لينك التسجيل الصوتي علي ساوند كلاود:
https://on.soundcloud.com/rznhQ
و أنا في الكلية كان عندي إقتناع لسه جوايا لحد دلوقتي إن لو فيه حاجة إتحطت في منهج طالب كلية هندسة في مصر فخليك عارف إن المعلومة دي متأخرة خمسين سنة عن أحدث تكنولوجيا موجودة في السوق وقتها .. يعني مثلاً .. في الوقت اللي إحنا كنا بنفني فيه سنين بنتعلم إزاي محطة إنتاج الكهرباء بتحرق فحم و غاز طبيعي عشان تولد كهرباء كانت تكنولوجيا الطاقة المتجددة موجودة في كل حتة بره ولا كأنها أغنية جديدة لسه منزلها (ويجز) الناس كلها عماله تسمعها .. نفس الكلام علي العربيات .. أنا دفعة 2012 بس درست العربيات اللي بتشتغل بالكارباراتير اللي هي أساساً تكنولوجيا مكانها المتحف في الوقت اللي دلوقتي الدنيا رايحة في سكة العربيات اللي بالكهرباء و ده اللي أنا عايز أتكلم عنه شوية النهاردة.
مهم بالنسبة لي إنك تبقي عارف درس مهم أوي في الحياة .. الدنيا زي شريط الكاسيت ليها وشين .. أي حاجة في الدنيا ليها وجهتين نظر ولازم يبقي عندك الحكمة الكافية إنك تبقي فاهم ده و تسمح لنفسك إنك تستوعب وجهتي النظر عشان تعرف تكون رأي صح .. في حتة العربيات اللي بالكهرباء دي بالذات إنت برده عندك وجهتين نظر .. وجهة النظر الوردية إن إنتقال صناعة السيارات من تكنولوجيا محركات الإحتراق الداخلي للمحركات الكهربية هي أحسن حاجة حصلت في الدنيا بعد الرز بلبن بالأيس كريم .. وجهة نظر تانية إن التغيير ده زيه زي الرز بلبن برده بس الفرن اللي هو ملوش غير مكان واحد بس .. مزبلة التاريخ.
وجهة النظر الأولانية .. ليه التغيير ده حلو أوي يا ولاد؟
عايزك تبقي عارف إن كلامي حيركز علي صناعة السيارات بس و كمان عايزك تعرف إن التغيير ده حرفياً حيغير شكل العالم من حوليك بس إنت عايش في مصر ود معناه إن لسه قدامك شوية لحد ما تلاقي التغيير بيفجعك في وشك .. عايزك تعرف إن دولة عايشة في اللالاند زي النرويج قالت إن لما تيجي سنة 2025 حتبقي كل العربيات اللي ماشية في شوارع النرويج هي عربيات شغالة بالكهرباء .. طب دي النرويج ناس عايشة في الساقعة فوق عند القطب الشمالي ملناش دعوة بيها .. جت بريطانيا قالتلك إن اللي عملته النرويج أنا حعمله بس علي سنة 2030 .. جت بعد كده الدول الأعضاء في الإتحاد الأوروبي كلهم قالوا طب علينا الطلاق ما يحصل إني يبقي شوارعنا فيها عربية بموتور بتطلع دخان و قالوا إن لما تيجي سنة 2035 و عليكم خير كل العربيات اللي ماشية في شوارع أوروبا كلها حتبقي عربيات بالكهرباء .. أنا بكلمك عن تغيير شامل في صناعة السيارات في أهم حتة في العالم بتصنع سيارات خلال ال13 سنة الجايين.
فيه شركات شافت ده إنه فرصة يعملوا فلوس حلوة و من ضمن الشركات دي فولكس فاجن اللي في 2019 بدأت برنامج وقتها إتقال عليها مجنون إنها تعيد تدريب 8,500 بني أدم شغالين في مصنعها في ألمانيا عشان بدل ما خطوط الإنتاج بتعمل عربيات بتشتغل بمحرك إحتراق داخلي بقت بتعمل عربيات بتشتغل بالكهرباء .. تاني .. الفكرة إن الشركة كان ماسكها ناس عندهم بُعد النظر الكافي إنهم يشوفوا التغيير علي إنه فرصة نعمل قرشين .. خلال سنة 2019 عدد الألمان اللي قرروا يشتروا عربيات بتشتغل بالكهرباء كانوا ضعف اللي خدوا الخطوة دي في 2018 .. جري الشريط لسنة 2020 و الرقم زاد ضعفين كمان .. صحيح إن عدد الالمان اللي عندهم عربيات حوالي 48 مليون بني أدم و خدامك أنا و العربية إن ال365,000 بني أدم اللي قرروا يبقي عندهم عربيات بالكهرباء دول ولا حاجة من السوق بس هي الفكرة إن ده حصل خلال أربع سنين بس .. في أول أربع شهور من سنة 2021 عدد الألمان اللي قرروا يشتروا عربيات بالكهرباء كان قد العدد اللي خد نفس الخطوة في سنة 2020 كلها.
