خلينا نكون صرحاء مع بعض إن سمعة السلاح الفرنساوي مش أحسن حاجة في الدنيا .. حاسس إن القفا اللي خدوه من النازيين في الحرب العالمية الثانية لسه معلم فيهم لحد دلوقتي حتي لو إتفقنا إن المشكلة كانت في الدماغ اللي ماسكة المؤسسة العسكرية الفرنساوية بس برده ده مخلاش سمعة السلاح الفرنساوي زي الألماظ .. إيه أحسن سلاح بتصنعه فرنسا؟ .. طيارات رافال؟ .. هي أه حلوة و كل حاجة بس مش حتلاقي الناس بتجري عليها تشتريها .. بس اللي أنا فعلاً عايز أتكلم عنه النهاردة إن فيه عظمة عملتها شركات السلاح الفرنساوي و محدش بيتكلم عنها ولا بيجيب سيرتها يمكن باستثناء الإماراتيين زي ما حنشوف كمان شوية و العظمة اللي أنا بتكلم عنها هي الدبابة ليكلريك Leclerc اللي تعتبر الدبابة الأساسية في سلاح المدرعات الفرنساوي .. صدقني لو قلتلك إن أنا شخصياً مستغرب بس استغرابي راجع لنقطة ممكن تخليك تفطس علي نفسك من الضحك .. صحيح إن المؤسسة العسكرية الفرنساوية باعته قوات ليها في حتت كتير من العالم من أول أفغانستان و كمان جيبوتي و حتي مالي بس القوات دي و هي رايحة مش بتاخد معاها الدبابة دي .. دي دبابة مضربتش دانة توحد ربنا ضمن كل العمليات القتالية اللي شاركت فيها القوات المسلحة الفرنساوية من وقت حرب الخليج الثانية سنة 1991 يعني تقريباً فيه كتير منكوا من قبل حتي ما يتولد و الدبابة دي مضربتش طلقة و شوف رغم كل ده أنا بقولك إنها من أحسن الدبابات اللي في السوق .. جبت أنا الثقة دي كلها منين؟ .. تعالي نشوف.
فرنسا طلعت من الحرب العالمية الثانية معندهاش قوات مسلحة أساساً و من بعد الحرب و طول فترة الخمسينات و هم بيحاولوا يبنوا القوات المسلحة بتاعتهم من الصفر .. خلال فترة الحرب الباردة اللي هي الحرب بين الغرب بقيادة الأمريكان و الإنجليز و شوية الفرنساويين ضد الشرق متمثلاً في الإتحاد السوفيتي فكان سلاح المدرعات الفرنساوي معتمد علي نوعين من الدبابات اللي إتصنعوا في فرنسا في الخمسينات:
- الدبابة الأولي و اللي الحقيقة مينفعش يتقال عليها دبابة أصلاً اسمها AMX-13 .. دي كانت عبارة عن ميكروباص شالوا الأربع عجلات بتوعه حطوله جنزيرين و مدفع عيار 75 مليمتر و البتاعة دي بدأت تخش الخدمة في القوات المسلحة الفرنساوية سنة 1953 .. و رغم عيوبها الكتير اللي أهمها إن عشان وزنها كان يدوبك 13 طن فهي كانت حقاً و صدقاً ميكروباص متركبله مدفع فهي مكنش ليها أي حماية من أي نوع و شوف يا مؤمن رغم كده إسرائيل و الهند أشتروها .. الإسرائيليين مثلاً استخدموها ضدنا في العدوان الثلاثي.
- سنة 1966 الدبابة التانية نزلت السوق و كان اسمها AMX-30 .. الفرنساويين كانوا فرحانين بيها أوي علي أساس إنها كانت أول مرة يعملوا بإيديهم دبابة و يركبولها درع سمكه 80 مليمتر مرة واحدة .. هو بس تقريباً محدش قالهم إن الدبابة الأمريكاني اللي في السوق وقتها اللي هي M-47 Patton كان بيتركبلها درع سمكه 243 مليمتر.
حرب الخليج الثانية هي اللي ورت الفرنساويين إن الهباب اللي هم بيسموه دبابة ده ميسواش في سوق الدبابات ثمن توكتوك .. الناس لما شافت الدبابة M-1 Abrams الأمريكاني كان باين أوي إن التصميم بتاعها حيخلي كل الدبابات القديمة ملهاش مكان غير مقالب الخردة خصوصاً بسبب دروعها المتصنعة من مادة متخلقة في معمل بيسموها Composite Material Chobham و مدفعها الأساسي عيار 125 مليمتر .. أي مقانة بين الإبرامز و بين AMX-30 كان لازم تنتهي بالسف علي الدبابة الفرنساوي بس الحقيقة إن محدش من اللي حضر الحرب في أول سنة ليها كان عارف إن فيه عظمة بتتطبخ جوه .. الأمريكان بيطوروا في الإبرامز بقالهم سنين و خلال السنين دي و هم بيوروا تصميماتها لصحابهم و من ضمنهم الفرنساويين عشان يجروا ريقهم يشتروها منها فعلياً المؤسسة العسكرية الفرنساوية كانت بين نارين .. نشتري الإبرامز ولا نصنع إحنا واحدة شبه الإبرامز .. بعد هري و مناهدة الفرنساويين قالوا لنفسهم هو إحنا ناقصين إيد ولا رجل ما نعمل إحنا الدبابة بتاعتنا و سموها AMX-56 Leclerc و بتتنطق لي-كلير بالفرنساوي و إتسمت علي اسم الجنرال الفرنساوي اللي كتيبة الدبابات بتاعته هي اللي حررت العاصمة باريس سنة 1944 من الإحتلال النازي.
