الطريق الي الأندلس .. مجد الإمبراطوريات إتبني علي التعيينات الصح (الجزء العاشر).

قليل أوي لما تلاقي بني أدم ربنا حطه في موقع سلطة و تلاقيه عارف أهمية المثل الشعبي اللي بيقول لو صبر القاتل علي المقتول كان مات لوحده .. لما بتبقي في موقع سلطة بتبقي بين نارين .. النار الأولانية إنك بتبقي عارف إن مش كل الناس عاجبها إن انت اللي بتحكم و بالتالي بتبقي عايز تبان إنك جامد فشخ وعشان كده بتبقي مستعجل تخش في أي خناقة تكسبها عشان توريهم إنك في الشدة شديد وفي القوة قوي أوي أوي .. النار الثانية بتاعة إنك بتبقي مش عايز تخش في خناقة بدري أوي كده و بتكون عايز الأول تفهم حجم المصيبة اللي انت فيها قبل ما تقرر تعمل إيه.

سنة 1132 (أبو محمد عبدالمؤمن) مسك قيادة الموحدين بس من اليوم الأول و هو كان عارف و فاهم كويس حقيقة الوضع علي الأرض .. لا قوات المرابطين تقدر تطلع جبال أطلس عشان تخلص علي الموحدين .. ولا الموحدين عددهم ينفع إنه يخليهم ينزلوا من الجبال و يواجهوا المرابطين في معركة مفتوحة .. 8 سنين من الصبر أو 8 سنين من البيات الشتوي و اللي الحقيقة تفسير ده سهل أوي إنك تفهمه .. صحيح كان فيه ناس جوه قيادة الموحدين بتزن فوق دماغ (أبو محمد عبدالمؤمن) إنه ينزل و يحارب الكفار لإن خليني أبقي صريح معاك إن في المرحلة دي الموحدين بقوا شايفين المرابطين زيهم زي المسيحيين الكاثوليك في الأندلس .. شوية كفار علي بعض .. بس (عبدالمؤمن) كان عارف إنه لو نزل حيشيل أوبح.

بعد 8 سنين الصبر جاب نتيجة و المرابطين لقوا إنهم محتاجين يفكوا حصارهم علي جبال أطلس لإن فيه كذا ثورة ولعت في كذا حتة في المغرب .. بمجرد ما ده حصل عينك ما تشوف إلا النور .. الموحدين نزلوا من الجبال وبقوا بيدوسوا علي أي حد قدامهم و خليني أبقي واضح برده إن الدنيا مشيت معاهم زي ما انت تكون بتلعب بلاي ستيشن مع صاحبك و تلاقي كل شوطة بيشوطها بجون .. ساعتها انت بترمي الدراع و بتحلف إنك مش لاعب معاه تاني .. سنة 1145 حصلت المواجهة المنتظرة بين الموحدين و المرابطين و مات فيها أمير دولة المرابطين في المغرب وكان إسمه (تاشفين بن علي) .. سنة 1146 الموحدين خدوا مدينة فاس .. سنة 1147 خدوا مدينة مراكش عاصمة دولة الرابطين في المغرب و اللي أسسها كان (يوسف بن تاشفين) .. بعدها بسنة يعني بتتكلم عن سنة 1148 الموحدون عملوا في المرابطين زي ما العباسيين عملوا في الأمويين بعد معركة الزاب الأكبر وحكينا ده في جزء قبل كده .. عملية تطهير ممنهجة لقتل أي حد من قيادات دولة المرابطين في المغرب .. أكتر من 30,000 بني أدم أتعدموا في المجزرة دي.

أرجع و أقولك إن في المرحلة دي المسلمين كانوا بيتعاملوا مع بعض علي أساس إنك لو مش معايا تبقي كافر و دمك حلال .. الموحدون وقتها كانوا ماشيين بمبدأ كله يهون في سبيل السلطة و انا مش عايز أبان إني بتجني عليهم لإن خلينا نبقي صرحا مع بعض إن مش لوحدهم اللي كانوا كده .. المسلمين في المرحلة دي رفعوا سلاح علي بعض أكتر ما رفعوه علي المسيحيين .. لمدة 15 سنة و الموحدون عمالين يتوسعوا في شمال أفريقيا .. سنة 1158 خدوا تونس .. سنة 1159 وصلوا لطرابلس الغرب عاصمة ليبيا دلوقتي.

