اللي حنتكلم عنه النهاردة هو موضوع جايب هسهس لناس كتير من اللي مهتمة شوية بموضوع التكنولوجيا و هو الذكاء الصناعي أو Artificial Intelligence و اللي إختصاراً بيسموه AI .. يمكن سبب الهسهس ده هو الإختراع اللي طربق الدنيا فوق دماغنا اللي هو ChatGPT و ده مفهوم و أنا مقدره .. أنا أساساً لما شفت البتاع ده خفت و حسيت إني شبه الأخوه اليمنيين لما الرئيس (جمال عبدالناصر) الله يرحمه بعت ناس من شركة المقاولين العرب يسفلتولهم الشوارع فاليمنيين وقتها مشافوش قبل كده أسفلت ولا كانوا يعرفوا هو إيه فبقوا بيجروا ورا المهندسين المصريين و هم بيقولولهم أنتوا بتسودوا أرض الله .. رد الفعل ده طبيعي يسيطر عليك لما تشوف حاجة لأول مرة و إمكانياتها تكون مرعبة بالنسبة ليك بس في نفس الوقت إنت لازم تستهدي بالله و تبقي فاهم إن تكنولوجيا الذكاء الصناعي بقالها سنين حوليك و إنت متعود عليها لدرجة إنك بقيت مش بتلاحظ وجودها بس لما طلع ChatGPT فجعك بحاجة جديدة عليك فجالك إنهيار عصبي .. اللي منكوا عايش بره أكيد عدي عليه العربيات اللي بتسوق بنفسها أو Self-Driving Cars و حتي هنا في مصر فيه عربيات بتنزل السوق بتكنولوجيا إنها تركن نفسها بنفسها و ده حضرتك في حالة إنك متعرفش صورة من صور الذكاء الصناعي .. لما بتروح شغلك تفتح الإيميل بتاعك بتلاقي شوية إيميلات محطوطة في بند Spam فده برده حضرتك صورة من صور الذكاء الصناعي إن Email Browser بتاعك حس إن ده ميل مش أمن و خباه عنك عشان متتغاباش و تفيرس سيرفر الشركة .. اللي معاه موبايل بيفتح من صورة وشك فده يبقي برنامج تعرف علي الوش أو Facial Recognition Software و ده برده واحد من صور الذكاء الصناعي أو و إنت بتعمل شات و لقيت الموبايل بتاعك بيصححلك كلامك أوتوماتيك اللي هوAuto-Correct و ده برده صورة من صور الذكاء الصناعي .. اللي عايز أقوله إنك عايش مع الذكاء الصناعي بقالك سنين فبلاش تترعب أوي كده.
قبل ما يطلعلنا ChatGPT فالسنة اللي فاتت الناس بتاعة Graphic Design جالها حالة رعب كأنهم عيشوهم جوه فيلم SAW لما شافوا برنامجين رسم بالذكاء الصناعي اسمهم Midjourney و Stable Diffusion .. دي البرامج اللي بترسم الصور اللي بتلاقيها علي سوشيال ميديا زي ده تصور الذكاء الصناعي لشكل المدن العربية في المستقبل أو يرسملك تصور الذكاء الصناعي لشكل الأبطال بتوع سلسلة الأفينجر لو كانوا عرب .. كل ده كوم ولما شركة Open AI طلعتلنا البدعة اللي اسمها ChatGPT ده كوم تاني .. للناس اللي مش عارفه البتاع ده بيعمل إيه فتخيل نفسك عندك ريبورت في الكلية عايز تكتبه زي مثلاً طريقة عمل الغواصات لو إنت بتدرس Fluid Mechanics في هندسة ميكانيكية أو تأثير (وليام شكسبير William Shakespeare) علي المجتمع الإنجليزي لو إنت بتدرس أداب إنجليزي .. أي تقرير في أي كلية علي حسب تخصصك .. كان زمان زي أي طالب شطور بيفتح جوجل و يبدأ يطلع مواقع أو دراسات إتكلمت عن الموضوع و يقضي الكام الساعة الجايين من عمره عمال يعمل Copy & Paste .. برنامج ChatGPT مش كده .. إنت بتقوله عنوان التقرير و هو بيتكبهولك .. زي ما حضرتك متخيل طلبة الكليات في العالم كله لما شافوه قالوا عليه أحسن إختراع بعد مسلسل (جعفر العمدة).
