نجيلة كرة القدم .. بيزنس وعلم وبطولات.

لينك التسجيل الصوتي للمقالة علي ساوند كلاود:
https://on.soundcloud.com/UmDes

خليني أبدأ معاك بسؤال واضح وبسيط .. إيه اللي يخلي نادي كرة قدم يصحي الصبح يتقال عليه إنه حينيم أوروبا من المغرب؟ .. إيه اللي نادي محتاج يعمله عشان لما تتجاب سيرته الناس يجي في دماغها جملة العو جه العو حضر؟ .. هل إنه يجيب لاعيبه علي أعلي مستوي؟ .. هل إنه يجيب مدير فني جاحد؟ .. هل إن يبقي عنده إستاد يرعب أي حد يلعب عليه؟ .. هل جمهوره اللي واقف في ظهر الفرقة؟ .. أسئلة كتير أنا عارف بس خلينا مع بعض نحاول نجاوب علي السؤال ده بإننا نحكي حكاية اللي حصل في ريال مدريد سنة 2009 وباريس سانجيرمان سنة 2013.

2009 دي السنة اللي فاكرها كويس أي حد بيشجع ريال مدريد .. دي السنة اللي (فلورينتينو بيريز Florentino Perez) رئيس النادي أتهور و جاب فيها (كريستيانو رونالدو Cristiano Ronaldo) و(كاكا Kaka) و(كريم بنزيمة) .. بس في وسط الناس اللي جابها (بيريز) كان إسم عدي من غير ما حد ياخد باله منه وده كان واحد إسمه (بول بورجيس Paul Burgess) جابوه من أرسنال ومش عايزك تهرش في شعرك وتحاول تفتكر هو (بول بورجيس) ده كان لاعيب مركزه إيه لإنه مكنش لاعيب كرة قدم أصلاً .. (بول بورجيس) كان المسئول عن نجيلة إستاد الإمارات ونادي أرسنال جابه من نادي تحت بير السلم إسمه بلاكبول سنة 1999 .. (بول بورجيس) هو اللي خلي نجيلة ملعب الإمارات حرير لدرجة إن الإتحاد البرتغالي لكرة القدم جابه عشان يشرف علي الملاعب اللي إتلعبت عليها بطولة أمم أوروبا 2004 .. (بول بورجيس) خلي الكورة بتجري علي ملعب السانتياجو برنابيو بنفس نعومة الشيكولاتة النوتيلا وهي بتتفرد علي شريحة التوست لدرجة  إن نادي أتليتيكو مدريد عجبته الفكرة وجاب إنجليزي تاني إسمه (دان جونزاليز Dan Gonzales) من نادي بورنموث عشان يبقي مسئول عن نجيلة إستاد فيسينتي كالديرون اللي هو الإستاد القديم بتاع النادي.

لما مؤسسة الإستثمارات القطرية إشترت نادي باريس سانجيرمان لقوا إن عندهم مشكلة معقدة الحقيقة .. المشكلة مش إنهم محتاجين لاعيبه لإن الناس دي معاها فلوس تخليهم يشتروا اللي هم عايزينه .. المشكلة كانت إن لستة الإصابات بتاعتهم كانت أطول من الليلة السودا .. ولإن زي ما قلتلك نجاح الأندية الإسبانية في أوروبا خلي ناس تدور ورا سر الخلطة بتاعتهم واللي ناس كتير مخدتش وقت طويل عشان تفهم إن الفكرة كلها في النجيلة بتاعة الإستاد .. ده خلي إدارة باريس سانجيرمان سنة 2013 تجيب واحد إسمه (جوناثان كالديروود Jonathan Calderwood) كان وقتها ماسك النجيلة بتاعة إستاد نادي أستون فيلا الإنجليزي .. إشمعني يعني الرجل ده بالذات؟ .. يكفي إن أقولك إن المدير الفني الفرنساوي (جيرارد هوليير Gerard Houllier) اللي درب قبل كده فرق ليفربول وليون وأستون فيلا قال عليه إنه أحسن واحد بيفهم في نجيلة الإستادات علي مستوي العالم.

الفكرة في منتهي البساطة هي الأتي .. نجيلة نظيفة يعني أرضية الإستاد نفسها زي ما بنقول في الهندسة كده ميتها واحدة اللي هو النجيلة كلها علي مستوي واحد وبطول واحد .. ده بيعملك حاجتين .. أول حاجة إنها بتحمي اللاعيبه من الإصابات .. ثاني حاجة إنها بتخلي الكرة تجري بسرعة .. معني إن الكرة بتجري بسرعة إن رتم اللعب نفسه بقي أسرع .. عايزك تعرف إن من سنة 2013 ودي السنة اللي (جوناثان كالديروود) راح فيها باريس سانجيرمان فالنادي قدر ياخد الدوري 6 مرات في 8 مواسم .. تاني .. أنا فاهم كويس إنك حتقولي إن السبب الأساسي في ده هو إن باريس سانجيرمان بيشتروا أحسن لاعيبة العالم بس في نفس الوقت الإتحاد الفرنساوي لكرة القدم إختار نجيلة ملعب إستاد حديقة الأمراء بتاع باريس سانجيرمان أحسن نجيلة إستاد في فرنسا في 6 مواسم .. خد دي كمان .. في موسم 2014 وقتها المدير الفني للنادي (رولان بلان Laurent Blanc) طلع قال إن (جوناثان كالديروود) لوحده السبب في إن الفرقة تاخد 16 نقطة في الموسم ده ولما الصحفيين سألوه إزاي الكلام ده قالهم إن نجيلة الإستاد كانت ناعمة لدرجة إن المهاجمين مبقوش يتعبوا عشان ينقلوا الكرة لقدام .. فنقول كمان مرة .. نجيلة ناعمة يعني لاعيبة مش بتتصاب كتير يعني تقدر تلعب كرة هجومية .. وعشان خاطري بلاش تقول لنفسك بلاش مبالغة يعني أكيد الفرنساويين فاهمين إزاي يبقي عندهم نجيلة كويسة لإن (جوناثان كالديروود) لما مسك نجيلة ملعب حديقة الأمراء إكتشف إن الفرنساويين معندهمش المكن بتاع قص النجيلة اللي بيستخدم بعد نهاية كل ماتش عشان يشيل ورق النجيلة الميت .. بالنسبة ليهم اللي كان بيقوله (جوناثان كالديرون) وبالتالي اللي بيعمله الإنجليز عشان يحافظوا علي نجيلة الملاعب ده خيال علمي من وجهة نظر الفرنساويين.

عايزك تفتكر وتاخد بالك كويس إن سنة 2009 كانت بداية السنة اللي أندية إسبانيا بقت بتدوس علي وش أندية أوروبا كلها .. صحيح ومعاك إن جزء من ده سببه إن اللاعيبة اللي بتلعب في أندية إسبانيا الكبيرة زي ريال مدريد وبرشلونة وأتليتيكو مدريد وقتها كانوا علي أعلي مستوي بس كمان عشان الأندية دي بقت فاهمة إنك عشان تبقي نادي ناجح صحيح محتاج لاعيبة فرز أول بس في نفس الوقت اللاعيبة دي بتجري علي نجيلة ومحتاج يبقي كمان عندك نجيلة فرز أول .. وده معناه إنك محتاج ناس تاخد بالها من نجيلة الإستاد ووقتها مكنش فيه حد بيفهم في النجيلة زي الإنجليز .. الحقيقة إن الإنجليز سابقين أوروبا كلها في تكنولوجيا نجيلة الإستادات واللي عايزين نفهمه النهاردة هو إجابة سؤال واضح وبسيط .. إزاي ده حصل؟

