اللي حتكلم عنه النهاردة هو الإجابة عن سؤال بسيط .. هو إيه اللي بيحصل في فرنسا بالضبط؟ .. ليه فيه مظاهرات؟ وهل (إيمانويل ماكرون Emmanuel Macron) رئيس فرنسا ده بني أدم فاشل مش عارف يدير الليلة ولا إحنا اللي فاهمينه غلط؟ .. بلاش تتخيل إن اللي بيحصل في فرنسا ده لو شبهناه بحاجة عشان نفهمه إن فرنسا بني أدم مجرد عنده دور برد جامد حبتين .. الموضوع مش كده .. مظاهرات فرنسا دي مش هي الفيروس ومش هي المرض .. اللي بيحصل في فرنسا ده مجرد عرض من أعراض مرض جامد حبتين مسك أوروبا وأميركا ومش راضي يسيبهم والمرض ده هو حزب الكنبة .. فاكر مصطلح حزب الكنبة اللي طلع أيام ثورة يناير عندنا؟ المصطلح ده بيتكلم عن الناس اللي بتمثل أغلبية الشعب المصري اللي هم الطبقة المتوسطة اللي كانت قاعدة مأنتخة في بيوتها وسابت الشباب ينزل المظاهرات يُعتقل ويموت لحد ما الرئيس (محمد حسني مبارك) الله يرحمه راح في داهية .. ساعتها بس نزلوا وبقي ليهم صوت ومطالبات فئوية وإضرابات .. فاكر إنت الفترة دي؟ .. أهو اللي بيحصل في أوروبا كلها وأميركا دلوقتي هو إن حزب الكنبة بتاعهم بقي له صوت وإنت مهم أوي تفهم هو ليه الناس دي فاقت دلوقتي؟
حاول تحط نفسك مكان مواطن فرنسي عنده 40 سنة شغال في مصنع .. أنا عارف إن الموضوع صعب بالنسبة ليك بس معلش حاول معايا وأنا حساعدك .. إنت رجل متجوز وغالباً عندك عيل أو اتنين .. إنت محسوب علي الطبقة المتوسطة بس الفلوس اللي بتخشلك كل أول شهر يدوبك بتكفي مصروف البيت .. إنت مستفدش حاجة من العولمة ولا الرأسمالية الغربية .. لو إنت عايش في مدينة كبيرة جوه فرنسا فإنت كل اللي إنت شايفه إن المهاجرين عددهم عمال يزيد لدرجة إن بقي فيه أحياء كاملة جوه مدينتك إنت مبقتش عارف تمشي فيها لوحدك بليل .. في الوقت ده إنت شايف دول حوليك اللي زيك من المقهورين من الطبقة الوسطي عايشين فيها بقي ليهم حس .. إنت شايف حكومة إيطاليا اللي تعتبر حقاً وصدقاً أغرب حكومة فيك يا عالم دلوقتي ماسكها تحالف من أقصي اليمين المتطرف وأقصي اليسار مع بعض اللي هو أنا مش فاهم إزاي بس فالحين كل شوية يطلعوا يهددوا إنهم حيسيبوا الإتحاد الأوروبي ويطلعوا من اليورو مع العلم إن إيطاليا دولة من الدول المؤسسة للإتحاد الأوروبي .. إنت شايف زمايلك من عمال بريطانيا الرجاله اللي بسم الله ما شاء الله لبسوا بلدهم كلها في الحيط لما وافقوا علي إنهم يسيبوا الإتحاد الأوروبي في الاستفتاء بتاع بريكزيت Brexit .. وطبعاً إنت شايف زعيم حزب الكنبة العالمي (دونالد ترامب Donald Trump) وهو عمال يسقف وهو بيتفرج علي الإتحاد الأوروبي بيقع حتة حتة .. بزمتك مش حتقول لنفسك هو ليه مصحاش من نومي وأساهم بدوري في إني أدمر الإتحاد الأوروبي أنا كمان؟
