جي جينبينج .. رجل بوهيمي يفعل ما يحلو له.

اللي حنتكلم عنه النهاردة هو الصين .. أنا مش بهزر لو قلتلك إن أغلب معلوماتنا عن الصين جبناها من فيلم فول الصين العظيم بتاع (محمد هنيدي) وغير كده إحنا منعرفش حاجة عن الصين .. إمشي في الشارع إسأل أي حد هي عملة الصين إيه؟ أو إسم رئيس الصين إيه؟ وغالباً مش حيعرف .. الحقيقة إن ده مينفعش يبقي طريقة تعاملنا مع دولة تعتبر القوة العظمي الثانية في العالم مع أميركا وده اللي إحنا حنتكلم عنه النهاردة .. أول ويمكن أهم حاجة تكون عارفها إن الصين دولة بيحكمها حزب واحد اللي هو الحزب الشيوعي الصيني وبيقودها رئيس حاجة كده شبه (جمال عبدالناصر) الله يرحمه .. (جمال عبدالناصر) بتاع الصين دلوقتي إسمه (جي جينبينج Xi Jinping) والحقيقة إن الرجل ده مهم جداً لدرجة إنك مينفعش تتكلم عن الصين دلوقتي إلا و تربط كل كلمة بتقولها بيه .. خليني أديلك مثال علي قد إيه الرجل ده فشيخ إن من فترة كده إتعمل إستفتاء جوه الحزب الشيوعي الصيني علي فكرة إنهم يلغوا سقف المدد الرئاسية للرئيس .. زمان كان الرئيس الصيني أخره مدتين كل واحدة فيهم 5 سنين بس هم لغوا ده وخلوا من حق (جي جينبينج) يفضل لازق في الكرسي لحد ما يموت لو حب .. اللي هو أقعد يا أستاذ (جي) ميهمكش .. اللي إنت محتاج تعرفه إن من أصل 3000 عضو في الجمعية العمومية للحزب الشيوعي الصيني فيه إتنين بس هم اللي قالوا لا في الإستفتاء .. إنت متخيل؟ تخيلت؟

يا ريت الموضوع وقف علي كده .. (جي جينبينج) رجل فشيخ لدرجة إنه عمل مذكرة سماها أفكار (جي جينبينج) خلاها مرجع في الدستور .. عشان أفهمك الخطوة دي حاول تتخيل إن الرئيس (عبدالفتاح السيسي) عندنا طلعلنا ورقة وقالنا دي الزتونة اللي حنحكم بيها وهو ده دستورنا والدستور بتاع البلد بلوه وأشربوا ميته .. بس مش ده المميز في (جي جينبينج) .. فاكر الرئيس (محمد حسني مبارك) الله يرحمه لما كان راسم لنفسه صورة إنه أبو المصريين و(سوزان مبارك) هي أمهم .. في كل المهرجانات والحفلات كان دايماً بيحب يتقاله بابا (مبارك) .. الإعلام الصيني برده عامل نفس الحكاية مع (جي جينبينج) .. هو بيحب أوي يتقاله Xi Dada يعني عمو (جي) .. حتي قصة حياته مفيش حد في الصين مش عارفها.

هو إتولد في عيلة غنية بس زي ما إنت عارف بقي الزمن غدار وأبوه خسر فلوسه أيام حاجة إسمها الثورة الفكرية بتاعة (ماو تسي تونج) ودي حاجة ممكن نبقي نتكلم فيها وقت تاني بس المهم إن (جي جينبينج) وهو لسه شاب في ثانوية عامة إترحل بعيد عن أهله في قرية في حتة مقطوعة ودلوقتي القرية دي متحف .. لو رحت هناك حتلاقيهم عاملين سريره اللي كان بينام عليه مزار سياحي .. ورشة الخياطة اللي هو إشتغل فيها معمولة مزار سياحي الناس تتصور فيها سيلفي .. أهل القرية اللي لسه عايشين من أيام ما كان (جي جينبينج) قاعد فيها كل شوية الإعلام يستضيفهم ولو رحت القرية دي تزورها حتلاقيهم مش بيبطلوا يحكوا عن قد إيه الرجل ده كان نسمة وبلسم يتحط علي الجرح يطيب .. بس مش دي كل قضية (جي جينبينج) .. (مبارك) كان راسم نفسه إنه أبونا كلنا وهو كان إبن تييت حرامي بيسرقنا بس (جي جينبينج) موضوعه مختلف لإنه ماسك دولة إقتصادها طالع بسرعة الصاروخ.

