خلينا نبقي متفقين إن المهندسين وأنا منهم بيتقال علينا شايفين نفسنا أوي .. إحنا مش بنسيب مناسبة غير لما نفكر الناس إننا مهندسين .. ودي الحقيقة خصلة غير إنها مادة خصبة للتريقة إلا إنها جاية من حاجة فينا مش حتلاقيها عند ناس كتير وهي إننا بنركز في التفاصيل الصغيرة اللي ناس كتير ممكن متاخدتش بالها منها وتعالي مثلاً ناخد مثال علي ده موضوع حتلاقي ناس كتير بتجيب سيرته في الشارع وهو إزاي إحنا كبلد المفروض إننا نبص شوية للمستقبل ونبدأ نعتمد بشكل أكبر علي الحاجة اللي بيسموها الطاقة المتجددة أو Renewable Energy اللي هو ببساطة عشان ننتج كهرباء مش لازم نحرق حاجة .. إحنا محتاجين ندور ونسعي ورا إننا ننتج كهرباء بطرق تانية زي الطاقة الشمسية وطاقة الرياح .. إحنا محتاجين نفتح الباب شوية للعربيات اللي بتمشي بالكهرباء إنها تبدأ تخش السوق .. محتاجين في مشاريع كتير من اللي بتتبني نبدأ نعتمد علي سخانات المياه الشمسية بدل من سخانات المياه الكهرباء أو حتي اللي بتشتغل بالغاز الطبيعي .. كل دي أفكار جميلة جايه من دماغ ناس بتفكر في المستقبل بس عشان إحنا مهندسين بنركز في الحاجات الصغيرة فأول ما حد يبدأ يفتح بقه قدامنا في الموضوع ده بيبقي هاين علينا ندور علي أقرب طوبة نحدفه بيها لإن الموضوع مش بس إنك تجيب خلية شمسية تركبها وهوبا بقي عندك كهرباء جاية بالطاقة الشمسية .. الموضوع أعقد من كده سيكا والتعقيد سببه كلمتين .. المواد الخام.
من أول سلك الكهرباء اللي إنت بتأسس بيه كهرباء شقتك لحد موبايلك اللي في جيبك .. من أول بطارية اللاب توب بتاعك لحد بطارية عربيتك التيسلا Tesla ده لو إنت من الناس بتوع Egypt مش بتوع مصر .. عشان كل ده يتعمل فإنت بتحتاج سلسلة طويلة عريضة من المعادن اللي كنت زمان بتسمع أساميهم في حصة العلوم في إعدادي .. معادن زي النحاس والكوبالت والليثيوم والنيكل .. خليني بس أحطك قدام إحصائية حتنور لمبة في دماغك .. بناء علي أرقام وكالة الطاقة الدولية International Energy Agency أو IEA فإنت عشان تبني محطة كهرباء بالرياح زي مثلاً الزعفرانة في مصر اللي علي طريق العين السخنة دي فإنت بتحتاج 9 أضعاف كمية المواد الخام خصوصاً من المعادن مقارنة بمحطة إنتاج كهرباء بتشتغل بالمازوت أو الفحم .. ده معناه إيه؟ .. زي ما الفنان (سمير غانم) الله يرحمه قال في مسرحية المتزوجون جيت ألم البنطلون الجاكتة ضربت .. إنت صحيح عايز توقف بناء محطات إنتاج الكهرباء اللي بتحرق مازوت وفحم وغاز طبيعي بس قصاد ده بنيت محطات إنتاج كهرباء بالطاقة المتجددة بتحتاج أضعاف كميات المعادن اللي عشان تنقب عنها وتطلعها من باطن الأرض بتخرب بيت البيئة اللي هو كان ياريتك سبت محطات الكهرباء بالفحم يارجل.
