لأكتر من خمسين سنة و أميركا بتتعامل مع إسرائيل كإنها إبن خالة الكراش بتاعك اللي قضي حياته في الخليج و جاي يتجوز و يصرف عليها فسابتك و راحتله .. خمسين سنة و أميركا كل ما تطلع طيارة جديد تديها لإسرائيل .. في الستينات أدولهم طيارت F-4E Phantom II و اللي دخلوا بيها حرب أكتوبر 1973 .. سنة 1976 الأمريكان أدوا الإسرائيليين طيارات F-15A Eagle و دخلوا بيها حرب لبنان .. في الثمانينات إسرائيل استلمت طيارات F-16A Fighting Falcon .. بعدها إسرائيل إستلمت طيارات F-15C و F-15I Strike Fighter و F-16I .. أخر العنقود في المسلسل البايخ ده هو الطيارة F-35 Lightening II اللي إسرائيل إستلمت و حتستلم نسخ منها متعدلة مخصوص بما يناسب المواصفات اللي حطتها إسرائيل و غيروا إسمها خلوها F-35I Adir و الI دي إختصار Israel و Adir دي هي كلمة عبري ترجمتها العظيمة .. ده معناه إن لأكتر من خمسين سنة بإستثناء الطيارة F-22 Raptor مفيش طيارة مقاتلة تعملها أميركا إلا و إدتها لإسرائيل .. كلامنا النهاردة حيبقي عن F-35I Adir.
في سبتمبر 2008 إسرائيل قدمت طلب رسمي إنها تستلم طيارة F-35 و الطلب كان إن إسرائيل عايزة 25 طيارة لو عجبتها حتشتري منها 50 طيارة كمان .. يعني هم كانوا ناويين يبقي عندهم 75 طيارة و ده رقم كبير بالمناسبة بس سببه إن الإسرائيليين كانوا مخططين إنهم يطلعوا الأجيال القديمة من طيارات F-16 اللي عندهم بره الخدمة .. الكلام الأولي خالص إن إسرائيل كانت حتدفع 200 مليون دولار للطيارة الواحدة .. بعد كده الكلام بقي إن إسرائيل حتدفع 100 مليون دولار بس .. في أكتوبر 2014 الإسرائيليين إتفقوا مع الأمريكان إنهم حيشتروا منهم 50 طيارة بس الواحدة واقفة عليهم ب100 مليون دولار .. لما وقت التسليم قرب إسرائيل إتعاركت مع شركة لوكهييد مارتن Lockheed Martin اللي بتصنع الطيارة F-35 .. الإسرائيليين قالوا معلش إحنا عايزين نركب شوية حاجات متصنعة محلياً جوه إسرائيل عشان تتركب علي الطيارة .. وجهة نظرهم إن دونا عن باقي الزباين اللي حيشتروا F-35 فالإسرائيليين عايشين قال إيه في حالة حرب مستمرة و عشان كده هم عايزين الطيارة بتاعتهم تبقي فرز أول و تبقي فيها حاجات بتخليها متفوقة تكنولوجيا .. وزارة الدفاع الأميريكية ضغطت علي شركة Lockheed Martin إنها تقبل الشروط الإسرائيلية و اللي كانت كالأتي:
أهم طلب كان إن الإسرائيليين عايزين يركبوا علي طيارات F-35I Adir اللي حيستلموها Software هم اللي عاملينه إسمه Command, Control, Communications, Computer and Intelligence و إختصاراً بيسموه C4I .. حاول تتخيل إنك لو حتشتري لابتوب و كنت عايز تركبله Windows 10 و كمان iOS مع بعض يعني الإسرائيليين كانوا عايزين طيارتهم تشغل إتنين Software مختلفين خالص عن بعض .. الفرق إيه؟ .. الفرق إن الSoftware الأساسي بتاع الطيارة F-35 بيجمع كل الData اللي بتيجي من Sensors الطيارة و بيعرضها قدام خوذة الطيار و الطيار بعد كده يبقي ينقل أي معلومة هو شايفها مهمة للقيادة بتاعته أو لزمايله .. علي الناحية الثانية C4I بيعمل الحركة دي Automatic .. هو من نفسه بيجمع كل Data دي و بينقلها عن طريق شبكة الإتصالات بتاعة الجيش الإسرائيلي للعناصر القتالية اللي حول الطيارة F-35.
