عمرك كنت بتتفرج علي فيلم أكشن فيه البطل بيعوم تحت المياه و فيه ناس معاها بنادق ألية بتضرب عليه نار و في المشهد إنت بتشوف الطلقات و هي بتخترق المياه حول البطل وهو بيعوم .. فيه مشهد جامد جداً بيوروك الحكاية دي اللي هو المشهد الإفتتاحي في فيلم Saving Private Ryan و غيره كتير الحقيقة بس هي الفكرة إن و إنت بتتفرج أكيد سألت نفسك هو ده بيحصل فعلاً؟ .. هو ممكن بندقية ألية عادية تضرب نار تحت المياه؟ .. كتير مننا بينسي معلومة إن فيه ناس شغلتها في الحياة إنها بتاخد فلوس عشان تضرب نار تحت المياه و الناس دي هي الضفادع البشرية .. أيوه هم دول بتوع فيلم الطريق إلي إيلات .. الناس دي من أول يوم إتعملت فيه الوحدات القتالية بتاعتهم و هم بيتحطوا قدام السؤال ده .. إزاي أضرب نار تحت المياه؟
من الناس اللي حاولت تجاوب علي السؤال ده كان السوفييت اللي في السبعينات عملوا واحدة من أغرب البنادق الألية اللي إتعملت في تاريخ البني أدمين وهي البندقية APS .. لا مش الفرامل في عربيتك .. السلاح ده بقي بيتحط في إيد الضفادع البشرية اللي ضمن القوات الخاصة السوفيتية اللي يمكن إنت تعرفها من الإسم اللي أكيد سمعته لو لعبت Call of Duty اللي هو سبيتس-ناز Spetsnaz .. كمحاولة للتقريب حاول تتخيل إن قوات سبينسناز دي هي هي الصاعقة في القوات المسلحة المصرية و إن جزء منها يبقي الصاعقة البحرية بس هو فيه نقطة .. الإتحاد السوفيتي كان بلد واسعة .. واسعة بغباوة يعني .. إذا كانت القوات المسلحة المصرية عندها 5 مناطق عسكرية اللي هم الغربية و الشمالية و الجنوبية و المركزية و شرق القناة و ده منطقي حسب جغرافيا البلد فالإتحاد السوفيتي كان عندهم 14 منطقة عسكرية .. كل منطقة بيخدم فيها لواء كامل من القوات الخاصة بيضم ما بين 900-2000 فرد .. زود عليهم معلش لواء إضافي كمان و لواء بتاع مظلات.
كتير من المناطق العسكرية دي متوزعة علي سواحل و حدود الإتحاد السوفيتي .. بمعني أخر .. جزء من تدريب القوات الخاصة دي إنك إزاي تنقلهم تحت المياه لسواحل دول مجاورة زي اليابان و فنلندا و السويد و كلها دول غربية و حليفة لأميركا عشان ينفذوا عمليات خلف خطوط العدو .. القوات دي عشان توصل لسواحل الدول دي غالباً بيركبوا غواصات صغيرة بتتركب في الغواصة الكبيرة اللي بتشوفها في الأفلام وهي اللي تنقلهم لساحل الدولة التانية أو بيقضوها غطس اللي هو حنرجع تاني لفيلم الطريق إلي إيلات .. طبعاً لو دي ظروف شغلك فإنت بنسبة كبيرة حتتحط في موقف إنك محتاج تضرب نار علي حد و إنت تحت المياه .. لحد دلوقتي الكلام منطقي .. زي ما إنت بتشوف في الأفلام فالبنادق الألية العادية تقدر تستخدمها عشان تضرب نار تحت المياه بس هي فيها مشكلتين .. المشكلة الأولانية إنك مينفعش تنشن بيها خالص .. المشكلة الثانية إنك لازم تكون قريب جداً من اللي إنت عايز تقتله عشان مدي ضرب النار تحت المياه بيكون قصير .. هنا بيجي دور البندقية APS.
