أنا من الناس المقتنعة بإن العقيدة القتالية اللي هي إنت معتبر مين عدوك؟ و معتبر مين صاحبك؟ بتحدد بشكل كبير السلاح اللي إنت حتشتريه .. والعكس صحيح .. أنا لو بصيت علي السلاح اللي إنت بتشتريه فأنا أقدر برده أرسم ملامح صورة هي العقيدة القتالية بتاعتك رايحة علي فين؟ .. إنت بتعتبر مين أكبر تهديد لأمنك القومي؟ وبالتالي بتشتري سلاح عشان تواجهه .. من ضمن الأفرع الرئيسية للقوات المسلحة الأميريكية حاجة اسمها مشاة البحرية US Marine Corps اللي إحنا عارفينهم باسم المارينز .. المارينز عشان تبقي فاهم وظيفتهم دي الناس المتخصصة في العمليات البرمائية .. لو بكره الصبح الأمريكان حبوا يحتلوا الإسكندرية مثلاً فأول ناس حيتم إنزالها علي شواطيء إسكندرية هم المارينز .. مؤخراً طلعت قيادة سلاح مشاة البحرية قالت إن التسليح الحالي ليهم مش ماشي مع الإستراتيجية الدفاعية بتاعة أميركا اللي اسمها National Defense Strategy واللي بتعتبر الصين هي أكبر تهديد واضح و صريح للأمن القومي الأميريكي .. طب و الحل يا بهاوات؟ .. مفيش إحنا بس حنستغني عن شوية أسلحة كده عندنا حاسين إنها حتبقي مش مناسبة أوي إن أحنا نستخدمها في المواجهة الجاية مع الصين.
الناس دي بتقول إحنا مش عايزين الأربع كتائب دبابات M1A1 Abrams اللي عندنا اللي هم أساساً 3 كتائب في الخدمة و واحدة إحتياط يعني بتتكلم تقريباً عن 200 دبابة .. مش عايزين رؤوس الكباري ولا الكباري العايمة اللي كنا بتستخدمها عشان ننقل الدبابات دي فوق الترع و الأنهار .. مش عايزين 3 كتائب مشاة كل واحدة فيهم فيها حوالي 800 مقاتل .. اه كمان مش عايزين 16 من أصل 21 وحدة مدفعية ميدان ثقيلة .. بالمرة مش عايزين فرقتين من أصل 6 فرق عمليات برمائية .. مش عايزين 4 أسراب طيارات هليكوبتر شايفينهم ملهمش لازمة .. يوووه كنت حنسي .. بالنسبة لأسطول طيارات F-35B اللي حنستلمهم بدل ما السرب كان فيه 16 طيارة حيبقي فيه 10 طيارات بس و ده طبعاً معناه بالضرورة إن عدد طيارات F-35B اللي كنا ناويين نشتريها هم كمان حيقلوا.
فيه منكوا دلوقتي بيسمع الكلام ده و بيبقي نفسه يقول لقيادة المارينز لا تكونوش فاكرين نفسكوا شوية عباقرة باصين للعالم من بلورة سحرية و شايفين اللي إحنا مش شايفينه .. لا فوقوا .. مفيش حاجة اسمها إن قوات مسلحة ميبقاش عندها دبابات و مدافع .. بس الحقيقه إنت لو هديت شوية و بصيت للموضوع من وجهة نظر المارينز حتبدأ تفهم هم عملوا كده ليه؟ .. دلوقتي زي ما قلتلك هم معتبرين الصين أكبر تهديد للأمن القومي الأميريكي .. لو حصل و بكره الصبح قامت الحرب فالمهمة اللي المارينز حيبقوا مكلفين بيها هي إنهم ياخدوا الجزر سواء الطبيعية أو الصناعية اللي تحت إيد الصين في بحر الصين الجنوبي .. هنا إنت عندك مشكلتين .. أول مشكلة إن الجزر دي كمساحة فهي صغيرة يعني أكبر واحدة فيهم اسمها سوبي رييف Subi Reef عليها قاعدة جوية صينية علي مساحة 976 فدان و ثاني أكبر واحدة اسمها فايري كروس رييف Fiery Cross Reef و دي برده فيها قاعدة جوية صينية علي مساحة 677 فدان فأولاً حتي القوات الصينية اللي بتحميها ممكن ميبقاش تحت إيدها دبابات أصلاً و بالتالي المارينز اللي حياخدوا الجزر دي مش حيبقوا محتاجين دبابات و حتي مش حيعرفوا يستخدموها إزاي؟ .. ثاني مشكلة أن المارينز حيبقي مطلوب منهم أنهم يبقوا زي الأرنب عمال ينط .. حيبقي مطلوب منهم ينطوا بين الجزر لحد ما يوصلوا للساحل الصيني .. النط الكتير ده عايز قوات خفيفة مش عايز مدرعات و دبابات لإن دي حتعطلهم مش حتساعدهم.
ده مش معناه إن المارينز مش حيصرفوا .. لا خالص .. هم بس حيصرفوا علي سلاح هم شايفينه حيبقي مناسب ليهم أكتر .. أهم سلاح حيتصرف عليه هو منصات إطلاق الصواريخ المتحركة زي HIMARS و دي إختصار High Mobility Artillery Rocket System و هي تقدر تقول النسخة الأمريكاني من منصة إطلاق الصواريخ TOS-1 الروسية .. البتاعة دي عبارة عن منصة إطلاق صواريخ كل منصة بتقدر تضرب 6 صواريخ في المرة الواحدة و بتتركب علي مركبة عادية أو حتي ترلة و بتقدر لو حطتها علي جزيرة إن مداها يطول جزيرة تانية جنبها .. منصات HIMARS دي لوحدها الصرف عليها حيزيد بنسبة 300% و دي مش غلطة مطبعية علي فكرة .. المارينز كمان حيصرفوا علي نسختين مخصوص من صواريخ كروز واحد اسمه Naval Strike Missiles و الثاني اسمه Maritime Strike Tomahawk.
لنفترض إن المارينز استولوا علي جزيرة فبمجرد ما يرصوا بطاريات الصاروخين دول فهم يقدروا كأنهم فرشوا ناموسية حول الجزيرة بحيث أي سفينة معادية تخش جوه الناموسية يقدروا يضربوها .. خلي بالك .. المارينز نفسهم معترفين إن استراتيجيتهم دي حتبقي فاشلة لو قامت مواجهة بين أميركا و روسيا .. لو بكره الصبح الحرب بين الروس و الأمريكان ولعت و بعد ما المارينز رموا كل دباباتهم و مدافعهم في الزبالة ففي أي مواجهة بينهم و بين الروس هم حيشيلوا أوبح .. صدقني هم عارفين ده كويس.
المصدر:
مقالة بعنوان After nearly a century, the US Marine Corps is ditching its tanks نشرت في مجلة Popular Mechanics و ده لينك المقالة الأصلية:
https://www.popularmechanics.com/military/weapons/a31915295/marine-corps-tanks/
