منطقي ومفهوم إن اللي إتعودنا عليه لما يجي حد يقولنا إن خلاص وقته خلص إن مخنا يرفض يصدق المعلومة دي .. الحتة دي حقيقية جداً خصوصاً في مجال التسليح والحروب .. يعني أنا فاهم إن خروج سلاح الفرسان بره الخدمة في القوات المسلحة حول العالم كان قرار مرفوض في بدايته من دول كتير .. ناس كتير إتولدت وإتربت وعاشت وشابت علي حقيقة إن سلاح الفرسان هو العمود الفقري لأي قوات مسلحة فمينفعش تقولي إن سلاح زي ده خلاص مكانه المتحف .. بس هي دي طبيعة الدنيا .. زي ما كل يوم بتتولد تكنولوجيا جديدة زي ما كل يوم فيه تكنولوجيا قديمة بيجي وقتها إنها تتدفن .. عشان كده أنا حابب النهاردة إني أتناقش في الحتة دي .. هل جه الوقت إن سلاح المدرعات وأخص بالذكر الدبابة تطلع بره الخدمة ونقتنع بحقيقة إن خلاص الدبابة كفكرة وكتنولوجيا معادش ليها مكان في الحروب المستقبلية؟ .. إيه اللي يخليني أفكر في ده؟ .. العروسة اللي قدامك دي و تبقي الدبابة T-90M الروسية.
اللي حصل إن يوم 25 إبريل 2022 إتعرف إن قيادة القوات المسلحة الروسية ضمن فعاليات المأساة البشرية اللي بيسموها الغزو الروسي لأوكرانيا قررت إنها تبعت دبابات جديدة لانج إسمها T-90M والروس بيحبوا يسموها Proyv ودي كلمة روسي معناها الإنجاز للجبهة المفتوحة حول منطقة خاركيف أوبلاست Kharkiv Oblast .. مهم تبقي فاهم أوي إن القرار ده شبه إن مصر تكون بتلعب ماتش في نص نهائي بطولة أمم أفريقيا والمدير الفني بتاعنا قرر يقعد (محمد صلاح) علي الدكة .. في الشوط الأول دخل فينا الجون الأول ووراه الثاني ومع بداية الشوط الثاني (أبو مكة) نزل الملعب .. تخيل حجم التفاؤل اللي حيبقي فيه مش بس المشجعين اللي بيتفرجوا علي الماتش إنما اللاعيبة اللي في الملعب كمان .. (صلاح) حيتبصله علي إنه المنقذ .. الأمل إن الليلة السودا دي تخلص علي خير .. بالنسبة للروس فالكابوس اللي كانوا عايشينه هو ما يسمي الصواريخ المضادة للدبابات Anti-Tank Weapons وأخص بالذكر هنا صواريخ جافلين Javelin الأمريكاني وصواريخ NLAW الإنجليزي .. مفيش موديل دبابة روسي شارك في الغزو اللي ملوش معني ده إلا وإتلسعت من الصواريخ دي .. حتي درة تاج سلاح المدرعات الروسي T-90 .. ده خلي قيادة القوات المسلحة الروسية تقرر إن جه الوقت إن T-90M تخش الملعب ومع دخولها الروس قالوا هيييييييه.
خلينا نتفق إن علي الورق دي دبابة مينفعش تتقارن بالدبابات الكحيانة اللي الأوكرانيين فرحانين بنفسهم أوي إنهم عرفوا يدمروها .. دي مش زي T-72 ولا T-80 .. علي رأي (بهجت الأباصير) في مسرحية مدرسة المشاغبين .. أنا غير العالم اللي ورايا دول خالص .. دي دبابة طلعت من المصنع لسه سنة 2017 يعني لسه بشوكها .. عشان بس أحطك في الصورة الدبابة T-90 دخلت الخدمة في القوان المسلحة الروسية سنة 1994 .. فيه شوية تعديلات إتعملت فيها عن الموديل اللي قبلها T-90 بيخلوا T-90M علي الورق برده حاجة تانية خالص:
- إتحطلها دروع إضافية من اللي بيتقال عليها Explosive-Reactive Armor وإختصاراً بيسموها ERA بحيث دي عبارة عن طبقات من العبوات الناسفة بتترص داير ما يدور حول جسم الدبابة عشان تفرقع لبره بمجرد ما يخبط في الدبابة صاروخ مضاد للدبابات.
- إتركبلها مدفع ميداني جديد طراز 2A46M-4 عيار 125 مليمتر يقال إن دقته أعلي من المدفع اللي متركب علي الدبابة T-90 بنسبة 15-20%.
- موتور الديزل بتاعها بيديك ما بين 1,000-1,130 حصان ومحطوط ليها موتور تاني إحتياطي علي أساس لو الموتور الأساسي باظ ومش عارفين نصلحه .. ده موتور 12 سلندر بيخلي الدبابة تجري بسرعة 60 كيلومتر في الساعة لو علي أرض ممهدة و50 كيلومتر في الساعة في الأراضي الوعرة.
