لو إنتي بنت عايشة في مجتمعنا المصري الجميل جربي توصلي لسن ثلاثين سنة و لسه ربنا مأرادش إنك تتجوزي و إتفرجي علي تعليقات الناس .. مش حنفرح بيكي بقي .. ربنا يكتبلك إبن الحلال .. لو إنتي برده بنت عايشة في مجتمعنا المصري الرائع و ربنا كرمك و إتجوزتي و عدي علي جوازك سنة و لسه ربنا مأرادش إنك تخلفي فإتفرجي برده علي تعليقات الناس .. مفيش حاجة جاية في السكة .. مش حنفرح بيكي بقي .. برده علي أساس إن الفرح عندنا مش بيجي غير بجواز أو خلفة .. بس صدقيني عزيزتي البنوتة المصرية إن حالك و إن كان مأساوي إلا إنه مش حيبقي كئيب أكتر من البنوتة اللي عايشة في إسرائيل .. المجتمع الإسرائيلي وصل لمرحلة غريبة جداً إنك لو بنت و إتجوزتي و كمان خلفتي فلو حضرتك متحولتيش لأرنبة و خلفتي علي الأقل 3 عيال فالمجتمع هناك بيبصلك علي إنك معيوبة .. ده حقيقي علي فكرة .. في المتوسط معدل الإنجاب في إسرائيل 2.9 يعني كل بنت متجوزة بتخلف في المتوسط تقريباً 3 عيال .. قارن ده بفرنسا مثلاً حتلاقي إن معدل الإنجاب هناك 1.8 وفي إنجلترا معدل الإنجاب 1.6 .. فالسؤال دلوقتي هو ليه؟ .. ليه في إسرائيل زي ما يكون فيه مشروع قومي لتحويل المرأة الإسرائيلية لمشروع أرانب؟
الحقيقة إن الإجابة علي السؤال ده في مسألة حساب بسيطة أوي .. دلوقتي إسرائيل عايش فيها حوالي 9.5 مليون بني أدم .. شيل منهم 21% بتوع عرب إسرائيل اللي الغالبية العظمي منهم مسلمين حتلاقي إن نسبة اليهود اللي عايشين جوه إسرائيل حوالي 74% .. المشكلة حتبدأ توضح لو ضميت الضفة الغربية المحتلة و قطاع غزة للحسبة حتلاقي إن نسبة اليهود اللي عايشين في إسرائيل شاملة كل الأراضي الفلسطينية اللي هي محتلاها و معاها القطاع حتلاقيهم بالميت يعني خالص 50% و هو ده الخازوق .. لو كلمت أي حد من الناس اللي شايفة إسرائيل هي جنة الله علي الأرض حتلاقيه بيقولك جملة لو فكرت فيها حتلاقيها غريبة جداً و هي إن إسرائيل دولة يهودية .. ليه دي جملة غريبة؟ .. لإن بناء علي الحسبة اللي إحنا لسه حاسبينها سوا نسبة اليهود اللي عايشين في إسرائيل متجيش 50% فإزاي بتقول عليها دولة يهودية؟ .. إنت مثلاً تقدر تقول علي مصر إنها دولة مسلمة لإن الغالبية العظمي من الناس اللي عايشين فيها مسلمين بس متقدرش تقول ده علي إسرائيل .. و عشان كده مهم أوي بالنسبة لي إنك تفهم نقطة .. الصراع العربي الإسرائيلي مش بس بيشارك فيه العساكر بتوع جيش الدفاع الإسرائيلي ضد المقاومة الفلسطينية إنما كمان بتشارك فيه المرأة سواء الفلسطينية أو الإسرائيلية بإنهم ينافسوا بعض علي مين فيهم تخلف أكتر.
زمان و زمان ده اللي هو في الثمانينات و التسعينات كان الفلسطينيين بيقودهم واحد إسمه (ياسر عرفات) الله يرحمه .. (ياسر عرفات) كان مناضل قديم و حياته مليانة حكاوي بس يمكن من أكتر الجملة المأثورة ليه إنه كان دايماً بيقول أهم سلاح في إيده لا المسدسات ولا البنادق الألية ولا العبوات الناسفة إنما رحم المرأة الفلسطينية .. طول ما المرأة الفلسطينية بتخلف كتير يبقي القضية الفلسطينية حتفضل عايشة و دي كانت حقيقة واضحة مش بس للفلسطينيين إنما للإسرائيليين كمان .. سنة 2003 (بنيامين نتياهو) بني حملته الإنتخابية عشان يبقي رئيس وزراء إسرائيل لأول مرة علي إنه حيحط واحدة من أولوياته إنه يقلل من معدلات الإنجاب عند الفلسطينيين و يزودها عند الإسرائيليين .. الكلام وقتها إن معدل الإنجاب عند الفلسطينيين حوالي ضعف الإسرائيليين و (نتنياهو) قال إن لازم تتحط خطة إن الوضع ده يتغير و الحقيقة إنك لو بصيت علي معدلات الإنجاب دلوقتي حتلاقي إن الخطة بتاعة (نتنياهو) جايبة نتيجة بشكل مرعب:
- سنة 1960 معدل الإنجاب عند عرب إسرائيل كان 9.3 و ده كان معدل خزعبلي .. خلال الفترة من 1960 لحد 1995 المعدل ده قل للنص تقريباً بقي 4.7 بس .. خلال الفترة من 1995 لحد 2020 معدل الإنجاب عند عرب إسرائيل قل أكتر وصل ل3 .. نفس الإنهيار ده حصل للفلسطينيين اللي عايشين في الضفة الغربية و قطاع غزة اللي معدل الإنجاب بتاعهم سنة 2003 كان 4.6 و وصل سنة 2019 بقي 3.8.