الموحدون و إسبانيا .. تسمع عن (مروان محسن)؟

مين فينا ضغطه معلاش من (مروان محسن)؟ .. مش مهم تبقي أهلاوي أو غير أهلاوي .. (مروان) كلاعيب كورة تحسه متصمم عشان يجيبلنا الضغط و السكر كمشجعين كرة قدم عموماً و السبب هو أهم عيب فيه .. تضييع الفرص السهلة .. زي ما (عصام الشوالي) دايما بيقول .. لو تضيع تستقبل .. لو جاتلك فرص سهلة و مستغلتهاش و ضيعتها حيخش فيك جوان و حتخسر الماتش .. الكلام ده يمشي في كرة القدم و يمشي في السياسة كمان.

في الفترة من أول 1148 لحد 1159 كان الموحدون بيتوسعوا في شمال أفريقيا وكانت قدامهم الأندلس فرصة متاحة إنهم ياخدوها وبرده مستغلوهاش .. في الفترة دي الأندلس كانت عاملة زي لما الجون يبقي فاضي .. أي حد يحط رجله الكرة حتخش في الجون بس ده محصلش .. في السنين دي كانت الأندلس دخلت مرحلة ممالك الطوائف الثانية .. دولة المرابطين إنتهت .. كل مدينة أندلسية بقت ماشية بدماغها و بتحارب في أخواتها .. بس إذا كان الموحدين كانوا عايشين في اللالاند و عاجباهم رمال صحراء شمال أفريقيا فالأندلسيين كانوا واخدين بالهم كويس أوي من اللي بيحصل .. زي ما (توم كروز Tom Cruise) في شخصية (إيثان هانت Ethan Hunt) في سلسلة Mission: Impossible قال Desperate Times, Desperate Measures يعني لما الدنيا تقفل في وشنا مفيش مانع نحط إيدينا في البيبي فالأندلسيين رفعوا سماعة التليفون و طلبوا مساعدة الموحدين .. أيوه زي ما انت سمعت .. تجربة (يوسف بن تاشفين) في الأندلس كلاكيت تاني مرة .. أكشن.

سنة 1147 ودي نفس السنة اللي الموحدين خدوا فيها مدينة مراكش عاصمة دولة المرابطين في المغرب بعتوا قوات للأندلس .. سنة 1148 خدوا مدينة إشبيلية و اللي لسنين حتفضل عاصمة دولة الموحدين في الأندلس .. طبعاً مش محتاج أقولك إن بمجرد ما الموحدين بعتوا قوات للأندلس و الممالك المسيحية في الشمال خدت بالها بس أرجع و أقولك إحنا النهاردة في مود (مروان محسن) .. أهم شخصية في الممالك المسيحية في الوقت ده كان (ألفونسو السابع Alfonso VII) وده كان ماسك مملكة ليون قشتالة Leon Castille واللي مات سنة 1157 .. علي فكرة الرجل ده زي (ألفونسو السادس) ما عمل وقت ما (يوسف بن تاشفين) وصل الأندلس كان بيخطط إنه ياخد جيش محترم عشان يطرد الموحدين بره الأندلس .. هوبا الرجل مات .. الرجل عمل نفس الغلطة الأزلية إنه قسم مملكته بين عياله .. إبنه الكبير خد مملكة ليون و إبنه الصغير خد مملكة قشتالة و طبعاً مسكوا في خناق بعض.

