لينك التسجيل الصوتي علي ساوند كلاود:
https://on.soundcloud.com/EZ7KH
الحروب وماتشات الكورة بينهم حاجة مشتركة وهي إن هما الإتنين محتاجين لما يخلصوا الناس تشاور علي حد وتقول هو ده بطل الليلة .. عشان كده ماتشات الكورة فيها جايزة رجل المباراة .. المفروض إن الجايزة دي تكريم للرجل اللي قدم كل حاجة عنده عشان فريقه يكسب .. في الحروب الجايزة دي غالباً بتروح لسلاح معين أو تكنولوجيا معينة .. لما (رمسيس الثاني) بدأ غزوه لسوريا جايزة رجل المباراة راحت بلا منازع للعجلات الحربية .. سلاح الفرسان فضل لسنين الحقيقة هو رجل المباراة للفتوحات الإسلامية علي مدار تاريخها .. شوية وظهرت البندقية .. دخول سلاح الجو كان نقلة كبيرة الحقيقة خلال الحرب العالمية الأولي .. بس يمكن في الحرب العالمية الثانية الجايزة دي راحت أو علي الأقل خلال المراحل الأولانية للحرب للدبابات وأخص بالذكر الحقيقة الدبابات الألمانية اللي الأوروبيين جالهم حالة ذعر لما شافوها بتدوس علي وش البولنديين سنة1939 عشان تبدأ المدعكة العالمية الثانية.
خليني أقولك إن ناس كتير ضيعت من عمرها سنين وهي بتحاول تلاقي إجابة علي السؤال بتاع هو الوحش اللي اسمه الدبابة ده ندمره إزاي؟ .. الفكرة كمان إن التكتيكات اللي النازيين استخدموها (علي الأقل برده في المراحل الأولانية للحرب) خلت ناس كتير تضرب كف علي كف وهي بتحاول تفك طلاسم السؤال ده .. ده كان عامل زي ما إنت تبقي مدافع وتلعب قدام الدبابة البشرية (إيرلينج هالاند) .. حتوقفه إزاي ده؟ .. الحقيقة إن الإجابة اللي الناس لقتها كانت إننا حنستخدم حاجة من 3 حاجات:
- إما حنعمل بنادق ألية بس بتضرب طلقة جامدة شوية تقدر تخترق دروع الدبابة والبندقية دي يقدر أي عسكري يشيلها.
- يا إما نصطاد الدبابة دي بمدافع ميدانية.
- أخر حل بقي إننا نصطاد الدبابات بدبابات زيها.
خليني أركز شوية في حتة البنادق دي .. أنا عارف إنك بتقول لنفسك هو معلش يعني إزاي بندقية كلاشينكوف حتدمر دبابة وأنا متفهم استغرابك بس إنت لازم تفهم المنطق ورا الأمور .. الفكرة إنك عايز تعمل سلاح (لسه مش عارفين هو شكله حيبقي إزاي) بس السلاح ده فيه شوية مواصفات .. هو لازم يبقي خفيف عشان عسكري واحد بس يقدر يشيله .. لازم يبقي سهل في استخدامه والأهم إنه يبقي سهل في تصنيعه عشان تقدر تعمل منه نسخ كتير تروح لعساكر كتير .. حتيجي تسأل نفسك السؤال المهم .. هو بالصلاة علي سيدنا النبي الطلقة اللي أنتوا عايزين تعملوها دي عيار كام؟
عشان تجاوب علي السؤال ده لازم تعرف هو إنت حتدمر إيه؟ .. في بداية الحرب العالمية الثانية النازيين كان عندهم الدبابة الأسطورية بانزر واحد وإتنين والسوفييت كان عندهم الدبابة T-26 .. حلو .. الدبابة T-26 كان سمك الدرع بتاعها 13 مليمتر والدبابة البانزر الدرع بتاعها كان سمكه 20 مليمتر .. ده خلي البولنديين اللي هم أول ضحية من ضحايا الحرب العالمية الثانية يقدموا للعالم أول محاولة وإن كانت يائسة لفكرة إزاي عسكري ممكن يوقف دبابة لما عملوا البندقية Model 35 أول سلاح مضاد للدبابات .. بندقية بتقدر تخترق درع سمكه 20 مليمتر لحد مسافة 300 متر .. زي ما قلتلك هي كانت محاولة يائسة الحقيقة لإن بولندا وقعت في إيد النازيين والسوفييت خلال شهر ودي مكانتش مدة كافية إن بلد علي الله حكايتها زي بولندا تقدر تصنع عدد كافي من البنادق دي .. الأهم إن علاج البندقية دي سهل .. زود طبقة دروع للدبابة .. بس كده.
