لسبب ما أنا شخصياً مش فاهمه مفيش حد فاهم أوي في المسدسات .. إنت ممكن تلاقي حد عرف يميز بين البندقية الألية الكلاشينكوف و البندقية الألية M-16 بس صعب جداً تلاقي حد بعنيه يعرف يميز بين مسدس بيريتا و مسدس جلوك .. عشان بحر المسدسات واسح ولو غطسنا فيه مش حنعرف نطلع فالنهاردة حنتكلم عن أحسن خمس مسدسات في التاريخ في رأيي الشخصي .. فيه منها مسدسات قديمة طلعت بره الخدمة وفيه منها مسدسات لسه نازلة السوق من كام سنة.
مسدس كولت Colt M1911A1 .. الأمريكاني اللي علي أبوه:
لحد سنة 1911 وكانت القوات البرية الأميريكية بتستخدم المسدس الساقية Revolver كمسدس رسمي بيتوزع علي العساكر و الضباط بتوعها .. لما التدخل العسكري في الفلبين في السنة دي باظ فوزارة الدفاع الأميريكية قررت إنها تبص لنفسها في المراية وتشوف هل تسليح عساكرنا مناسب للزمن اللي هم كانوا عايشين فيه؟ .. إجابة السؤال ده كانت إنهم رموا المسدس الساقية عيار 0.38 في الزبالة وحلوا محله بالمسدس Colt 1911 و اللي إتسمي علي نفس السنة اللي هو دخل فيها الخدمة في القوات البرية .. المسدس ده كان من تصميم مهندس أمريكاني جاحد إسمه (جون موزيز براونينج John Moses Browning).
المسدس كولت 1911 القديم لو حكمت عليه بمعايير دلوقتي فإنت غالباً لو شفته حترميه في الزبالة .. هو كان تقيل وزنه حوالي كيلوجرام كامل و التقل ده كان جاي من كتر الأجزاء الداخلية اللي فيه .. كمان هو كان بيتركبله خزنة أخرها تشيل 7 طلقات بس .. تاني إنت لو بصيت للمسدس ده بمعايير دلوقتي فإنت حيكون رأيك فيه إن أخره المتحف بس إنت محتاج تفهم إن المسدس ده لما نزل السوق وقتها كان ثورة في العالم المسدسات .. كانت أول مرة يتمسك مسدس نص ألي يعني بيضرب طلقة طلقة و المظروف الفاضي بيتطرد بره الماسورة ومن ساعتها و بقي ده التصميم اللي كل المسدسات الحديثت إتبنت عليه .. سنة 2012 قررت قيادة العمليات الخاصة التابعة لسلاح مشاة البحرية الأميريكية اللي إنت عارفهم بإسم المارينز U.S. Marines إن كل أفرادها من هنا و رايح حيمسكوا مسدساتColt M45A1 وده يعتبر هو هو مسدس Colt 1911 بس متعدل عليه شوية.
مسدس جلوك 17 .. فخر الصناعة النمساوية:
ميزة الجلوك 17 وسر عظمته هي إنه إتصمم عشان يعمل 3 حاجات .. يبقي سهل في تصنيعة .. يكون يُعتمد عليه و ميعطلش .. يكون سهل في الإستخدام .. عشان تفهم سر غرام العسكريين في المسدس ده تعالي نشوف هل هو حقق فعلاً ال3 حاجات اللي هو إتصمم عشانها ولا لا؟ .. مبدأياً ده أسهل مسدس في فكه وتركيبه لدرجة إنه بتكة زرار واحدة إنت فعلياً تقدر تفكه من بعضه .. لو حتشوف هل هو يُعتمد عليه ولا لا فأحب أقولك إن لما المسدس ده إتجرب لأول مرة علي إيد وزارة الدفاع النمساوية فهم ضربوا بيه 1000 طلقة و معطلش و محصلوش Jamming إلا مرة واحدة بس .. لو حنتكلم عن سهولة الاستخدم ففيه كتب إتكتبت عن إزاي المسدس ده بيحقق نسبة Pointability خزعبلية و كلمة Pointability ملهاش ترجمة حرفية بس خليني أفسرهالك بإنك عشان تنشن بالجلوك علي هدف فإنت فعلياً حتحس إن المسدس هو جزء من إيدك .. إنت مش محتاج تغمض عين و تفتح عين ولا تبقي ثابت في مكانك وكل الكلام اللي إنت بتتعلمه في ضرب النار لما تخش الجيش.
صحيح إن النسخة الأولانية من مسدس جلوك كانت بتستخدم خزنة بتشيل 17 طلقة عيار 9 مليمتر بس دلوقتي بقي بينزل منه نسخ بتستخدم عيارات طلقات مختلفة ويمكن عشان كده المسدس ده هو المسدس الرسمي لعناصر قوات ديلتا فورس Delta Force اللي هم القوات الخاصة للقوات البرية الأميريكية و القوات الخاصة البريطانية SAS.