فولكس فاجن عارفه إنها أكبر شركة سيارات في ألمانيا بس في حتة العربيات اللي بالكهرباء فهي متأخرة حبة حلوين عن شركة تيسلا Tesla و ده الهدف اللي الشركة حطته لنفسها إنها عايزة تبقي النامبر وان في البيزنس ده و عشان تبقي النامبر وان فهم لقوا نفسهم محتاجين يعملوا حاجتين: أول حاجة إنك تنتج كتير و تبيع كتير و ثاني حاجة يبقي عندك العمالة الكافية اللي شاطرة في شغلها عشان تحقق ده .. كان ممكن فولكس فاجن تمشي نسبة مش قليلة من موظفيها و تعين بدالهم ناس بتفهم في حتة العربيات اللي بالكهرباء بس هم معملوش كده .. هم خدوا جزء محترم من تحويشة العمر اللي هم عملوها علي مدار السنين اللي فاتت عشان يعيدوا تدريب كل موظفيهم .. الفني اللي كان زمان بيركب الشاكمان بقي بيتقاله ركب البطارية دي .. ده خلق حالة من الولاء إنت لا تتخيلها بين الموظف و شركته .. الموظف بقي بيقول لنفسه أنا مستعد أعمل أي حاجة عشان خاطر الشركة لإن الشركة كان ممكن تاخد القرار السهل و تمشيني بس هي قالتله إحنا كتفنا في كتف بعض و حنعدي التغيير ده سوا .. لكن .. و زي ما حد قبل كده قالي إن مشكلة كلمة لكن إنها بتخليك ترمي أي حاجة إتقالت قبلها من الشباك فمش كل الشركات معاها فلوس فولكس فاجن .. فيه الناس اللي علي الله حكايتها.
وجهة النظر الثانية .. ليه التغيير ده خراب بيوت مستعجل؟
صناعة السيارات في أوروبا بالذات و اللي شغال فيها حوالي 3.7 مليون بني أدم بقوا دلوقتي في وضع زي الزفت الصراحة .. تكنولوجيا الروبوتات ملت المصانع فبدل ما الشغلانة كانت محتاجة زمان 10 عمال عشان تتعمل فدلوقتي إنت محتاج بني أدم واحد بس يشرف علي شوية روبوتات و شكرا علي كده .. فكرة كمان إن كل مواطن أوروبي بقي تقريباً ناشط بيئي يعني في الوقت اللي إحنا هنا بنرمي زبالة في الشارع عادي إنت ممكن تلاقي مواطن ألماني ميرضاش يركب عربيته عشان العادم بتاعها بيبوظ البيئة .. المشكلة اللي ممكن إنت متبقاش حاسس بيها أوي إن صناعة السيارات في العالم كله مش بس قايمة علي الشركات اللي بتصنع السيارات .. صناعة السيارات مش بس تويوتا و كيا و فولكس فاجن و بيجو .. صناعة السيارات قايمة علي أكتر من 10,000 شركة علي مستوي العالم منهم 1,200 شركة في ألمانيا بس بيصنعوا قطع الغيار بتاعة السيارات .. فاكر ال3.7 مليون بني أدم اللي شغالين في بيزنس صناعة السيارات في دول الإتحاد الأوروبي اللي قلت رقمهم من شوية؟ أهم دول مقسومين حتتين: 1.2 مليون شغالين في شركات تصنيع السيارات و 1.7 شغالين في شركات تصنيع قطع الغيار و الناس دي هم اللي حيترموا في الشارع بسبب التغيير اللي بيقلب ملامح صناعة السيارات.
