دي مقالات صغيره قصيره مش حتاخد منك وقت في قراءتها بس حتتعلم من كل مقاله فيهم معلومه جديده
بناء علي كلام شركة متخصصة في تحليل البيزنس إسمها Sensor Tower فالApplication بتاع Shein بقي أكتر App بيتعمله Download في أميركا و يمكن أكتر حتي من Amazon و ده لوحده مذهل لإن Amazon بتبيع كل حاجة بس Shein بتبيع هدوم بس.
هي طيارة تحسسك بإنها شبه الكيا السيراتو .. طيارة بتشيل عساكر و صواريخ و مدافع رشاشة .. هي محندقة و صغيرة فبتقدر تناور و تخمس في الشوارع ولا الموتوسيكلات .. اللي منكوا شاف فيلم Black Hawk Down و اللي بيحكي القصة الحقيقة لمعركة مقديشيو اللي حصلت سنة 1993 حيشوفها و الطيارين الأمريكان حرفياً بيعملوا بيها ريفتات في الشوارع.
رغم كل ده الدبابة T-90M إتداس علي وشها برده في أوكرانيا .. مش بس بسبب الخساير اللي إتعرضتلها إنما كمان الخبر اللي طلع إن القوات الأوكرانية عرفت تأسر دبابة منها .. السؤال دلوقتي هو ليه؟ .. هل المشكلة عامة إن الصواريخ المضادة للدبابات خلاص حتخلي السلاح ده ملوش لازمة؟ .. ولا المشكلة خاصة بس بالتصميم الروسي للدبابات؟
تيمور الشرقية عايزه تستغل إنها بتتصنف علي إنها بلد ديموقراطية .. بلد مفيهاش طال عمره .. فهي مؤهلة إنها لو عرفت تلاقي زبون يشتري منها الغاز الطبيعي بتاعها إنها تعمل اللي النرويج عملته .. المشكلة إن الزبون اللي كل شوية يخبط علي بابهم هو الصين و زي ما كلنا عارفين مفيش حد بيعمل بيزنس مع الصين و ربنا بيكرمه .. أبداً.
بالورقة و القلم معلومة إن نهر الأمازون دي معليهوش كباري المفروض تخليك تهرش في شعرك و تشك في كلامي .. إنت بتتكلم عن تاني أطول نهر في العالم .. ده نهر فيه أكبر كمية مياه وسط كل أنهار الأرض .. ده نهر بيعدي علي 3 دول اللي هم بيرو و كولومبيا و البرازيل و مفيش ولا دولة فيهم فكرت تعمل عليه كوبري يتيم .. ده نهر عايش علي ميته 30 مليون بني أدم .. إزاي نهر زي ده مفيهوش كباري.
من ضمن الأحداث اللي حصلت في الدنيا و حيكون ليها تأثير كبير علينا و إحنا مش داريانين هو إن الأمريكان و أخص بالذكر جدو (جو بايدن) إتهور و مضي علي قانون إسمه قانون تخفيض التضخم Inflation Reduction Act أو IRA و اللي يبان من إسمه إنه قانون معمول عشان يقلل شوية من أسعار الحاجة في السوق بس لما تيجي تقراه تكتشف إن القانون ده ملوش علاقة من قريب ولا من بعيد بالأسعار.
لو صدقت كلام الأوكرانيين فهم من فبراير 2022 و ده الشهر اللي بدأ فيه الغزو الروسي لأرضهم و لحد مايو فهم قدروا يغتالوا 12 جنرال روسي .. إزاي عملوا ده؟ .. هم إكتشفوا إن لما شبكة الإتصالات العسكرية الروسية بتقع فالعساكر الروس بيستخدموا موبايلاتهم عشان يتصلوا ببعض .. طب إيه المشكلة؟
في الأخر عايزك تعرف 3 حاجات .. المواد الأربعة دول ملهمش بدايل .. البشر حيفضلوا يستهلكوا فيهم بكميات حتفضل تزيد مع الوقت .. المواد الأربعة عشان تنتجهم إنت بتحرق كمية بنزين إنت ممكن متبقاش قادر تتخيلها.
