الثروة .. رحلة البشر من إنسان الغاب للأونلاين شوبينج.

عايزك تنزل الشارع في يوم الصبح و إنت رايح الشغل و تبدأ تركز في وشوش الناس .. بنسبة كبيرة حتلاقي الناس كلها مكشرة .. هو لسه اليوم مبدأش و محصلش ما يستدعي إنها تبقي مكشرة بس ده بقي الوضع الطبيعي للناس و هي ماشية و الحقيقي إنك سهل تعرف هو يا تري الناس مكشرة ليه .. الإجابة في كلمة واحدة .. الفلوس .. مفيش حد فينا مش مزنوق في فلوس .. فيه مننا اللي مزنوق عشان يشتري أو يعمل حاجة مهمة زي مثلاً عملية جراحية أو علاج لمرض و فيه اللي عايز يشتري حاجة بتتحط تحت بند الرفاهيات و فيه اللي نفسه يحج و فيه اللي عايز يدفع مصاريف مدارس الولاد .. وسط كل ده أنا عايزك تعرف حاجة مهمة جداً وهي إن الهري ده كله جديد علينا كبشر .. من أول ما ربنا خلق سيدنا (أدم) عليه السلام لحد دلوقتي إنت تقدر تقسم تاريخ البشر الإقتصادي المتعلق بالفلوس ل3 مراحل بس .. المرحلة الأولي و يمكن أطول مرحلة هي من أول ظهور إنسان الغاب من حوالي 300,000 سنة لحد من حوالي 12,000 سنة بس و خلال المرحلة دي البشر كانوا أقرب ما يكون للقطط و الكلاب اللي بتشوفهم في الشارع اللي هو بنصحي الصبح مش شاغل دماغنا غير يا تري حناكل إيه النهاردة فكانت حياة البشر قائمة علي الصيد و الرعي فطبيعي إن البشر ميبقوش قاعدين في حتة واحدة .. المرحلة الثانية و دي إستمرت من سنة 10,000 قبل الميلاد لحد سنة 1750 يعني بتتكلم عن يدوبك 40 سنة قبل الحملة الفرنسية علي مصر و دي المرحلة اللي البشر إتعلموا فيها الزراعة و خلال المرحلة دي طلعلتك كل الإمبراطوريات اللي إنت شفتها في منهج التاريخ بتاع إبتدائي و إعدادي .. إحنا دلوقتي عايشين في المرحلة الثالثة من تاريخ البشر و دي اللي محتاجين نتكلم عنها شوية.

المرحلة دي غريبة لسبب وهي إنها تميزت بإرتفاع مش عايز يقف لمعدلات النمو الإقتصادي للبشر .. قبل المرحلة دي كان اللي بيتقال عليه غني هو اللي ربنا يكرمه بكام عبد و كام ملكة يمين و بيت و شوية ذهب و الباقي مش لاقي ياكل .. خلال المرحلة دي الفجوة بين الأغنياء و الفقراء مبقتش بجحة زي زمان .. بمعني .. خد بريطانيا مثلاً .. الثورة الصناعية في بريطانيا هي كانت بداية المرحلة الثالثة اللي إحنا فيها دلوقتي فلو كنت مثلاً من سنة 1700 لحد سنة 1800 جيت قست كل الفلوس اللي بتخش للإقتصاد البريطاني من بيع أي منتج بيتصنع جوه بريطانيا اللي بيسموها Gross Domestic Product أو GDP و قسمته علي عدد السكان فحتلاقي معدل الثروة في بريطانيا خلال ال100 سنة دول زاد بنسبة 40% .. إعمل نفس الخطوة دي خلال الفترة من 1800 لحد 1900 حتلاقي معدل الثروة في بريطانيا نط بنسبة 100% .. إعمل نفس الحركة كمان عشان خاطري خلال الفترة من 1900 لحد سنة 2000 حتلاقي معدل الثروة في بريطانيا زاد بنسبة 400%.