الدبابة ليكليرك زي ما قلت من شوية إتصنعت سنة 1991 و دخلت الخدمة في القوات المسلحة الفرنساوية و شاركت في أواخر حرب تحرير الكويت سنة 1992 و من ساعتها و هي مشمتش ريحة أي حرب رغم إنها وقتها كانت أغلي دبابة في السوق .. الدبابة الواحدة كانت بتتكلف 9.3 مليون دولار قصاد إن مثلاً يعني دبابة M-1A2 Abrams بتتكلف 7.56 مليون دولار و الدبابة T-90 الروسي بتتكلف 4 مليون دولار بس .. لا في أفغانستان ولا الكونجو ولا كوتيفوار ولا أفريقيا الوسطي ولا حتي مالي .. لو حبينا نتكلم عن مميزات الدبابة دي فالحقيقة هي ملهاش غير ميزة واحدة بتحطها في حتة تانية لو قارنتها بأي دبابة في السوق و الميزة دي إنها خفيفة .. دي دبابة وزنها يدوبك 55 طن .. ده معناه إيه؟ .. معناه لو حطتلها موتور ديزل 8 سلندر حيقدر يديك 1,500 حصان مستريح .. ده برده معناه إيه؟ .. معناه إن دي دبابة أقصي سرعة ليها علي طريق متسفلت ممكن توصل 80 كيلومتر في الساعة و لو طريق مش ممهد ممكن تديك 50 كيلومتر في الساعة .. دي أرقام بتاعة عربيات ملاكي مش دبابات خصوصاً لو دخلت في إعتبارك استهلاكها للبنزين .. علي تفويلة واحدة هي ممكن تمشي 544 كيلومتر و ده رقم خزعبلي قصاد إن الإبرامز اللي تاني بقول إنها بتتصنف علي إنها أحسن دبابة في العالم علي تفويلة واحدة ممكن تمشي 416 كيلومتر.
فعلياً غير إنها دبابة خفيفة فبناء عليه بتجري بسرعة هي ملهاش ميزات إضافية تخليك تقول واو تسلم إيد الصناعة العسكرية الفرنساوي .. يمكن اللي أنا شخصياً واقف قدامه و عاجبني فيها إن فعلاً من أولها لأخرها تصنيع فرنساوي .. الدبابة الإبرامز الأمريكاني مثلاً اللي تعتبر أحسن دبابة في السوق المدفع بتاعها من تصنيع شركة راين-ميتال Rheinmetall الألمانية بس المدفع بتاع الدبابة ليكليرك من تصنيع شركة نيكستر Nexter اللي هي نفس الشركة اللي بتصنع الدبابة و المدفع اسمه بالكامل CN120-26 عيار 120 مليمتر بيتركبله نظام تعمير دانات أوتوماتيك بيقدر يضرب 12 قذيفة مختلفة في الدقيقة .. الدبابة بيتركب فيها برنامج تحكم في ضرب النار بيسموه Fire Control System بيقدر ينشن علي 6 أهداف في وقت واحد بحيث أقصي مسافة ممكن المدفع يصطاد منها هدف هي 4 كيلومتر .. الدروع بتاعتها شبه اللي بتتركب في الإبرامز.
إذا كان الفرنساويين مجربوش الدبابة دي في أي خناقة بس اللي جربها كان الإماراتيين .. خلال العملية العسكرية الإماراتية السعودية المشتركة في اليمن الإماراتيين بعتوا كتيبتين مدرعات مكونين من دبابات ليكليرك (من أصل 390 دبابة بتملكهم الإمارات) و لو صدقت التقارير اللي كتبتها المؤسسة العسكرية الإماراتية فهم شايفين إن أداءها خلالها من وجهة نظرهم علي الأقل أحسن من الإبرامز .. لازم أقول عشان الأمانة يعني إن النسخة الإماراتي من الدبابة دي هي نسخة خاصة شوية لإن متركبلها موتور 12 سلندر مش 8 و متركبلها زوربيح حساسات Sensors أكتر بكتير من الحساسات اللي بتتركب علي النسخة التقليدية من الدبابة.
المصادر:
- مقالة بعنوان France’s Leclerc Tank is Something Truly Special, Putin Would Hate It نشرت في موقع 1945 و ده لينك المقالة الأصلية:
https://www.19fortyfive.com/2023/01/frances-leclerc-tank-is-something-truly-special-and-should-make-russia-sweat/ - مقالة بعنوان Just How Good Is France’s Leclerc Tank Anyway? نشرت في موقع The National Interest و ده لينك المقالة الأصلية:
https://nationalinterest.org/blog/buzz/just-how-good-frances-leclerc-tank-anyway-147801?page=0%2C1