مع الوقت الأسلحة المضادة للدبابات بقت بتنط بشكل مرعب في التكنولوجيا بتاعتها .. كنا إتكلمنا قبل كده إن صواريخ زي ساجر كانت من الدروس المستفادة من حرب أكتوبر 1973 واللي الحقيقة إن العالم إتعلم منها بشكل كبير وده حيخلينا نتكلم عن الاسم بتاع عنوان المقالة .. جافلين Javelin .. عايزك تعرف إن زي ما قلت إن كل حرب محتاجة رجل المباراة بتاعها فخليني أقولك إن الغزو الروسي لأوكرانيا قدم للعالم التحفة الهندسية اللي اسمها صواريخ جافلين .. سلاح الأوكرانيين شايلينه فوق راسهم لدرجة إنهم بقوا بيعتبروه قديس .. القديس جافلين .. إسمه بالكامل FGM-148 Advanced Antitank Weapon System وزيه زي البندقية Model 35 البولندية هو سلاح إتصمم عشان يقدر عسكري واحد إنه يشيله .. سلاح سهل في استخدامه بشكل مستفز ولا كأنك بتسوق عربية بفتيس أوتوماتيك .. الجافلين مش سلاح جديد خلي بالك .. هو دخل الخدمة سنة 1996 وكل شوية ينزل منه نسخ أحدث .. يعني مثلاً النسخة اللي متاحة في السوق دلوقتي هي FGM-148F .. حالياً هم شغالين علي تطوير النسخة FGM-148G.
الأرقام الخاصة بالسلاح ده كافية إنها توريك قد إيه ده سلاح إتعمل عشان يخلي عسكري المشاة يبص لصاروخ مضاد للدبابات محمول علي الكتف زي RPG و يقول لنفسه عليا الطلاق ما إحنا عايشين:
- إنت بتتكلم عن صاروخ وزنه شاكب راكب بسلطاته وبنظام التوجيه بتاعه بالمقذوف حوالي 22 كيلوجرام بس.
- ده سلاح بيتحط تحت مظلة خاصة شوية من الأسلحة بتتسمي Fire and Forget يعني إتك علي الزناد وفسي دماغك خلاص يعني مش مطلوب منك كعسكري غير إنك تبص علي الدبابة اللي إنت عايز تدمرها وتتك علي الزناد .. الصاروخ بيتولي الباقي .. هو اللي بينقي مسار طيرانه .. هو اللي بيختار يضرب الدبابة فين بناء علي المكان اللي فيه أضعف حماية ليها.
عشان الصورة توضحلك وتبقي فاهم كويس هو البتاع اللي اسمه جافلين ده بيشتغل إزاي لازم تبقي عارف إجابة سؤالين:
- إزاي إنت كعسكري بتستخدم السلاح ده؟
- إزاي الصاروخ بعد ما بيطلع بيدمر الهدف بتاعه؟
خلينا نبدأ بالسؤال الأولاني .. حضرتك كعسكري مطلوب منك إيه؟
لو بصيت علي صورة صاروخ الجافلين حتلاقي علي جنب كده علبة سودا متركبة في نص الصاروخ .. العلبة دي هي الشغل كله .. إسمها Command Launch Unit أو CLU إختصاراً .. العلبة دي فيها عدسة توجيه بتشتغل ليل ونهار .. عدسة بتقدر تكبرلك أربع أضعاف قدرة العين البشرية .. العلبة السودا دي إنت تقدر تفصلها وتركبها تاني في الصاروخ وده بيخليها مفيدة فشخ للعساكر .. عايزك تتخيل نفسك كعسكري ماسك موبايل الكاميرا بتاعته فشيخة بتقدر تعمل زووم أربع أضعاف الكاميرا العادية .. بتقدر تشوف بيها بليل عشان فيها Night Vision Sensor .. حتي لو الدنيا بتشتي أو فيه ضباب أو وسط عاصفة رملية مش حتفرق .. طب لنفترض إنك لقيت دبابة عايز تدمرها .. مطلوب منك تعمل إيه؟
إنت لازم تختار طريقة Firing Mode ودي بتبقي حاجة من إتنين .. يا إما تضرب الصاروخ بمسار أفقي مباشر أكنك بتنشن علي الهدف ببندقية عادية .. أو إنك تختار مسار الصاروخ بحيث يطير لفوق وينزل فوق دماغ الهدف بتاعك أكنك بتحدف طوبة .. المسار ده إنت بتحدده بناء علي ظروف المعركة .. بعد كده إنت بتتك علي زرار عشان حرفياً بياخد Screen Shot للهدف بتاعك .. الكومبيوتر بتاع LCU بيصور الهدف وبيخزن الصورة في الميموري بتاعة الصاروخ عشان لما يطلع ويروح يدمره بيقارن الصورة دي بالصورة اللي الكاميرا بتاعة الصاروخ بتصورها قبل لحظات من تدمير الهدف .. كده إنت دورك كعسري خلص .. هنا بقي يجي دور الهندسة ورا تصميم وتصنيع الجافلين.