ده كان معناه إن الموحدين بقوا بالضبط زي (مروان محسن) .. انت منفرد بالجون .. و لنفترض إن اللي واقف في الجون كمان (شريف إكرامي) يعني لو قلتله بص العصفورة حتلاقيه بيبص مكان ما شاورت و يسيب الجون .. هاتها بقي .. جيب جون .. ضيعها برده .. الموحدون كان ليهم قوات في الأندلس .. الممالك المسيحية ماسكة في خناق بعض .. عندكوا جيش فشيخ تقدروا تسحبوه من المغرب لإسبانيا و تكتبوا إسمكوا في التاريخ للابد .. ضيعوا الفرصة برده .. بداية من 1160 و انت طالع كان جنوب غرب الأندلس تحت إيد الموحدين و لما جم يتوسعوا أكتر لقوا إن فيه لقمة واقفالهم في الزور .. لا مش الممالك المسيحية .. واحد إسمه (أبو عبدالله محمد بن سعد بن مردنيش) وده يبقي واحد من ملوك الطوائف وكان بيحكم مدينة مورسيا Murcia و قواته قدرت تصد قوات الموحدين .. فضل الوضع كده لحد ما خليفة دولة الموحدين (أبو محمد عبدالمؤمن) قرر ياخد فتح الأندلس جد .. يقال إن (أبو محمد عبد المؤمن) حشد جيش وصل عدده فوق ال100,000 مقاتل .. جيش خطوط الإمداد بتاعته لوحدها وصل طولها 25 كيلومتر .. جيش فشيخ يقدر يدوس علي وش كل ممالك الأندلس .. سنة 1163 الجيش ده وصل جبل طارق و لسه حيعبر قضاء ربك نفذ و توفي (أبو محمد عبدالمؤمن).

أرجع تاني لنقطة دولة المؤسسات اللي قلتها في الجزء اللي قبل كده .. في دولة المؤسسات الحاكم بيسلم حاكم .. مش مهم إن الحاكم يموت لإن حيجي وراه حد تاني يكمل شغله .. دولة الخلفاء الراشدين كانت دولة مؤسسات .. كان ممكن بعد وفاة سيدنا (أبوبكر الصديق) رضي الله عنه الفتح الإسلامي للعراق و إيران يتفض بس سيدنا (عمر بن الخطاب) رضي الله عنه كمل وراه .. في حالة دولة الموحدين و من قبلها دولة المرابطين دي مكانتش دول مؤسسات .. بمجرد ما الحاكم بيموت كل خططه وكل طموحاته وكل إستراتيجياته بتموت معاه .. بعد وفاة (أبو محمد عبدالمؤمن) جه وراه إبنه (أبو يعقوب يوسف) .. (أبويعقوب يوسف) ده شخصية تستحق إنك تقف قدامها الحقيقة .. يمكن لو كان بيحكم دولة في العصر اللي إحنا عايشين فيه ده كان زمانه حاكم إسمه إتحفر في التاريخ .. هو رجل مدني بكل ما تحمله الكلمة من معني .. هو كان حاكم إشبيلية لحد ما تولي هو قيادة دولة الموحدين بعد وفاة أبوه سنة 1163 وكان عنده وقتها 25 سنة بس مش معني كده إنه كان معندوش خبرة سياسية لإن زي ما قلتلك هو كان حاكم إشبيلية .. هي مشكلته إنه مش بتاع حروب .. عشان كده قلتلك إنه لو كان بيحكم دولة في وقتنا دلوقتي كان زمانه شاطر أوي لإن بيبقي عندك وزير دفاع هو اللي بيتولي قيادة الجيوش .. بس زمان الحاكم كان هو القائد السياسي للبلد وكمان القائد العسكري و دي أكتر حاجة هو مكنش بيعرف يعملها.

(أبو يعقوب يوسف) بدأ حكمه بحملة عسكرية محققتش حاجة جديدة سنة 1165 .. سنة 1172 الدنيا ضحكت في وشه لما (أبو عبدالله محمد بن سعد بن مردنيش) مات وعشان زي ما قلتلك زمان مكنش فيه حاجة إسمها دولة مؤسسات فبمجرد ما مات كل الأرض بتاعته راحت للموحدين .. المنطق إن الموحدين ينطلقوا بقي .. خلاص اللي كان واقف في زوركوا مات .. بس لو ده رأيك فارجوك متنساش إني في البداية خالص انا  وصفت دولة الموحدين في الأندلس بإنها (مروان محسن) .. برنس تضييع الفرص السهلة .. فين و فين سنة 1184 يعني بعد 12 سنة كاملة من وفاة (بن مردنيش) تلاقي (أبو يعقوب يوسف) خد جيشه وراح ياخد مدينة سانتاريم Santarem ودي المدينة اللي بسببها قامت الحرب البونيقية الثانية .. المهم إن الحملة دي دي كانت متخططة بشكل زي الزفت لدرجة إن مش بس قوات الموحدين إتهزمت ده كمان (أبويعقوب يوسف) اتصاب و مات بعد كده متأثراً بجراحه.