مهم بالنسبة لي تبقي فاهم معني الأرقام اللي أنا برميها في وشك دي .. اللي أنا عايز أقوله إن اللي إنت دلوقتي بتقول عليه فقير بالنظر للفلوس اللي بتخشله كل شهر فعايزك تعرف إن مثلاً أيام حكم (محمد علي باشا الكبير) الله يرحمه كان ده حال الغالبية العظمي من الشعب و مش بس في مصر .. سنة 1820 وقت حكم (محمد علي باشا) عايزك تعرف إن 94% من إجمالي سكان كوكب الأرض كلهم كانوا بيعيشوا علي أقل من 2 دولار يومياً اللي هو في معايير دلوقتي ده مش تحت خط الفقر ده الدنيا جاية عليه جامد يعني .. خلال أقل من 200 سنة يعني بتتكلم عن سنة 2018 البنك الدولي طلع تقرير قال فيه إن نسبة البشر اللي عايشة علي أقل من 2 دولار يومياً بقوا 8.6% بس .. الفرق في الثروة ده كان له تأثير في كل حاجة .. سنة 1800 متوسط العمر الإفتراضي لأي بني أدم كان يدوبك 40 سنة بغض النظر إنت عايش فين .. دلوقتي متوسط العمر الإفتراضي للبني أدمين بقي 73 سنة .. السؤال اللي عايزين نجاوب عليه سوا هو إزاي؟ .. إزاي النطة دي حصلت؟ .. إزاي البشر إنتقلوا خلال 200 سنة بس من ناس زي ما النبي (عليه الصلاة و السلام) قال من أصبح منكم أمناً في سربه معافي في جسده عنده قوت يومه فكأنما حيزت له الدنيا بحذافيرها لناس دلوقتي بقت بتسأل نفسها يا تري حنتغدي النهاردة فين و لازم نحط صور الأكل علي أنستجرام و مش مشكلة نسهر لمتأخر كده كده حناخد أوبر و إحنا مروحين عشان الدنيا بتمطر و مش عايزين نبوظ الهدوم البراندات اللي إحنا لابسينها .. عملناها إزاي دي؟

الفكرة كلها إن الفلوس جيت في إيد الناس:

فيه في الإقتصاد مصطلح بيسموه Economic Growth أو النمو الإقتصادي و ده معناه بمنتهي البساطة إن الإقتصاد بتاع البلد بقي بينتج كل سنة بضاعة أكتر من السنة اللي وراها .. الثورة الصناعية في بريطانيا كانت بداية إن النمو الإقتصادي لدول أوروبا و وراها أميركا و بعدها أسيا و إحتمال كبير تحصلهم دول أفريقيا خلال الكام سنة الجايين كان بداية إن الفلوس تجري في إيد الناس .. و هو ده مربط الفرس .. إن الناس العادية بقي معاها فلوس .. خلال تاريخ البشر قبل الثورة الصناعية سواء كنت بتتكلم عن الحضارة الرومانية أو ظهور الإسلام و لحد ما الدولة العثمانية كانت بتتسيد العالم .. خلال السنين دي كلها كان فيه صداع في دماغ الحكام علي مستوي العالم إسمه الفرق الرهيب و المرعب في الثروة بين الأغنياء و الفقراء .. في الدولة الرومانية مثلاً كان فيه عضو في البرلمان الروماني كان إسمه (شيشرون Cicero) .. الرجل ده المفروض إن شغلته كانت سياسي بس الحقيقة إنه كان رجل أعمال حجم البيزنس بتاعه تقدر تقول إنه أكبر من (إيلون ماسك Elon Musk) مؤسس Tesla Motors و SpaceX و حالياً مالك Twitter و يمكن أكبر من (جيف بيزوس Jeff Bezos) مالك شركة Amazon قصاد إن المواطن الروماني البسيط لو الحكومة موفرتلوش رغيف العيش بيموت من الجوع .. الوضع ده هو هو فضل و إستمر في مصر اللي كانت ولاية رومانية مروراً بالفتح الإسلامي و حتي حكم المماليك و مكمل معانا لحد دخول العثمانيين و لحد ما (محمد علي باشا) قعد علي الكرسي .. يعني بتتكلم عن بلد معدل الثروة بتاع الناس اللي عايشة فيها فضل هو هو من سنة 30 قبل الميلاد لحد سنة 1820 .. إنت مستوعب .. و مش بس مصر .. العالم كله كان كده .. لو إنت إتولدت غني فبنسبة كبيرة حتموت غني و لو إنت إتولدت فقير فبنسبة كبيرة برده حتموت فقير.

