مشكلة إن بلد يبقي عندها سلاح جو فيه كوكتيل طيارات جايين من كذا حتة عامل زي بالضبط إنك تبقي رجل معاك فلوس فإنت معاك عربية رينو فرنساوي .. مراتك معاها هيونداي كوري .. إبنك معاه فولكس فاجن باسات ألماني .. عيلة واحدة ب3 عربيات من 3 دول مختلفة يعني 3 ميكانيكية مختلفين .. يعني 3 كهربائية مختلفين .. فكك من الفلوس اللي بتتدفع أنا قايل من الأول إنك رجل غني .. أنا بتكلم عن معاناة الصيانة والأعطال .. إنت حتتفشخ مشاوير .. مصر عندها مشكلة شبه دي شوية فيما يتعلق بسلاح الجو بتاعها .. زي ما في التشبيه اللي قلته إنت رجل غني عندك 3 عربيات من 3 دول مختلفة فبرده مصر عندها طيارات من 3 دول مختلفة:
- من فرنسا إحنا جايبين 24 طيارة رافال Rafale وعلي فكرة إحنا عايزين نطلب زيهم كمان وحنفهم ليه كمان شوية .. من فرنسا برده عندنا 15 طيارة Mirage 2000.
- من أميركا احنا عندنا 20 طيارة F-16 Block 52 .. عندنا 10 طيارات هليكوبتر AH-64D Apache Longbow ومقدمين علي طلب عشر طيارات زيهم .. من أميركا عندنا برده 8 طيارات إنذار مبكر E-2C Hawkeye وركز مع الطيارات دي شوية عشان مهمة.
- من روسيا إحنا عندنا 46 طيارة MiG-29M .. زود عليهم 46 طيارة هليكوبتر Ka-52 Alligator ومعاهم برده عدد محدش عارفة بالضبط من طيارات هليكوبتر Mi-24 .. وأخيراً وليس أخراً طلبنا ناخد 24 طيارة Su-35S Super Flanker بس اللي إستلمناه منها كان 5 طيارات بس.
المفروض يعني إن الطيارات دي كلها تكون بتعرف تتكلم مع بعض بس طبعاً ده مبيحصلش .. المفروض إن الطيار اللي بيطير بطيارة الإنذار المبكر E-2C Hawkeye يعرف يبعت رسالة لزميله اللي بيطير بطيارة MiG-29M إن روح إلحق زمايلك اللي واحد فيهم بيطير بطيارة F-16 والثاني بيطير بطيارة رافال بس زي ما قلت ده مبيحصلش لإن الطيارات الأمريكاني بتنزل بنظام إتصالات مختلف خالص عن الروسي .. الحل إن البلد اللي عندها كوكتيل الطيارات ده يبقي عندها شبكة إتصالات بتعرف تخلي الطيارات دي تتكلم مع بعضها .. في حالة مصر فالشبكة دي إسمها RISC 2 ودي إختصار Radar Integration and Surveillance Command Center يعني مركز قيادة الإستطلاع وتكامل الرادارات .. الشبكة دي عملتها شركة بنها للصناعات الأليكترونية ومصر عرضت الشبكة دي معرض Egypt Defense Expo اللي إتعمل سنة 2018.
الشبكة دي فعلياً قايمة علي 3 حاجات .. أول حاجة نظام إسمه IFF ودي إختصار Identification Friend or Foe وده معمول عشان شبكة الإتصالات دي تبقي عارفه هي الطيارة اللي طايرة في السما دي عدو ولا حبيب عن طريق إنها تلقط الإشارة اللاسلكية اللي طالعة منها والنظام ده بتعمله شركات كتير وإحنا بنشتريه وبندمجه في شبكة RISC2 .. تاني حاجة هي تفادي أي تأخير في نقل المعلومات Delay in Data Sharing وعشان تعمل ده فإحنا معتمدين علي طيارات Rafale لإن الطيارات دي Operating System بتاعها أولاً هو Link 16 Data Links وثانياً هو بيعرف يتواصل مع الطيارات اللي حتي من تصنيع روسي وعشان كده إحنا طالبين 24 طيارة كمان .. ثالث حاجة هو قمر الإتصالات طيبة واحد TIBA-1 اللي مصر أطلقته في نوفمبر 2019.
المصدر:
- مقالة بعنوان How is Egyptian Air Force able to operate its fleet of mixed origins? نشرت في مجلة Defense News وده لينك المقالة الأصلية:
https://www.defensenews.com/battlefield-tech/c2-comms/2020/10/28/how-is-the-egyptian-air-force-able-to-operate-its-fleet-of-mixed-origin/#:~:text=BEIRUT%20%E2%80%94%20Egypt’s%20fleet%20of%20military,an%20Egyptian%20armed%20forces%20expert.&text=RISC2%20was%20introduced%20during%20the,control%2Dand%2Dcommand%20tasks.