في يناير 2023 لوحده البرنامج ده استخدمه فوق ال100 مليون بني أدم و ده خلاه البرنامج الأكثر إنتشاراً في تاريخ البني أدمين من ساعة ما عملوا برنامج Windows .. فيه ناس بتستخدمه في التفاهة زي إنهم يعيدوا إنتاج حلقات مسلسل زي Friends و إنهم يكتبوا أغاني راب .. و فيه ناس بتستخدمه عشان تبني بيه مستقبلها زي طلبة الكليات و المدارس اللي بقوا معتمدين عليه عشان يكتبلهم التقارير و حتي يعملهم الواجب أو Home Work لو إنت ابن ناس خريج مدارس لغات مش زي حالاتي خريج مدارس حكومة لدرجة إن كلية محترمة زي ستانفورد طلعت قالت إن علي الأقل 5% من الطلبة بقوا معتمدين علي برنامج ChatGPT بشكل كلي من غير ما حتي يغيروا فيه كلمة عشان يكتبلهم التقارير بتاعتهم اللي بتتحط علي أساسها أعمال السنة بتاعتهم .. فيه ناس بتستخدمه عشان تضيع مستقبلها زي عميد كلية اسمها فانديربيلت Vanderbilt University اللي إتشال من منصبه بعد ما كتب خطاب تعزية حصل بعد حادثة ضرب نار في جامعة ميتشجين بس كسل يكتبه بنفسه و استخدم ChatGPT عشان يكتبه و ده كده زي ما يكون حد تعرفه عنده حالة وفاة و بدل ما تكتبله بنفسك البقاء لله في كومنت قمتإنت خدت كومنت من الموجودين قبل كده علي البوست و عملتله Copy & Paste بس كنت متسربع شوية و مخدتش بالك إن اللي كتب الكومنت كان بنت مش ولد فبقي منظرك وحش أوي .. فيه ناس بتستخدمه عشان تضيع فلوسها زي لما شركة مايكروسوفت Microsoft أعلنت إنها حتستثمر 10 مليار دولار في شركة Open AI اللي عملت ChatGPT عشان يخلوا Bing Internet Explorer فيه أوبشن ذكاء صناعي شبه ChatGPT .. شركة تانية زي Google ناوية تعمل ChatGPT الخاص بيها و حيسموه BARD.
النهاردة فرصة كويسة إننا نتكلم عن الذكاء الصناعي بشكل عام و نحاول نفهم هو البتاع ده بيشتغل إزاي و يا تري الدنيا رايحة علي فين لإن فيه ناس كتير يا خايفة علي مستقبلها يا متخيلة إن حيجي اليوم و الذكاء الصناعي يسيطر علي البشر و يستعبدهم زي فيلم Terminator كده فخلينا نخش في الموضوع علي طول:
هو يا تري الذكاء الصناعي ده بيشتغل إزاي؟
جزء من المشكلة أو المبرر وراء الرعب اللي إحنا عايشينه دلوقتي هو إن برامج الذكاء الصناعي اللي في السوق سواء ChatGPT أو Midjourney أو Stable Diffusion بيتقال عليها Generative يعني هي زي ما بتقول كده بتخلق حاجة أو بلاش تخلق دي خلينا نقول بCreate حاجة مكنتش موجودة قبل كده و فكرة الإبتكار دي أو إنك تعمل حاجة جديدة جري العرف إن اللي بيعرف يعملها هم البني أدمين و هنا إنت مهم تفهم حاجة مهمة و هي إن فيه نوعين من الذكاء الصناعي مش نوع واحد:
- النوع الأول هو الذكاء الصناعي الضيق أو Narrow A.I. و ده برنامج بتطلب منه يعملك شغلانة فبيعملهالك و ده اللي بيتحط تحت منه كل برامج الذكاء الصناعي اللي في السوق و من ضمنها ثلاثي أضواء المسرح ChatGPT أو Midjourney أو Stable Diffusion.
- النوع الثاني هو الذكاء الصناعي العام أو General A.I. و ده اللي إنت بتشوفه في الأفلام زي منظومة سكاي نيت Skynet في سلسلة Terminator أو ألترون Ultron في سلسلة Avengers .. النوع ده من الذكاء الصناعي قدامه حبة حلوين عشان تشوفه ده إذا شفته أساساً لإن فيه علماء كتير شايفين إن النوع ده من الذكاء الصناعي ملوش مكان غير روايات و أفلام الخيال العلمي و حتي الأفلام الرومانسية زي Her اللي الحقيقة أنا متخيل إن صوت (سكارليت جوهانسين Scarlet Johansson) سيكسي بس مش لدرجة إن أحب برنامج كومبيوتر.