صحيح مستوي الفقر بيفرق بس برده إنت فقير .. يعني في مصر مثلاً الفقير اللي كان عايش وقت الدولة الرومانية كان حاله أسواً بكتير من نفس الفقير اللي عايش تحت حكم الدولة العباسية .. بس في نفس الوقت زي ما كانت الفجوة كبيرة أوي بين الأغنياء و الفقراء أيام الدولة الرومانية ففضلت نفس الفجوة مكملة لسنين و سنين .. و حتي إرتفاع مستوي المعيشة بين الفقراء خلال السنين معلاش بسبب إن السياسات الإقتصادية للحكام كانت بسم الله ما شاء الله حلوة .. لا خالص .. الفكرة إن كل شوية يطعلك وباء يخلص علي البشر فكان خير ربنا كتير و مكفي .. الطاعون مثلاً لوحده مسئول عن وفاة حوالي نص سكان أوروبا فإنت أكنك بتلعب The Last of Us بس بحق و حقيقي.

لسنين طويلة كان النمو الإقتصادي للبشر بيزيد .. مع الوقت الإختراعات و الإكتشافات الهندسية و الطبية بتزيد .. بس كل ده كان بيروح هدر قصاد معدل النمو السكاني .. خد عندك الدولة العباسية مثلاً .. فيه في التاريخ الإسلامي ما يسمي بالعصر الذهبي للإسلام و ده الخمسين سنة اللي خلال فترة حكم الدولة العباسية اللي العلماء المسلمين كان ربنا فاتح عليهم من وسع و مكتبة بغداد كانت شبه Google بتاع العالم بس في نفس الوقت مدينة زي بغداد عاصمة الدولة العباسية كان عايش فيها حوالي مليون بني أدم .. إنت متخيل يعني إيه مليون بني أدم في زمن الدولة العباسية؟ .. متخيل حجم الموارد من أكل و شرب و علاج اللي بيروحوا عشان خاطر الكم ده من السكان يعيش .. ده في الإقتصاد بيتسمي Malthusian Trap أو فخ مالتوسيان علي إسم الإقتصادي البريطاني (توماس مالثوس Thomas Malthus) اللي بيقول إن لازم معدل التطور التكنولوجي و العلمي للبلد يكون أعلي من معدل النمو السكاني بتاعها عشان تقدر تقول إن النمو الإقتصادي يقدر ينقل البشر لقدام .. عشان البشر يحققوا المعجزة بتاعة الثورة الصناعية إنت كده محتاج كذا حاجة تحصل في وقت واحد و صادف إن الظروف دي كلها إتجمعت في بريطانيا .. أولاً محتاج زيادة سكانية و ده كان موجود بس مش الزيادة اللي تخليها تبلع النمو الإقتصادي اللي هو زيادة سكانية بس في المعقول .. ثانياً محتاج مجتمع متعلم و ده كان موجود .. ثالثاً و ده المهم إنك محتاج حكومة مش بتقف في طريق التقدم التكنولوجي و الفكري .. مفيش حاجة إسمها إن الحاكم يقول ده عاجبني و ده مش عاجبني و يمكن دي النقطة اللي خلت الدولة الإسلامية محققتش المعجزة الإقتصادية بتاعة الثورة الصناعية إن رضا الحاكم أو الخليفة عن العالم كان من أهم شروط إستمرارالعالم في شغله .. الثلاث شروط دول توفروا في المجتمع البريطاني دوناً عن باقي دول أمة محمد كلها و حتي ده كان صدفة بحتة.

مفيش حاجة تيجي كده إهدي حبيبي كده .. ده مش مجرد كوبليه في اغنية غنتها (نانسي عجرم) .. لا خالص دي حكمة بتوصف حياة البشر .. خلال أول كام سنة من الثورة الصناعية حياة الإنجليز متغيرتش كتير و يمكن عشان كده (كارل ماركس Karl Marx) اللي كان واحد من مؤسسي الإشتراكية كان متضايق جداً من اللي بيحصل و شايفه إستغلال و ظلم للعمال .. بس في نفس الوقت فيه حاجتين حصلوا مع بعض هم اللي خلوا الناس تقول إن الثورة الصناعية دي أحسن إختراع حصل للبشر من بعد إختراع الكهرباء و هي إن ظهرت النقابات العمالية في بريطانيا عشان تحمي حقوق العمال و تاني حاجة إن معدل المواليد بدأ يقل شوية عن المعدلات القديمة بحيث الست هناك مبقتش تخلف بالستة و السبعة إنما بقت تخلف بالثلاثة و الأربعة فمع الوقت عدد العمالة في السوق قل شوية بس مش كتير بحيث يكسر عجلة الإنتاج و في نفس الوقت معدل كان كافي إن المرتبات تعلي.

ده معناه إن مع الثورة الصناعية بقي عندك مجتمع التعليم فيه جودته عماله تزيد مع الوقت .. مجتمع الحاكم فيه مش بيتدخل في التطور العلمي و الهندسي اللي بيحصل .. و في نفس الوقت مجتمع فيه مؤسسات عمالية زي النقابات بتحمي حقوق العمال عشان مرتباتهم تفضل تعلي .. الناس الفلوس جريت في إيدها عشان كانوا بيخلفوا كتير بس مش أوي اللي هو أخرنا 3 عيال .. الناس الفلوس جريت في إيدها عشان الأفكار الهندسية اللي بتنقل الصناعة لقدام محدش كان بيعطلها و بيقول لا دي متتطبقش .. الأهم إن الفلوس جريت في إيد الناس عشان زي ما الأغنياء بيسترزقوا فالعمال كمان بقوا بيسترزقوا و بقت مصالحهم بتحميها مؤسسات تقدر تقف قصاد الناس اللي معاها فلوس.

فاضل نختم بإننا نتكلم عن هو يا تري المستقبل مخبيلنا إيه .. توقعي الشخصي إن معدل النمو الإقتصادي للبشر مش حيقل رغم إن كتير من الناس شايفه إن الكساد الإقتصادي جاي جاي بس زي ما قلت أنا شايف إن ده مش حيحصل و ده لسبب بسيط جدا هو قلة الأدب التكنولوجية اللي بتحصل فينا اليومين دول .. شوف .. أنا من مواليد الثمانينات .. طفولتي كانت شبه طفولة أمي و أبويا .. زي ما أبويا و هو صغير كان بيلعب كورة في الشارع فأنا كمان و أنا صغير كنت بلعب كورة في الشارع و جدي الله يرحمه كان بيلعب كورة في الشارع و جد جدي .. الإنترنت دخل مصر سنة 2010 و الثورة قامت في 2011 و قبل السنة دي كان كل طفل بيتولد في نفس التكنولوجيا اللي إتولد فيها أبوه .. العيال الصغيرة اللي إتولدت و كبرت في الجيل بتاع دلوقتي مش كده .. دي أطفال وعيت علي الدنيا و فيه إنترنت بس السؤال دلوقتي هل زي ما المؤسسات العمالية من نقابات أنقذت البشرية و هي اللي قومت مسار الثورة الصناعية حيبقي عندنا مؤسسات تقوم إستهلاكنا للتكنولوجيا؟ .. متهيألي هو ده السؤال اللي المفروض نسأله لنفسنا.

المصادر: