لو عايز تبقي شاطر في الإقتصاد والعلوم السياسية كل اللي عليك تعمله إنك تحفظ بيت الشعر ده اللي كتبه (أبوالطيب المتنبي) واللي بيقول فيه .. بذا قضت الأيام ما بين أهلها .. مصائب قوم عند قوم فوائد .. الفكرة إن لما ربنا بيبتلي بلد بمصيبة فخليك عارف إن فيه بلد تانية في نفس ذات الوقت المصيبة دي بالنسبة ليها بتبقي هدية من السما وعشان تشوف إزاي (المتنبي) كان عنده حق بص للي بيحصل بسبب الغزو الروسي لأوكرانيا .. دلوقتي دي حرب سببها إن الروس خايفين علي مصالحهم وعايزين يحموا نفسهم من توسع حلف شمال الأطلسي اللي إنت عارفه باسم NATO وده الكلام اللي إنت بتسمعه وبتقراه علي السوشيال ميديا بس ورا المأساة بتاعة الحرب ولما تركز أكتر بعنيك عشان تشوف هو اللي بيحصل ورا ألاف الضحايا اللي ماتوا بسببها حتلاقي إن فيه خناقة تانية متدارية علي مين يبقي الكبير بتاع أوروبا .. خناقة قد تبدو غريبة لإنها بين دولتين المفروض إن المنطق بيقول إيش جاب لجاب .. الخناقة دي بين بولندا وألمانيا.
خليني أبقي صريح مع نفسي ومعاك وأقولك إن مفيش بلد وقفت وقفة جدعنة مع أوكرانيا زي بولندا .. بولندا مسلفة القوات المسلحة الأوكرانية عشرات الدبابات .. حتي لما الألمان رسموا نفسهم قدام الناس علي إنهم بيضحوا عشان خاطر أوكرانيا وعطوهم 14 دبابة Leopard-2 فاللي بيدرب الأوكرانيين علي استخدام الدبابات دي هم البولنديين مش الألمان .. بولندا لوحدها مستقبلة لحد دلوقتي 1.5 مليون لاجيء أوكراني وده كعدد أكبر تجمع للاجئيين الأوكرانيين في أوروبا كلها .. في نفس الوقت لازم برده أكمل دور الصراحة ده وأقولك إن بولندا مش واقفة وقفة الجدعنة دي لله وللوطن .. فيه سببين مهمين ورا الموقف ده: الروس والألمان.
عايزك تبقي عارف إن السياسة زيها زي الماركتينج في إن بيبقي عندك سلعة أو منتج وإنت عايز تبيعه بس يمكن الفرق إن في الماركتينج إنت بتبيع منتج أو Product بس في السياسة إنت بتبيع نفسك .. اللي بيحكم بولندا دلوقتي هو حزب اسمه حزب القانون والعدالة بيرأسه واحد إسمه (أندريا دودا Andreij Duda) والرجل ده بيبيع نفسه للبولنديين علي إنه هو السكس بلف أو المحبس اللي مانع إن (فلاديمير بوتين Vladimir Putin) يضم بولندا هي كمان لروسيا ويعمل فيها زي ما عمل في أوكرانيا .. سنة 2014 بعد ما الروس خدوا شبه جزيرة القرم من أوكرانيا غصب وعافية كده بولندا بدأت تجمع دول شرق أوروبا في تحالف سياسي وعسكري ضد روسيا سموه تحالف تسعة بوخارست وبوخارست دي تبقي عاصمة رومانيا والدول التسعة يبقوا بلغاريا والتشيك وأستونيا والمجر ولاتفيا وليتوانيا وبولندا ورومانيا وسلوفاكيا .. خدت بالك من نقطة وهي إن صحيح التحالف ده فكرة بولندي بس البولنديين مأصروش إنه يتسمي علي اسمهم ويبقي تحالف تسعة وارسو علي اسم العاصمة بتاعتهم .. نقطة تانية وهي إن زمان كان فيه حاجة إسمها حلف وارسو وده كان النسخة الروسي من NATO وكان هدفه هو حماية مصالح روسيا فلما دلوقتي البولنديين يعملوا حلف وارسو الجديد بس يبقي هدفه هو إنه ينكد علي الروس عيشتهم فكده هو (أندريا دودا) بيستفز (بوتين) بدون داعي .. في الماركتينج وفي السياسة مهم تبقي فاهم إن كلام الناس مهم .. (أندريا دودا) مع كل موقف بيعمله بيثبت للأوروبيين إنه تعلب .. مش عايز أقول إنه معندوش بربع جنيه سلكان بس علي الأقل هو مش سهل.
علي الناحية الثانية خليني أصنفرلك ذاكرتك وأفكرك بكيس الشيتوس الحجم العائلي (دونالد ترامب Donald Trump) اللي كان بيحكم أميركا قبل جدو (جو بايدن Joe Biden) وأسالك هو إنت فاكر إيه الحاجة اللي (ترامب) كان دايماً يشتكي منها كل ما يقابل المستشارة الألمانية وقتها (أنجيلا ميركيل Angela Merkel)؟ .. لو كنت ناسي أفكرك .. (ترامب) كان متضايق جداً إزاي بلد ربنا كارمها زي ألمانيا إقتصادها بسم الله ما شاء الله جامد زحليقة بس معندهاش عساكر ولا جيش قادر يقف علي رجله .. الإنفاق العسكري الألماني كان دايماً نقطة الخناق بينه وبين (ميركل) وعشان كده بولندا أو (أندريا دودا) دلوقتي بيبيع نفسه للأمريكان علي أنه الرجل بتاعهم في أوروبا .. بولندا ماشية في خطة إنها خلال الكام سنة الجايين يبقي عندها أكبر قوات مسلحة من حيث العدد في أوروبا بحيث إجمالي القوات النظامية البولندية يبقي 300,000 مقاتل وعلي فكرة ده رقم قريب من تعداد القوات المسلحة المصرية لإن القوات النظامية بتاعتنا عددها 468,500 مقاتل بس حط في إعتبارك الفرق الشاسع في تعداد السكان بين مصر وبولندا .. الإنفاق العسكري البولندي متوقع إنه يزيد من 2.4-5% من إجمالي الناتج الوطني الإجمالي Gross Domestic Product أو GDP اللي هو تخيل إن بولندا جابت كل الفلوس اللي بتخشلها كل سنة وخدت 5% منهم صرفتهم علي القوات المسلحة بتاعتها.
