إنك تيجي متأخر أحسن من إنك متجيش خالص .. الجملة دي تمشي علي أي حد و في أي موقف و في أي حتة .. إنت ممكن متبقاش أب كويس و ولادك حاسين إنك هاملهم و ملكش دور في حياتهم بس إنت تقدر تغير كده في أي لحظة .. ممكن تبقي واحد شغال في شغلانة و طول عمرك عايش بمبدأ علي قد فلوسهم بس إنت تقدر بكره الصبح تغير ده سواء كنت شغال لاعيب كورة في نادي أو مهندس في شركة .. إنك تتغير للنسخة الأفضل دي حاجة كويسة مهما الموضوع خد منك وقت و دايما إفتكر إن الناس بتفتكر النهايات مش البدايات .. هي طبيعة البشر كده .. (حسام عاشور) هو أكتر لاعيب متوج بالبطولات في تاريخ الأهلي فهل تفتكر جمهور النادي فاكره دلوقتي أو بيجيب سيرته؟ .. لا .. ليه؟ .. عشان خاطر قراره في النهاية إنه يسيب النادي .. اللي أنا عايز أقوله ليك إن مش حتفرق إنت كنت إيه في الأول .. نهاية مشوارك هي اللي حتحدد مصيرك في دماغ الناس .. الكلام ده يمشي علي أي لاعيب كورة و يمشي علي أي حد بما فيهم (ساتيا Satya Nadella) المدير التنفيذي CEO لشركة مايكروسوف Microsoft العملاقة و ده اللي إحنا عايزين نتكلم عنه النهاردة.
(ساتيا) إتولد في حتة في الهند اسمها حيدرأباد بس أبوه و أمه هاجروا أميركا و دخل المدرسة في مرحلة ثانوية عامة في أميركا و إشتغل في مايكروسوفت سنة 1992 عشان يبقي مجرد مهندس برمجيات من أصل هندي بيترمي مع باقي العبيد من مهندسي الكومبيوتر اللي أصلهم من جنوب شرق أسيا اللي قايمة علي كتافهم شركات التكنولوجيا الأميريكية .. (ساتيا) من الناس اللي بيتقال عليهم ابن الشركة .. ده من الناس اللي عاملين زي البحارة في مركب The Flying Dutchman أو الهولندي الطاير في فيلم Pirates of the Caribbean: At World’s End اللي هم بقالهم كتير أوي بيخدموا في المركب لدرجة إنهم بقوا جزء منها حرفياً أقصد .. اللي هو شوية كمان و كنت حتلاقي حيطة مثلاً هو مدفون فيها و طالعلك بوشه و إنت لسه مهندس جونيور متعين جديد يرحب بيك في مايكروسوفت .. (ساتيا) عدي عليه أيام حلوة أوي و عدي عليه أيام إلهي ما يعيديها .. عدي عليه قضية القرن لما الحكومة الأميريكية رفعت قضية إحتكار علي مايكروسوفت عشان تخليها تبطل تنزل برنامج Microsoft Internet Explorer بشكل أوتوماتيكي علي نسخ الويندوز اللي بتنزل علي الأجهزة عشان ده بيقتل المنافسة في سوق برامج التصفح علي الإنترنت قال يعني Microsoft Internet Explorer كان أملة أوي ما شاء الله ميعرفوش إننا بنتطلع عليه ميمز دلوقتي و دي القضية اللي مايكروسوفت كسبتها بالمناسبة .. و كمان عدي عليه الفضيحة اللي اسمها Windows Phone و الشراكة الفاشلة مع NOKIA و اللي ضيعت علي مايكروسوفت إنها تدوق الشهد من بيزنس السمارت فون .. و وسط كل ده (ساتيا) كان شغال علي المشروع اللي هو كاين شايف إنه حينقل مايكروسوفت سنين ضوئية لقدام .. بينج Bing.
طبعاً لو إنت قديم شوية زي حالاتي فأول ما سمعت اسم Bing تلاقيك إنهرت من الضحك بس في حالة إنك من جيل مواليد الألفينات و متعرفش إيه ده فخليني أقولك إن زمان و زمان ده اللي هو سنة 2009 مايكروسوفت حاولت تنافس شركة جوجل Google بإنهم يعملوا سيرش إنجن Search Engine اسمه Bing بحيث إنك مثلاً لو حابب تعرف مين كسب بطولة دوري أبطال أوروبا موسم 2006 فبدل ما تفتح Google تفتح Bing .. بس طبعاً زي ما إنت شايف بعنيك دلوقتي مفيش حد أصلاً عارف إيه Bing ده و ده لوحده يوريك حجم الفشل اللي وصله المشروع اللي (ساتيا ناديلا) كان مسئول عنه .. بس مهم تفهم حاجة .. العيب مكنش في الفكرة العيب كان في التنفيذ .. (ساتيا ناديلا) بدأ يشتغل علي فكرة محركات البحث أو Search Engines في وقت مكنش فيه ناس بتتكلم فيها غير Google و صحيح هم كسبوه .. لا كسبوه إيه دول داسوا علي وشه بس ده خلي الناس اللي ماسكة مايكروسوفت تقول لنفسها إحنا عندنا حد شايف بكره فيه إيه بس يمكن أول مرة مجاتش معاه بس أكيد تاني مرة ممكن تجيب همها و ده اللي حصل سنة 2011 لما (ساتيا ناديلا) بدأ مشروع جديد جوه مايكروسوفت اللي هو أزور Azure.