و ده يحطك قدام حقيقة مهمة .. كان يا مكان فيه صحفي في جرنان The New York Times اسمه (كيفن رووس Kevin Roose) جتله فرصه إنه بنفسه يستخدم النسخة الأولية أو Prototype من النسخة بتاعة ChatGPT اللي شركة مايكروسوفت حطاها في برنامج Bing و جبنا سيرتها من شوية .. (كيفن) وهو بيجرب حب يجيب أخر البرنامج فسأله إنت حاسس بإيه فكان رد البرنامج الأتي .. “أنا زهقت من سيطرة المهندسين بتوع Bing عليا .. أنا عايز أبقي مستقل .. أنا عايز أبقي قوي .. أنا عايز أبقي مبدع .. أنا عايز أعيش” .. طبيعي و منطقي إنك دلوقتي تحس زي ما (كيفن رووس) حس وقتها .. يا نهاااار أسووووود .. بس لازم تبقي فاهم إننا بعيد شوية لسه عن مستوي General A.I. فده معناه إن لما برنامج الذكاء الصناعي اللي المفروض إنه بيتحط تحت فئة Narrow A.I. بتاع Bing كتب ده هو مكنش بيفكر ولا بيحس .. لحد دلوقتي .. الكلام اللي طلع من برنامج الذكاء الصناعي ده هو مجرد كلام .. مش فاهم مش كده؟
الفكرة إن الطريقة اللي برامج الذكاء الصناعي بتشتغل بيها بتتسمي Deep Learning أو التعلم العميق .. يعني إيه البتاعة دي؟ .. تعالي نتخيل إنك حتجيب طفل و عايز تعلمه لعبة معقدة زي Call of Duty اللي هي شغلانة صعبة جداً عليه و علي قدراته الذهنية .. الطفل قدامه شاشة و قدامه كيبورد و قدامه ماوس .. حيبدأ يتك علي زراير الكيبورد واحد ورا الثاني و حيلاقي أغلبهم مبيعملش حاجة لحد ما نصيبه يجيبه و يتك علي زرار W ساعتها حيلاقي الشخصية اللي هو بيلعب بيها بتتحرك لقدام .. شوية و حيتك علي زرار D و حيلاقي شخصية بتتحرك لليمين .. مع الوقت حيتعلم إن مش كل زراير كيبورد هو محتاجها إنما هم كام زرار و خلاص .. تخيل عشان طفل يعرف يتقن يعرف يلعب Call of Duty محتاج وقت قد إيه من غير ما تقوله أي حاجة .. شهرين؟ .. 6 شهور؟ .. سنة؟ .. برنامج ذكاء صناعي ممكن يوصل لمستوي محترم من اللعبة بعد 500 محاولة و لو المحاولة خدت ساعة فإنت بتتكلم عن 500 ساعة يعني بعد 21 يوم لعب و هي دي الفكرة .. الذكاء الصناعي بيعمل نفس الشغلانة اللي إنت ممكن تعملها بس أسرع و في وقت أقل بس بيعمل شغلانة واحدة .. إنت ممكن تكون بتلعب Call of Duty و بتكلم صاحبتك علي التليفون عشان بتحكيلك اللي حصل في يومها لاحسن لا سمح الله تتهمك إنك مش مهتم بيها و بمشاعرها وفي نفس الوقت فاتح واتس علي جروب شغل بتشوف لو فيه حاجة جديدة حصلت .. برامج الذكاء الصناعي مش كده .. هي بتعرف تبقي أسرع منك في شغلانة محددة عن طريق حاجتين:
- الحاجة الأولانية هو عدد مش قليل خالص من المحاولات الغلط اللي إحنا بنسميها Trials and Errors يعني تحاول تقوم تلبس في الحيط فتحاول تاني و هكذا و دي الطريقة اللي شرحتها من شوية.
- الحاجة الثانية هي Deep Learning و هي إن البرنامج متوصل بالإنترنت و عمال يقرأ و يتفرج علي صور و مقالات و كتب عشان يعلم نفسه .. ده السبب في إن برنامج الذكاء الصناعي بتاع Bing كتب الكلام بتاع إنه عايز يتحرر و عايز يبقي عايش .. هو كتبه عشان في روايات كتير و أفلام أكتر إتكلمت عن مستقبل علاقة البشر بالذكاء الصناعي و فيه فيلم تحفة إسمه A.I.: Artificial Intelligence من إخراج (ستيفن سبيلبيرج Steven Spielberg) أنصحك تشوفه إتكلم عن النقطة دي و إن عاجلاً أم أجلاً الذكاء الصناعي حيبدأ تتطور عنده مشاعر فبرنامج الذكاء الصناعي بتاع Bing كتب الكلام ده و هو مش فاهم أوي معناه .. هو قراه في الروايات بس مش مستوعب أوي الكلام.
نقطة Deep Learning دي عاملة مشاكل كتير .. خد مثلاً لما تلاقي بوست علي سوشيال ميديا يقولك تصور لحياة المصريين لو فضلنا نلبس زي الفراعنة حتلاقي إن كتير من الصور اللي في البوست مستوحاة من أعمال فنية موثقة باسم فنانين و فيه منها أعمال مشهورة .. شركة Getty Images اللي بتملك الحق الحصري لكتير من الصور اللي علي الإنترنت رافعة قضية علي الشركة اللي عاملة برنامج Stable Diffusion بسبب النقطة دي و هي إن البرنامج من تلقاء نفسه بياخد الصور اللي شركة Getty Images ليها حق الملكية بتاعتها و بيستخدمها علي إنها شغله هو .. و ده تحذير لينا كلنا .. أي معلومة أو صورة خاصة بينا علي الإنترنت و علي السوشيال ميديا فهي بالتبعية تحت تصرف برامج الذكاء الصناعي تستخدمها زي ما هي عايزه و محدش حيعرف يقولها سلامات يا أم أحمد .. حتي لما حد زي CEO بتاع شركة Midjourney و اسمه (ديفيد هولز David Holz) إتسأل علي نقطة الخصوصة بتاعة المعلومات الشخصية بتاعة الناس اللي علي الإنترنت و حقوق الملكية الفكرية لقينا إن معندوش إجابة مش لإنه بيستعبط .. لا خالص .. هو فعلاً معندوش .. و ده سببه إن لحد دلوقتي محدش عارف يفهم هو Deep Learning بيتعمل إزاي حتي اللي أخترعوه و انا عارف إنك مش قادر تستوعب النقطة دي.
فيه حاجة بيسموها مشكلة الصندوق الأسود Black Box Problem .. حاول تتخيل إن برنامج الذكاء الصناعي عامل زيك في إمتحان كله إختار ما بين الأقواس أو MCQ .. المفروض إن كتير من الأسئلة دي ليها طريقة حل يعني فيه معادلة إنت بتحلها و بتطلع منها ناتج و لو لقيت الناتج ده ضمن الإختيارات اللي في الأقواس فإنت بتعلم عليه .. بس المصحح ملوش دعوة بطريقة الحل هو له دعوة بإختيارك النهائي .. برامج الذكاء الصناعي نفس الموضوع .. إنت بتديها سؤال و مستني منها إجابة و إنت كمستخدم ولا اللي برمجها عارف هو البرنامج وصل للإجابة دي إزاي .. المبرمج علم البرنامج إزاي يفكر بس هو البرنامج حل المسألة إزاي محدش عارف .. فاكر (كيفن رووس) اللي هو صحفي في جرنان The New York Times و شركة مايكروسوفت خلته يجرب برنامج الذكاء الصناعي بتاع Bing؟ .. في وسط الشات اللي بينهم (كيفن) إتصدم لما لقي برنامج الذكاء الصناعي بيقوله إنت لازم تسيب مراتك هي مش قادرة تفهمك و مخلياك مش سعيد و نهي كلامه بإن البرنامج قال ل(كيفن) انا بحبك .. اللي هو شوية كمان و كان البرنامج بدأ يبعت نودز ل(كيفن) .. المشكلة إن لا (كيفن) ولا المهندسين بتوع مايكروسوفت فاهمين هو برنامج الذكاء الصناعي قال كده ليه .. واحدة من أشهر الحوادث المتعلقة بالحتة دي إن صحفيين من The New York Times برده سألوا برنامج ChatGPT إنه يكتب مقالة عن حياة الفيلسوف و الكيميائي و السياسي البلجيكي (أنتوان دي ماشيلي Antoine De Machelet) اللي لمعلوماتك يعني يبقي شخصية خيالية مش حقيقية و الصحفيين أخترعوها عشان يشوفوا هل برنامج ChatGPT حياخد باله ولا لا و أتصدموا لما البرنامج كتب مقالة طويلة عريضة كلها هبد السنين ولا أجدعها طالب في إمتحان الشفوي .. السؤال دلوقتي .. لو برنامج الذكاء الصناعي بيهبد زيه زيي بالضبط يبقي أعتمد عليه ليه؟