تفكير الناس بتوع حزب الكنبة في أوروبا كلها واحد كأنهم كلهم غاشين من بعض .. إحنا شايفين الدنيا بتتطور بشكل أسرع من قدرتنا علي إننا نفهمه .. شايفين بلدنا بتتسرق من المهاجرين .. شايفين قيمنا بتتسرق مننا .. يعني إيه نقبل بحاجة زي حقوق الشواذ وحقوق المتحولين جنسياً؟ .. وليه مرتبنا مبقاش يكفينا زي زمان؟ .. ليه بتحسبونا علي إننا من الطبقة المتوسطة وإحنا أقرب ما نكون للفقراء؟ .. حزب الكنبة في أوروبا وأميركا عاش حياته كلها في السنين اللي فاتت علي مبدأ بيسموه في الإقتصاد High-Wage, Middle-Skilled Job .. يعني أنا مواطن معييش شهادة جامعية بس شغال في مصنع باخد مرتب حلو أوي .. مع الوقت بدأت الRobotics والالات والذكاء الصناعي Artificial Intelligence ياخدوا مكاني .. مع الوقت الشركات الأوروبية بقت تفضل تنقل مصانعها للصين عشان العمالة أرخص .. مع الوقت الناس مبقتش لاقيه شغل ولو لقت شغل فهو بقي شغل يا إما عايز ناس متعلمة فشخ أو ناس مش متعلمة بس بتاخد مرتب قليل .. بإختصار شديد الHigh-Wage, Middle-Skilled Job إنتهي وحل محلها High-Wage, High-Skilled Job و Low-Wage, Low-Skilled Job .. مع الوقت حزب الكنبة عمال يتشحن بطاقة غضب ضد كل حاجة .. طاقة غضب ضد السياسيين اللي هو شايفهم ضحكوا عليهم .. طاقة غضب ضد رجال الأعمال اللي هو شايفهم بيسرقوا منه أكل عيشه .. عايزك تحط كل ده في الخلاط .. ناس حاسة إن بلدها إتسرقت منها .. حاسة إن في أي لحظة ممكن مديرهم في الشغل يقولهم مع السلامة .. ناس شايفة إن كل يوم بيعدي فرصتهم في حياة كريمة بتقل وإن اللي يقدر يشتريه النهاردة بكره مش حيقدر .. فوق ده كله ناس شايفه إن القيم اللي هم إتربوا عليها هي كمان بتتهد .. تعالي إنت بقي إدي للناس دي وسيلة إنهم كلهم يتواصلوا مع بعض زي سوشيال ميديا Social Media وهوبا تلاقي يطلعلك في الأخر السم الهاري اللي (ماكرون) عمال يشربه.
يوم 24 نوفمبر 2018 جرنان The Guardian البريطاني عمل تحقيق محترم أوي إنهم راحوا إتكلموا مع الناس بتوع مظاهرات فرنسا اللي الناس بتسميها Yellow Vest Protesters أو متظاهرين الجاكتات الصفرا بس اللي أنا زي ما قلتلك بسميهم حزب الكنبة .. المهم إنك لما تبدأ تسمع الناس دي رأيها إيه حتبدأ تفهم كلامي .. عندك واحدة زي (فلورينس Florence) .. دي ست عندها 55 سنة شغالة في شركة شحن جوي في باريس اللي رأيها في (ماكرون) بمنتهي البساطة إنه مبيعرفش يتكلم مع الناس بتوع الطبقة المتوسطة .. هي حاسه إنه بيحتقرهم وده إحساس خطر أوي إن مواطن يحسه من رئيسه .. واحد تاني زي (برونو بينيلي Bruno Binelli) نجار علي المعاش عنده 66 سنة عايش في مدينة ليون مشكلته مع (ماكرون) إنه لما غلي سعر السولار قال إنه عمل كده عشان يساهم في إنقاذ البيئة فالناس اللي عايشة في الأرياف زي (برونو بينيلي) اللي معندهمش وسائل مواصلات ولا أتوبيسات ولا قطارات زي جوه المدن وبالتالي واحد زيه محلتوش غير عربيته النص نقل اللي شغالة علي محرك ديزل حيتخرب بيته بسبب زيادة السولار وبناء عليه الإحساس اللي واصل للناس بتوع الأرياف إن (ماكرون) عايش في اللالالاند ومش حاسس بيهم ولا بمشاكلهم ولا يعرف أي حاجة عنهم .. واحدة زي (ماري ليموين Marie Lemoine) عندها 62 سنة شغالة مدرسة وهي قالت إنها شاركت في المظاهرات مش لإنها يمينية ولا يسارية ولا أي حاجة خالص إنما هي شايفة بعنيها ناس حوليها بيجي نص الشهر يلاقوا مرتبهم خلص .. خدت بالك من معدل أعمار الناس اللي الThe Guardian إتكلمت معاهم؟ .. خدت بالك إن كلهم كبار في السن؟ .. خدت بالك إن كلهم يا إما شغالين في وظايف متوسطة يا إما عايشين في الأرياف؟ .. أهو دول حزب الكنبة بتاع أوروبا.