خد مثلاً العربيات اللي شغاله بالكهرباء .. المنطق إن العربيات دي ياريت نكتر منها في شوارعنا عشان نقلل شوية من معدلات التلوث بتاعة عوادم العربيات اللي بتشتغل بمحركات إحتراق داخلي .. تلاقي إن القلب النابض لأي عربية بتشتغل بالكهرباء هو البطارية بتاعتها اللي بيتقال عليها بطارية Lithium-Ion وأكتر موديل بيتباع منها في السوق إسمه NMC111 .. المهم إن البطارية دي عشان تتصنع فإنت محتاج ليها 16 كيلوجرام ليثيوم و46 كيلوجرام نيكل وزيهم كوبالت وعشان خاطري عايزين كمان 43 كيلوجرام منجنيز .. الحقيقة إن الكلام في موضوع المواد الخام ده وإزاي إحنا في سعينا ورا الطاقة المتجددة حضرنا عفريت معرفناش نصرفه اللي هو التعدين أو Mining محتاج إننا نسال سؤالين مهمين لازم نطلع بإجابة واضحة وصريحة ليهم:
- السؤال الأولاني هو يا تري إيه الثمن البيئي اللي بيتدفع من إننا سبنا نفسنا لشركات التعدين تدوس جامد في شغلها في مقابل إنها توفرلنا المعادن اللي إحنا محتاجينها في ما يسمي كفاح البشرية لإنقاذ كوكب الأرض؟
- السؤال الثاني وده مهم جداً وهو الثمن الأخلاقي اللي بيتدفع المتمثل في حياة الناس اللي بتتدمر وبتضيع بسبب توحش شركات التعدين في سعيها إنها تملا جيوبها أرباح.
الثمن البيئي .. أراك تخرب في بيئة الست الوالدة:
عشان نفهم الحتة دي تعالي ناخد سوا واحد من أكتر المعادن اللي الناس بتوع الكهرباء بيموتوا فيها .. النحاس Copper .. معلومة كده علي الماشي إن أكتر دولة بتنتج نحاس في العالم هي تشيلي اللي لوحدها بتطلع 27% من النحاس اللي متاح في السوق .. أكتر بلد بتستهلك نحاس هي أميركا اللي صادف إن ترتيبها في قائمة الدول المنتجة للنحاس هو السادس فده معناه إن أميركا بتحرق في نحاس زي ما صحابك بيحرقوا في سجاير وهم بيتفرجوا علي الماتش في القهوة .. عشان النحاس يبقي في صورة السلك اللي إنت بتشوفه بيتباع في السوق وبتركبه عندك في شقتك وإنت بتأسس شغل الكهرباء فهو بيمر برحلة طويلة شوية بتبدأ بإن بيتقال إن الحتة دي فيها منجم نحاس .. اللي بيحصل إن فيه ناس بتاخد فلوس عشان تحفر في الأرض تطلعك حتة معدن تقيلة كده بيتقال عليها إن ده Ore أو المفروض إنها نحاس بس مش لوحده وحوليه شوائب كتير .. وإنت في المنجم بتبدأ المرحلة الأولانية من تنقية النحاس إنك بتحميه في بانيو مليان مواد كيماوية خطرة زي السيانيد اللي هو مادة سامة أو الزئبق اللي هو برده مادة سامة أو الزرنيخ اللي هو كمان مادة سامة عشان تنقيه شوية وبعد ما النحاس يطلع من البانيو بنحميه في مياه .. بعد كده النحاس المستحمي ده بيروح مصنع عشان يتعمله حاجة بيسموها Smelting ودي بمنتهي البساطة بتحرق حتة المعدن دي لحد ما يطلع ليها صحاب وميبقاش فاضل فيها غير نحاس نقي.
عد بقي معايا إنت خربت البيئة إزاي .. واحد إنت عشان تحفر أصلاً حرقت بنزين في معدات بس فكك من ده مش حنركز في دي .. دلوقتي إنت طلعت النحاس اللي عشان تنقيه حميته في بانيو فيه مواد كيماوية خطرة وبعد ما نقيته المواد دي معادش ليها فايدة واللي عشان تخلص منها بتدفنها تحت الأرض في خزانات بيسموها Tailings عادة يعني ما اللحامات بتاعتها مش بتكون أحسن حاجة في الدنيا وفي حالات كتير حصلت المواد الكيماوية الخطرة دي بتتسرب لباطن الأرض .. مصيبة رقم واحد .. بعد كده فرتكتلك كام ألف متر مكعب مياه عشان تنظف النحاس ودي مصيبة رقم إتنين .. دلوقتي المواد الكيماوية الخطرة دي لما بتتسرب لباطن الأرض أو بتوصل للمياه الجوفية أو بتترمي في أقرب نهر بتلوثه وبتبقي مصيبة سودا بتقضي علي أي مستقبل للحياة في الحتة اللي حصل فيها التسريب والمشكلة الأكبر إن شركات التعدين بتبقي عارفه كويس أوي إزاي عقود المشاريع تتكتب بشكل مستفز عشان متتحملش هي أي مسئولية عن التسريبات اللي ممكن تحصل .. اللي منكوا بيحب الأفلام الأجنبي ياريت تتفرجوا علي فيلم Erin Brockovich اللي بتجسد فيه الممثلة (جوليا روبيرتس Julia Roberts) شخصية المحامية (إيرين بروكوفيتش) اللي دافعت عن الاف الضحايا من التسريبات الكيماوية لشركة تعدين وحضر وإنت بتتفرج مناديل كتير عشان العياط وكده.