- ركز بقي .. إنهيار معدل الإنجاب عند الفلسطينيين سببه الأساسي هو الوضع الإقتصادي اللي زي الزفت اللي هم عايشينه خصوصاً إن الدعم الخليجي لقضيتهم مبقاش موجود تقريباً .. لو جيت سألت بصوت عالي إيه اللي بتعمله إسرائيل بالضبط عشان ده يحصل حتلاقي الرد الجاهز من عندهم إن التريند العالمي خصوصاً في الدول المتقدمة هو إن الناس متخلفش .. سنة 1970 معدل الإنجاب في الدول المتقدمة اللي بيحطوها جوه منظمة إسمها منظمة التعاون الإقتصادي و التنمية OECD كان 3 بس دلوقتي وصل 1.6 اللي هو أساساً كارثة لإن عشان بلد أيا كانت هي مين تحافظ علي عدد سكانها ثابت لا بيزيد ولا بيقل فلازم كل إتنين متجوزين يخلفوا في المتوسط 2.1 طفل بحيث يعوضوا موت أبوهم و أمهم و ده يفسرلك ليه كتير من الدول الأوروبية دخلت مرحلة إن تعداد سكانها بدأ يقل مش يزيد .. فالرد الإسرائيلي علي أي إتهام ليهم إنهم بيخنقوا علي الفلسطينيين عيشتهم عشان يبطلوا خلفة بيترد عليه إن سبحان الله الفلسطينيين اللي مش عارفين يعيشوا بقي بيتطبق عليهم نفس التريند اللي ماشي في الدول الأوروبية.
فيه معلومة معرفش عدت عليك قبل كده أو لا إن الإسلام هو أسرع الديانات نمواً في العالم دلوقتي بس دي مش الصورة الكاملة .. بناء علي كلام معهد أبحاث و إحصاء محترم أوي إسمه Pew Research Center فمتوسط معدل الإنجاب في الدول الإسلامية سنة 1995 كان 4.3 و المعدل ده قل سنة 2015 بقي 2.9 .. مش بس كده .. خلال الفترة من 1970 لحد سنة 2010 فيه 12 دولة علي مستوي العالم حصل فيهم إنهيار ملحوظ في معدلات الإنجاب منهم 7 دول عربية .. خد عندك إيران مثلاً .. إيران اللي شوية و المؤسسة الدينية هناك حتبوس إيد المتجوزين يخلفوا حتلاقي معدل الإنجاب وقع من 7 سنة 1984 بقي 1.7 دلوقتي .. حط كل ده قصاد اللي بيحصل في إسرائيل حالياً .. خلال الفترة من 1960 لحد سنة 1990 معدل الإنجاب هناك قل من 3.4 بقي 2.6 بس زي ما قلتلك من أول الألفينات و معدل الإنجاب في إسرائيل عمال يعلي لحد ما بقي 3.1 دلوقتي و ده الحقيقة اللي محتاجين نفصصه شوية.
