بمناسبة القرار اللي طلع من الإتحاد الدولي و الإتحاد الأوروبي لكرة القدم بمنع مشاركة منتخب روسيا أو الفرق الروسية في أي بطولة ليها علاقة بكرة القدم بسبب الغزو الروسي لأوكرانيا و ده معناه إستبعاد منتخب روسيا من ماتشات الملحق الأوروبي لكأس العالم في قطر و كمان إستبعاد فريق سبارتاك موسكو من بطولة Europa League فأنا حابب بس أفهمك هو القرار ده طلع إزاي و ليه؟
الموضوع بدأ بيوم السبت 26 فبراير لما طلع (رومان إبراموفيتش) مالك نادي تشيلسي قالك إنه بيسلم الStewardship بتاعة النادي للجمعية الخيرية بتاعة النادي .. شوف يا إبن الحلال .. قانوناً مفيش حاجة إسمها Stewardship .. قانوناً لو أنا عندي عربية متسجلة بإسمي فلو سبت حد تاني يسوقها ففي نظر القانون أنا برده لسه المالك بتاعها .. هي الفكرة إن الكلام كتر في أوروبا و بريطانيا إن لازم الحكومات تجمد حسابات رجال الأعمال الروس اللي قريبين من الرئيس الروسي (فلاديمير بوتين) و اللي الإعلام بره بيسميهم الأوليجاركس .. اللي حصل إن (إبراموفيتش) حب يوصل رسالة إن أنا خلاص شلت إيدي من النادي .. أرجع و أقولك إن قانوناً اللي عمله (إبراموفيتش) ده هبد لإن لو أنا مثلاً بملك نادي وادي دجلة و ليا حساب في CIB فمش حتلاقي حسابي في البنك فيه 250 مليون جنيه اللي هم ثمن النادي لو حبيت أبيعه بكره الصبح .. فتاني .. قرار (إبراموفيتش) ملوش علاقة بحاجة غير إنها محاولة منه إنه يقول للناس كلها “الله و أنا مالي يا لمبي”.
وراها علي طول طلعت إتحادات كرة القدم بتاعة السويد و التشيك و بولندا قالوا إنهم مش حيلعبوا قصاد روسيا في الملحق .. مهم تبقي برده فاهم إن اللي كان حيحصل إن روسيا حتلاعب بولندا و التشيك حتلاعب السويد و الكسبان حيلاعب الكسبان علي التأهل لكأس العالم في قطر إن شاء الله .. طلع بعدها بيان من الإتحاد الدولي لكرة القدم FIFA قال إن روسيا مش حتلعب ولا ماتش علي أرضها و إن الماتشات اللي المفروض تتلعب علي أرضها حتتلعب في أرض محايدة .. مش كده و بس .. منتخب روسيا حيلعب تحت مسمي إتحاد كرة القدم الروسي و مش حيرفع العلم الروسي و مش حيتعزف النشيد الوطني الروسي في الماتش.
تاني يوم طلع بيان تاني من الإتحاد البولندي لكرة القدم قال إن قرار FIFA مش مقبول بالنسبة ليهم .. هم أصلاً مش عايزين يلاعبوا الروس بغض النظر إسم منتخب روسيا حيبقي هيثم ولا كريم ولا أحمد و إياكش حتي بدل النشيط الوطني تشغلوا أغنية البخت ل(ويجز) .. جت ناس إتكلمت مع بولندا قالتلها خلي بالك من كذا نقطة:
- الإجراءات بتاعة FIFA دي هي هي اللي اللجنة الأوليمبية الدولية IOC عملتها مع روسيا عشان تعاقبها علي تعاطي المنشطات.
- السبب ورا إن دي هي القرارات اللي طلعت من FIFA هو إن دي مجرد قرارات مبدئية و بناء عليه هم ملقوش حاجة يعملوها غير إنهم يقلدوا اللي عملته اللجنة الأوليمبية الدولية لإن الناس دايماً بتغلط و بتتخيل إن FIFA دي عاملة زي شركة رئيس مجلس إدارتها هو (جياني إنفانتينو) بحيث اللي يقوله (إنفانتينو) بيمشي علي أطخن طخين لمجرد إنه رئيس FIFA .. الحقيقة مش كده .. اللي حصل إن بعد البيان المشترك بتاع إتحادات كرة القدم بتاعة بولندا و التشيك و السويد فإتعمل إجتماع لما يسمي FIFA Bureau و ده إجتماع بيضم (إنفانتينو) مع رؤساء الإتحادات القارية الدولية الستة و المشكلة اللي ظهرت في الإجتماع ده ليها علاقة بالحاجة اللي طول عمر FIFA بتقول إن ملهاش علاقة بكرة القدم .. السياسة.