فنلندا دي بلد فوق خالص بينها و بين القطب الشمالي فرده كعب .. هي بلد ضمن الدول الإسكندنافية و حتي علمها شبههم .. أبيض بصليب لونه أزرق .. بلد عايش فيها 5.5 مليون بني أدم فهي بلد إلي حد ما صغيرة بس ربنا إبتلاها بحدود علي إمتداد 1333 كيلومتر مع روسيا و صدقني لو قلتلك إن تاريخ العلاقة بين روسيا و بين فلنلندا يوريك إنها علاقة توكسيك.
(بوتين) بيعتبر مشروع ROSS ده من المشاريع المميزة في فترة حكمه .. هو عايز الناس تفضل فاكراله إنه هو الرجل اللي طلع بره روسيا بره مشروع محطة الفضاء الدولية عشان ترجع تاني روسيا ليها مشروع فضائي مستقل زي ما كان ليها محطة الفضاء مير أيام الإتحاد السوفيتي الله يمسيه بالخير .. بس ده ميمنعش إن Deadline أو معاد التسليم بتاع 2030 ده مش منطقي.
الرئيس الأميريكي الجديد (جو بايدن) واحد من الحاجات اللي قال إنه حيشتغل عليها إنه يرجع أميركا تاني للإتفاق النووي مع إيران و ده عطي إسرائيل الفرصة إنها تدوس بنزين في تعاونها مع الخلايجة .. هم باعوا للخلايجة فكرة إن محدش خايف علي مصلحتكوا قدي .. زي ما بنقول المتغطي بأميركا عريان بس اللي متكلفت بإسرائيل متدفي.
من ستين سنة و في ليلة من ليالي الحرب الباردة بين الغرب و الإتحاد السوفيتي تحطمت قاذفة طراز بي-52 فوق قرية جولدزبورو شايلة قنبلتين نوويتين عشان تسبب حالة من الذعر مشفتهاش أميركا من سنين.
الدرون Drone40 دي ممكن تركبلها كذا حاجة .. ممكن تركبها كاميرات HD تصورلك ميدان المعركة كله و إنت كعسكري يبقي معاك تابليت تتفرج علي هو إيه اللي بيحصل حوليك .. ممكن يتركب عليها عبوة ناسفة صغيرة .. ممكن يتركب عليها متفجرات خارقة للدروع .. ممكن تركب عليها جهاز تشويش علي الرادار .. ممكن تركب عليها شعاع ليزر عشان ينشن علي هدف ما لمجرد إن طيارة في الجو تضربه.
كان يا مكان في موسم 2009-2010 جري الشريط لماتش الذهاب و العودة من دور ال16 لبطولة التشامبيونز لييج و القرعة توقع مانشستر يونايتد قصاد إيه سي ميلان .. ماتش الذهاب كان في إيطاليا علي ملعب السان سيرو و قبل الماتش بيحكي (بارك جي سونج) إن السير (أليكس) قاله إنت وظيفتك في الماتش ده إنك متلمسش الكورة و متمررش الكورة لحد .. وظيفتك في الماتش ده هي إنك تفضل لازق في (أندريا بيرلو).
يقوم الروس عاملين إيه بقي؟ .. واخدين مصر محلل .. يوم 24 يوليو 2022 فيه سفينة إسمها كريستيد The Crested شايلة حمولة 700,000 برميل بترول من روسيا جت ميناء الحمرا علي البحر المتوسط و نزلت حمولتها .. بعدها بكام ساعة جت سفينة تانية إسمها كريس The Cress كانت قاعدة في الميناء بقالها كام يوم شالت كل الحمولة دي كلها و إتحركت يوم 28 يوليو 2022 علي ميناء العين السخنة علي البحر الأحمر.
أي مبني في الدنيا بيستهلك كمية طاقة .. لو إنت ساكن في عمارة مثلاً و عايز تحسب هي بتستهلك كهرباء قد إيه إنت بتجمع حمل التكييفات بتاع الشقق كلها و حمل الأجهزة الكهربية من تليفيزيونات و تلاجات و كماان طلمبات المياه اللي بترفع المياه للأدوار العليا .. بتجمع كل ده علي بعضه و بيطلع عندك حمل الكهرباء للمبني .. المباني أنواع .. لو مستشفي غير مبني سكني غير مبني إداري و طبعاً غير الفنادق.