أي ديانة في الدنيا حتلاقي فيها ناس بيتقال عليهم متشددين بس أنا بحب أكتر مصطلح ملتزمين مش لسبب غير إن التشدد نسبي بس الإلتزام مفهوم بس ده مش موضوعنا دلوقتي .. زي ما في مصر بيتقال علي السلفيين إنهم أكتر فئات التيار الإسلامي تشدداً أو إلتزاماً فبرده في اليهودية فيه فئة اللي هم السلفيين بتوعهم و بيتسموا الحريديم و بالإنجليزي بيتسموا Haredi .. إذا كان في إسرائيل متوسط معدل الإنجاب هو 3.1 فوسط مجتمع الحريديم معدل الإنجاب بيوصل 6.6 .. ده معناه إن كل خمسين سنة نسبة الحريديم جوه المجتمع اليهودي بتزيد الضعف .. نرجع تاني للحساب .. دلوقتي نسبة الحريديم جوه المجتمع الإسرائيلي حوالي 13% فهم زي ما إنت شايف أقلية بس عشان ستاتهم بيخلفوا زي الأرانب فلو جيت تشوف فيه كام طفل في إسرائيل تحت سن 14 سنة حتلاقي إن نسبة الأطفال الحريديم منهم حوالي 19% .. النسبة دي بتزيد ل24% من بين الأطفال تحت سن 4 سنين .. لو فضل الحريديم دول يخلفوا بنفس المعدل ده فالمتوقع إن لما تيجي سنة 2065 و عليك خير نص أطفال إسرائيل حيكونوا منتمين لفئة الحريديم اليهودية اللي برجع أفكرك إنهم المتطرفين بتوع اليهود.
أنا بس عايز أختم بإني أفهمك نقطة .. الإسرائيليين نفسهم مرعوبين من ده .. غريبة صح .. التشبيه ده حيبقي غريب بس حيساعدك إنك تفهم هي المشكلة فين .. تعالي نقول إن الحريديم دول يبقوا السلفيين بتوع إسرائيل .. تاني ده تشبيه مش دقيق بس حيساعدك تفهم هي المشكلة فين .. لو إنت طفل إسرائيلي إتولدت في بيت عايش فيه أب و أم من الحريديم دول فإنت لما تكبر شوية مش بتروح حضانة و أهلك بيحاولوا يعلموك إنجليزي و ألماني و تروح النادي تتمرن سباحة .. دي مش بتكون طفولتك .. طفولتك إنك تروح المعبد تحفظ التوراة و ترجع من المعبد تحفظ التوراة .. مش بقول إن أي أب و أم يقرروا إن عيالهم بالتبعية يحفظوا قرأن حاجة وحشة بالعكس دي حاجة كويسة بس غالباً هنا بيكون حفظ القرأن ماشي بالتوازي مع أنشطة تانية زي إنك تروح النادي مثلاً .. هناك في إسرائيل مش كده .. لما بتكبر شوية و بتقرر تخش الجامعة فإنت بتخش ما يعادل جامعة الأزهر عندهم عشان تكمل في دراستك للتوراة .. فإنت بتبقي قدام وضع غريب جداً إن رجالة الحريديم مبيعملوش حاجة في حياتهم غير إنهم يدرسوا عشان يطلعوا حاخامات .. لا بيشتغلوا .. ولا بيصرفوا علي بيوتهم .. ولا بيتعلموا صنعة ياكلوا منها عيش .. لما تيجي سنة 2065 ربع شباب إسرائيل حيبقوا حريديم و بالتالي القوة العاملة في إسرائيل خسرت ربع إنتاجيتها .. الناس دي بتخلف بمعدلات مخيفة مش لسبب غير إن ده الكلام اللي إتقال في التوراة بحيث هم سابوا كل كلام ربنا الباقي و مبقوش يعملوا غير دي.
بس أرجع و أقولك إن مش كل إسرائيل متشددين لإن دول نسبتهم زي ما قلت حوالي 13% بس من السكان .. الحقيقة إن فيه عوامل تانية مخلية معدلات الإنجاب في إسرائيل بتزيد زي إن الحكومة هناك بتشجع ده .. في مصر مثلاً الحكومة مش بتحمي المرأة العاملة من ظلم القطاع الخاص في حين إنك لو إمراة عاملة في إسرائيل فإنتي بتاخدي حقوقك تالت و متلت لو قررتي تبقي أم .. عامل تاني مهم و هو إن المجتمع الإسرائيلي شبه المجتمع المصري في حتة إن أي ست متجوزة و مخلفة و بتشتغل بدل ما بتسيب العيال في حضانة بتسيبهم عند أمها .. يعني مثلاً .. 83% من الستات في إسرائيل اللي أعمارهم بتتراوح ما بين 25-39 سنة و بيشتغلوا و مخلفين بيسيبوا عيالهم عند مامتهم قصاد إن لنفس الفئة العمرية في بلد زي ألمانيا 30% بس اللي بيسيبوا عيالهم عند مامتهم خلال ساعات العمل الرسمية .. يمكن اللي أنا عايز أقوله إن الإسرائيليين خدوا جملة (ياسر عرفات) و أستخدموها مش بس ضده ده ضد العرب كلهم.
المصادر:
- مقالة بعنوان In Israel, birth rates are converging between Jews and Muslims نشرت في مجلة The Economist و ده لينك المقالة الأصلية:
https://www.economist.com/middle-east-and-africa/2022/08/18/in-israel-birth-rates-are-converging-between-jews-and-muslims