هنا يجي دور السؤال الثالني .. ليه الجافلين ده وراه عظمة في الهندسة؟
بمجرد ما حضرتك تتك علي الزرار بتاع الإطلاق فيه كذا حاجة بتحصل ورا بعض بسرعة أوي وصدقني إن كل الخطوات الجاية دي إنت كعسكري دورك فيها إنك تتفرج بس:
مرحلة رقم واحد .. إحنا مش عايزين نحرق مؤخرتك .. أول حاجة إن بيشتغل محرك إطلاق وظيفته إنه يطلع الصاروخ بره أسطوانة الإطلاق اللي العسكري بيكون شايلها .. وظيفة المحرك ده إنه يدي للصاروخ زقة لمسافة 4.5 متر تقريباً .. ليه ده بيحصل؟ .. إنت عايز الصاروخ وهو بيطلع ميسببش أي أذي لأي حد حول العسكري اللي بيضربه .. لو إنت دخلت الجيش واستخدمت RPG حيتقالك حاجتين .. حيتقالك إن لما عسكري يضرب صاروخ RPG مينفعش بأي حال من الأحوال حد يكون واقف وراه لإن اللهب اللي بيطلع من الصاروخ وهو بينطلق ممكن يعور أي حد .. كمان بيتقالك أوعي تضرب صاروخ RPG وإنت منشن لفوق .. ليه؟ .. عشان برده اللهب الللي بيطلع لحظة الإطلاق حيخبط في الأرض و يرتد عليك يحرق مؤخرتك .. هل إنت عايز مؤخرتك تتحرق؟ .. عشان كده المهندسين اللي صمموا الجافلين قالك بلاش وجع دماغ ونركب محرك إطلاق صغير دوره إنه بس يطلع الصاروخ بره إسطوانة الإطلاق وإياكش حتي تضرب صاروخ جافلن من جوه شقة فمش حيحصل حاجة.
مرحلة رقم إتنين .. دايما إفتكر إن مش مطلوب منك حاجة .. بمجرد ما الصاروخ نط الأربعة متر ونص الأولانيين فبيبدأ يفرد جناحاته .. بيطلعله مجموعتين جناحات .. المجموعة الأولانية إسمهم الجناحات أو Wings ودول عبارة عن 8 زعانف أو أجنحة قصيرة ودول دورهم إنهم يحافظوا علي إرتفاع الصاروخ وهو طاير .. المجموعة الخلفية هم أربع زعانف ودول دورهم بيكون توجيه الصاروخ واللي بيتحكم فيهم هو الكومبيوتر بتاع الصاروخ .. خليك فاكر إن LCU خدت سكرين شوت من الهدف اللي إنت عايز تدمره وخزنتها في الميموري بتاعة الصاروخ ففعلياً يعني الصاروخ مش محتاج منك حاجة.
مرحلة رقم ثلاثة .. العو جه العو حضر .. العو هنا أقصد بيه الرأس المتفجر بتاع الصاروخ وده الحقيقة قصة لوحده .. المهندسين بيسموها Shape Charge ومهم أوي إنك تبقي فاهم هي البتاعة دي بتشتغل إزاي .. عارف اللحام؟ .. لنفترض إن عندك حتتين حديد عايز تلحمهم في بعض .. فكرة اللحام بمنتهي البساطة إنك بتجيب معدن تالت بيتسمي سيخ اللحام تسخنه لدرجة حرارة عالية أوي لحد ما يسيح ولما يسيح زي ما يكون عامل زي صمغ الأمير اللي بيلزق حتتين الحديد في بعض .. بمجرد ما الحديد يبرد شوية حتلاقيهم لزقوا في بعض .. اللحام بنفس فكرته ده ينفع تستخدمه هو هو عشان تخرم حتة حديد .. حتجيب حتة الحديد اللي إنت عايز تخرمها وتجيب سيخ اللحام تولع فيه وتسخنه لحد ما درجة حرارته تخليه يسيح .. لما بيسيح فهو بيقدر يخرم حتة الحديد .. إذن كل اللي إنت محتاجة هو حاجة شبه سيخ اللحام وشوية حرارة كافية إنك تسيح سيخ اللحام ده وتوجهه بحيث يروح علي الدرع بتاع الدبابة وحتلاقيه خرم درع الدبابة .. أتمني تكون فهمت الفكرة.