إيه اللي خلي  بيزنس نجيلة الإستادات في إنجلترا بقي بالتطور ده؟

زمان كانت الملاعب الإنجليزية عاملة زي شوارع الإسكندرية لما الدنيا تمطر .. أي حد إسكندراني عارف معني كلامي كويس .. في حالة إنك مش إسكندراني فتخيل إنك ماشي في شارع عامل زي ما إنت تمشي وسط الخرسانة وهي بتتصب كده .. يمكن الملعب الوحيد اللي اللاعيبه والجمهور كانوا بيحبوا يحضروا الماتشات فيه كان ملعب ويمبلي في لندن عشان ده كان أنظف إستاد في إنجلترا كلها .. عشان جو إنجلترا زي ما إنت عارف زفت وهناك لما بتشتي فهي زي ما يكون السما فيها حد بيسيق وبيغرق الدنيا فكتير كانت فيه ماتشات بتتأجل ولما الماتش بيتأجل فده بيترجم بإن النادي اللي الماتش حيتلعب علي أرضة بيخسر فلوس .. ده خلي أندية كتير في إنجلترا تحاول تلاقي حل حتي لو الحل ده كان هبد .. سنة 1981 نادي كوينز بارك راينجرز هبد الهبداية العابرة للقارات لما إستخدم ملعب ترتان .. شوية وأندية تانية بدأت تستخدمها بس عشان ملعب الترتان ده بدعة ولإن كل بدعة بتبوظ الدنيا مش بتصلحها فسنة 1995 الإتحاد الإنجليزي لكرة القدم قرر يلغي إستخدام ملاعب الترتان دي خالص بس ده فتح الباب قدام فرصة جديدة.

لما الدوري الإنجليزي بقي إسمه البريمير لييج والفلوس جريت في إيد الأندية الإنجليزية اللي بقت بتقدر تشتري لاعيبه علي أعلي مستوي فهي إكتشفت الحقيقة اللي الأندية الإسبانية شافتها بداية من سنة 2009 بس الإنجليز عاشوها من التسعينات وهي إن عشان إنت معاك فلوس تجيب أحسن لاعيبة العالم فإنت عايز تحافظ علي اللاعيبه دي وعشان تحافظ عليهم لازم يبقي عندك نجيلة ينفع بني أدمين يلعبوا عليها .. نقطة تانية إن حقوق البث بتاعة الماتشات كان معناها إن الدوري الإنجليزي بقي بيتشاف في تليفيزونات الدنيا كلها وعشان تجيب زبون لازم تعرض بضاعتك بشكل يجري ريق الزبون ويزغلل عينه .. ده خلي الناس في إنجلترا تبقي عايزة تشوف ماتشات كرة قدم بتتلعب علي نجيلة ولا طرابيزة البلياردو كده.

الحقيقة إن ناس كتير متعرفش الحكاية دي بس نادي أرسنال هو اللي فتح عيون الإنجليز علي أهمية إن النجيلة بتاعة الإستاد تبقي زي المسطرة وده حصل لما النادي ببركة دعاء الوالدين الحقيقة جابوا إتنين في وقت واحد هم اللي نقلوا النادي لحتة تانية خالص .. الأولاني هو (أرسين فينجر Aresen Wenger) وده كان المدير الفني اللي لما جابوه من اليابان الناس كلها قالت هي إدارة أرسنال اتخبطت في نافوخها ولا إيه .. الثاني كان عيل صغير عنده 23 سنة إسمه (ستيف برادوك Steve Braddock) عشان يبقي هو المسئول عن نجيلة ملعب الهايبوري بتاع نادي أرسنال واللي لحد دلوقتي هو اللي مسئول عن نجيلة ملعب الإمارات وعن ال11 ملعب تدريب في مركز كولني Colney بتاع النادي .. يكفي إني أقولك إن (ستيف برادوك) مثلاً هو اللي قال إن لازم نجيلة الإستاد كلها تتشال بعد نهاية كل موسم ويتحط نجيلة جديدة والكلام ده كان سنة 1987 ودلوقتي مفيش إستاد فيكي يا أوروبا مبيعملش كده.

مع الوقت الإتحاد الإنجليزي لكرة القدم بقي فاهم أهمية إن النجيلة بتاعة الإستادات تبقي مفيهاش غلطة .. من التسعينات والإتحاد حط في لايحته إن أي حد عشان يمسك منصب مسئول نجيلة ملعب أي إستاد لازم يكون خريج كلية زراعة .. إنت مش متخيل إزاي الإتحاد الإنجليزي لكرة القدم بقي بيركز أوي في جودة نجيلة الملاعب .. خد عندك ملعب ويمبلي مثلاً .. لو إنت مسئول عن نجيلة ملعب ويمبلي فإنت فعلياً بتحتاج تشتغل ما بين 25-30 ساعة في الإسبوع يعني بتتكلم عن 6 ساعات كل يوم وفيه يومين أجازة ومفيش أجازات سنوية وده الإستاد اللي مبيتلعبش عليه ماتشات في الدوري إنما بيتلعب عليه النهائيات وماتشات المنتخب بس .. تخيل ملعب زي الإمارات ولا الإتحاد ولا ستامفورد بريدج الناس اللي مسئولة عنه بتشتغل كام ساعة .. مكنة قص النجيلة لوحدها ثمنها بيبدأ من 11,000 جنيه إسترليني يعني 330 ألف جنيه مصري فالملاعب الإنجليزية بيتصرف عليها كتير سواء كفلوس أو كوقت عشان تبان بالمنظر اللي يفرح اللي إنت بتشوفه لما بتتفرج علي ماتشات الدوري الإنجليزي.