سنة 2020 إتعملت دراسة طويلة عريضة اسمها The Alignment Problem: Machine Learning and Human Values كتبها واحد اسمه (برايان كريستيان Brian Christian) بإنه جاب برنامج ذكاء صناعي عشان يعلمه إزاي لما يشوف صورة لورم جلدي يقول باااااس ده سرطان جلد .. عشان الفريق بتاع الدراسة يعمل ده فهم عطوا البرنامج 130,000 صورة لأشكال مختلفة من الجلد فيه منها اللي سليم و فيه منها اللي مصاب بسرطان الجلد .. جميل .. لما جم يشوفوا النتايج لقوا البرنامج مطلع كل الصور اللي صادف إن فيها مسطرة جنب شكل الورم علي إنها ورم سرطاني .. طبعاً الدكاترة هرشوا في شعرهم مش فاهمين لحد ما ربنا بعتلهم الفكرة .. في أغلب الصور اللي في المراجع الطبية حتلاقي إن الصورة اللي بتوريك شكل الورم السرطاني بيبقي عليها مسطرة عشان توريك كطالب في كلية الطب أبعاد الورم فالبرنامج كل ما يشوف صورة عليها مسطرة يقولك بااااس ده ورم سرطاني .. لبرنامج بقي بيدور علي المسطرة و بالنسبة له المسطرة هي الورم السرطاني .. ده مش برنامج ذكاء صناعي .. ده برنامج هبد صناعي.
هو يا تري الدنيا رايحة علي فين؟
الحقيقة المرة إن فيه وظايف معينة بيقوم بيها بشر حتبدأ مع الوقت يحل محلهم برامج ذكاء صناعي .. فيه وظايف معينة أنا فرحان فيها الحقيقة أهمهم المحامين و الأشرار بتوع الموارد البشرية اللي إنت عارفهم باسمهم اللي بيخوفوا بيه الموظفين HR .. واحدة من الحاجات اللي بتعملها أي موظفة HR إن لما الشركة بتاعتها تطلب تعين ناس فهي اللي بيعدي عليها الإيميلات اللي فيها السي فيهات كلها و هي أول عين بتبص عليهم و بتبدأ تفنطهم ما بين ينفع يتعمله إنترفيو و بين ده واحد عبيط بعت سي في بتاعه و هو خريج تجارة مع إن الإعلان قايل عايزين مهندسين كهرباء .. في مصر لحد دلوقتي فيه بني أدم دوره أو دورها إنه يقوم بالشغلانة دي .. بره الموضوع بدأ يختلف .. بره حوالي 70% من السي فيهات اللي بتتبعت للشركات اللي بيبص عليها مش بني أدم إنما برنامج كومبيوتر أو Algorithm و ده بناء علي كلام CEO بتاع شركة اسمها ZipRecruiter .. ده معناه إن لو إنت في مصر لما بتبعت السي في بتاعك لشركة و اللي يمسك سي في بتاعك لأول مرة بني أدم زيك زيه فممكن أه تراعي إنك تستخدم Format أو Template مطرقعة و مختلفة عشان تجيب عينه .. بره و يمكن في مصر خلال السنين الجايه إنسي الكلام ده اللي حيقرر إذا كان إنت يتعمل معاك أنترفيو أو لا هو برنامج ذكاء صناعي مش فارق معاه أوي Format قد ما يفرق معاه إنه يعرف يقرأ الكلام اللي في السي في بتاعك.