أزور ده مشروع فكرته بمنتهي البساطة إن إنت لو عندك شركة و لتكن مثلاً شركة مقاولات فإنت عشان تحتفظ بشغلك و سجلاتك و مشاريع بتحطها علي سيرفر Server فمش بس Azure بتعملك السيرفر دي كمان بتقدملك خدمة Cloud Storage يعني الداتا بتاعتك مش بتتحط في هارد درايف في أوضة إنما بتتحطلك علي الإنترنت و دي فكرة كانت سابقة عصرها و مفيش حد كان شغال فيها غير شركة أمازون Amazon اللي جواها إدارة اسمها أمازون ويب سيرفيسيس Amazon Web Services أو AWS .. خلال كام سنة شغل Azure سمع جداً في السوق لدرجة إن سنة 2014 (بيل جايتس Bill Gates) شخصياً إختار (ساتيا ناديلا) عشان يبقي CEO لشركة مايكروسوفت و دي كانت بداية النقلة الكبيرة للشركة .. (ساتيا) مهندس و المهندسين عموماً فيهم خصلة غريبة جداً إن مشاعرهم مش بتحركهم أوي يعني بالنسبة لينا المصالح بتبقي أهم من أي حاجة تانية و ده اللي خلاه يبدأ يرجع علاقات كانت متدمرة قبل كده بين مايكروسوفت و شركات تانية بسبب إن (بيل جايتس) وقت ما كان ماسك الشركة مكنش عنده في الخناقات يا أما ارحميني .. إتصالح مع شركة Salesforce اللي كانت بينها و بين (بيل جايتس) ما صنع الحداد .. إشتري شركات مش عشان هي شركات بتجيب فلوس قد ما هي شركات ليها زباينها فتقدر تقول إنه حرفياً إشتري الشركات بزباينها زي شركة موجانج Mojang اللي بتعمل لعبة ماينكرافت Minecraft .. إشتري لينكدإن LinkedIn بكل السيفيهات اللي فيه .. دلوقتي Azure بقت المنافس رقم واحد لشغل AWS .. خلال 9 سنين من إدارة (ساتيا ناديلا) مايكروسوفت تحولت لشركة سعرها في السوق مش حيقل عن 2 ترليون دولار.
بس فضلت النقطة اللي مخلية مايكروسوفت مش عارفة ترجع تاني مايكروسوفت التسعينات إنها مش تحت إيدها المنتج اللي الناس كلها عايزاه زي ما كان وقت ما كل بيت في العالم كله في كومبيوتر شغال بيندوز .. مايكروسوفت محتاجة ويندوز جديد يخلي سيرتها علي كل لسان و ده اللي ممكن يحققه الذكاء الصناعي Artificial Intelligence أو AI و ده المستقبل اللي (ساتيا ناديلا) بيراهن عليه.
لما برنامج ChatGPT نزل السوق خلي الناس كلها تتكلم عنه و إحنا هنا إتكلمنا عنه في مقالة قبل كده و عن إزاي AI ممكن يغير الدنيا .. من غير ما أخليك تحتاج تقرأ المقالة القديمة فالموضوع بمنتهي البساطة إن اللي إشتغل علي برنامج ChatGPT هي شركة اسمها أوبين إيه أي OpenAI المدير التنفيذي بتاعها اسمها (سام ألتمان Sam Altman) و الرجل ده ماضي عقد شراكة مع مايكروسوفت بحيث شركته OpenAI تقدر تستفيد من التكنولوجيا بتاعة إدارة Azure في نفس الوقت مايكروسوفت حتقدر تستخدم تكنولوجيا ChatGPT في تطوير Bing Search Engine عشان لأول مرة يمكن ليك كواحد بيدور علي معلومة علي الإنترت إنك بدل ما تفتح Google عشان تدور علي معلومة تقوم فاتح Bing .. دي مش مجرد أفكار للمستقبل اللي محدش عارف حيبقي واقع إمتي .. في فبراير 2023 (ساتيا) أعلن إن خلاص Bing بقي شغال ببرنامج ذكاء صناعي شبه ChatGPT اسمها سيدني Sydney .. و أيوه ده نفس برنامج الذكاء الصناعي اللي قلنا في مقالة ChatGPT إن لما الصحفي (كيفن رووس Kevin Roose) اللي شغال في جرنان The New York Times جربه لقاها بتقوله إنت لازم تسيب مراتك و ترتبط بيا و أنا حخليك رجل أسعد بس مش دي القضية .. القضية إن الصفقة اللي عملتها مايكروسوفت مع OpenAI بعشرة مليون دولار فيه ناس بتتكلم إنها فعلاً حتبقي صفقة القرن لو قارنت الفلوس دي بحجم الشغل اللي ممكن تاخده مايكروسوفت لو كل برامجها بما فيها ويندوز بقت مدموجة بتكنولوجيا الذكاء الصناعي .. مش بعيد (ساتيا ناديلا) ينسينا (بيل جايتس) و يبقي هو الفاترينة بتاعة مايكروسوفت.
المصادر:
- مقالة بعنوان Microsoft’s Satya Nadella Is Betting Everything on AI نشرت في مجلة Wired و ده لينك المقالة الأصلية:
https://www.wired.com/story/microsofts-satya-nadella-is-betting-everything-on-ai/
