أصعب حاجة في الدنيا هي إن البني أدم يقتنع إن جه وقت التغيير .. التغيير عمره ما كان سهل .. إحنا كبشر طبيعتنا إننا بنحب حياتنا تمشي بشكل طبيعي زي ما إحنا متعودين .. إحنا كبشر بنحب إحساس الراحة إننا نبقي عارفين حنصحي الصبح نروح الشغل عارفين حنعمل إيه في الشغل و لما نخلص يا نروح علي البيت يا نقعد علي القهوة مع صحابنا نتفرج علي الماتش .. المشكلة الأصعب إنك حتي لما إنت كبني أدم تقرر تتغير فالناس حتبصلك بصة اللي هي إنت عبيط يلا؟ ما تخليك زي الناس و متوجعش دماغنا .. ده بالضبط الوضع اللي فيه قيادة سلاح مشاة البحرية الأميريكية اللي ممكن تكون عارفهم بإسم المارينز أو US Marines Corps .. كنت إتكلمت قبل كده إن الناس دي قررت تغير العقيدة القتالية بتاعتها .. الناس دي بقت مقتنعة بإن الصين هي أكبر تهديد للأمن القومي الأميريكي و عشان كده الناس دي بصت لتسليحها و قالت لنفسها إحنا لو دخلنا حرب مع الصين بالسلاح ده إحنا حنشيل أوبح.
بسم الله الرحمن الرحيم كده الناس دي قررت ترمي كل أسطول دبابات M1A1 Abrams اللي تحت إيدها في الزبالة .. عارفها إنت الدبابة اللي إحنا بنصنعها هنا في مصر و فرحانين بيها أوي .. أهو المارينز قالوا مش عايزينها .. لا هي ولا اختها الصغيرة M1A2 .. السؤال اللي إتسأل للناس دي هو أنتوا مش عارفين إن الصين هي كمان عندها دبابات؟ .. يعني أكيد في أي مواجهة مع الصين حتحتاجوا تشوفوا حتوقفوا الدبابات الصيني دي إزاي فزي ما فيلم الفرح بيقولها إستهدي بالله يا بنتي و قومي إقلعي فإستهدوا بالله كده و متوجوعوش دماغنا و خلوا دبابات M1A1 حتنفعكوا.
اللي إنت محتاج تفهمه إن المارينز بصوا لخريطة الصين و قالوا لنفسهم إحنا لو بكره الصبح إتقالنا الحرب قامت بين أميركا و الصين فإحنا شغلنا حيكون علي ساحل الصين .. حلو .. ده معناه إن اللي حيتطلب مننا إننا نفضل نطنطط زي الأرنب بين الجزر الساحلية الصينية اللي فيه منها جزر ربنا خلقها و فيه كتير منها جزر صناعية .. الإسلوب ده في الحروب بيتسمي Island-Hopping Campaign زي ما لما كنت صغير تبقي ماشي في الشارع علي الرصيف و تقرر تنط عشان تحط رجلك علي البلاطات الحمرا مش الصفرا .. فيه مشكلتين حيواجهوا المارينز لو كانوا دخلوا حرب من النوع ده بتسليحهم القديم:
- المشكلة الأولانية إن النط الكتير محتاج متكونش واكل قبلها عشان متحسش إنك عايز ترجع .. محتاج تبقي خفيف .. صحيح الدبابة M1A1 Abrams فيها مدفع محترم جداً اللي هو M256 عيار 120 مليمتر بيقدر يجيب أي هدف متحرك من علي مسافة بتوصل 2,000 متر بس دي دبابة تقيلة .. دبابة كتلتها 68 طن .. عشان تنقل لواء دبابات بالوزن ده بين الجزر الصينية فده حوار و صداع ملوش أي لازمة.