اللي مسك دولة الموحدين بعديه هو (أبو يوسف يعقوب) وعشان هو عارف إنك حتتلخبط بين إسمه و بين إسم اللي قبله فهو سمي نفسه (المنصور) .. السياسة وقتها كانت كالاتي .. بيموت الحاكم و بيجي حاكم جديد .. الناس بتقول تعالي نجرب الحاكم الجديد فتلاقيهم بيثوروا عليه عشان يعرفوا أخره .. تحس إن الناس كانت بتتعامل مع الحكام زي تعامل اليوتيوبرز دلوقتي مع أي موبايل بينزل أو حتي أي عربية .. مش واحد بس ياخد الموبايل يجربه .. لا تلاقي واحد جرب أداءه و نزل فيديو .. واحد تاني عشان يجيب لايكات أكتر قام مجرب يرمي الموبايل في الحيطة و ينزل فيديو .. واحد ثالث قالك طب ما نجرب نرميه في المياة و ينزل فيديو .. فجأة تلاقي نفسك داخل علي YouTube تتفرج علي Review بتاع موبايل تلاقي خمسين فيديو لناس من أول ما بتطلع الموبايل من علبته لحد ناس بتجرب تدوس علي الموبايل بعربيات عشان تشوفه حيتكسر ولا لا.

(المنصور) إستلم الحكم سنة 1184 وعايزك تعرف إن الدنيا مهدتش في دولة الموحدين إلا سنة 1190 يعني بعد 6 سنين .. لك أن تتخيل 6 سنين من الحرب الأهلية .. 6 سنين من الموارد اللي راحت في الحرب دي بما فيهم فيه كام مليون إتصرف و كام عسكري مات كان ممكن يتحطوا في فتح الأندلس .. ال6 سنين دول كانوا كافيين جداً إن الممالك المسيحية تشم تفسها و تبني نفسها .. الممالك المسيحية وقفت علي رجلها لدرجة إنهم سنة 1189 يعني قبل نهاية الحرب الأهلية في دولة الموحدين بسنة واحدة بس واحدة منهم اللي هي مملكة البرتغال خدت مينة سيلفاس Silvas .. صحيح إن سنة 1190 إنتهت الحرب الأهلية و الموحدين بعتوا جيش ياخد تاني المدينة من إيد البرتغالين سنة 1191 بس ده كان أقصي حاجة الموحدين يقدروا يعملوها .. مواردهم العسكرية أستنفذت لدرجة إنهم ميقدروش يعملوا حملة عسكرية جديدة و كبيرة في الأندلس.

الوضع ده خلي دولة الموحدين تمضي إتفاقية سلام مع الممالك المسيحية في الأندلس .. أيوة زي ما قريت .. عشان بس تعرف إن الموحدين كانوا ظالمين المرابطين .. عشان تعرف إن الحكم و السياسة بيخلوك غصب عنك تقدم تنازلات .. عشان متتحمقش أوي كده و تقول انا ححكم بشرع الله وتقعد تكفر أي حد بيختلف معاك في الرأي .. السياسة نجاسة ودي أهم قاعدة .. علي فكرة إتفاقية السلام دي مكملتش كتير و إنتهت فعلياً سنة 1194 وده حيخلينا نروح للمرحلة الثانية من حكم الموحدين للأندلس.

معركة الأرك .. لما (مروان محسن) يجيب جون:

سنة 1194 ملك مملكة  قشتالة Castille وقتها كان إسمه (ألفونسو الثامن Alfonso VIII) اللي مش بس قالك إتفاقية السلام دي مش عاجباني ده كمان بدأ يهاجم الأراضي اللي حولين مدينة إشبيلية اللي بفكرك إنها كانت عاصمة الموحدين في الأندلس .. بمجرد ما خليفة الموحدين (المنصور) جاله الخبر وهو في المغرب قال حلو .. (ألفونسو) غلط و انا كنت مستنيه يغلط .. يوم 1 يونيو 1195 جيش الموحدين نزل علي ساحل الأندلس في مدينة طريفة الساحلية .. يوم 22 يونيو الجيش وصل مدينة إشبيلية وبعدها وصل مدينة قرطبة و قابل تعزيزات جاتله من المدينة و بدأ يتحرك لجوه إسبانيا .. هنا بقي انت محتاج درس سريع أوي في جغرافيا و تضاريس شبه جزيرة إيبيريا عشان بس تبقي معايا في الصورة.