تاني خدامك إن التعدين نفسه كصناعة هو مش من الصناعات اللي بتستهلك مياه كتير يعني مثلاً أميركا اللي هي أكتر بلد بتنتج معادن علي مستوي العالم لو جيت تحسب كم المياه اللي هم بيستهلكوها في قطاع التعدين فهي متجيش 1% من إجمالي الإستهلاك القومي الأميريكي ومش كده وبس .. التعدين كصناعة برده مش فارق معاه مدي نقاء المياه ومش فارق معاهم إنت بتستخدم مياه عذبة أو مالحة وأرجع أديلك مثال بأميركا اللي 47% من إجمالي المياه اللي الأمريكان بيستهلكوها في التعدين أساساً مياه مالحة بس هي الفكرة إن المياه دي بمجرد ما أستخدمتها هي إتلوثت خلاص وعشان تخلص منها يا بترميها تاني للمصدر اللي إنت خدتها منه يا بترميها في الأرض وفي كل الحالات إنت المشكلة إنك بتلوث المكان اللي إنت شغال فيه اللي هو لفي بينا يا دنيا.
الثمن الأخلاقي .. البخيل وأنا:
تعالي ناخد بلد غلبانة وشعبها أغلب زي جمهورية الكونغو الديموقراطية .. دي لا جمهورية ولا هي ديموقراطية .. دي بلد أفريقية فقيرة ربنا عطالها موارد إقتصادية جرت ريق الإمبراطوريات الإستعمارية اللي لحد دلوقتي بتمص دمها .. الكونغو هي أكبر منتج للكوبالت في العالم والكوبالت لمن لا يعلم هو المادة الخام اللي بتدخل في تصنيع بطاريات الليثيوم أيون Lithium-Ion اللي حتلاقيها حوليك في كل حاجة ماشية بالكهرباء من اللابتوب للموبايل للعربيات اللي بالكهرباء .. وخليني أقولهالك علي بلاطة مفيش شركة تنقيب عن الكوبالت في أفريقيا كلها متقالش عليها إنها متهمة بعمالة الأطفال وبتعتبر اللي بيشتغلوا في المناجم دي حرفياً عبيد ملهمش قيمة رغم إن بحسبة ورقة وقلم وألة حاسبة العمال دول بيأكلوا شركات التعدين الشهد والأرقام لوحدها الحقيقة مرعبة .. سنة 2020 علي سبيل المثال وفي الوقت اللي العالم كله كان بيتداس علي وشه بسبب جائحة فيروس كورونا والناس قاعدة في بيوتها وشركات كتير قفلت أبوابها تلاقي إن أكبر 40 شركة في مجال التعدين علي مستوي العالم لما تيجي تحسب أرباحهم في السنة السودا دي حتلاقيها 544 مليار دولار .. مش دي القضية .. القضية إن الرقم ده أعلي ب4% من أرباح الشركات دي سنة 2019.
التعدين في الأخر هو بيزنس وأي بيزنس في الدنيا عايز يجيب فلوس أيا كانت العواقب .. خد عندك بلد تانية زي الجابون مثلاً .. دي بلد إنت في مصر مش بتسمع إسمها غير لما منتخبنا يلاعبها في أمم أفريقيا أو في تصفيات كأس العالم وغير كده إنت كمواطن كحيان الجابون مش بتشغل حيز كبير من تفكيرك .. المهم إن الجابون ربنا عطاها إحتياطي حلو جداً من معدن الحديد اللي عشان شركات التعدين تطلعه بقت بتتعامل مع الغابات الأستوائية زي ما إنت بتتعامل مع دقنك لما تحلقها كده بالضبط اللي هو إنت عايز تقولهم مش غابات أبوكوا هي.