حزب الكنبة مشكلته إنه سهل أوي يتضحك عليه وإسأل الناس بتوع بريطانيا لو مش مصدقني .. طب أنا حشهدك .. لنفترض إنك عايش في بريطانيا وأنا سياسي بريطاني جيت طلعتلك في برنامج (أحمد موسي) بتاع بريطانيا وقلتلك إنك يا باشمهندس (جون John) لو وافقت وقلت Yes في الاستفتاء بتاع Brexit فإنت حتستفيد إنك مش حيجيلك العمال الأوروبيين اللي بيتقدروا بإن عددهم 2.2 مليون بني أدم من بره بريطانيا وعايشين فيها يشتغلوا وبالتالي واخدين وظايف كان ممكن إبنك هو اللي يشتغل فيها وفي نفس الوقت حتستفاد بكل الحلويات اللي بتيجي مع إنضمامك للإتحاد الأوروبي .. بذمتك واحد بيهبد الهبد ده حد يصدقه؟ .. يعني إنت متخيل إن الدول الأوروبية حتسيبك تطرد عيالها بره بلدك وفي نفس الوقت حتسيبك تاخد منتجاتها ببلاش؟ .. إنت عبيط يلا .. وبرده الناس بتوع حزب الكنبة صدقوا وقالوا Yes في استفتاء Brexit مع إن كل ده كان كدب في كدب.
دلوقتي تبص علي اللي بيحصل في بريطانيا وتلاقي نفسك بتضرب كف علي كف .. واحد زي (بوريس جونسون Boris Johnson) اللي كان وزير الخارجية وواحد من الناس بتوع حزب المحافظين اللي كان ناقص يخبط علي بيوت الناس يقولهم والنبي أبقوا قولوا Yes في الاستفتاء مع إنه عارف إنه كده بيلبس بلده كلها في الحيط لإنه عارف إن الإتحاد الأوروبي عمره ما حيقبل بطلبات بريطانيا إنها تسيب الإتحاد أول ما لقي رئيسة الوزراء (تيريسا ماي Theresa May) يا عيني محطوطة في خانة اليك ومش عارفة تتصرف قام مقدم استقالته وبيتهمها هي بإنها اللي فاشلة ومش عارفة تدير المفاوضات مع الإتحاد الاوروبي مع إنه عارف كويس أوي إن الحل الوحيد عشان الأزمة دي تعدي إن يتعمل استفتاء تاني عشان المرة دي الناس تقول No والمياه ترجع لمجاريها بس تقول إيه العند يولد الكفر .. النقطة دي بالذات حتخليني أرجع تاني أتكلم عن (ماكرون).
قول علي (ماكرون) اللي إنت عايزه بس إنت محتاج تفهم إنه رجل بيفهم .. هو شاف إقتصاد بلده مأنتخ ومفخد فحب يخليه يعمل دايت ويروح جيم عشان يتنشط بس مشكلته يمكن لإنه معندوش خبرة سياسية إنه مفهمش الفرق بين إنك تبقي صح وبين إنك تشتغل صح زي ما بيقول الخبير الإقتصادي الفرنسي (لودفيج سوبران Ludwig Subran) وإنه مفهمش إزاي إن نظام الدايت اللي هو كان عايز الإقتصاد الفرنسي يمشي عليه حيفشخ الناس اللي بتشرب كليوباترا سوبر فرط وفي نفس الوقت مش حيبقي له تأثير أوي علي الناس اللي بتشرب سيجار كوبي .. نظام الدايت اللي (ماكرون Macron) كان عايز يطبقه علي الإقتصاد الفرنسي قايم علي 4 حاجات:
- إصلاحات في قانون الضرايب هدفها إنك لو إنت معاك فلوس فالأحسن ليك إنك تفتح بيها شغل وتستثمرها.
- أكتر فئة بتبلع حصة المعاشات في الميزانية كانت عمال السكك الحديد فهو قرر يقلل من الفلوس بتاعة معاشاتهم.
- عمل شوية لعب في قانون العمل بحيث إنك لو عندك شركة فبقي أسهل ليك إنك تمشي الناس وتعين الناس.
- عمل صندوق شعبي هدفه إنه يمرن ويدي كورسات للعمال اللي مش لاقيين شغل أو اللي مشوا من شغلهم.
