إقتصاد الطاقة المتجددة .. يا صباح الإشراقات.

واحدة من أكتر النظريات اللي الناس بتحب تجيب سيرتها لما بتحب تبان إنها مثقفة هي نظرية تأثير الفراشة The Butterfly Effect اللي هو ترجمتها بمنتهي البساطة إن الدنيا دي بقت أوضة و صالة .. ممكن حاجة تحصل في بلد بعيد عنك و إنت حتي متعرفش هم مكانهم فين علي الخريطة ولا بيتكلموا أنهي لغة بس تلاقي اللي حصل ده فرقع عندك .. مثال علي كده هو الغزو الروسي لأوكرانيا .. إمشي في الشارع معاك خريطة العالم و إسأل أي حد ماشي إنه يشاورلك علي مكان أوكرانيا علي الخريطة غالباً مش حيعرف .. بس إسأله ليه يا تري سعر الحاجة في السوق غالي أوي كده حتلاقيه يقولك أصل ده بسبب الحرب بتاعة أوكرانيا .. برده من ضمن الأحداث اللي حصلت في الدنيا و حيكون ليها تأثير كبير علينا و إحنا مش داريانين هو إن الأمريكان و أخص بالذكر جدو (جو بايدن) إتهور و مضي علي قانون إسمه قانون تخفيض التضخم Inflation Reduction Act أو IRA و اللي يبان من إسمه إنه قانون معمول عشان يقلل شوية من أسعار الحاجة في السوق بس لما تيجي تقراه تكتشف إن القانون ده ملوش علاقة من قريب ولا من بعيد بالأسعار .. القانون ده معمول عشان حاجة واحدة بس و هي إن أميركا تدوس علي وش الدنيا كلها في حتة إقتصاد الطاقة المتجددة.

الرئيس الأميريكي (جو بايدن) و هو بيمضي علي قانون تقليل التضخم Inflation Reduction Act.

اللي حصل إن فيه بنك سويسري إسمه كريديت سويس Credit Suisse مسك القانون ده قروه كلمة كلمة و بدأوا يسألوا نفسهم طب و بعدين؟ .. هو الكلام ده ممكن يعمل إيه في الدنيا يعني؟ .. الحق يتقال القانون ده حيعمل ثورة في إقتصاد أميركا و اللي الحقيقة إحنا في مصر مهم جداً إننا نفهم ده عشان أولا نتعلم منه و ثانياً نبقي متوقعين تأثير ده علينا إيه؟

مبدأياً كده الحكومة بتقولك لو إنت قررت تشتري عربية بالكهرباء فإحنا حنساعدك في ثمنها .. لو هي مثلاً يعني عربية Tesla ثمنها 250 ألف جنيه فإحنا من جيبنا حندفع لعم (إيلون ماسك) مثلاً يعني 50 ألف جنيه .. ليه؟ .. أصل إحنا كحكومة عايزين الناس تبطل تشتري عربيات بتحرق بنزين عشان خاطر البيئة و كده فلو أنا قعدت أتحايل عليك من هنا لحد بكره مش حتسمع الكلام .. مفيش حاجة حتخليك تروح تجري تشتري عربية بالكهرباء غير إني أقولك إن عليها أوفر زي عروض كارفور بتاعة عيد الأم.
لو إنت مصنع بسبب شغلك بتطلع نسبة ثاني أكسيد كربون كتيرة فإنت كرجل أعمال يعني صاحب المصنع قمت جاي علي حي زي أكتوبر أو الشيخ زايد قمت زارع مليون شجرة .. ليه؟ .. فيه حاجة إسمها Zero-Carbon Electricity .. حضرتك بتحسب هو المصنع بتاعي بيطلع كام طن ثاني أكسيد كربون في السنة و بتقول لنفسك هو أنا محتاج كام شجرة عشان تشفط كمية ثاني أكسيد الكربون دي من الجو فتقوم زارع إنت و متحمل تكاليف زراعة الشجر ده كله .. بلاش دي .. حضرتك كرجل أعمال مثلاً تقول أنا حركب محطة طاقة شمسية للمصنع .. أو حركب محطة Wind Farm تبرع لصندوق تحيا مصر .. بإختصار يعني أي فلوس تحطها عشان تعوض الزفت و القطران اللي إنت بترميه في الجو .. لو عملت كده حديلك خصم علي الضرائب اللي إنت بتدفعها.
حالياً أميركا هي أكتر دولة بتصدر بترول و غاز طبيعي الفلوس اللي حتحطها الحكومة دي حتخلي شركات طاقة متجددة كتير تاكل الشهد .. ده حيخلي علي سنة 2029 و عليك خير حتخلي سعر ميجاوات الكهرباء اللي بتطلع من الطاقة الشمسية و طاقة الرياح أقل من خمسة دولار ..حاول بس تفكر شوية في المعلومة دي .. ثمن الميجاوات كهرباء حيبقي قد ثمن وجبة النص فرخة.

إنت مش متخيل كم الفلوس اللي الحكومة حتدفعها خلال العشر سنين الجاية .. أقل التقديرات خالص بتقول إن كم الخصومات اللي حتتعمل للمواطن و لرجال الأعمال اللي حيشتروا عربيات بالكهرباء أو اللي يشتغلوا علي حتة Zero-Carbon Electricity حتوصل 374 مليار دولار .. الناس بتوع بنك Credit Suisse بيقولوا إن الرقم ممكن يوصل من 800 مليار دولار إلي 1.7 ترليون دولار .. الفلوس دي كلها إستثمارات مباشرة بتحطها الحكومة في مجال إقتصاد الطاقة المتجددة .. بس يمكن أهم نقطة القانون ده بيعملها إنه بينسف الفكرة القديمة بتاعة إن لو الحكومة قررت تروح في سكة حماية البيئة و فرض ضرائب إضافية علي الشركات اللي بتلوث البيئة فده حيضر الإقتصاد .. رجال أعمال كتير بيبيعوا فكرة إن أي تضييق أو محاولة لسحب فلوس منهم حتترجم إنهم حيمشوا ناس و ده حيؤدي إن معدل البطالة يزيد .. الناس بتاعة بنك Credit Suisse بتقول إن رجال الأعمال اللي بيقولوا كده شايفين الدنيا غلط .. التوجه الجديد بتاع الحكومة الأميريكية ده فرصة متتعوضش ليهم إنهم يعملوا قرشين زي الفل.

المستقبل مش إنك تحرق بنزين عشان تجيب فلوس .. لا خالص .. المستقبل إنك تركب خلايا شمسية عشان تولد كهرباء أرخص من الكهرباء اللي بتطلعها من حرق البنزين .. إنت متخيل يا مان .. الإقتصاد دلوقتي بيتقلب حاله .. مرحلة لوث البيئة براحتك المهم الأرباح بتنتهي .. إحنا دلوقتي في مرحلة عشان تجيب أرباح لازم تحمي البيئة.

المصادر: