واحد من أكتر المفاهيم اللي عقلنا كبشر بيكون صعب علينا نفهما هو إستيعاب فكرة الرزق .. يمكن ده السبب ورا إن واحد من الأمثال الشعبية في مجتمعنا هو اللي أنا إستخدمته في العنوان .. إنت بتبقي عاجز عن فهم المعني الإلهي ورا إن حد ربنا يكرمه برزق معين فبتسأل نفسك طب هي واحدة ربنا خلقها من غير ودان فليه برده ربنا يرزقها بحلق؟ .. طب ما يمكن حتبيعه وتاخد فلوسه .. يمكن حتديه لبنتها كهدية .. إنت إيش دراك إنت .. إنت بس شايف وضع غير منطقي وإنت عاجز عن إستيعابه فبتسأل السؤال التقليدي بتاع هو ليه كده بس يا رب؟ .. الوضع ده بيمشي علي بني أدمين وبيمشي علي دول .. تلاقي ربنا كرم بلد معينة بمصدر رزق إنت أساساً مش مستوعب ليه؟ .. عشان تفهم ده أكتر تعالي نمسك بلد إنت يمكن عمرك ما سمعت عنها قبل كده إسمها تيمور الشرقية.
الغزو الروسي لأوكرانيا كان السبب في إن كذا حاجة تحصل من ضمنهم إن سعر بيع المتر مكعب غاز طبيعي ضرب في السما .. النهاردة سعر الغاز الطبيعي 6 دولار لكل BTU .. من سنة كان 4.5 دولار لكل BTU .. ده معناه إيه؟ .. معناه إن دول كتير من اللي بتعتبر حوت غاز طبيعي زي أوروبا والصين بقت بتدور علي مصدر تاني للغاز الطبيعي بره روسيا .. وهنا يجي دور الكلام عن تيمور الشرقية .. عايزك تعرف إن لحد سنة 1975 مكنش فيه حاجة إسمها تيمور الشرقية .. المنطقة كانت تحت الإستعمار البرتغالي وبمجرد ما البرتغال لمت هدومها ومشيت جت أندونيسيا إحتلتها وضمتها ليها غصب .. كفاح تيمور الشرقية إنها تستقل عن أندونيسيا إستمر سنين ومات فيه أكتر من 250,000 بني أدم لحد ما في سنة 1998 حصل كذا حاجة غيروا وضع تيمور الشرقية .. أولها إن (سوهارتو) ديكتاتور أندونيسيا ربنا إفتكره وبعدها إتعمل إستفتاء علي إستقلال تيمور الشرقية وافق عليه الغالبية العظمي من سكان البلد عشان لأول مرة من أكتر من عشرين سنة بعد إنسحاب المستعمر البرتغالي أهل تيمور الشرقية يصحوا الصبح يلاقوا نفسهم مش تحت سيطرة حد.
مش معني كده إن تيمور الشرقية بلد فلة شمعة منورة .. دي بلد عايش فيها حوالي مليون بني أدم .. بلد إقتصادها علي الله حكايته .. بس في نفس الوقت بلد ربنا عطالها غاز الطبيعي بالعبيط .. بلد عايمة فوق حقل غاز طبيعي كبير حبتين .. أكتر الأراء تحفظاً يعني الناس اللي مش عايزه تسيب نفسها للدنيا بتقول إن تيمور الشرقية عندها أكتر من 10 ترليون متر مكعب غاز طبيعي .. الناس بقي اللي سايبه نفسها للدنيا بيقولوا إن تيمور الشرقية عندها 100 ترليون متر مكعب غاز طبيعي .. مهم برده تبقي فاهم هم أهل تيمور الشرقية عايزين إيه لإن ده حيفيدك تفهم ليه أنا إخترت العنوان ده:
دلوقتي فيه بلد عايشه فوق خالص يدوبك فرده كعب من القطب الشمالي إسمها النرويج اللي يمكن لو إنت بتحب الكورة فإنت متعرفش حاجة عنها غير إنها البلد اللي جابت (إيرلينج هالاند) ولو إنتي بنت متشغليش بالك بمين هو (هالاند) لإن مفيش معلومة مثيرة لإهتمامك كبنت بخصوص النرويج .. النرويج متفرقش حاجة عن تيمور الشرقية .. الإتنين بلد صغيرة .. الإتنين عايش فيهم ناس مش كتير تقريباً كلهم عارفين بعض .. الإتنين عندهم إحتياطي محترم من البترول بيخلي النرويج مثلاً تقدر تقول كده السعودية بتاعة أوروبا .. يمكن الفرق بين النرويج وبين تيمور الشرقية هو إن عشان النرويج ربنا كرمها وكانت دولة أوروبية معندهاش فكرة طال عمره زي السعودية والخليج عموماً فهم إستغلوا الفلوس اللي كانت بتيجي من بيع البترول مش إنهم يبعزقوها علي العيلة المالكة بتاعتهم إنما عملوا بيها صندوق ثروة سيادية Sovereign Wealth Fund .. يطلع إيه البتاع ده؟ .. ده عباره عن جمعية عاملينها للبلد كلها .. فلوس البترول بتتحط في الصندوق ده والفلوس دي بيشغلوها كأستثمارات مباشرة في شركات كبيرة .. أرباح الإستثمارات دي بتتحط في الصندوق ده وبتتوزع تاني علي النرويجيين .. فعلياً وبالورقة والقلم لو إنت مواطن نرويجي فإنت حرفياً مليونير بس بينزلك كل شهر الفوايد بتاعة المليون اللي الحكومة حطاهم بإسمك في البنك.
تيمور الشرقية عايزه تعمل ده .. تيمور الشرقية عايزه تستغل إنها بتتصنف علي إنها بلد ديموقراطية .. بلد مفيهاش طال عمره .. فهي مؤهلة إنها لو عرفت تلاقي زبون يشتري منها الغاز الطبيعي بتاعها إنها تعمل اللي النرويج عملته .. المشكلة إن الزبون اللي كل شوية يخبط علي بابهم هو الصين وزي ما كلنا عارفين مفيش حد بيعمل بيزنس مع الصين وربنا بيكرمه .. أبداً .. الصين لو لقتك عندك حاجة هم عايزين يشتروها مش بيسألوك عايز فيها كام .. العلاقة العادية بين البايع والمشتري مش هي اللي بيحبها الصينيين .. ليه؟ .. عشان بين البايع والشاري يفتح الله .. يمكن في يوم الغرب يلعب في دماغ تيمور الشرقية عشان متبيعش غاز طبيعي للصين .. الصين عايزه تيمور الشرقية متلاقيش بديل غير إنها ترمي نفسها في حضن الصين عشان ميجيش اليوم وحد يقول لتيمور متبيعيش حاجة للصين.
وده بيرجعنا للحكمة بتاعة أوعي تحاول تفهم هو الرزق بتاع ربنا ده المنطق وراه إيه .. مش حتعرف .. تيمور الشرقية ربنا عطالها غاز طبيعي أي بلد تحلم بيه بس وضعها الجغرافي والسياسي مخليها مش عارفه تستغله ومخليها لازم تنقي زباينها زي ما البنت بتنقي العرسان اللي بيجوا يتقدمولها .. أعي تقول يدي الحلق للي بلا ودان .. قول لو كان فيه خيراً لبقي.
المصدر:
- مقالة بعنوان A country you’ve never heard of is sitting on a massive offshore field that can replace Russian gas نشرت في مجلة Forbes وده لينك المقالة الأصلية:
https://www.forbes.com/sites/ikebrannon/2022/09/21/a-country-youve-never-heard-of-is-sitting-on-a-massive-offshore-field-that-can-replace-russian-gas/?sh=369c047f7075
