اللي إنت محتاج تفهمه إن المارينز بصوا لخريطة الصين و قالوا لنفسهم إحنا لو بكره الصبح إتقالنا الحرب قامت بين أميركا و الصين فإحنا شغلنا حيكون علي ساحل الصين .. حلو .. ده معناه إن اللي حيتطلب مننا إننا نفضل نطنطط زي الأرنب بين الجزر الساحلية الصينية اللي فيه منها جزر ربنا خلقها و فيه كتير منها جزر صناعية.
المارينز عشان تبقي فاهم وظيفتهم دي الناس المتخصصة في العمليات البرمائية .. لو بكره الصبح الأمريكان حبوا يحتلوا الإسكندرية فأول ناس حيتم إنزالها علي شواطيء إسكندرية هم المارينز .. مؤخراً طلعت قيادة سلاح مشاة البحرية قالت إن التسليح الحالي ليهم مش ماشي مع الاستراتيجية الدفاعية بتاعة أميركا اللي اسمها National Defense Strategy واللي بتعتبر الصين هي أكبر تهديد واضح و صريح للأمن القومي الأميريكي.
لو فيه درس نقدر نتعلمه من السفينة Zumwalt فهو انك لما تيجي تعمل حاجة جديدة في شغلك بلاش تجيب أكتر من فكرة جديدة أغلبهم متجربوش قبل كده و تيجي تدفسهم مع بعض في حتة واحدة و تقول لنفسك انا عملت اللي محدش عمله قبل كده.