فيه هسهس عند ناس كتير إن مينفعش نزعل مننا الصين .. الصين بلد كبيرة و قوة عظمي و مينفعش نعمل حاجة تضايقها .. إيه المشكلة يعني لما تسجنلها و تعتقلها كام مليون مسلم من الإيغور .. الناس دي فعلياً زي ما تكون بتتعامل مع الصين معاملة العفاريت كده اللي هو ربنا يجعل كلامنا خفيف عليهم .. لو إنت من الناس دي فأنا عايزك في كلمتين علي جنب .. تعرف إستراليا؟ .. القارة الكبيرة اللي تحت خالص علي إيدك اليمين لو بصيت علي خريطة العالم و اللي كانت جزء من الإمبراطورية البريطانية .. البلد اللي هي الموطن الأصلي للكانجارو دي …. أهي أستراليا دي بينها و بين الصين دلوقتي خناقة كبيرة بس مش ده الغريب .. زي ما مصارين البطن بتتخانق فبرده عادي و بتحصل إن بلدين يختلفوا .. هي المشكلة إن كتير من الأستراليين كانوا بيفكروا زي الناس اللي قلت عليهم في الأول .. ميذنفعش نزعل الصين .. قبل ما أفهمك هي إيه بالضبط سبب الخناقة بين الصين و أستراليا فإنت مهم تبقي فاهم هي العلاقة بينهم كانت إزاي أصلا؟
مبدأياً أستراليا و الصين سياسياً مفيش بينهم أي حاجة مشتركة .. الأولانية تبقي حليفة أميركا اللي بتعتبر الثانية خطر واضح و صريح علي الأمن القومي بتاعها .. أستراليا عارفه كويس أوي إن لو الفاس وقعت في الراس و أميركا و الصين مسكوا في خناق بعض فأول حد حيتضرب هم .. أستراليا بلد ديموقراطية رأسمالية و الصين بلد شيوعية .. حقاً و صدقاً البلدين دول المفروض يعني إن مفيش بينهم أي حاجة مشتركة بس عشان مفيش حد بيقول للرزق لا فالبلدين زي ما يكونوا قالوا لبعض مش معني إننا مختلفين سياسياً إننا منفّعش بعض .. من 2009 لحد 2019 الصادرات الأسترالية للصين نطت 3 أضعاف يعني أستراليا باعت للصين بضاعة بحوالي 110 مليار دولار .. نص الفلوس دي كانت عشان الصين تشتري من أستراليا خام الحديد اللي هم معتمدين عليه في مشاريع الإنشاءات الفشيخة اللي بتتعمل عندهم .. حاجة كمان إن نسبة كبيرة من السياح اللي بيزوروا أستراليا كل سنة بيجوا من الصين .. لحد هنا الدنيا كانت زبادي خلاط بين البلدين .. علي الأقل من ناحية الفلوس .. لحد ما جت جائحة فيروس كورونا.
في إبريل 2020 طلع رئيس الوزراء الأسترالي (سكوت موريسون Scott Morrison) طلب إن يتعمل تحقيق برعاية الأمم المتحدة عشان يشوفوا هو فيروس Covid-19 ده طلع إزاي .. أنا شايفه طلب منطقي و الرجل مغلطش في حاجة .. بعدها بإسبوع سفير الصين في أستراليا طلع هدد بإن الكلام الماسخ اللي طلع من بق رئيس الوزراء ده مينفعش يترد عليه إلا بمقاطعة عامة لكل البضايع الأسترالية .. لما محدش عبره جت الحكومة الصينية من غير لا إحم ولا دستور في مايو 2020 طلعت قرار بفرض تعريفة جمركية تعجيزية علي القمح المستورد من أستراليا .. عايزك تعرف إن الفلاحين الأستراليين كانوا بيصدروا كل سنة قمح للصين بحوالي مليار دولار .. هوبا ومن غير أي مقدمات الناس دي إتقالها زي ما (طارق الشيخ) بيقول .. كفي نفسك.
