من ضمن الحاجات اللي نفسي نفهمها هو إنك مش لازم تغلط عشان تتعلم .. إنت ممكن تشوف غيرك بيغلط وتتعلم منهم هم .. عادي مش عيب إنك تتفرج علي غيرك وتشوفه بيعك وتقول لنفسك الحمد لله الذي عافانا .. ده الحقيقة بينطبق علي غلطة بقالها سنين عامله صداع للقادة العسكريين في العالم وهي إنك لو مشيت في الشارع في أي حتة في العالم حتلاقي الناس ماسكه في موبايلاتها زي العيل الصغير اللي شبطان في لعبة .. دلوقتي هم العساكر وضباط الجيش دول مش بني أدمين برده .. هم العساكر وضباط الجيش دول بيتعاملوا مع الموبايلات إزاي؟ .. إمتي العسكري يتقاله إمسك موبايلك عادي وإمتي ميمسكوش؟ .. هل ضابط الجيش عادي إنه ينزل أي Apps علي موبايله؟ .. أنا عارف ومقدر إنها أسئلة قد تبدو غبية بس أنا النهاردة جايلك بشوية قصص وحكايات لإزاي الموبايلات مش بس عملت مصايب دي كانت السبب في موت ضباط وعساكر مش لسبب غير إن العسكري أو الضابط مكنش مستوعب ولا عنده فكرة لحجم الكارثة اللي هو ماسكها في إيده.
لو صدقت كلام الأوكرانيين فهم من فبراير 2022 وده الشهر اللي بدأ فيه الغزو الروسي لأرضهم ولحد مايو فهم قدروا يغتالوا 12 جنرال روسي .. إزاي عملوا ده؟ .. هم إكتشفوا إن لما شبكة الإتصالات العسكرية الروسية بتقع فالعساكر الروس بيستخدموا موبايلاتهم عشان يتصلوا ببعض .. طب إيه المشكلة؟ .. المشكلة علي حسب كلام واحد زي الجنرال (بين هودجيز Ben Hodges) اللي كان قائد القوات المسلحة الأميريكية في أوروبا إن أسهل حاجة في الدنيا إنك تحدد مكان أو Location بتاع حد بيتكلم في التليفون ودي اللي بيسموها Geo-Locate .. إزاي ده بيحصل؟ .. لما عسكري روسي يطلع موبايله ويتصل بزميله فالموبايل بتاعه بيطلع إشارة بيسموها Roaming Signal بمجرد ما موبايله يلقط شبكة من Service Provider أوكراني .. زي كده لو مواطن أمريكاني جه مصر زيارة بس هو في بلده مثلاً معاه شريحة فودافون فلما جه مصر إتصل بحد فموبايله لقط الشبكة بتاعة فودافون مصر .. لما العسكري الروسي موبايله بيلقط شبكة فالمخابرات الأوكرانية بتقدر تحدد مكانه عن طريق أقرب 3 أبراج تقوية ليه .. بإختصار لما عسكري روسي يستخدم موبايله في أوكرانيا فهو بيدي المخابرات الأوكرانية رقم تليفونه والLocation بتاعه.
الناس اللي ماسكه iPhone بتتمنظر علي باقي خلق الله بسبب خاصية Find My iPhone App اللي لو لا قدر الله موبايلك إتسرق بتعرف تجيب Location بتاع اللي سرقه حتي لو الموبايل مقفول .. يحكي أن فيه مواطن أوكراني اسمه (فيتالي سيمينتس Vitaliy Semenets) عساكر روس سرقوا الiPhone بتاعه فالرجل دخل علي النت وشغل الFind My iPhone App وبقي شايف بنفسه علي جوجل ماب تحركات الوحدة العسكرية الروسية اللي فيها العساكر اللي سرقوا موبايله .. إنت مستوعب حجم الكارثة؟ .. تبقي المشكلة في الفساد خلي بالك .. القوات المسلحة الروسية معندهاش شبكة إتصالات عسكرية مستقلة محترمة زي اللي عند الأمريكان أو الصينيين .. عناصر القوات الخاصة الروس بيبقي معاهم أجهزة لاسلكي متشفرة للإتصالات بتاعتهم وكان المفروض إن الأجهزة دي تتوزع علي كل الوحدات القتالية الروسية اللي دخلت أوكرانيا بس ده محصلش .. جزء من السبب إن الغزو الروسي محدش كان مخططله من شهور فمحدش لحق يوفر الأجهزة دي .. جزء تاني من السبب إن الروس نفسهم مكانوش متخيلين إن الأوكرانيين حيقاوموا بالبسالة دي وكانوا متخيلين إن المواطن الأوكراني البسيط حياخد العساكر الروس بالحضن .. بس يمكن أهم جزء هو الفساد .. يقال إن مشروع توزيع أجهزة الإتصالات العسكرية المشفرة دي علي الوحدات القتالية الروسية إتحطله ميزانية 10 مليار دولار بس منهم خمسة إتشفطوا وإتوزعوا علي حسابات البنوك بتاعة كبار القادة العسكريين الروس في سويسرا.
أوعي تفتكر إن الأخطاء دي قاصرة علي الروس بس .. لا خالص .. البهايم كتير وبيجوا بكل شكل و لون .. في نوفمبر 2021 حلف شمال الأطلنطي عمل مناورة عسكرية شاركت فيها القوات المسلحة البولندية وكان من ضمن أحداث المناورة إن وحدة قتالية بولندية تتحرك في السر للحدود بين بولندا وبيلاروسيا .. المشكلة إن العساكر البولنديين في الوحدة كان معاهم موبايلاتهم وعشان يتسلوا شغلوا Dating Apps علي موبايلاتهم عشان اللي حابب يعرف يشقط بنت .. المشكلة إن المخابرات البيلاروسية لقطت إشارات الموبايلات وبقوا عارفين هم العساكر البولنديين اللي المفروض يعني إن مكانهم سري والهدف كان إن لو حصلت حرب يفجعوا البيلاروسيين.
مش بس البولنديين .. الأمريكان ليهم تاريخ طويل من ستر ربنا في حتة إستخدام العساكر للموبايلات .. سنة 2018 المخابرات الأميريكية إكتشفت إن كتير من العساكر الأمريكان في القواعد العسكرية جوه الشرق الأوسط بقوا بيلبسوا ساعات سمارت بتكنولوجيا FitBits عشان لما حضرتك تطلع تجري الصبح بكل نشاط وحيوية فالساعة بتحسبلك إنت جريت قد إيه وحرقت سعرات حرارية قد إيه .. المشكلة إن الساعات دي كانت بتنقل الداتا دي كلها لGoogle Maps فلو إنت سايق عربيتك جنب أي قاعدة عسكرية أميريكية بتلاقي الموبايل بيقولك إزاي توصل لأي مكان جوه القاعدة العسكرية .. في أخر السنة اللي هي 2018 طلع قرار من وزارة الدفاع بمنع العساكر والضباط من إستخدام الساعات السمارت والموبايلات وأي جهاز بيطلب منك تشغل Location طول ما إنت قاعد في قاعدتك العسكرية .. مش بس كده .. لو دخلت زيارة لمقر وزارة الدفاع فإنت بيتقالك معلش سيب موبايلك علي الباب لإن برده المخابرات الأميريكية إكتشفت إن إنت لو جنرال أمريكاني جوه البينتاجون وموبايلك عليه App بيطلب منك إنك تديله Permission يعرف الLocation بتاعك فحرفياً أي حد يقدر يخترق موبايلك أو الموقع بتاع الشركة اللي بتعمل Application ويبقي شايف إنت رايح فين وجاي منين جوه مقر وزارة الدفاع.
أنا بس عايز أختم بقصة برده حصلت سنة 2020 لما خلال مناورة نفذتها قوات مشاة البحرية الأميريكية عسكري أمريكاني ملقاش حاجة يعملها قام مطلع موبايله صور نفسه صورة سيلفي حطها علي إنستجرام .. الإشارة بتاعة موبايلة إتلقطت و ده كان السبب إن مكان الوحدة بتاعته يتم إستهدافها .. لمجرد إنك مش لاقي حاجة تعملها أو إنك عايز تشقط بنات أو إنك عايز تجيب لايكات و شير كنت السبب في موتك و موت زمايلك كلهم .. تاني .. مش لازم نقع في نفس الأخطاء عشان نتعلم .. كفاية إننا نتفرج علي بلاوي الناس عشان نقول ربنا سترها.
المصدر:
- مقالة بعنوان Russian troops are proving that cell phones in war zones are a very bad idea نشرت في موقع Task & Purpose و ده لينك المقالة الأصلية:
https://taskandpurpose.com/news/russia-ukraine-cell-phones-track-combat/