ناس بتتصور جنب صورة الرئيس الصيني في المتحف اللي معمول في القرية اللي كان عايش فيها.

علي حسب كلام البنك الدولي فالناتج الوطني الإجمالي GDP بتاع الصين اللي هو لو حبيت تفهمه تخيل كل المنتجات والخدمات اللي بينتجها الإقتصاد الصيني كله شوف سعرهم كلهم علي بعض كام شاكب راكب يطلعلك GDP .. المهم إن خلال ال30 سنة اللي فاتت الGDP بتاع الصين فضل يزيد بنسبة 10% سنوياً وده معناه إن الصين بقت أكتر إقتصاد عمال ينمو بمعدل شبه ثابت في تاريخ البشر .. ده حترجمه علي الأرض إن فيه أكتر من 800 مليون صيني خلال ال30 سنة اللي فاتوا إترفعوا من تحت خط الفقر وبقوا دلوقتي جزء من الطبقة المتوسطة اللي دلوقتي بتعيش أجمل أيامها في تاريخ الصين .. إمشي في الشارع في الصين وإسأل أي شاب صغير بيبني مستقبله إيه رأيك في إقتصاد البلد؟ حتلاقيه بيقولك فلة شمعة منورة ومش لإنه خايف ليتقبض عليه بالعكس ده الوضع فعلاً .. الناس في الصين سعيدة والأهم إنها متفائلة باللي حيحصل في المستقبل ودول حاجتين إحنا مشفنهمش في مصر بقالنا أكتر من 50 سنين .. إحنا بقينا مكتئبين ومتشائمين لدرجة إننا بقينا مرضي نفسيين ماشيين في الشارع .. هل تفتكر إن (جي جينبينج) كده فرحان ومزقطط؟ .. لا .. لإن طموحه عامل زي طموح (تركي أل شيخ) إنه نفسه ميخليش حد من ال100 مليون مصري إلا ويكون شتمه حتي اللي لسه بيرضعوا .. (جي جينبينج) شغال دلوقتي علي مشروعين كبار أوي واحد فيهم محلي والثاني دولي وخليني أديلك فكرة سريعة عنهم:

خلينا نبدأ بالمشروع الدولي اللي الصينيين بيسموه مبادرة حزام وطريق Build and Road Initiative وفكرتها بمنتهي البساطة إنهم حيصرفوا أكتر من ترليون دولار علي مشاريع بنية تحتية Infrastructure زي كباري وطرق وموانيء ومطارات في أكتر من 60 دولة في العالم بحيث إنهم يعيدوا رسم خطوط التجارة عشان تبقي الصين هي مركز التجارة العالمية .. لما تسمع إزاي الصينيين بيتكلموا عن المشروع ده حتلاقيهم متحمسين أوي له وبيقولوا عليه أكتر مشروع طموح في تاريخ البشر .. خش علي YouTube وإتفرج علي فيديوهات الأطفال اللي بتغني عشان تعمل دعاية للمشروع ده .. وعلي فكرة فيه نسخة راب من الإعلانات دي .. محدش يقدر يقولك وهو متؤكد إن المبادرة دي حتنجح بس اللي أنا أقدر أقوله ليك وأنا ضميري مستريح إن مشروعه المحلي عامل أحلي شغل.

دي مجرد خريطة بتوريك حجم مشاريع البنية التحتية اللي بتتعمل علي حس مبادرة حزام وطريق في ديسمبر 2015.

المشروع المحلي هو حملة فشيخة لمكافحة الفساد .. فاكر لما ولي العهد السعودي (محمد بن سلمان) حبس أفراد من العيلة المالكة وكام رجل أعمال سعودي بتهم فساد في فندق ريتز كارلتون الرياض والناس قالت أووو ماي جااااد ده جامد تنين .. أهو (جي جينبينج) حابس لحد دلوقتي أكتر من 100,000 بني أدم بتهم فساد وفيه منهم ناس كانوا في مناصب سلطة فشيخة وده برده خلي الصينيين يقولوا عليه أوووو مااااي جاااااد إنت شديد أوي مع موظفينك يا (جي جينبينج) بيه.

لحد دلوقتي ده الكلام اللي (جي جينبينج) وحاشيته عايزينك تعرفه عن الصين .. لحد دلوقتي ده الكلام اللي دوره إنه يخليك تحس إن (جي جينبينج) هو أحسن إختراع بعد الشويبس أناناس .. بس الحقيقة غير كده شويتين تلاتة .. فاكر المسئولين اللي هو قبض عليهم بتهم فساد؟ كتير منهم صادف إنهم خصومه السياسيين اللي بيتحسبوا علي المعارضة اللي هو شوف يا أخي الصدف .. مش كده وبس .. كتير من الإعترافات اللي النيابة في الصين خدتها منهم كانت عن طريق التعذيب وده في حد ذاته يخليك تشك في مصداقية الإعترافات دي لإن أي حد ممكن يقول أي حاجة ويعترف علي نفسه بأي تهمة لمجرد إن الألم ينتهي .. فوق ده كله فاكر قرار الجمعية العمومية للحزب الشيوعي الصيني إنها تلغي سقف المدد الرئاسية عشان يخلوا (جي جينبينج) يحكم مدي الحياة لو حب؟ الفكرة دي أصلاً إن الصينيين يحطوا سقف للمدد الرئاسية إتعملت عشان يحموا الصين من إنها تعيش نفس تجربة (ماو تسي تونج) اللي عشان تفهم هو عمل إيه حاول تمسك (صدام حسين) الله يرحمه و(عمر البشير) الله يسامحه و(بشار الأسد) ربنا ياخده وكل قادة العرب قتالين القتلة اللي إنت تعرفهم وإضربهم في الخلاط يطلعلك (ماو تسي تونج) .. الرجل ده عشان يخلي الصين تكتفي ذاتياً من المحاصيل الزراعية عمل مشروع قومي إنه بيجبر الناس تشتغل فلاحين في ظروف قهرية والسياسة دي أدت إن فيه 45 مليون بني أدم ماتوا زود عليهم مليون بني أدم تانيين ماتوا علي إيد البوليس ضمن حملة تخلص من المعارضة أيام ما كانت الصين بتعيش حاجة إسمها الثورة الثقافية.

المشكلة إن (جي جينبينج) ماشي في نفس السكة .. هو حساس جداً للنقض .. زي ما طلع عندنا مثلاً إسم بلحة ولقينا إنه بيتضايق من الإسم ده وإحنا عارفين إنه بيتضايق لإنه قالنا إنه بيتضايق وعشان كده فيه ناس حتفضل تستخدم الإسم عشان تضايقه .. في الصين تلاقي إن الأمن فارض رقابة فظيعة علي الكلام اللي بيتقال علي الإنترنت .. لو إنت في الصين وإتريقت علي اللي بيحصل إن قلت علي (جي جينبينج) إنه إمبراطور الصين الجديد البوليس حيقبض عليك .. بس الوصف اللي فعلاً بيعصب (جي جينبينج) إنه يتقال عليه إنه شبه شخصية وييني ذا بوو بتاعة الكرتون وعلي فكرة أنا مبهزرش .. (جي جينبينج) متضايق أوي إن الصينيين خدو بالهم إنه بيشبهله ولإنهم عرفوا إنه بيتضايق فطبيعي إنك تلاقي ناس كتير حتفضل تقول عليه يا وييني ذا بووو اللي هو حاجة شبه فيلم الباشا تلميذ لما الفنان (حسن حسني) الله يرحمه كان بيقول ل(كريم عبدالعزيز) يا فاشل يا فاشل .. بتعصبك ويني ذا بوو؟ طب يلا يا ويني ذا بوو.

الرئيس الصيني بيتضايق جدا ًمن إن الناس تقول عليه شبه Winnie the Pooh.

(جي جينبينج) زيه زي أي ديكتاتور في الدنيا مرعوب من اليوم اللي الناس تنقلب عليه وتمشيه .. هو مش عايز مصيره يبقي زي (مبارك) أو الإتحاد السوفيتي عشان كده هو مش لاقي حل غير إنه هو اللي يتحكم في كل كبيرة وصغيرة في البلد ودي حاجة شبه مستحيلة في بلد ضخمه زي الصين .. من ضمن محاولات الحكومة إنها ترضي (جي جينبينج) وتخليه ينام وهو متطمن إن محدش حيثور عليه بكره الصبح إنهم عاملين لستة بالمواطنين اللي عاملين قلق ولو إنت إتحطيت علي اللستة دي فإنت متقدرش تروح تشتري عربية أو تشتري شقة أو تاخد قرض من البنك .. اللي فعلاً يخليك تهرش في شعرك إن الحكومة الصينية دلوقتي ماشية في سكة إنها تدي لكل مواطن سكور قد إيه هو مواطن صالح عن طريق شوية معايير زي إنك بتسمع كلام الحكومة وبتشتري المنتجات الصينية لكن لو إنت مثلاً مبتدفعش ضرايبك وعليك أحكام قضائية فده حيقلل السكور بتاعك .. ولو السكور بتاعك قل أوي فإنت ساعتها حتتعاقب إنك مينفعش تشتري تذاكر طيران أو قطر أو تشتري عربيات.

رعب (جي جينبينج) من المعارضة ده حمادة بس رعبه من الدين ده حمادة تاني خالص .. هو كافر لدرجة إنك لو إنت بتعبد ربنا فهو مش حيسيبك إلا لما تكفر إنت كمان .. لو إنت مواطن صيني مسيحي فالحكومة بتقولك شيل صور سيدنا عيسي (عليه السلام) اللي بتحطها في بيتك أو في الكنيسة وحط مكانها صورة (جي جينبينج) .. الإيغور المسلمين في الصين طالع عين اللي خلفوهم في حملة قمعية محصلتش في التاريخ قبل كده وإتكلمنا عنها في مقالة قديمة هنا .

عشان أديك مثال لأد إيه (جي جينبينج) بني أدم مفتري خد اللي حصل لواحد إسمه (يو جاو بو Yu Zhao Bo) ده رجل صيني خد نوبل يعني المفروض يتعمله تمثال بس سنة 2009 كتب مقالة بيدعو فيها إن الصين يبقي فيها شوية ديموقراطية اللي هو شخص معارض يعني وزيه زي أي معارض إتقبض عليه وفضل محبوس من 2009 لحد 2017 ومات في السجن .. لحد دلوقتي قصته شبه كتير من قصص المعارضين السياسيين في أي حتة في العالم … اللي حصل بعد كده هو اللي بيخلي (جي جينبينج) في حتة تانية خالص .. الرقابة الحكومية فرضت حظر علي ذكر إسمه علي Social Media وعلي الSearch بتاع المواقع علي النت .. حتي إرسال قناة CNN في الصين بيقطع لو حد قال إسمه .. بإختصار شديد الحكومة الصينية عملت ل(يو جاو بو ) بلوك زي ما إنت بتعمل بلوك لحد علي Facebook.

(يو جاو بو) و واحدة من أشهر جمله إنه بيتمني إنه يبقي أخر ضحايا تعامل الصين مع الكلام علي إنه جريمة.

أظن اللي أنا عايز أقوله ليك في الأخر بطّل تُعجب أوي بالصين .. هي بلد قوية و إقتصادها قوي و كل حاجة بس مش معني إنك بتكره أميركا إنك تحب الصين لإن خلينا نكون صرحا مع بعض الصين أنيل بكتير من أميركا.

المصدر: