي و ساعات الشغل فيها أقل و بياخد أجازات أكتر و عمال ياخد في علاوات و مكافئات .. يحكي أن رجل كويتي إسمه (وليد السعيد) عمل Interview لشاب كويتي عنده 22 سنة فأول سؤال الشاب سأله هو أنا بالصلاة علي النبي كده لما أطلع معاش حتدوني كام؟ .. هل تفتكر إن الثقافة دي حتتغير قريب؟ بالتأكيد لا .. هل فيه حلول؟ اه فيه حلول.
واحد زي (نادي قباني) مدير أبحاث مركز بروكينجز في الدوحة بيقول إن يمكن حكومات الخليج محتاجة تلاقي طريقة تانية عشان تعيش مواطنيها عيشة كريمة غير إنها تلاقيلهم شغل في القطاع العام .. عندك حتة زي ولاية ألاسكا الأميريكية مثلاً اللي فكرت إنها تجيب عائدات النفط تقسمها علي عدد السكان و كل مواطن ياخد نصيبه فلوس في جيبه كل شهر .. إيطاليا عملت نفس الفكرة مع إن إيطاليا معندهاش بترول إن بقي عندها Basic Income يعني كل مواطن بياخد مرتب من الحكومة سواء بقي هو شغال أو لا .. المشكله إن مفيش حد بيفكر ولا بيناقش ولا بيعمل أي حاجة في الخليج و الوقت عمال يجري و المصيبة بتكبر .. و ده اللي بيقوله (خليفه حماده) اللي بفكرك إنه شغال مساعد وزير المالية الكويتي اللي قال إنه لما إستلم شغله سنة 1987 كان عدد الموظفين الحكوميين الكوايتة مبيعديش ال700 بس دلوقتي الرقم وصل 3500 في حين إن بحسبة بسيطة حتكتشف إن كم الشغل المطلوب من الموظفين مزادش أوي يعني لدرجة إن الحكومة تعين العدد ده في الوقت القليل ده.
المصدر:
مقالة بعنوان A ghost army of workers is paid to do nothing in the Gulf يعني جيش من الموظفين الأشباح بياخد فلوس عشان ميعملش حاجة في الخليج نشرت في مجلة Bloomberg و ده لينك المقالة الأصلية:
https://www.bloomberg.com/news/articles/2018-06-20/workers-paid-to-do-nothing-a-ghost-army-that-haunts-gulf-rulers