اللي إنت محتاج تفهمه إن مشاريع التعدين مش بتكون مشاريع باتنين جنيه .. دي مشاريع بتكون بمليارات وبتسحب وقت وعمالة ومصاريف وبتعمل مشاكل ما يعلم بيها إلا ربنا وعشان كده غالباً المشاريع دي بيكون عليها العين .. المشروع الواحد بيكون حصة محترمة من الناتج الوطني الإجمالي GDP بتاع أي بلد وللناس اللي مش عارفه إيه هو GDP فده حضرتك لو جمعت كل الفلوس اللي بتخش البلد أول كل شهر اللي تقدر تسميه مجازاً يعني مصروف البيت فده بيحطك قدام كذا خازوق كل ما تيجي سيرة مشاريع التعدين دي بالذات:
- الخازوق الأولاني إن مع الطلب اللي عمال يزيد علي المعادن زي ما حكينا في المقدمة مع هوجة الطاقة المتجددة اللي عايشها العالم اليومين دول فإنت فيه ناس كتير معاها فلوس عايزه تحط فلوسها في مشاريع تعدين عشان تستثمرها وزي ما كلنا عارفين إذا حضرت الفلوس إترمت الأخلاق من الشباك.
- الخازوق الثاني إن كتير من الإحتياطيات المحترمة من المعادن لاجل الصدف يعني موجودة في دول علي الله حكايتها في أفريقيا وأسيا وأميركا الجنوبية والدول دي عشان هي علي الله حكايتها فمعندهاش المؤسسات الحكومية اللي واقفة علي رجلها اللي تقدر تحارب عشان مصلحة شعوبها قصاد جشع الخازوق الأولاني .. عادة اللي بيحصل إن الناس اللي معاها فلوس بتكرمش خمسيناية للناس اللي قاعدة علي الكراسي عشان ينهبوا ثروات البلد ويطلع أهل البلد الغلابة من المولد بلا حمص.
- الخازوق الثالث بيتمثل في لحظة لما الشعب الغلبان يفوق ويقرر إنه يضرب كرسي في الكلوب والخازوق ده عشان مينفعش يتجاب سيرته كده زي ما هو في تقارير الأرباح بتاعة الشركات فهم بيسموه إسم سيكسي أوي اللي هو المخاطرة السياسية Political Risk اللي هي إحتمالية إن أكل مال اليتيم يفرقع في وش شركات التعدين الكبيرة .. ومش بس كده .. نفترض مثلاً إن شركة تعدين كبيرة راحت بلد زي الكونغو وقت ما كان ماسكها حكومة حرامية .. هوبا قامت ثورة .. هوبا جت حكومة شعبية .. هوبا الحكومة مسكت في خناق الشركة واللي عشان ماضية عقد والحكومة الجديدة مش حتقدر تدفع الشرط الجزائي عشان تطرد الشركة من البلد فبتلجأ إنها تكفرها في عيشتها وبتقرر تفرض عليها ضرائب عالية.
أنا بس حبيتك تفهم إن فيه ثمن بيتدفع قصاد إن العالم يقرر يجري في سكة الطاقة المتجددة وإن صحيح إنقاذ كوكب الأرض وإزاي محركات الإحتراق الداخلي دي بقت دقة قديمة ولازم نبدلها بتكنولوجيات صديقة للبيئة هو هدف سامي ونبيل بس في نفس الوقت لازم تفهم إن فيه ضحايا بتروح في داهية وملهمش ذنب غير إن البيزنس ميعرفش يا أما أرحميني .. إنها الرأسمالية العفنة يا سادة.
المصادر:
- مقالة بعنوان Mining is necessary for the green transition. Here’s why experts say we need to do it better نشرت في موقع وكالة PBS وده لينك المقالة الأصلية:
https://www.pbs.org/newshour/science/mining-is-necessary-for-the-green-transition-heres-why-experts-say-we-need-to-do-it-better - مقالة بعنوان The Environmental Problems Caused by Mining نشرت في موقع Earth.org وده لينك المقالة الأصلية:
https://earth.org/environmental-problems-caused-by-mining/ - مقالة بعنوان The Political Risks of Mining نشرت في موقع Risk Assessment وده لينك المقالة الأصلية:
https://www.rmmagazine.com/articles/article/2012/04/01/-The-Political-Risks-of-Mining-
