يطلع إيه S-300؟ وإيه الفرق بينه وبين S-400؟ .. دي أسئلة أنا بعتبرها من الأسئلة الوجودية اللي ناس كتير بتسألها لنفسها بس محدش عنده ليها إجابة .. يعني مثلاً الأتراك خسروا طيارات F-35 عشان كانوا شبطانين في S-400 فأظن السؤال المنطقي دلوقتي هو إيه الفشيخ في S-400 لدرجة إن الأتراك يقولوا تولع F-35 بس ناخدها؟ .. بداية إنك تعرف إجابة كل الأسئلة دي إني أرجعك بالزمن لحرب أكتوبر 1973 .. لو جت سيرة حرب أكتوبر قدامك مع أي حد غالباً إسم صواريخ سام حيتقال .. الشعب المصري كله بقي عارف إن الدفاع الجوي بتاعنا في الحرب كان فشيخ عشان كان تحت إيدنا صواريخ إسمها سام وكنا جايبينها من روسيا .. كلمة سام دي أصلاً مكنش الإسم اللي الروس عطوه للصواريخ دي .. سام دي تبقي SAM ودي إختصار Surface-to-Air Missile يعني صواريخ أرض- جو .. أهم صاروخ كان تحت إيدنا واللي الروس كانوا معتمدين عليه كان S-75 واللي الأمريكان سموه SA-2 .. الروس عملوا S-300 عشان يحل محل S-75 وتقدر تقول إن S-300 دخلت الخدمة في القوات المسلحة الروسية سنة 1978 .. السؤال دلوقتي: إيه الأوبشنز الزيادة اللي كانت موجودة في S-300؟
أهم ميزة إن S-300 كانت بيتقال عليها Multichannel يعني بيقدر ينشن علي كذا هدف طايرين في الجو مع بعض ويضرب عليهم كلهم صواريخ في وقت واحد .. مش بس كده .. الروس من زمان وهم بيحلموا بمنظومة دفاع جوي تقدر تحركها من مكان لمكان بإنك تربطها براس ترلة وتسوقها توديها لأي حتة تأمنهالك .. أول نسخة من S-300 كان إسمها S-300PT .. حرف P ده كان مقصود بيه إن النسخة دي حتخدم في سلاح الدفاع الجوي الروسي .. النسخة دي عبارة عن علبتين تقال اوي كل علبة بتتجر بترلة .. العلبة الأولانية هي الرادار .. العلبة الثانية كانت بيتقال عليها TEL ودي إختصار Transporter, Erector, Launcher اللي هم الصاروخ ومنصة الإطلاق نفسها .. لحد كده فالS-300PT كانت ثورة في الدفاع الجوي .. كانت الفنكوش اللي بقي بحق وحقيقي .. يمكن العيب الوحيد كان إن الرادار بتاعها كان علي قده شوية وكمان الصاروخ المستخدم كان 5V55 وكان مداه يدوبك 75 كيلومتر .. شوية ونزل Upgrade بتاعه سنة 1982 وكان إسمه S-300PS ويمكن الفرق بينه وبين النسخة الأقدم كان الصاروخ المستخدم اللي بقي 5V55R اللي مداه بيوصل 90 كيلومتر .. النسخة اللي بتتصدر من S-300PS إسمها كان S-300PMU .. زي ما قلت إن حرف P ده المقصود منه إن المنظومة دي حتشتغل مع سلاح الدفاع الجوي الروسي .. في الوقت ده كان بيتم تطوير نسخة إسمها S-300F ودي كانت حتروح للقوات البحرية ونسخة تانية إسمها S-300V كانت حتروح للقوات البرية وده إتعمل مخصوص لمواجهة الصواريخ الباليستية.
سنة 2007 الروس عرضوا التعديل الثالث أو الUpgrade الثالث لS-300 وكان إسمه S-300PMU-3 وعشان الإسم لقوه كبير أوي فقالك نسميه S-400 وهي دي النقطة .. S-400 في حد ذاته مفيهوش إضافة كبيرة .. S-400 نقطة قوته إنه بيقدر يستخدم 4 صواريخ مختلفة بمدي طيران مختلف والأربع صواريخ دول كانوا مستخدمين في النسخ القديمة من S-300 .. يعني بدل ما كنت حتجيب S-300PT وتجيب كمان S-300F ومعاهم S-300V فإنت حتجيب S-400 يقوم بدورهم كلهم وفوق ده كله إضرب المدي بتاع الصواريخ والرادار في إتنين مثلاً .. أول نسخة بتتصدر من S-300 اللي هي S-300PMU-1 مدي الصواريخ بتاعتها بيوصل 150 كيلومتر .. الUpgrade بتاعها اللي هو S-300PMU-2 مدي الصواريخ بتاعتها 200 كيلومتر .. عايزك تعرف إن صواريخ 40N6 اللي بتستخدمها S-400 مداها بيوصل 400 كيلومتر .. ده يوريك ليه الأتراك حيموتوا ويبقي معاهم S-400 .. بطارية S-400 واحدة بتعمل شغل 3 بطاريات S-300 لا وكمان بضعف المدي .. يا بلاش.
المصدر:
- مقالة بعنوان Russia’s anti-air S-400 system can kill almost anything in the sky نشرت في مجلة The National Interest وده لينك المقالة الأصلية:
https://nationalinterest.org/blog/reboot/russias-anti-air-s-400-system-can-kill-almost-anything-sky-163287