مهم تبقي فاهم معلومة إن بيزنس نجيلة الإستادات في إنجلترا ده بيزنس لو حبيت تقيمه بفلوس فده بيزنس بمليار جنيه إسترليني .. ده بيزنس شغال فيه 27,000 بني أدم .. ده بيزنس شغال فيه ناس شغلتها إنها بتدرس أنهي بذور من النجلية اللي بتقدر تنمو في الظل ومش لازم تتعرض لضوء الشمس .. ده بيزنس شغال فيه ناس موراهاش حاجة غير إنها تطور في الكيماويات اللي بتخلي لون النجلية نفسه أخضر بيلمع عشان يبقي شكله حلو علي شاشة التليفيزيون وإنت بتتفرج في البيت .. ده بيزنس فيه مؤسسة علمية إسمها معهد دراسات نجيلة الملاعب بيدرس فيه علماء ومهندسين كل حاجة ليها علاقة بالنجيلة من أول إيه أنواع النجيلة اللي مش بتحتاج مياه ري كتير لحد هي إيه العلاقة بين طول ورقة النجيلة وبين المسافة اللي بتجريها الكرة لما لاعيب يمررها لزميله.

زي أي بيزنس في الدنيا فهو زي ما بيقوم علي كتاف البحث العلمي فهو كمان بيقوم علي الشركات .. شركة زي Bernard and Company دي بتصنع المكن اللي بيحمي سنان مكن قص النجيلة .. شركة تانية زي Allett وشركة زي Dennis ودول بيصنعوا مكن قص النجيلة .. علي فكرة ملعب الكامب نو بتاع برشلونة وملعب الأولد ترافورد بتاع مانشستر يونايتد وملعب حديقة الأمراء بتاع باريس سانجيرمان  بيستخدموا مخصوص مكن قص النجيلة بتاع Dennis بس .. الإستادات اللي حيتلعب عليها كأس العالم في قطر نجيلتها حتتقص بمكن عاملاه شركة Dennis والإتحاد القطري لكرة القدم مضي عقد مع الشركة إنه يشتري منها 12 مكنة قص نجيلة.

إذا كان زمان في بداية التسعينات الإنجليز كانوا بيحاولوا يهبدوا ويجربوا عشان يفهموا كويس هو يعني إيه نجيلة كويسة فدلوقتي الموضوع بقي واضح ومفهوم ويمكن محفوظ كمان .. إنت بسهولة أوي تقدر تخش علي الموقع بتاع الإتحاد الأوروبي لكرة القدم عشان تعرف المعايير اللي أي نجيلة إستاد في أوروبا بتتعمل علي أساسها:

• أول ويمكن أهم معيار هو Surface Traction وده بيقيس هو اللاعيب عشان يجري علي النجيلة محتاج يبذل مجهود قد إيه .. لازم الSurface Traction بتاع أي نجيلة إستاد متقلش عن 30 نيوتن متر .. لو الرقم ده زاد أوي فاللاعب لو جري كتير علي النجيلة فهو بيحمل علي الرباط الصليبي في الركبة وبسهولة ممكن يتصاب .. لو الرقم ده قل أوي تلاقي اللاعيب عمال يتزحلق علي النجيلة لو جري بسرعة.
• تاني معيار هو Surface Hardness وده عشان تفهمه تخيل إنك جبت شاكوش وخبطت بيه علي الأرض .. إنت بتبقي نازل علي الأرض بكل عزمك بس بمجرد ما الشاكوش يخبط في الارض بتلاقي إن غصب عنك الشاكوش بيرجع لورا بعجلة تناقصية … المفروض إن Surface Hardness لنجيلة ملعب كرة القدم تكون ما بين 70-90 عجلة الجاذبية الأرضية .. لو إنت عملت نجيلة ملعب الSurface Hardness بتاعها قليل زيادة عن اللزوم فإنت كلاعيب وإنت بتجري نفسك بيتقطع بسرعة لإن الارض زي ما تكون بتعاكسك وإنت بتجري .. لو الSurface Hardness كان عالي زيادة عن اللزوم فإنت كلاعيب معرض إنك تتصاب أسرع وتلاقي كل ما الكورة خطبت في الأرض بتنط في الهواء مسافة عالية.
• طول ورقة النجيلة لازم يكون ما بين 24-28 مليمتر ولما تيجي تقص النجيلة لازم تقصها في إتجاه واحد وهو الإتجاه العمودي علي خط التماس.
• قطر نقطة ضربة الجزاء لازم يبقي 200 مليتمر وقطر نقطة السنترة لازم يبقي 240 مليمتر.

أنا بس حابب أختم كلامي بإني أأكد علي نقطة إن صحيح عشان تبقي نادي ناجح دي عاملة زي عمايل الأكل محتاج مقادير وكل ما كانت مقاديرك نظيفة كل ما كانت الأكلة حتطلع أحلي .. المقادير حتلاقيها لاعيبه كويسة ومدير فني كويس بس حاول متنساش إنك مينفعش تعمل صينية مكرونة بالبشاميل من غير الحاجة اللي موجودة في إسمها .. الصينية .. في كرة القدم نجيلة الإستاد هي الصينية .. كل ما كانت الصينية كويسة فحتلاقي المكرونة بتستوي أحسن ومش بتلزق .. سنة 2016 لما (بيب جوارديولا Pep Guardiola) جه يمسك فرقة مانشستر سيتي كانت راسه وألف سيف إن طول ورق النجيلة في إستاد الإتحاد ميزيدش عن 19 مليمتر عشان ده الطول المناسب إن الكرة تجري بسرعة عشان تناسب إسلوب لعبه هو الشخصي وكمان إن ده طول النجيلة اللي هو إشتغل عليه سواء في برشلونة أو بايرن ميونيخ .. بس الناس اللي مسئولة عن نجيلة الإستاد أقنعوه إن مينفعش طول ورق النجيلة يبقي قصير كده عشان الجو في مانشستر زي الزفت ولو النجيلة قصيرة فهي كده معرضة إنها تبوظ أسرع .. بعد شوية مناهدة (جوارديولا) وافق إن طول ورق النجيلة في الإستاد يبقي 23 مليمتر .. الموقف ده حصل هو هو مع ليفربول لما بعد موسم 2018/2019 (يورجين كلوب Jurgen Klopp) إشتكي إن نجيلة ملعب الأنفيلد بتخلي الكرة بطيئة وده خلي المسئولين عن الملعب يعملوا عمرة كاملة لنجيلة الملعب والموسم اللي وراه ليفربول متغلبش ولا ماتش علي أرضه.

سمعة النجيلة بتاعة الملاعب الإنجليزية بقت زي الألماظ ويمكن ده اللي خلي الإتحاد الأوروبي لكرة القدم يعمل حاجة غريبة جداً في بطولة أمم أوروبا اللي فاتت .. البطولة إتلعبت علي 11 ملعب في 11 مدينة مختلفة بس نص النهائي والنهائي إتلعبوا علي إستاد ويمبلي في لندن .. ليه؟ .. عشان ده الإستاد اللي فيه أنظف نجيلة ملعب في أوروبا .. مش كده وبس .. الإتحاد الأوروبي إختاروا 10 مسئولين عن النجيلة في الأندية الإنجليزية عشان يبقوا مشرفين علي نجيلة الملاعب العشرة اللي غير إستاد ويمبلي اللي حتتلعب عليها ماتشات البطولة .. الحقيقة إن تفوق الأندية الإنجليزية في نجيلة الملاعب دي حاجة تستحق إننا نقف قدامها ونتعلم منها كتير أوي خصوصاً لو أندية مصرية وأخص بالذكر هنا الأهلي لو قرر إنه فعلاً عايز يبقي له الإستاد الخاص به.

المصدر:

• مقالة بعنوان ‘The Silicon Valley of turf’: how the UK’s pursuit of the perfect pitch changed football نشرت في جريدة The Guardian وده لينك المقالة الأصلية:
  https://www.theguardian.com/football/2021/jun/15/silicon-valley-of-turf-uk-perfect-football-pitch