الوضع في ألمانيا بالذات صعب .. بناء علي كلام (ولفجانج ليمب Wolfgang Lemb) رئيس النقابة التجارية في ألمانيا فالمعلومة اللي يمكن متبقاش غريبة علي ودنك إن السيارات هي أكتر حاجة بتصدرها ألمانيا .. مبيعات شركات السيارات الألمانية كل سنة ممكن توصل 300 مليار دولار فده معناه إن صناعة بتجيب فلوس حلوة زي دي فطبيعي إن ناس كتير تكون بتشتغل فيها .. حوالي 5% من القوة العاملة في ألمانيا شغالة بشكل أو بأخر في صناعة السيارات منهم 200,000 وظيفة مٌعرضة إنها تنتهي خلال الكام سنة الجايين .. لسه النكد مخلصش .. بناء علي تقرير من شركة Boston Consulting Group فإنت بتتكلم عن 42% من القوة العاملة في صناعة السيارات في أوروبا مٌعرضة إنها تترفد من شغلها من دلوقتي و لحد سنة 2030 اللي هو إنت بتتكلم عن حوالي 280,000 بني أدم.
طب و الحل؟ .. هنا بقي يبان الفرق بين الشركات اللي معاها فلوس و موارد تخليها تتعايش و تغير جلدها مع التغيير زي فولكس فاجن و بين الشركات اللي علي باب الله .. خد عندك شركة زي ZF Friedrichshafen .. دي واحدة من أهم الشركات علي مستوي العالم في بيزنس تصنيع قطاع غيار السيارات و الناس دول متخصصين في قطع غيار الفتيس .. المهم إن بسبب الظروف اللي زي الزفت اللي كلمتك عنها و اللي لما تزود عليهم تأثير جائحة فيروس كورونا فالناس دي حبت تقلد فولكس فاجن بس معرفوش .. مش كل الناس معاها فلوس .. ده خلي مجلس الإدارة ياخد قرارين عكس بعض تقريباً .. القرار الأول إنهم مشوا 15,000 موظف عشان يوفروا مرتباتهم و القرار الثاني إن الشركة قررت تشتغل في حتة تانية غير تصنيع الفتيس بتاع السيارات و راحوا لحتة تصنيع الفتيس بتاع تربينة الهواء Wind Turbine اللي بتولد كهرباء بطاقة الرياح و ده خلاهم يعملوا زي فولكس فاجن و يبدأوا برنامج تدريبي ل30,000 موظف عشان يتعلموا هو يعني إيه فتيس تربينة هواء .. فيه شركات تانية معرفتش تتكيف مع التغيير ده .. شركة زي Selzer و دي شركة بتصنع قطع الغيار بتاعة مواتير الإحتراق الداخلي و شغالة بقالها أكتر من 100 سنة .. بداية من 2018 بدأ الفصل الحزين في قصة الشركة لما مجلس الإدارة صحي علي معلومة إن نص العمالة في الشركة معادش ليها لازمة.
طب هنا في مصر ده معناه إيه .. معناه إنك بداية من 2030 و إنت طالع حتبدأ تشوف بنفسك إن قطع الغيار بتاعة عربيتك بقت مش موجودة في السوق .. ولو لقيتها حتبقي غالية .. ليه؟ .. عشان إحنا في مصر حنبقي عايزين بضاعة مبقاش ليها وجود خلاص .. المستقبل للعربيات اللي بالكهرباء .. إحنا في مصر محتاجين شغل كتير أوي عشان نلحق القطر اللي طلع من المحطة ده .. محتاجين يبقي عندنا بنية تحتية كويسة لمحطات شحن بالكهرباء .. محتاجين فنيين و مهندسين بيفهموا في أعطال و صيانة العربيات دي .. محتاجين نقول للناس إن خلاص كده محرك الإحتراق الداخلي بقي في العناية المركزة .. بس صدقني لو قلتلك إن أول خطوة لو حصلت إبدأ إعرف إن العربيات اللي بالكهرباء بقت واقع في البلد دي إنك صحيت الصبح لقيتها إتحطت في منهج كليات الهندسة.
المصدر:
- مقالة بعنوان Germany is bracing for a major electric vehicle shock نشرت في موقع Wired و ده لينك المقالة الأصلية:
https://www.wired.co.uk/article/germany-electric-vehicles-europe