مسدس Sig P226 .. لما السويسريين و الألمان يعملوا عظمة:
قصة المسدس ده تجسيد لمقولة محدش عارف الخير مستخبيله فين .. المسدس ده عملته شركة سويسري ألماني اسمها سيج ساور Sig Sauer .. فاكر لما قلتلك إن القوات البرية الأميريكية كانت عايزة تطلع مسدس Colt M1911A1 بره الخدمة وكانوا بيدوروا علي حاجة بداله؟ .. أهو من ضمن الخيارات اللي كانت متاحة لقيادة القوات البرية الأميريكية كان المسدس Sig P226 .. صحيح هم مختاروش المسدس ده بس في وسط Presentation بتاعة عرض إمكانيات المسدس كان قاعد ناس من قيادة قوات Navy SEALs اللي مجازاً يعني تقدر تقول عليهم الصاعقة البحرية بتاعة أميركا .. في الوقت ده الناس دي كانت بتفكر هي كمان تطلع مسدس بيريتا Beretta M9 بره الخدمة ويبدلوه بحاجة ثانية .. من اليوم ده و هم وقعوا في غرام Sig P226 وبقي هو المسدس الرسمي ليهم .. المسدس ده يبقي التطوير بتاع مسدس أسطوري الحقيقي اللي هو Sig P220 واللي في وقت الحرب الباردة فيه دول كتير كانت بتستخدمه زي اليابان مثلاً.
مسدس M&P .. لما الCowboys جم المستقبل:
أي حد إتفرج علي أفلام Western أو أفلام رعاة البقر Cowboys الأميريكية عدي عليه الإسم ده اللي هو Smith & Wesson .. دي شركة لسنين و سنين كانت مبتعرفش تعمل حاجة في حياتها غير مسدسات الساقية Revolvers وكانوا شاطرين جداً فيها لحد ما لقوا السوق بيتسحب منهم من أول ما مسدس Glock 17 نزل السوق و كل الجو .. خلاص فكرة المسدس المعمول من الصلب دي بدأت تترمي في الزبالة وحل محلها مسدسات خفيفة من البلاستيك وعشان كده شركة Smith & Wesson قررت سنة 2005 إنها تنزل تحفتها الفنية M&P ودي إختصار Military and Police يعني المسدس اللي ينفع يشيله ضابط الشرطة و ضابط الجيش .. لأسباب كتير من ضمنها إنه معمول بميكس من الصلب و البلاستيك وإن المقبض بتاعه بينزل منه 3 أشكال عشان يناسب حجم إيد بنت عشان الشرطة بيشتغل فيها رجالة وبنات فالمسدس ده بقي هو المسدس الرسمي لعناصر الشرطة في أميركا.
مسدس CZ75 .. السكودا بتاعة المسدسات:
الأخوة بتوع التشيك بيفهموا في الهندسة .. دول الناس اللي عملوا العربية السكودا فأكيد دي ناس دماغها شغالة .. دول الناس برده اللي سنة 1975 عملوا واحد من أحلي و أحسن المسدسات في العالم اللي هو CZ75 .. التشاكوة خدوا المسدس Browning Hi-Power وده مسدس أمريكاني صممه (جون موزيز براونينج) اللي قلتلك إنه هو نفس البني أدم اللي صمم المسدس Colt M1911 و بدأوا يحطوا عليه التاتش بتاعتهم .. عملوا مسدس بيستخدم طلقات عيار 9 مليمتر وبيشيل 16 رصاصة في خزنته وده كان رقم خزعبلي وقتها .. السؤال دلوقتي هو ليه حضرتك عمرك ما سمعت عن المسدس ده؟ .. الفكرة إن التشيك اللي كانت وقتها دولة واحدة مع سلوفاكيا وكان اسمهم تشيكوسلوفاكيا كانوا هم الإثنين تحت سيطرة السوفييت .. السوفييت شافوا المسدس CZ75 وعرفوا إنه ثورة في عالم صناعة المسدسات عشان كده فرضوا حظر تصدير عليه وفضل حظر التصدير ده متطبق لحد ما إنهار سور برلين سنة 1989 وبعدها بسنة إنهار الإتحاد السوفيتي .. حالياً فيه النسخة الأحدث منه CZ75BD واللي يمكن في رأيي ميفرقش في جودته عن أي مسدس أمريكاني أو ألماني بس لسبب ما اسمه مش مسمع أوي.
المصدر:
- مقالة بعنوان These 5 Handguns Took the World by Storm نشرت في مجلة The National Interest وده لينك المقالة الأصلية:
https://nationalinterest.org/blog/reboot/these-5-handguns-took-world-storm-169630