اللي عايز (أندريا دودا) يعمله إنه يقول للأوروبيين وللأمريكان بالذات إن لو عايزين حد يقف في ظهركوا ويحمي مصالحكوا فالحد ده يبقي إحنا مش الألمان .. (دودا) مش بيسيب فرصة كل ما تيجي سيرة الألمان غير لما يفكر الناس بإن الألمان دول أصلاً شوية حرامية مش هاممهم غير مصالحهم .. من سنين والناس كلها بتقول للألمان بلاش تعتمدوا أوي كده علي الغاز الطبيعي الروسي بس الألمان كان عاجبهم إن الروس بيبعولهم غاز رخيص .. (دودا) له جمله مشهورة أوي إن الإتحاد الأوروبي ده مينفعش يتقال عليه غير الرايخ الرابع الألماني علي أساس إن ألمانيا هي اللي ممشية أوروبا كلها .. يا رجل ده في أكتوبر 2020 وزارة الخارجية البولندية بعتت جواب رسمي لوزارة الخارجية الألمانية بتطلب تعويض بقيمة 1.3 ترليون دولار عن الجرايم اللي إرتكبتها القوات المسلحة الألمانية في بولندا وقت الحرب العالمية الثانية .. هو أساساً ده طلب غير قانوني عشان بولندا سنة 1953 وافقت علي إسقاط حقها في طلب تعويضات بس هي الفكرة إن (دودا) ما بيصدق كل شوية ينزل Diss Track يهزق فيه الألمان .. بس في نفس الوقت أنا مستغرب إن الألمان مقلعوش اللي في رجليهم وأدوا (أندريا دودا) فوق دماغه .. الألمان فيهم عيب أبن ستين كلب هو إنهم عايزين ينسوا العالم كله المصايب اللي هم عملوها وقت الحرب العالمية الثانية فدلوقتي ماشيين بمبدأ إنهم يشمشموا علي الجنازة عشان يشبعوا فيها لطم .. سنة 2020 (أندريا دودا) طلع عفو رئاسي عن رجل متهم بالتحرش بأطفال اللي هي أساساً يعني قضية داخلية ودي مشكلة بين البولنديين وبعضيهم وملناش دعوة يا محيي .. بس إزاي .. الصحف الألمانية استلمت (دودا) وقتها غسيل ومكواة وكان موقف غريب جداً الصراحة بس يخليك تفهم هو ليه الألمان مثلاً في كأس العالم بتاع قطر كانوا محسسينا إنهم جايين يعلمونا يعني إيه حقوق إنسان وهم أصلاً قتالين قتلة .. المهم .. نرجع لنقطة هم ليه الألمان ساكتين علي (دودا).
خلال العشرين سنة اللي فاتت خصوصاً بداية من 2015 لما الحزب بتاع (أندريا دودا) مسك الحكم والنجاح الإقتصادي البولندي أساساً يعني سببه قوة الإقتصاد الألماني لإنك لو جيت حسبت GDP بتاع ألمانيا وقسمته علي عدد السكان حتلاقي إن معدل ثروة الفرد في ألمانيا تقريباً ضعف بولندا .. طب إيه معني ده؟ .. الفكرة إن كل الشركات الألمانية الكبيرة ليها مصانع في بولندا .. ألمانيا بتتعامل مع بولندا زي ما أميركا بتتعامل مع الصين اللي هو شركاتي بتفتح مصانع عندك عشان العمالة عندك رخيصة .. ده يفسرلك ليه ألمانيا هي أكبر شريك تجاري لبولندا .. تقريباً يعني في المتوسط بولندا بتبيع لألمانيا بضاعة بحوالي 70 مليار يورو .. يا مؤمن ده سنة2021 ألمانيا دفعت من جيبها 21 مليار يورو ضختهم في ميزانية الإتحاد الأوروبي راح منهم 12.9 مليار لبولندا لوحدها اللي هو لو ألمانيا قررت تقفل المحبس علي بولندا فالبولنديين من بكره الصبح حيباتوا في الشارع بس هم مش قادرين يعملوا ده .. ليه؟ .. عشان (دودا) ماسكهم من إيدهم اللي بتوجعهم .. لو الألمان فكروا يزعلوا البولنديين فكل اللي (دودا) محتاج يعمله يشغلهم موسيقي فيلم Schindler’s List وساعتها حيفكر الناس كلها بإن الألمان دول قتالين قتلة.
المصادر:
- مقالة بعنوان Poland’s futile bid to be Ukraine’s savior نشرت في موقع UnHerd وده لينك المقالة الأصلية:
https://unherd.com/2023/02/polands-futile-bid-to-be-ukraines-saviour/