رغم كل ده الدبابة T-90M إتداس علي وشها برده في أوكرانيا .. مش بس بسبب الخساير اللي إتعرضتلها إنما كمان الخبر اللي طلع إن القوات الأوكرانية عرفت تأسر دبابة منها .. السؤال دلوقتي هو ليه؟ .. هل المشكلة عامة إن الصواريخ المضادة للدبابات خلاص حتخلي السلاح ده ملوش لازمة؟ .. ولا المشكلة خاصة بس بالتصميم الروسي للدبابات؟ أصل محدش قال حاجة عن الدبابات الإبرامز الأمريكاني .. علي إيدك اليمين معلومة إن في التدخل العسكري الروسي في الثورة السورية الروس خسروا 5 دبابات T-90 من صواريخ مضادة للدبابات تقليدية زي R.P.G. ومش أسلحة حديثة بنت ناس زي الجافلين .. ده معناه إن الدبابات عموماً خلاص وقتها خلص .. بس علي إيدك الشمال فيه شوية حاجات لما بتحطها جنب بعض بتكتشف إن لا إستني .. المشكلة في التصميم بتاع الدبابات الروسي مش في الConcept بتاع الدبابة:
- معلومة رقم واحد .. عشان الروس يقللوا من وقت تعمير المدفع الميداني الرئيسي بتاع الدبابة فهم قرروا يحطوا صندوق الذخيرة اللي فيه الدانات اللي بتتضرب من المدفع جوه البرج .. طب ده معناه إيه؟ .. المشكلة إن صواريخ جافلين فيها الخاصية بتاعة إنه يضرب الدبابة من فوق بحيث ينزل فوق دماغ البرج .. أول ما الصاروخ يضرب البرج فبيفرقع معاه صندوق الذخيرة وبتقول علي الدبابة يا رحمن يا رحيم .. مهما كانت طبقات دروع الدبابة مش حتفرق .. يعني إنت صارف ومكلف علي ERA بس كل الفلوس دي بتترمي في الزبالة.
- معلومة رقم إتنين .. صواريخ جافلين مش بتتوجه بالليزر .. تاني .. دي صواريخ بتتوجه بالأشعة تحت الحمراء .. دي صواريخ إنت قبل ما تضربها بتصور الهدف بتاعك ولما الصاروخ بيطير وطول ما هو رايح يزغرط علي الدبابة بيفضل يقارن بين الصورة اللي متسجلة في الميموري بتاعته وبين الصور اللي الكاميرا اللي في مقدمة الصاروخ عماله تصورها .. ده معناه إن نظام APS اللي بيتركب علي الدبابات الروسي ملوش لازمة قصاد صواريخ جافلين لإن APS ده نظام دفاعي بيدور علي الصواريخ المضادة للدبابات المتوجهة بالليزر فمش حيشوف الجافلين أصلاً.
- معلومة رقم ثلاثة .. لما بتخدم في القوات المسحلة الأميريكية فإنت بتتعلم درس مهم فشخ .. زي ما الدبابة بتحميك كعسكري فإنت كعسكري بتحمي الدبابة .. وإنت ماشي جنبها عينك تبقي في وسط راسك .. إنت دورك إنك تدور علي أي حد بيفكر يضرب الدبابة .. مش ده اللي بيتعلمه العساكر الروس وده درس مهم جداً في عصر أي شارع وأي حفرة وأي شجرة ممكن يكون قاعد فيها عسكري ومعاه صاروخ مضاد للدبابات.
طبعاً مش محتاج أقولك إن اللي فرحان ومزقطط من خبر أسر دبابة T-90M هم الأمريكان والأوربيين عموماً اللي المخابرات بتاعتهم حتفكها حتة حتة عشان تفهم سر الصنعة بتاعتها .. يحكي أن لما الروس نزلوا دبابتهم T-72 الأمريكان حاولوا كتير إنهم يحطوا إيدهم علي واحدة منهم .. 14 سنة بيحاولوا لحد ما أخيرا سنة 1987 ربنا كرمهم وتاجر سلاح روماني باع واحدة خردة للمخابرات الأميريكية بس طبعاً بعد ما كان الروس نزلوا موديلات أحسن وأقوي من T-72 .. المختلف هنا إن الدبابة T-90M صحيح طلعت من المصنع سنة 2017 زي ما قلت بس هي دخلت الخدمة فعلياً في القوات المسلحة في إبريل 2020.
المصادر:
- مقالة بعنوان Deathmatch: Russia’s new T-90M tank vs. Javelin and NLAW missiles: Who wins? نشرت في موقع 1945 و ده لينك المقالة الأصلية:
https://www.19fortyfive.com/2022/05/deathmatch-russias-new-t-90m-tank-vs-javelin-and-nlaw-missiles-who-wins/ - مقالة بعنوان Putin should be worried about Ukraine capturing one of Russia’s new T-90M tanks نشرت في مجلة Business Insider و ده لينك المقالة الأصلية:
https://www.businessinsider.com/putin-should-worry-about-ukraine-capturing-new-russian-t90m-tank-2022-10