بس لإن حزب (ماكرون) لسه حديث الولادة متأسسش إلا لما هو رشح نفسه للرئاسة يعني مش حزب قديم ملوش قاعدة شعبية وملوش ممثلين في المحليات وبالتالي معندوش الفريق اللي يقيس ويحس برأي وإحساس الناس فيا عيني الرجل إتصدم من رد فعل الشعب علي قراراته .. اللي هو مفهموش إن الناس بتوع حزب الكنبة شافوا إنه قلل الضرايب اللي بيدفعها الناس الأغنياء والشركات وعوض الفلوس دي بإنه خد فلوس المعاشات ورفع سعر السولار حتي من غير ما يحط في القانون فقرة يستثني فيها الناس اللي عايشة في الأرياف لإن معندهمش وسائل مواصلات .. ولإن الناس بتوع حزب الكنبة ساعتها حسوا إنهم زي ما يكونوا بيتهانوا من رئيسهم قاموا لابسين الجاكتات الصفرا بتاعتهم ونزلوله الشارع قالوله إنت سامعنا دلوقتي؟ .. علي رأي (ألان فراكون Alain Frachon) الصحفي في جريدة Le Monde الفرنسية إن (ماكرون) يا عيني تخيل نفسه بيحكم سنغافورة مش فرنسا اللي هي أساساً بلد ثورية .. بإختصار شديد (ماكرون) جاب كل الأخطاء السياسية اللي ممكن أي رئيس يعملها قام دايس Select All وداس Apply عليهم كلهم.
عشان (ماكرون) ينقذ إسمه في الشارع قام خارب الميزانية .. البيه قرر إنه يلغي الزيادة بتاعة السولار بس ملغاش قرار تخفيض الضرائب علي الأغنياء والشركات عشان يعوض الفرق .. مش كده وبس .. ده زود الحد الأدني للأجور 114 دولار في الشهر ولغي قرار تقليل المعاشات بتاعة العمال بتوع السكة الحديد .. يعني بسم الله ما شاء الله شوية وحيخلي فرنسا تفلس .. بس عشان الناس بتوع الجاكتات الصفرا ملهمش قائد فمحدش عارف الإجابة عن السؤال بتاع طب وبعدين؟ .. فرنسا دلوقتي وضعها زي وضعنا بعد ثورة يناير .. رئيس معندوش شعبية قدام متظاهرين ملهمش قائد .. في رأيي الشخصي (ماكرون) عشان ينقذ كرسيه حيغرق الإتحاد الأوروبي كله لإن كانت دايماً فرنسا وألمانيا هم أوائل الفصل .. هم الدحيحة اللي دايماً ميزانيتهم بتطلع مظبوطة عشان الإتحاد الأوروبي يكمل بس دلوقتي ميزانية فرنسا إتخربت و(أنجيلا ميركل Angela Merkel) أخر سنة ليها السنة دي فهي ماشية بمبدأ I don’t give a fuck اللي هي ترجمته خليها تولع .. خليني أكملك جرعة النكد بإني أنقلك وجهة نظر حد زي (دومينيك مويسي Dominic Moisi) واحد من أكتر الناس اللي بتفهم في السياسة الخارجية الفرنسية واللي بيقول الأتي:
في الوقت اللي أميركا كانت طول عمرها الأب الحنين لأوروبا واللي بيحميها من روسيا الوحشة تقرر إنها تعبت من الدور ده وإن أوروبا المفروض تتعلم تحمي نفسها .. في الوقت اللي روسيا بعد سنين من التهميش قصاد الدور الأميريكي تشوف أميركا بتنسحب فتقرر إنها تبقي عاملة زي الطالب الصايع في فيلم الناظر اللي عمال يزعق مفيش حريات هنا مفيش ديموقراطية هنا .. في الوقت اللي ألمانيا تبقي كل اللي طالع عليها تقول كله رايح .. في الوقت اللي إيطاليا زي العيل المراهق اللي مش عارف مصلحته وفاكر إن الطريقة الوحيدة اللي يبان بيها إنه رجل إنه يتمرد علي الإتحاد الأوروبي .. في الوقت اللي بريطانيا زي ما تكون واحدة عندها إكتئاب حاد وتقرر تنتحر عشان يستريح من قرف الدنيا .. تكتشف إن اللي بيحصل في فرنسا حيسمع في أوروبا كلها .. بإختصار شديد لو (ماكرون) معرفش يلم الليلة قول يا رحمن يا رحيم علي الإتحاد الأوروبي كله.
المصدر:
- مقالة بعنوان The End of Europe? .. هل دي نهاية أوروبا؟ .. نشرت في جريدة The New York Times وده لينك المقالة الأصلية:
https://www.nytimes.com/2018/12/18/opinion/europe-france-economy.html