البندقية دي من تصميم مهندس روسي إسمه (فلاديمير سيمونوف Vladimir Simonov) شغال في معهد الهندسة الميكانيكية الدقيقة و ده واحد من المعاهد العلمية اللي شغاله في تطوير الأسلحة في روسيا و أهم حاجة تفهمها و إنت بتحاول تفهم البندقية دي إنك تبقي عارف إن (فلاديمير سيمونوف) معادش إختراع العجلة .. هو جاب البندقية الأساسية اللي في إيد أي عسكري سوفيتي اللي هي AK-47 أو الكلاشينكوف و لعب في تصميمها شوية و الأهم إنه لعب في تصميم الطلقات المستخدمة فيها .. حتلاحظ كذا حاجة الحقيقة لو ركزت شوية .. حتلاحظ إن البندقية فعلياً مكشوفة من الجنب و ده مقصود عشان و إنت بتضرب نار فالماسورة تبقي مليانة مياه .. حتلاحظ إن الطلقات عبارة عن سياخ صلب طولها 12 سنتيمتر و قطرها 5.65 مليمتر و في أخر السيخ حتلاقي مظروف طلقة AK-47 عادية .. بمجرد ما حضرتك بتدوس علي الزناد السيخ بيعوم في المياه عن طريق ظاهرة فيزيائية جامدة زحليقة إسمها Supercavitation ودي نفس الفكرة اللي إتبني عليها طوربيد شكفال و كنا إتكلمنا عنه قبل كده .. حتلاحظ برده إن خزنة البندقية غريبة شوية و ده سببه شكل الطلقة زي ما إتكلمنا و الخزنة بتشيل 26 طلقة.
مشكلة البندقية دي في رأيي هي صعوبة إنك تحكم عليها هل هي حاجة حلوة ولا حاجة وحشة .. دلوقتي إنت لو عندك بندقية ألية فإنت بتشوف الأوبشنز بتاعتها .. هل بتخليك تضرب Semi-Automatic و Fully Automatic ولا لا .. معدل ضرب النار بتاعها عالي ولا لا .. لما تيجي تشوف الأوبشنز بتاعة APS فحتلاقي مشكلة إن الماسورة بتاعتها مش معمول فيها الحلزون أو الششخان في الماسورة اللي بيخلي الطلقات تلف حول نفسها وهي طايرة في الجو وده بيدي للطلقة Stability وهي طايرة و بيخليها تطير مسافات طويلة .. أساساً يعني عدم وجود أوبشن زي ده في APS خلاها ولا ليها أي لازمة طالما إنت مش تحت المياه .. حتي لو قلتلك إن في الإختبارات اللي إتعملت علي البندقية لما جربوها بره المياه كانت بتضرب طلقات بمعدل 600 طلقة في الدقيقة بمدي طيران للطلقة الواحدة 100 متر فكل ده بلح الفكرة في أرقامها تحت المياه .. هنا حتلاقي نفسك وقعت في مشكلة وهي إن الأرقام بتاعتها بتختلف علي حسب إنت في عمق قد إيه و كثافة المياه قد إيه و درجة الحرارة قد إيه و حتلاقي نفسك قدام مسالة فيزياء مش تقييم لأداء بندقية ألية .. لكن عشان أبقي يعني خلصت ضميري خليني أقولك الأرقام اللي الروس بيقولوا إن البندقية بتاعتهم بتديهالك .. لو إنت علي عمق 4.5 متر تحت المياه فالطلقة بتاعة البندقية APS بتقدر تعوم 270 متر .. لو إنت علي عمق 42 متر تحت المياه فالطلقة بتقدر تعوم 11 متر وده أقصي مدي و أقصي عمق تحت المياه تقدر توصله.
البندقية APS قديمة علي فكرة .. هي دخلت الخدمة سنة 1975 و بالتالي كتير من النسخ بتاعتها طلعت بره الخدمة و يقال إن فيه كلام إن الروس بيفكروا يعملوا حاجة بديلة ليها بس هي الفكرة في حاجة .. أكتر بلدين في العالم عندهم قوات ضفادع بشرية من حيث العدد علي الأقل هم روسيا و أميركا و لك أن تتخيل إن أميركا عمرها ما فكرت تعمل بندقية بتضرب تحت المياه عشان يستخدمها عناصر Navy SEALs بتاعتهم .. ده بيخلي بندقية APS زي ما كده بيتقال One of a Kind .. هي حالة لوحدها تستحق إننا كنا نوفرلها مساحة و وقت إننا نتكلم عنها.
المصدر:
مقالة بعنوان Death Underwater: Meet the APS Spetsnaz Rifle نشرت في مجلة The National Interest وده لينك المقالة الأصلية:
https://nationalinterest.org/blog/reboot/death-underwater-meet-aps-spetsnaz-rifle-176590