عشان حضرتك لو مكان (المنصور) و جيشه و عايز تروح من قرطبة في جنوب إسبانيا لحد مملكة قشتالة في هضبة ميسيتا الوسطي Meseta Central فحضرتك المفروض تعبر سلسلة جبال قاسمة إسبانيا بالنص إسمها جبال سييرا-مورينا Sierra Morena .. وسط الجبال دي فيه ممر عبارة عن وادي مايل بزاوية حادة شوية إسمه ديسبينا-بيروس Despenaperros .. الممر ده هو التذكرة الوحيدة اللي حتوديك من جوه الأندلس لحد الأرض بتاعة الممالك المسيحية في وسط و شمال إسبانيا .. ممر ديسبينا –بيروس ده الرومان كانوا عارفينه .. أهل قرطاج لما جم يعملوا مستعمرة ليهم في إسبانيا كانوا عارفينه .. المسلمين لما فتحوا الأندلس كانوا عارينه و دلوقتي انت عارفه .. يوم واحد يوليو 1195 قوات (المنصور) عبرت الممر ده و وصلت فعلياً لهضبة ميسيتا الوسطي.

(المنصور) كان عارف إن المواجهة يا حتتم دلوقتي يا مش حتيجي خالص .. في الوقت ده الممالك المسيحية كانت بتتجمع في جيش موحد .. (ألفونسو الثامن) كان خد قواته من مدينة طليلطية Toledo وكان المفروض إنه يستني قوات (ألفونسو التاسع Alfonso IX) ملك مملكة ليون و (سانشو السابع Sancho VII) ملك مملكة نافار Navarre .. سهلة أهي .. إستني زمايلك وخشوا الخناقة سوا .. بس حاجة في دماغ (ألفونسو الثامن) قالتله هو انت يعني عويل ناقص إيد ولا رجل .. انت متخيل المجد اللي مستنيك لو قدرت انت لوحدك إنك تصد قوات الموحدين؟ .. ده انت لو عملت كده بابا الفاتيكان حيحط صورتك علي سقف كنيسة القديس بطرس في روما .. الرغبة المريضة في المجد و إنه يسرق اللقطة خلته بدل ما يستني راح لوحده يواجه جيش (المنصور) بره أسوار مدينة ألاركوس Alarcos أو مدينة الأرك يوم 18 يوليو 1195.

(ألفونسو الثامن) رجل مش بيحب الهري الكتير .. هو بيحب يخلص بسرعة ومش بيحب تضييع الوقت .. ده بيخليه دايما رجل مستعجل زي ما انت شفت بدل ما يستني تعزيزات زمايله راح لوحده يواجه الموحدين .. ده كمان خلاه في معركة الأرك حب يخلصها بدري بدري زي ما يكون وراه مشوار بعد الظهر عايز يلحقه .. هو رص قواته صفين .. الصف الأول كان الخيالة الثقيلة بتاعته و الصف الثاني كان المشاة .. عارف إنك مستغرب بس إتقل و حفهمك اللي حصل.

(المنصور) علي الناحية الثانية كان جاي معاه منتخب مش جيش .. جيشة كان كوكتيل من كذا حتة وده خلاه يقسم الجيش ده 3 مراحل زي ما انت تخش تلعب Call of Duty لأول مرة في حياتك فتلاقي فيه 3 مستويات اللي هم Easy و Medium و Hard .. (المنصور) كان مذاكر (ألفونسو) أكتر ما (الفونسو) كان مذاكره .. حط نفسك مكان (المنصور) للحظة .. انت كنت متوقع تلاقي قدامك 3 جيوش مش جيش واحد فده معناه إن (ألفونسو) ده رجل متسربع .. ده معناه برده إنه غالباً هو اللي حيهاجم الأول .. التكتيك العسكري هو لعبة نفسية أولاً و أخيراً خلي بالك .. (المنصور) رص قواته علي هذا الأساس إنه يستقبل الضربة الأول و بعد كده يرد هو:

• المستوي Easy ده كان الصف الأول و دول كانوا مشاة خفيفة ورماة من قبيلة زناتة و دي واحدة من القبائل بتاعة شمال أفريقيا.
• المستوي Medium وده كان الصف الثاني .. في نص الصف حط قوات مشاة من قبيلة هنتاتة ودي برده واحدة من قبائل شمال أفريقيا .. علي شمالهم كانت قوات مشاة من العرب اللي جايين برده من شمال افريقيا .. علي شمالهم كانت قوات المشاة بتاعة الأندلس سواء اللي جاية من قرطبة أو إشبيلية.
• المستوي Hard وده الصف الثالث وكان القوات الخاصة للموحدين من الفرسان الثقيلة.

المعركة مشيت زي ما (المنصور) كان راسملها بالضبط .. (ألفونسو الثامن) أمر بهجوم كاسح للخيالة بتاعته داس علي وش الصف الأول بتاع جيش الموحدين .. الفرسان التقيلة وصلت للمستوي الثاني و بدأوا يضغطوا عليهم و كانوا خلقوا فعلاً ثغرات كتير أوي في صفوفهم .. في المرحلة دي (ألفونسو) أمر قوات المشاة بتاعته إنها كمان تتقدم و تضغط أكتر علي قلب جيش الموحدين .. هنا حصل اللي (ألفونسو) مكنش عامل حسابه .. الموحدين ركنوا الأوتوبيس .. لأكتر من 3 ساعات و قوات المشاة بتاعة الصف الثاني صامدة .. ـكتر من 3 ساعات و جيش المسيحيين مفشوخ من التعب .. كل ده و الصف الثالث من جيش الموحدين متحركش أصلاً .. لما الأمر بتاع (المنصور) راح لقوات الصفوة بتاعته إنها تخش تخلص علي المعركة كان مصير جيش (ألفونسو) إتحسم .. الحرس الشخصي بتاع (ألفونسو) جروه من علي الأرض عشان ينقذوه وشاف بعنيه إزاي جيشه تقريباً مفضلش منه عسكري .. بس الهزيمة العسكرية لجيش قشتالة دي حمادة و الخساير السياسية دي حمادة تاني خالص.

الإتنين اللي كان المفروض (ألفونسو الثامن) يستناهم اللي هم (ألفونسو التاسع) ملك ليون و (سانشو السابع) ملك نافار قالوله يعني إحنا مثلاً شوية هلافيت علي رأي (عنبة) يعني ولا إيه .. (ألفونسو التاسع) مثلاً مضي معاهدة سلام مع الموحدين و ساعدوه في إنه يهاجم مملكة قشتالة .. مملكة نافار موصلتش لمرحلة إنهم يضربوا قشتالة بس هم كمان مضوا إتفاقية سلام مع الموحدين و طلعوا بره اللعبة .. سنة 1198 (المنصور) ساب الأندلس كلها و رجع تاني مراكش في المغرب وهنا انت فعلياً محتاج تهدي شوية و تسأل نفسك السؤال المهم .. ليه؟ .. ايه اللي يخلي (المنصور) يمضي إتفاقية سلام مع الممالك المسيحية؟ .. انت عسكرياً أقوي منهم .. هم أساساً مش طايقين بعض .. دي كانت فرصتك انك تاخد إسبانيا كلها فارجع تاني للسؤال بتاع ليه؟

(المنصور) فعلياً لقي نفسه في نفس الوضع بتاع الرئيس (محمد أنور السادات) الله يرحمه في حرب أكتوبر 1973 .. عسكرياً انت كسبان علي الأرض .. سياسياً العرب كلهم وراك .. عمر ما إسرائيل كانت متحاصرة كده بس اللي انت محتاج تفهمه إن عبور قناة السويس زي ما وراك إزاي إسرائيل مش هي الجيش الذي لا يقهر فهو برده وراك إن الجيش المصري له قدرات محددة مينفعش يتخطاها و هي خطوط الإمداد .. حاول تبصلها كأنك مثلاً مهندس عندك تسليمة تقيلة مضغوطة و حتضطر إنها تخليك تبات في الشغل جمعة و سبت .. هو وضع مش لطيف خصوصاً لو انت رجل متجوز لكن لو انا قلتلك إن الشركة اللي انت شغال فيها وفرت ليك مرتبة بسوست .. مخدات و بطاطين .. وفرت ليك وجبة كل يوم من المحل اللي تطلبه إياكش حتي تجيب كل يوم من عند (صبحي كابر) .. وفرت ليك نص كيلو بن وسط محوج من عند بن أبوعوف ..وفوق ده كله قالولك حنصرفلك أوفر تايم الساعة بساعتين .. ساعتها السهر و البيات حيبقوا علي قلبك زي العسل .. أهو كل ده إسمه خطوط الإمداد.

