سنة 1988 كان فيه نحات أمريكاني اسمه (جيم سانبورن Jim Sanborn) إتقاله مبروك عليه إنت أخدت شغلانة إنك تعملنا تمثال عشان يتحط في الجنينة اللي في مدخل مبني وكالة المخابرات المركزية CIA اللي تعتبر أهم و أقوي جهاز مخابرات علي مستوي العالم .. يوم 3 نوفمبر 1990 في إحتفال علي الضيق كده أٌزيح الستار عن التمثال و اللي بمجرد ما ضباط المخابرات الأمريكان شافوه بلموا قدامه.
الضباط كانوا متخيلين إنهم حيشوفوا مثلاً تمثال لرجل لابس بدلة شيك و معاه مسدس بكاتم للصوت اللي حاجة كده زي (جيمس بوند) أو حتي يشوفوا تمثال لحاجة شبه شعار المخابرات العامة المصرية اللي هو نسر بيهجم علي أفعي .. لا خالص .. التمثال كان عبارة عن حيطة رفيعها من النحاس بإرتفاع 3.5 متر و عرض 6 متر محفور عليها مسألة من 2000 حرف .. شفرة للي يعرف يفكها .. مش أنتوا بتقولوا علي نفسكوا أفضل ضباط مخابرات علي مستوي العالم .. وروني شطارتكوا .. (جيم سانبورن) اللي صمم التمثال كان متخيل إن التمثال اللي سماه كريبتوس Kryptos و اللي جواه الأربع شفرات اللي هو حطهم حيتفكوا في خلال أسابيع .. جري الشريط 31 سنة و أدينا دلوقتي في 2021 و ثلاثة بس من الأربعة هم اللي إتفكوا.
بمجرد ما الفكرة جت ل(جيم) عشان يعمل التمثال عبارة عن شفرة و هو إتحط قدام واقع إنه بالصلاة علي النبي ميعرفش حاجة عن الشفرات .. هو أساساً كان فاشل في الحساب في المدرسة .. الحل كان إنه إتصل ب(إيدوارد شيد Edward Sheidt) و ده اللي كان ماسك إدارة الشفرات في CIA وقتها و (إيدوارد) تقدر تقول عطي ل(جيم) درس خصوصي في الشفرات .. يعني إيه شفرة؟ .. إزاي تكتب شفرة؟ .. إيه التطور الطبيعي للشفرات؟ .. هو إتعلم إزاي يكتب شفرة من إربع طبقات زي ما تكون قشرة بصل و إنت بتشيلها واحدة ورا الثانية و الطريقة دي هي اللي كتب بيها الشفرات الأربعة و اللي زي ماقلتلك ضباط في CIA و في وكالة الأمن القومي NSA سهروا الليالي عشان يفكوها لحد ما حلوا 3 من أصل أربعة.
- الشفرة الأولي كانت بتقول .. Between Subtle Shading and absence of light lies the nuance of iqlusion .. يعني بين الظل الهادي و بين غياب النور حتلاقي الفروقات البسيطة للوهم .. عارف إنك حتقولي إنت كاتب Illusion غلط بس صدقني (جيم) كان متعمد يكتبها غلط عشان يلخبط أي حد حيفكر يفك شفرته.
- الشفرة الثانية كانت أبسط شوية و كانت إحداثيات خطوط الطول و دواير العرض بتاعة مبني CIA و إنه بيشكر حد أو كيان أو جهة سماه WW .. طبعاً ناس كتير تخيلت إن WW ده إختصار الحرب العالمية World War بس طلع قصده علي (وليام ويبستر William Webster) مدير CIA وقت ما (جيم) صمم التمثال بتاعه.
- الشفرة الثالثة كانت جزء من اللي قاله عالم الأثار (هاورد كارتر Howard Carter) لما إكتشف مقبرة (توت عنخ أمون).
كل ده معناه إيه؟ الله أعلم و يمكن ناس كتير حتعرف المعلومة دي و مش حتفرق معاها كتير في حياتها اليومية بس أنا عايزك تستوعب إزاي (جيم سانبورن) صمم تمثال عشان يتحط في جنينة مبني و عمره ما كان حيتخيل إن لأكثر من 31 سنة التمثال ده حيفضل هسهس في دماغ ضباط المخابرات و خبراء الشفرة طول السنين دي كلها .. ولا تخرج قبل أن تقول سبحان الله.
المصدر:
مقالة بعنوان This Sculpture at CIA Headquarters Holds One of the World’s Most Famous Unsolved Mysteries نشرت في موقع وكالة أنباء CNN الأميريكية و ده لينك المقالة الأصلية:
https://edition.cnn.com/2020/07/25/us/kryptos-secret-message-code-trnd/index.html