- المشكلة الثانية إن كتير من الجزر الصناعية الصينية دي أساساً صغيرة .. الجزيرة الواحدة عرضها ميجيش 2,000 متر .. ده معناه إن أساساً القوات الصينية المكلفة بحماية الجزر دي إحتمال ميكونش تحت إيدهم أصلاً دبابات عشان مفيش مكان .. إيه اللي يخليني أبعت دبابات لجزيرة ضيقة زي دي عشان في الأخر أكتشف إني بقي عندي زحمة مرور ولا زحمة العربيات علي كوبري أكتوبر الساعة 4 العصر؟
طب و الحل؟ .. بناء علي كلام الجنرال (إيريك سميث Eric Smith) نائب رئيس إدارة التسليح في قيادة المارينز و اللي قاله في إنترفيو لمجلة أخبار الكلية البحرية U.S. Naval Institute News فهم بيفكروا يشتروا منظومة الصواريخ المضادة للدبابات Spike NLOS .. أقف بقي هنا .. كلمة Spike يعني طرف حاد زي قصة الشعر سبايك اللي طلعت موضة في التسعينات دي .. كلمة NLOS دي إختصار Non-Line of Sight يعني من غير ما تشوفه بعنيك .. دي صواريخ إلي حد ما صغيرة بتتثبت علي الأرض بحامل ثلاثي Tripod زيها زي الكاميرا مثلاً أو بتقدر تركبها علي أي مدرعة أو عربية هامفي أو جيب و ليها مدي طيران ما بين 15-20 ضعف مدي الدانة بتاعة الدبابة M1A1 Abrams اللي بفكرك إنه كان 2,000 متر يعني بتتكلم عن مدي طيران بيوصل 30 كيلومتر مستريح .. خد بقي التقيلة .. الصاروخ ده من تصنيع شركة السلاح الإسرائيلية رافاييل Rafael.
لو بصيت علي مقدمة الصاروخ Spike NLOS حتلاقي فيه حتة سودا .. الحتة السودا دي بيتركب فيها Electro-Optical Seeker و ده عبارة عن كاميرا بتشتغل بالأشعة تحت الحمرا و بتقدر تشوف بالليل أو الصبح أو حتي في الظروف الجوية الصعبة بحيث إنت كعسكري بيبقي معاك تابليت بتقدر تشوف بث مباشر من خلال كاميرا الصاروخ هو رايح فين و بتقدر توجهة زي ما انت عايز .. شركة رافاييل بتبيع الصاروخ ده ب3 نسخ علي حسب نوعية الرأس المتفجر بتاعه .. أول نسخة بتبقي عبارة عن كذا عبوة ناسفة صغيرة اللي هو حاجة شبه الخرطوش بس بقنابل و ده في حالة إنك بتستهدف طابور عربيات نقل أو مدرعات خفيفة .. تاني نسخة بتبقي عبوة ناسفة كبيرة شوية و ده في حالة انك بتنشن علي دبابة .. تالت نسخة بتبقي عبوة ناسفة خارقة للدروع و ده في حالة إنك بتضرب دشمة أو نقطة حصينة.
الناس اللي قارية شوية في تاريخ الحروب عارفين إن اللي أنا بتكلم فيه ده هم سمعوا عنه قبل كده .. في حرب أكتوبر الإسرائيليين إتصدموا من إستخدام العساكر المصريين لصاروخ صغير مضاد للدبابات إسمه ساجر Sagger كان بيتوجه برده عن طريق Joystick زي بتاعة Video Games و بسلك شبه سلك التليفون … صاروخ Spike NLOS هو الUpdate المعاصر لصاروخ Sagger .. صاروخ موجه بس بدل سلك التليفون بقي بيتوجه بData Link ويمكن خاصية التوجيه دي هي اللي مخلية المارينز يفكروا إنهم كمان يستخدموه كصاروخ مضاد للسفن .. إحنا داخلين علي مرحلة أشوف وشك بخير يا إبرامز.
المصدر:
مقالة بعنوان The Marines Broke Up With Their Tanks, and Now They’re Single and Loving It نشرت في مجلة Popular Mechanics و ده لينك المقالة الأصلية:
https://www.popularmechanics.com/military/weapons/a35482679/marines-looking-for-new-anti-tank-weapons/