انت عشان تقول لجيش إنه يتحرك من المغرب لحد إسبانيا و قضي خمس سنين من عمرك في حالة حرب مستمرة فده مش حاجة سهلة .. العسكري ده كان أحسنله يقعد في بيته وسط مراته و عياله و يشوف شغله .. بس لو انا وفرتلك أكلك و شربك و علاجك و سلاحك و مواصلاتك و مرتبك و كمان نسبة من الغنائم فانت حتبقي مش متضايق وبالعكس حيبقي علي قلبك زي العسل .. دولة الموحدين مكانتش دولة متقدمة إقتصادياً لدرجة إنها تقدر تمول حملة عسكرية بالشكل ده .. (المنصور) كان عارف ده كويس .. هو معهوش أكل يكفي الجيش بتاعه لو قرر مثلاً إنه يحاصر مدينة زي مدريد لمدة أسبوع فمابالك بشهر .. نقطة قوة الموحدين هي المواجهة المباشرة في ميدان مفتوح زي ما حصل معركة الارك بس ده نادر ما حيحصل.

سقوط دولة الموحدين .. مشكلة السلفيين مع المسيحيين في أبهي صورها:

من ضمن المصطلحات اللي انا بحبها أوي و جبت سيرتها قبل كده هي الدولة المدنية .. الدولة المدنية في رأيي انا الشخصي علي الأقل معناها إن لو فيه منصب معين و ليكن مثلاً وكيل أول وزارة التربية و التعليم اللي هو منصب اه كبير بس مش أملة يعني و كان مترشح للمنصب ده إتنين .. واحد مسلم و التاني مسيحي .. الدولة المدنية في رأيي معناها هو إن الإختيار يتم علي الكفاءة مش علي العقيدة .. يعني مش معني إن إحنا عايشين في بلد مسلمة يبقي كل اللي في السلطة مسلمين .. عادي جداً تبقي دولة مسلمة أغلبيتها مسلمين و نجيب رئيس وزراء أو حتي رئيس جمهورية مسيحي .. طالما الرجل شاطر في شغله و حيعرف يدير الليلة أحسن من المسلم اللي المترشح قصاده فصدقني إحنا الكسبانين كدولة .. عنوان السلسلة دي كلها إن مجد الإمبراطوريات بيتبني علي التعيينات الصح .. التعيين الصح بيتم علي أساس الكفاءة مش علي أساس الواسطة ولا علي أساس الأهل و العشيرة و الدين .. دي نفس المشكلة اللي الموحدين وقعوا فيها .. الأندلس كان مجتمع عامل زي دبي كده .. مجتمع مخلط .. عرب تلاقي .. أمازيغ تلاقي .. أوروبيين تلاقي .. مسيحيين و يهود و سنة و شيعة تلاقي .. مجتمع مثالي إنك تخليه قوة عظمي لو إستغليته صح .. لو فتحت المجال للكفاءات .. اللي الأمريكان بيسموه الحلم الأميريكي The American Dream .. إتعب و إشتغل و كافح و حتوصل أياً كان أصلك و ديانتك أو لون بشرتك.

الفكر اللي دولة الموحدين إتبنت عليه هو نموذج شاذ شوية من الفكر السلفي .. مؤسس فكر الموحدين (محمد بن تومرت) عمل حاجة ميكس كده غريب بين الأشعرية و السلفية و التشيع .. يعني مثلاً انا أقدر أفهم إنك تقول معلش يعني إحنا دولة إسلامية فمينفعش إن يمسك منصب رئيس الوزراء حد مسيحي .. اللي دولة الموحدين كانت بتقوله إن إحنا مش بس مش عايزين لا يهود أو مسيحيين يمسكوا مناصب كبيرة في البلد .. إحنا أصلاً مش عايزينهم يقعدوا فيها .. فعلياً دولة الموحدين في الأندلس كانت النموذج الإسلامي من حكم الرايخ الثالث في ألمانيا .. لو انت مسيحي أو يهودي عايش في الأندلس فانت بيتحطلك 3 إختيارات .. الإختيار الأول إنك تعتنق الإسلام غصب كده .. الإختيار الثاني إنك تمشي من البلد خالص .. الإختيار الثالث إنك تتعدم .. حتي لو قلت انا حعتنق الإسلام بس أفضل في البلد فانت بتبقي مطالب إنك تلبس لبس معين يقول للناس و انت ماشي في الشارع إني كنت مسيحي أو يهودي و إعتنقت الإسلام .. ليه؟ .. عشان يبقي تحذير للناس إنها متثقش فيك أصل سوري في الكلمة يعني رجل بعت دينك عشان تعيش.