تاني طلب إن F-35I Adir حتشيل صواريخ و قنابل تصنيع إسرائيلي محلي .. مبدأياً كده أي طيارة F-35 حتشيل قنابل GPS-Guided JDAM و دي قنابل موجهة بالGPS زي ما إسمها بيقول .. الإسرائيليين حيركبوا مكانها قنابل SPICE 1000 Precision-Guided من تصنيع شركى إسرائيلي إسمها Rafale و خلي بالك إن SPICE دي إختصار Smart Precise Impact Cost Effective و الفرق بينها و بين القنابل الموجهة بالGPS إن القنابل دي بتتوجه بMix بين الGPS و بين توجيه بصري Electro-Optical Guidance .. ده معناه إن فيه بني أدم اللي هو الطيار بيبقي دوره إن طول ما القنبلى رايحة علي الهدف هو يقدر يعدل مسارها في أي لحظة و يبطل مفعولها لو الضرورة حكمت.
فرق تالت و هو إن F-35I Adir حيتركب عليها صواريخ جو-جو Paython-5 و دي صواريخ موجهة بالأشعة تحت الحمرا بدل ما النسخ العادية من F-35 حستستخدم صواريخ AIM-9X Sidewinder الأميريكية .. الصواريخ دي ميزتها إنها بتتركب جوه جسم الطيارة و بيتقفل عليها بباب .. لما الطيار بيدوس علي زرار الإطلاق في Joystick بتاعته الباب ده بيفتح و الصاروخ بيقع بس بمجرد ما بيقع المحرك بتاعه بيشتغل و ساعتها ممكن الطيار ينشنه علي الطيارة المعادية.
فرق رابع إن الإسرائيليين طلبوا يتركب للطيارات بتاعتهم خزانين وقود إضافيين حمولة 425 جالون و ده معناه إن الطياره بقت تقدر تطير مسافة أطول بنسبة 36% .. قد يقول قائل طب ما الخزانات دي حتتركب بره جسم الطيارة و معني كده إنها مش حتبقي ليها القدرة علي التخفي من الرادارات Stealth أوي .. كلامك صح جداً و عشان كده الإسرائيليين بيقولوا إنهم حيستخدموا الخزانات دي في المراحل الأولانية خالص من الرحلة قبل ما الطيار يحتاج خاصية Stealth.
أول طيارتين F-35I تستلمها إسرائيل كانت سنة 2016 و في إبريل 2017 إستلمت 3 طيارات كمان .. بحيث إن من هنا لحد 2021 أو 2022 حتكون إسرائيل إستلمت الخمسين طيارة بتوعها .. فيه كلام إتقال علي إن في يونيو 2018 اللي فات ده أول طيارتين خالص إستلمتهم إسرائيل دخلوا الخدمة و إستخدموهم فعلاً في قصف أهداف جوه سوريا .. فيه كلام تاني علي إن بسبب إسرائيل حتطلع مئات من الطيارات القديمة من طرازات F-16 و F-15 بره الخدمى فهم أكيد حيطلبوا يشتروا طيارات تانية من الF-35 خصوصاً إن مع الوقت سعر الطيارة الواحدة حيقف علي إسرائيل ب85 مليون دولار بعد ما كان واقف عليها ب100 مليون دولار .. و إن كان فيه رأي تالت خالص بيقول لا الإسرائيليين بيتكلموا مع شركة Boeing اللي بتصنع الF-15 عشان تبيلعها شوية طيارات تعوض الفرق.
المصدر:
- مقالة بعنوان WhySyria should fear Israel’s own F-35I يعني ليه سوريا لازم تخاف من الطيارة الإسرائيلية F-35I.. نشرت في مجلة The National Interest و ده لينك المقالة الأصلية:
https://nationalinterest.org/blog/the-buzz/why-syria-should-fear-israels-own-f-35i-25357
