سياسه

خليك فاهم إن أي خبر علي سوشيال ميديا لتوتر حصل بين الصين وتايوان حيكون معاه الجملة دي .. طيارات من سلاح الجو الصيني إنتهكت المجال الجوي التايواني .. في شهر واحد بس 150 طيارة صينية إنتهكت المجال الجوي التايواني .. أقف بقي هنا .. اللي بيكون بيكتب الخبر تقريباً مش بيبقي واخد باله إن فيه حاجتين شبه بعض بس هم مختلفين خالص عن بعض .. الحاجة الأولانية هي المجال الجوي Air Space لأي دولة .. الحاجة الثانية هي منطقة عمليات الدفاع الجوي Air Defense Identification Zone و إختصاراً بتتسمي ADIZ.

في الأول (أبي أحمد) طلع قال إن يا جماعة مفيش قوات من أريتيريا بتشارك في الهجوم ضد التيجراي أصلاً وإن العساكر بتاعته بيوزعوا ورد وحلويات علي أهل التيجراي والناس صدقت .. شوية والمصايب بدأت تظهر .. الأمم المتحدة وصفت اللي حصل في التيجراي من أول نوفمبر 2020 إنه أسوأ كارثة إنسانية تعدي علي أثيوبيا من أكتر من 20 سنة.

لما حصل و صفقة الغواصات الفرنسية الأسترالية باظت فده خلي الفرنساويين يبصوا لنفسهم في المراية و يسألوا نفسهم هو إزاي إحنا شايفين نفسنا جامدين زحليقة بس باقي العالم شايفنا زي ما نكون كومبارس ملناش دور ولا أهمية؟

نقطة برده مهم بالنسبة لي تكون مستوعبها .. سنة 2018 طالبان قعدت مع الأمريكان علي طرابيزة مفاوضات و قعدوا سنتين يتكلموا لحد ما في فبراير 2020 إتمضي إتفاق و ده حصل حقاً و صدقاً بين الأمريكان و طالبان و في الإتفاق ده إتقال إن الأمريكان حينسحبوا من أفغانستان و لحد ما ينسحبوا فعناصر طالبان مش حيضربوا طلقة علي العساكر الأمريكان هناك.

كتير من الأسلحة اللي أميركا بتبيعها دلوقتي و قواتها معتمده عليها إتصممت و إتعملت أيام (ريجان) عشان الهسهس اللي كان مسيطر علي وزارة الدفاع الأميريكية هو الخوف من روسيا.

لما تيجي تبص علي الأخبار و اللي إنت بتشوفه علي السوشيال ميديا غصب عنك بتلاقي نفسك بتهرش في شعرك .. إحنا ماشيين علي نفس القضبان اللي الرواية بتاعة 2034 قالت إن نهايتها قطر أميركا حيلبس في قطر الصين.

علي الناحية الثانية و بشكل أنا مش شايف إن له أي معني الحقيقة الإسرائيليين زي ما يكونوا نسوا إنهم محتلين الضفة الغربية .. من المعلومات اللي انا عايزك تبقي عارفها إن إسرائيل خلال سنتين عملت أربع إنتخابات برلمانية و في طريقهم إنهم يعملوا الإنتخابات الخامسة .. المشكلة إن كل إنتخابات بتتعمل مش بتطلع حزب واحد معاه أغلبية فكل شوية بعد كل إنتخابات يختاروا حد يتقاله شكل حكومة فميعرفش فيتقال ل(نتنياهو) خليك في منصبك مؤقتا لحد ما نعمل إنتخابات جديدة يمكن ربنا يفكها علينا .. سنتين علي الحال الواقف ده.

(كارلوس غصن) علي حسب كلام النيابة اليابانية أخفي عن الضرائب أرباح وصلت 80 مليون دولار علي مدي 8 سنين .. البيه خسر 16 مليون دولار من فلوسه الشخصية في كذا بيزنس خاص بيه بس عشان رصيده في البنك ميتأثرش خد الفلوس دي من حساب الشركة .. مصاريفه الشخصية كلها كانت علي حساب شركة نيسان وعشان بس أحطك في الصورة يعني إيه مصاريفه الشخصية فعايزك تعرف إن قصره في بيروت إتصرف علي إعادة فرشه أكتر من 15 مليون دولار كلهم شركة نيسان هي اللي دفعتهم.

اللي أنا عايز أوصله ليك إن (جو بايدن) يبان شخص أهبل .. يبان شخص مبيعرفش يكمل جملتين علي بعض .. يا مؤمن دول مطلعين عليه اسم (جو النعسان Sleepy Joe) في أميركا .. كل ده علي عيني و علي راسي لإن (جو بايدن) من السياسيين اللي مبيعرفش يشتغل إلا في أوضة مقفولة.

حتي الأوروبيين سواء فرنسا أو إيطاليا هم الإتنين عايزين نفس الحاجه .. الإتنين عايزين حنفية المهاجرين غير الشرعيين اللي مفتوحة في ليبيا تقفل .. ده كل اللي هم عايزينه .. الفرنسيين شايفين إن (خليفه حفتر) هو اللي يقدر يحققلهم ده و الطليان شايفين إن (فايز السراج) هو الرجل المناسب .. لما الإتنين لقوا إن الحرب الأهلية دي شكلها مطوله ومحدش عارف يحسمها فالطليان و الفرنساويين تحت مظلة الإتحاد الأوروبي قالوا إحنا حنفرض حصار بحري علي ليبيا في عملية عسكرية سموها إيريني Irini.