فيه ناس حتقرأ الكلام ده و تقول إن الموحدين كان عندهم حق .. بس لو انت شايف ده فانت باصص تحت رجليك لسبب و هو إن السياسات دي خلت كتير من اليهود و المسيحيين اللي عايشين في الأندلس يهاجروا و يروحوا يا إما للممالك المسيحية للشمال ودول كانوا سبب من أسباب سقوط الأندلس زي ما حنعرف كمان شوية و فيه منهم اللي سافروا لمصر و الشام و العراق علي أساس إن الدول دي صحيح إسلامية بس مش متزمتين زي الموحدين .. زي ما قلتلك دولة الموحدين كانت ماشية بفكر شاذ شويتين تلاتة .. يكفي إني أقولك إن من ضمن اليهود اللي هربوا من الأندلس كان واحد إسمه (موسي بن ميمون) و الرجل ده وصل إنه جه مصر وبقي الدكتور الخاص و أحد المستشارين القريبين جداً من واحد من أهم الشخصيات في التاريخ الإسلامي .. (صلاح الدين الايوبي) .. (صلاح الدين) اللي كان في الوقت ده بيحكم مصر و طايح في الصليبيين .. انت متخيل كم الكفاءات اللي زي (موسي بن ميمون) اللي ضيعتها من إيدك؟

لأكتر من 17 سنة و الوضع هادي في الأندلس .. إتفاقيات السلام اللي مضتها دولة الموحدين مع مملكتي ليون و نافار خلوا الدنيا مستقرة بس وسط كل ده كان (ألفونسو الثامن) بيغلي .. هزيمته في معركة الأرك لسه معلمة في نفسيته .. سنة 1199 مات (المنصور) وجه مكانه إبنه (محمد الناصر) واللي الحقيقة مكنش يفرق كتير عن أبوه .. سنة 1209 السلام في الأندلس انتهي لما (ألفونسو الثامن) بدأ يعمل مشاكل .. كل شوية يعمل غارة علي أراضي دولة الموحدين و المشكلة إن الممالك المسيحية كانت عامله زي مدرسة المشاغبين كده كل ما مثلاً شخصية (بهجت الأباصيري) اللي جسدها الممثل (عادل إمام) يعمل حاجة بيجر وراه الشلة كلها ..  ده خلي (محمد الناصر) يقرر إنه جه الوقت إن دولة الموحدين ترجع تاني تلطش في وش الممالك المسيحية عشان يتعلموا الأدب .. سنة 1211 جيش الموحدين وصل الأندلس ودي كانت بداية النهاية.

المصادر:

فيديو بعنوان The Battle of Alarcos 1195 – The fight between Christianity and Islam intensifies – WOTW EP8 P2 نشر علي YouTube وده لينك الفيديو:
https://www.youtube.com/watch?v=FKWtAmowJUg&list=PLpA6sZxl1jJsTcycljzLBqCZw6Ps2hg2-&index=23

فيديو بعنوان Averroes & Maimonides-Great philosophers of Moorish Spain & Aristotle – WOTW EP8 P3 نشر علي YouTube وده لينك الفيديو:
https://www.youtube.com/watch?v=zEQ33EfjbvA&list=PLpA6sZxl1jJsTcycljzLBqCZw6Ps2hg2-&index=24

فيديو بعنوان Battle of Las Navas De Tolosa- A turning point in the Christian fight against the Muslims of Iberia نشر علي YouTube وده لينك الفيديو:
https://www.youtube.com/watch?v=p1RMtvWkQzg&list=PLpA6sZxl1jJsTcycljzLBqCZw6Ps2hg2-&index=25