- حصل قبل كده مرتين إن دولة إتمنعت من المشاركة في أي بطولة دولية لكرة القدم و المرتين دول كانوا يوغوسلافيا سنة 1992 و جنوب أفريقيا وقت ما كان ماسكها حكومة التفرقة العنصرية اللي بتتسمي أبارتهايد Apartheid .. المهم إن في المرتين طلع قرار رسمي من الأمم المتحدة بإدانة الدولتين و بناء عليه FIFA خدت قرار الأمم المتحدة كسبب تحطه في عين أي حد يقول إيه دخل الكرة في السياسة .. طبعاً عشان روسيا عضوة في مجلس الأمن فالأمم المتحدة مش حتعرف تطلع قرار بإدانتها و بناء عليه قرار FIFA ده إن مفيش ماتشات تتلعب علي الأراضي الروسية و إن المنتخب ميلعبش بإسم روسيا هو أقصي حاجة تقدر FIFA تقدمها .. إلا إذا.
الحل الوحيد إن التصعيد اللي عايزاه بولندا و التشيك و السويد يحصل هو إن دول كتير تقدم طلب رسمي بطرد روسيا من FIFA أو علي الأقل يقولوا إنهم مش حيلعبوا ضد مش بس المنتخب الروسي إنما الفرق الروسية كمان زي ما الإتحاد الويلزي و الإتحاد الإنجليزي و الإتحاد الأميريكي لكرة القدم قالوا .. بمجرد ما تطلع إتحادات تانية تاخد نفس الموقف فساعتها التصعيد حيحصل خصوصاً إن ماتش بولندا و روسيا لسه قدامه 3 أسابيع و ده اللي حصل فعلاً .. حاول تبقي حاطط في دماغك إن FIFA أجبن من إنهم ياخدوا قرار زي ده من دماغهم .. (جياني إنفانتينو) في منصبه ده دلوقتي عشان فيه ناس إختارته و حيفضل في منصبه طول ما الناس اللي إختارته شايفه إنه حيحمي مصالحها و ده يفسرلك ليه التعاطف مع فلسطين يعتبر تدخل للسياسة في كرة القدم بس مساندة أوكرانيا تعتبر واجب أخلاقي علي أي بني أدم .. خليك فاكر دايماً إن شعار FIFA اللي المفروض يتحط علي اللوجو بتاعهم إن الجُبن سيد الأخلاق.
أنا بس حابب أختم بالشخص اللي بدأت كلامي عنه .. (رومان إبراموفيتش) .. الأخ ده طلع بيان رسمي من المتحدث الرسمي بتاعه بإنه حالياً شغال كوسيط سلام بين روسيا و أوكرانيا .. قبل ما تتريق حط قدامك المعلومات دي .. معلومة رقم واحد إن الحكومة الأوكرانية هي اللي طلبت منه يبقي وسيط يعني (إبراموفيتش) مش من نفسه و مش من دماغه قالهم أنا عينت نفسي وسيط و أتمني أبقي مبسوط معاكوا هنا .. معلومة رقم إتنين إن صحيح (إبراموفيتش) روسي و صحيح هو من القريبين من (بوتين) و صحيح هو بيتحط ضمن شلة الأوليجاركس بس هو سحب فلوسه من روسيا من حوالي 20 سنة .. معلومة رقم ثلاثة وهي إن مامته أوكرانية ودي معلومة مش ناس كتير تعرفها وهو يهودي زيه زي الرئيس الأوكراني (فلاديمير زيلينسكي) .. هل حيبقي له دور؟ الله أعلم بس حكاية الغزو الروسي لأوكرانيا دي في حد ذاتها حنتكلم عنها كتير أوي بس لما الدنيا تهدي و يبقي عندنا المصادر اللي تخلينا نتكلم و إحنا واثقين من كلامنا.
المصدر:
فيديو من منصة شبكة ESPN الأميريكية علي YouTube و ده لينك الفيديو:
https://youtube.com/watch?v=2lVB3F37uwE&feature=share&fbclid=IwAR0PakNt8Gsd7RBrMxMV4Ik3LYYeKVYHUxuVOopbiS_yNHq-LR4A5BfQBTc