كلمة Shape Charge معناها إنك بتجيب حتة معدن تحطها جوه صاروخ ومعاها عبوة ناسفة .. لما العبوة الناسفة دي بتنفجر بتتولد موجة تضاغطية بترفع من درجة حرارة حتة المعدن لحد ما تسيح وبتبقي عامله زي اللافا بتاعة البراكين .. كل اللي مطلوب منك بعد كده إنك تخلق مسار تخلي اللافا دي تجري بسرعة ومتنساش إنك بتتكلم عن معدن ساح يعني بقي في صورته السائلة .. فكر فيها أكنك بترش مياه من خرطوم ولما بصوابعك تقفل شوية مخرج الخرطوم بتلاقي المياه طلعت بسرعة أعلي .. السؤال دلوقتي .. صاروخ جافلين بيعمل ده إزاي؟
مبدأياً لازم تبقي عارف إن Shape Charge دي مش إختراع لسه الأمريكان مكتشفينه من أول إمبارح .. دي فكرة قديمة ولإنها فكرة قديمة فالمهندسين اللي بيصمموا الدبابات حطوها في حسابهم وهم بيصمموها .. عشان كده إنت ممكن تكون سمعت الاسم ده قبل كده .. Reactive Armor .. البتاع ده لو إنت شفت أي صورة لأي دبابة علي النت حتلاقيه هو المكعبات الغريبة اللي بتتركب داير ما يدور حول جسم الدبابة .. فكرتها بمنتهي البساطة إنك بتجيب لوحين من الصلب وتحشر ما بينهم عبوات ناسفة .. إيه الفكرة ورا Reactive Armor ده؟ .. لو حصل وضربت أنا دبابة بShape Charge فوظيفة العبوات الناسفة المترصصة حولين جسم الدبابة إنك تخلق موجة تضاغطية عكسية عشان تفرمل نافورة المعدن السايح بتاع Shape Charge اللي جاي عشان يخرم درع الدبابة .. وهنا حضرتك بيجي سر العظمة بتاعة الجافلين .. الجافلين مش بس فيه Shape Charge .. ده فيه إتنين .. الأولانية المعدن اللي بيسيح فيها هو معدن إسمه الملبدين والثانية من النحاس .. الShape Charge الأولانية وظيفتها إنها تستقبل الموجة التضاغطية بتاعة Reactive Armor في حين إن Shape Charge الثانية دورها إنها تستغل المكان الفاضي في درع الدبابة اللي العبوة الناسفة إنفجرت فيه عشان تخترقه.
مش بقولك عظمة .. جم الروس قالوا لا معلش ألعبوا غيرها .. كنا من فترة إتكلمنا عن إن الروس عملوا نظام جديد لانج للدفاع عن الدبابات اسمه Active Protection System أو APS وفكرته إنك بتركب رادار علي جسم الدبابة عشان يشوف هل إتضرب عليها صاروخ مضاد للدبابات ولا لا ولو حصل فالدبابة بتصطاد الصاروخ وهو جاي بصاروخ مضاد للصواريخ .. حاول تتخيل إننا عملنا منظومة دفاع جوي بس للدبابات .. في الغزو الروسي لأوكرانيا ظهر عيب خطير في في أنظمة APS دي وهي إنها مش بتشوف الصواريخ المضادة للدبابات اللي بتضرب الدبابة من فوق .. فاكر لما قلتلك إن العسكري وهو بيضرب صاروخ جافلين بيبقي مطلوب منه يختار Firing Mode يا إما أفقي يا إما رأسي .. أنظمة APS فعلياً علي الله حكايتها قصاد ما يسمي Top-Down Attack يعني صاروخ جاي عليك من السما.
هل معني كده إن صواريخ جافلين دي خلاص كده حولت الدبابة لسلاح مكانه الخرابة بتاعة الخردة؟ .. بالتأكيد لا .. صحيح الجافلين هو معجزة هندسية تستحق إننا نتكلم عنه إلا إن شوية تفتيح مخ كفيلين إنهم يخلوه سلاح ملوش لازمة .. مجرد إن الدبابة متمشيش لوحدها وطول ما هي ماشية يكون حوليها أفراد مشاة عشان يحموها زي ما هي بتحميهم كفيل إنه يحمي الدبابة من هجمات الجافلين .. اللي هي أساسيات التكتيكات العسكرية وده يوريك الحقيقة الوضع المزري لتدريب القوات المسلحة الروسية اللي مكانتش لا متدربة ولا متسلحة بشكل كافي إنها تنجح في غزوها لأوكرانيا و إلا صواريخ جافلين مكانتش حققت كل النجاح ده.
المصادر:
- مقالة بعنوان Why the FGM-148 Javelin- Which has helped Ukraine destroy Russian tanks- is a marvel of engineering نشرت في موقع Digg و ده لينك المقالة الأصلية:
https://digg.com/video/fgm-148-javelin-explained-video - مقالة بعنوان Javelin Missile: Made by the U.S, wielded by Ukraine, feared by Russia نشرت في موقع History Net و ده لينك المقالة الأصلية:
https://www.historynet.com/javelin-missile/
