في الثمانينات العالم كله فعلياً وأنا مش ببالغ لما أقول إنه تنح قصاد جمال و حلاوة و رشاقة الطيارة F-15 Eagle .. المهندسين بتوع شركة ماكدونيل دوجلاس McDonnell Douglas الأميريكية اللي صنعوها إيديهم كانت تتلف في حرير .. علي فكرة في التسعينات شركة بوينج Boeing إستحوذت علي شركة ماكدونيل دوجلاس .. طيارة إتصممت و إتصنعت عشان تدوس علي وش أي طيارة تانية .. طيارة بكرسي واحد بس للطيار اللي كان بيقعد في كابينة علي شكل فقاعة عشان بعنيه يكون شايف السما كلها .. اتركبلها موتورين جبارين F100 من تصنيع شركة برات اند ويتني Pratt & Whitney بيخلوا Power to Weight Ratio ودي النسبة بين قوة الموتور مقسومة علي وزن الطيارة فعليا شبه الهيونداي الفيرنا اللي هو لو دست بنزين حتفضل تطير ومش حتقف .. اتحطلها رادار قوي إسمه APG-63 .. تسليح الطيارة كان يحسسك إنها اللي صممها رجل كان بيتفرج كتير وهو صغير علي أفلام (جيمس بوند) .. الطيار تحت إيده 4 صواريخ AIM-7 Sparrow ودي صواريخ موجهة بالرادار ..كمان فيه 4 صواريخ AIM-9 Sidewinder ودي صواريخ موجهة بالأشعة تحت الحمراء .. وفي حالة الإشتباكات الجوية Dogfighting فالطيارة فيها مدفع رشاش M61 من فئة مدافع جاتلينج Gatling .. طيارة مفيهاش غلطة .. بس ليه لا بدل ما هي شبه الهيونداي فيرنا نخليها ميرسيدس ايه ام جي؟
من هنا إتولدت الطيارة F-15E Strike Eagle .. هي طيارة ليها نفس إمكانيات النسخة القديمة من الموتور القوي و تانك البنزين اللي مش بيخلص و قدرتها علي إنها تدوس علي وش أي طيارة تانية في Dogfight و إتزود عليها إنها كمان فوق كل ده تقدر تضرب أهداف أرضية .. الطيارة الجديدة دخلت الخدمة في سلاح الجو الأميريكي سنة 1989 و مكملتش سنتين إلا وكانت بتشارك في حرب الخليج الثانية سنة 1991 اللي إنت عارفها أكتر باسم حرب تحرير الكويت .. فعلياً الإسرائيليين بصوا للطيارة F-15E Strike Eagle زي ما انت بتبص للملوخية وهي بتتصبلك في الطاجن بتاعها عند (صبحي كابر) أو (البرنس) .. رغبة الأسرائيليين إنهم ياخدوها بقت ضرورة لما (صدام حسين) الله يرحمه ضرب إسرائيل بصواريخ سكود Scud للي منكوا يفتكر أحداث حرب الخليج الثانية .. صدقني لو قلتلك إن الإسرائيليين كانوا جديأ عايزين يردوا و يضربوا بغداد بس هم بصوا لطياراتهم و لقوا نفسهم معندهمش الطيارة اللي تقدر تطير مسافات طويلة و تشيل قنابل كتيرة ولو اتزنقت تقدر تدافع عن نفسها .. بإختصار هم مكنش عندهم الطيارة F-15E Strike Eagle.
في مايو 1994 إتمضي إتفاق ثعلب السلام أربعة Peace Fox V بين الإسرائيليين و الأمريكان اللي بيقول إن الإسرائيليين حيستلموا 21 طيارة F-15I ولو عجبتهم يقدروا يطلبوا أربع طيارات كمان ضمن إتفاق تاني حيتكتب إسمه ثعلب السلام خمسة Peace Fox VI .. تطلع إيه F-15I؟ .. دي تبقي هي هي F-15E Strike Eagle بس بشوية إكسسوارات زيادة طلبها سلاح الجو الإسرائيلي وعشان كده إتسمت F-15I و حرف I ده إختصار Israel وفيه ناس بتسميها Ra’am و كلمة رعم دي هي رعد بس بالعبري .. سنة 1995 الإسرائيليين طلبوا واحدة زيادة فوق الأربعة و بكده هم بقي تحت إيدهم 25 طيارة F-15I .. أول طيارة إستلموها سنة 1997 وفضلوا يستلموا طيارة كل شهر لحد ما وصلت ال25 طيارة علي سنة 1999 .. جري الشريط 26 سنة ولسه الطيارة دي هي درة تاج القوات الجوية الإسرائيلية.
المميز في الطيارة F-15I ومش حتلاقيه في أي طيارة F-15E Strike Eagle هي إن إتحط فيها مكونات كتير تصنيع محلي إسرائيلي .. يعني مثلا .. الكومبيوتر المركزي بتاع الطيارة و نظام التوجيه بالGPS و شاشة العرض اللي بتتركب علي خوذة الطيار كلهم من تصنيع شركة البيت Elbit الإسرائيلية .. هي بتقدر تشيل صواريخ بايثون Python ودي صواريخ موجهة بالأشعة تحت الحمراء .. بتقدر تشيل صواريخ AIM-7 Sparrow و كمان صواريخ AIM-120 AMRAAM ودي من أحدث صواريخ جو-جو اللي ممكن تلاقيها في أي طيارة تصنيع أمريكاني .. اللي محتاج فعلا يتشرح شوية هو قدرتها علي ضرب الأهداف الأرضية .. دي طيارة بتقدر تشيل حمولة 8100 كيلوجرام .. الحمولة دي حضرتك بتوزعها بين البنزين و القنابل .. بس حنفترض إن الطيارة F-15I مش حتضرب هدف بعيد فهي بتقدر تشيل قنابل Paveway ودي قنابل معمولة لقصف الأهداف الأرضية موجهة بالليزر .. بتقدر تشيل قنابل JDAM الموجهة بالأقمار الصناعية .. بتقدر تشيل قنابل BLU-109 ودي قنابل بتستخدم لضرب الدشم المحصنة .. بتقدر تشيل قنابل SPICE الموجهة بالليزر برده .. ومعلش زود عليهم صواريخ جو-أرض AGM-88 HARM ودي صواريخ ضد التشويش علي الرادار.
حقاً و صدقاً الإسرائيليين بيعشقوا الطيارة دي .. سنة 2018 ناس كتير جوه قيادة سلاح الجو الإسرائيلي كانت ضد إنهم يشتروا الطيارة F-35I Adir ودي تبقي النسخة اللي إستلمتها إسرائيل من الطيارة F-35 Lightening II وكانوا مع إنهم يشتروا مكانها نسخ أحدث من الطيارة F-15 .. حتي بعد ما إستلموا F-35I Adir حتفضل الطيارة F-15I هي أهم طيارة في سلاح الجو الإسرائيلي.
المصدر:
مقالة بعنوان Why Israel’s F-15 Fighter Jet Is One of the Most Feared Planes in the Sky نشرت في مجلة The National interest وده لينك المقالة الأصلية:
https://nationalinterest.org/blog/reboot/why-israels-f-15-fighter-jet-one-most-feared-planes-sky-164854