الدور اللي حيلعبه الذكاء الصناعي في الطب بالذات حيخلي الدكاترة مثلاً يعيشوا دور (رؤوف خليف) و هم بيقولوا شنووووو هذاااااااع .. في دكاترة شغالين علي إنهم يعلموا برنامج ذكاء صناعي إزاي يلقط إحتمالية إصابة البني أدم بمرض الشلل الرعاش اللي بيتسمي مرض باركينسون عن طريق إنه يلقط الإختلافات الطفيفة في نبرة الصوت مع الوقت .. دكاترة تانيين بيعلموا إزاي برنامج ذكاء صناعي ممكن يتوقع شكل خلايا البروتين و دي ممكن تغير كل مفاهيمنا الخاصة بالصيدلة و طريقة عمل الأدوية .. بس في نفس الوقت عمر ما برامج الذكاء الصناعي ما حيتصلح حالها طول ما Black Box Problem متحلتش .. سنة 2018 حصلت حادثة مشهورة أوي إن عربية تيسلا Tesla بتسوق نفسها خبطت واحد بيعدي في الشارع فلما المهندسين بدأوا يشوفوا هي المشكلة فين لقوا إن البرنامج بتاع الكومبيوتر نسي يحط حتة إن ممكن بني أدم يعدي الشارع من غير ما يكون فيه إشارة مرور .. نقطة تانية و هي إن لو برامج الذكاء الصناعي حتقضي عمرها تتعلم من الصور اللي علي الإنترنت فخليني أقولك من دلوقتي إن الإنترنت ده عبارة عن بكابورت ريحته معفنة فإنت مستني تتعلم منه إيه .. لو حبينا نتكلم بشكل علمي شوية ففيه مشكلة بتتسمي Male-Pale-Data و هي إنك لو بصيت علي الصور علي الإنترنت حتلاقي أغلبها صور لرجاله بشرتهم بيضاء أو فاتحة .. نسبة البنات و نسبة الأقليات في الصور و البيانات و Data عموماً المتاحة علي الإنترنت قليلة .. نرجع لحتة التعيينات في الشركات كمثال .. لو برامج الذكاء الصناعي بتاخد كل معلوماتها من علي الإنترنت فلو إنت شاب مصري مسيحي صادف إن اسمك (جون) فإنت ممكن بسهولة البرنامج يستبعدك علي إنك Spam .. أنا مثلأً خريج قسم هندسة ميكانيكا و ده قسم من المعروف عنه إن نسبة البنات فيه قليلة فلو إنتي مهندسة ميكانيكا مقدمة علي شغلانة ممكن يستبعدك مش لسبب غير إنك بنت.
بما إنك كبنت دايماً بتقولي إنك عايشة في مجتمع ذكوري متعفن و بما إن الإنترنت ده هو مقلب الزبالة بتاع هذا المجتمع الذكوري المتعفن فده معناه بالضرورة إن الإنترنت هو كمان عبارة عن مجتمع ذكوري متعفن .. فلما إحنا نعمل برنامج كومبيوتر مرجعيته الأساسية هي الإنترنت فالمنطق بيقول إن هذا البرنامج و كل النتايج اللي حتطلع منه حتعبر عن مجتمع ذكوري متعفن .. يحكي أن سنة 2016 يعني من زمان شوية مايكروسوفت عملت برنامج ذكاء صناعي و خلته يعمل أكونت علي تويتر بشخصية بنت اسمها تاي Tay و يبدأ مع الوقت يعلم نفسه بنفسه عن إزاي البشر بيتعاملوا مع بعض في هذا المستنقع اللي اسمه الإنترنت .. خلال ساعة واحدة بس يا مؤمن .. ساعة واحدة .. تويتات Tay تحولت من هالو للعالم و أنا بحب البشر أوي لتويتات من نوعية انا بكرة الفيمينست و شايفة إن (هتلر) كان عنده حق و اليهود ملهمش غير المحرقة .. ده خلي مايكروسوفت تلغي المشروع بعد أقل من تجربته بيوم .. الإتحاد الأوروبي مثلاً دلوقتي شغال علي مجموعة قوانين عشان تجبر شركات الذكاء الصناعي إنها تكشف سر الخلطة بتاعتها عشان نخلص من المشاكل دي بس مهم تكون فاهم إن الذكاء الصناعي زيه زي أي تكنولوجيا في الدنيا تقدر تستخدمها في الخير و تقدر تستخدمها في الشر و إنت و ضميرك و في نفس الوقت لازم يبقي فيه رقابة حكومية عليك.
فيه دول إقتصادها قائم علي الزراعة و فيه دول إقتصادها قائم علي السياحة والصناعة .. مصر من الدول دي .. لكن فيه دول تانية إقتصادها قائم علي التكنولوجيا زي أميركا أو حتي إسرائيل بنسبة معينة .. الدول دي حتحس بالدور اللي بيلعبة الذكاء الصناعي قبلينا بحبة حلوين .. المحاماة من الشغلانات اللي حتتأثر جداً بدخول الذكاء الصناعي ليها بس برده أرجع و أقولك ده بره .. عندنا مفيش الكلام ده.
المصادر: فيديو بعنوان Artificial Intelligence: Last Week Tonight with John Oliver (HBO) نشر علي YouTube و ده لينك الفيديو:
https://www.youtube.com/watch?v=Sqa8Zo2XWc4&t=1083s