مهم تبقي فاهم المنطق ورا الأمور .. الصين كانت متخيلة إنها لما تعور أستراليا في مليار دولار فحيطلع (سكوت موريسون) يقول يا جماعة والله كبرتوا الموضوع و أنا مكنش قصدي و هاتوا راسكوا أبوسها .. الغريبة إن ده محصلش .. وزارة الخارجية الأسترالية طلعت بيان قالت فيه إن اللي بتعمله الصين ده إسمه لوي دراع و إحنا مبيتلويش دراعنا .. الصين تسكت؟ .. يبقي إنت متعرفش الصين كويس .. شوية و طلع قرار بمنع إستيراد اللحمة الأسترالي .. شوية و إتفرضت تعريفات جمركية علي النبيذ و الصوف و الإستاكوزا و السكر و النحاس و الخشب و العنب الأسترالي .. شوية و طلع قرار من الحكومة الصينية إن المستوردين ميجيبوش لا فحم ولا قطن من أستراليا ولا حتي غاز طبيعي مسال اللي هو LNG .. تاني مهم برده تفهم المنطق ورا الأمور .. دي مش أول مرة دولة تعمل حاجة تزعل الصين و مش أول مرة الصين تستخدم لوي الدراع ده عشان تاخد حقها .. هي جربت الطريقة دي مع كندا و اليابان و ليتوانيا و منغوليا و النرويج و الفلبين و كوريا الجنوبية و تايوان .. كل الدول دي رجعت في كلامها إلا أستراليا .. الأستراليين بصوا للصينيين و قالولهم إحنا لحمنا مر ميتاكلش .. و إن إتاكلنا عظمنا ناشف ميتقرش .. و إن إتقرش بيقف في الزور و ميتبلعش .. و إن إتبلعنا بيوجع البطن و ميتهضمش.
موقف أستراليا غريب لسبب .. حوالي 40% من صادرات أستراليا بتروح للصين .. أستراليا متقدرش تعيش مع الضربة الإقتصادية دي .. ورغم كده عاشت عادي .. إزاي بقي دي محتاجة تتشرحلك بمثال:
خد عندك الفحم مثلاً .. دلوقتي في مايو 2020 الصين طلعت قرار إنها مش حتستورد فحم من أستراليا .. جميل .. محطات إنتاج الكهرباء الصيني أكيد يعني مش حتبطل شغل و حتروح لحد تاني تشتري منه فحم و الحد ده كان روسيا و أندونيسيا .. حلو .. زمان كان أهم زبون للفحم بتاع روسيا و أندونيسيا هم اليابان و كوريا الجنوبية و الهند اللي لما الصين جت و دفعت أكتر فالروس و الأندونيسيين قالولهم و إحنا سدادين .. أكيد يعني اليابان و كوريا الجنوبية و الهند مش حيقفلوا و يشحتوا في الشارع .. قامت أستراليا رايحالهم و قاتلهم أنا مستعدة أبيعلكوا فحم بنفس السعر اللي كنتوا بتشتروا بيه من روسيا و أندونيسيا .. شفت اللي حصل مع الفحم ده؟ أهو ده حصل هو هو في كل البضايع اللي الصين فرضت حظر إستيراد ليها من أستراليا .. القمح راح للسعودية .. النحاس راح لأوروبا و اليابان .. القطن راح بنجلاديش و فيتنام.
اللي أنا عايز أقوله إن وسط جو التجارة العالمية و العولمة و إن العالم بقي أوضة و صالة مينفعش إنك تقول لنفسك أنا حعرف أقطع أكل عيش حد .. البيزنس دلوقتي بقي زي ما يكون لعبة كراسي موسيقية حتفضل تتلعب و متتخيلش إنك تعرف تخلي المزيكا تقف.
المصدر:
مقالة بعنوان Australia shows the world what decoupling from China looks like نشرت في مجلة Foreign Policy و ده لينك المقالة الأصلية:
https://foreignpolicy.com/2021/11/09/australia-china-decoupling-trade-sanctions-coronavirus-geopolitics/
