علاقة روسيا بحاملات الطائرات عاملة بالضبط زي واحدة جايلها عريس صالونات ومش مقتنعة به بس هي وافقت بعد ما كل ما صحابتها إتجوزوا أو إتخطبوا .. بعد الحرب العالمية الثانية وفي الوقت اللي أميركا بالذات بدأت تدوس جامد في مجال حاملات الطائرات السوفييت شافوا إن حاملة الطائرات دي رمز من رموز الإمبريالية العالمية وكلام كبير من اللي بتسمعه في الجرايد الإشتراكية .. السوفييت كانوا بيقولوا للأمريكان خلوا حاملات الطائرات تنفعكوا إحنا حنركز علي تطوير الغواصات عشان نغرقلكوا حاملات الطائرات بتاعتكوا اللي أنتوا فرحانين بيها دي .. لما الحرب الباردة ولعت والسوفييت إقتنعوا بإن فعلاً حاملات الطائرات دي بتنفع ومهمة قرروا يقبلوا يدخلوا اللعبة .. بس حتي لما دخلوها فكروا بإسلوب مختلف شوية .. الأمريكان دخلوا لعبة حاملات الطائرات عشان يسيطروا علي العالم وإنهم ياخدوا الحرب لحد عندك .. الروس دخلوا اللعبة عشان يدافعوا ويحموا حدودهم .. التفكير ده خلاهم يعملوا كذا محاولة لبناء حاملات طائرات بس كانوا عبارة عن سلسلة متتالية من المصايب شبه الأفلام اللي بيعملها (محمد سعد) كده من بعد فيلم اللي بالي بالك.
في الستينات السوفييت طلعولنا حاملة الطائرات طراز موسكفا كلاس Moskva-Class ودي بتاعة كده شبه الميسترال بتاعتنا .. دي حاملة طائرات مش بتشيل غير طائرات هليكوبتر ومعندهاش تسليح غير شوية طوربيدات وصورايخ مضادة للسفن .. الحاملة دي إتبنت مخصوص عشان تستخدم في صيد الغواصات المعادية مش عشان حاجة تانية.
بعد كده السوفييت طلعولنا جيل جديد من حاملات الطائرات سموه كييف كلاس Kiev-Class ودي عبارة عن إنهم جابوا المدمرة ضربوها في الخلاط مع حاملة الطائرات Moskva-Class .. هي أبعادها أكبر شوية من الجيل الأقدم بس تسليحها أكبر زيه زي تسليح المدمرات .. هي كانت بتقدر تشيل 8 صواريخ مضادة للسفن و 72 صاروخ مضاد للطيارات .. كانت بتقدر تشيل 16 طيارة هليكوبتر و 12 طيارة من طراز Yak-38 ودي طيارات كانت بتطلع وتهبط بشكل عمودي زيها زي الطيارات الهليكوبتر .. المشكلة إن في الوقت ده المهندسين السوفييت كانوا لسه معرفوش الخلطة السحرية لإزاي يصمموا حاملات طيارات من النوع ده وتكون كويسة .. عشان كده النوع أو الجيل ده من حاملات الطائرات كانت كلها مشاكل.
بعد كده السوفييت عملوا حاملة الطائرات الأدميرال كوزينتسوف Admiral Kuznetsov اللي إحنا حنركز كلامنا عليها النهاردة .. مهم تفهم هم المهندسين السوفييت كانوا بيفكروا في إيه لما بنوها عشان لو مفهتمتش ده حتفضل مقتنع زيك زي الأمريكان إن الروس مبيعرفوش يعملوا حاملات طائرات وحتفضل مقتنع طول حياتك بفكرة غلط .. إفهم الأول وبعد كده قرر .. في الوقت اللي الأمريكان كان فكرهم إن حاملة الطائرات مش حتبقي ماشية لوحدها إنما حتبقي ضمن مجموعة قتال أو Strike Group معاها مدمرات وفرقاطات وغواصات وليلة كبيرة أوي سعادتك فالمبدأ كان إنهم يعملوا مطار عايم علي وش المياة بحيث اللي حيدافع عن المطار ده هم السفن اللي معاها .. وبناء عليه إنت مش محتاج تبني حاملة طائرات زي Iron Man اللي هي بتعمل كل حاجة وبتغسل وتكوي وتنظف البيت كمان .. السوفييت كانوا بانيين تصميمهم علي إن حاملة الطائرات دي حتمشي لوحدها وبالتالي لازم تدافع عن نفسها .. ودي كانت النقطة اللي إنت محتاج تفهمها كويس .. حاملة الطائرات الأدميرال كوزينتسوف هي الوحيدة في العالم اللي عليها 12 صاروخ P-700 Granit المضاد للسفن ودي صواريخ بعيدة المدي محطوطة في صوامع أو Silos تحت سطح السفينة .. غير كده هي عليها نظام دفاع جوي إسمه كلينوك Klinok عامل زي الS-300 أو الS-400 بس بيقدر يشيل 200 صاروخ مضاد للطيارات يعني عشان بس أحطك في الصورة إن حاملة الطائرات دي كانت ممكن تتعامل مع كل الطيارات اللي مصر بعتتها علي خط بارليف في الضربة الجوية بتاعة حرب أكتوبر 1973 .. يعني حاملة طائرات واحدة فيها منظومة دفاع جوي تعادل كل منصات الدفاع الجوي اللي إسرائيل فرشتها علي طول قناة السويس .. زود علي ده عليها 8 مدافع رشاشة قشتان Kashtan الواحد فيهم ممكن يضرب 1000 طلقة عيار 30 مليمتر في الدقيقة يعني 16 طلقة في الثانية.
الأدميرال كوزينتسوف فعلياً من كتر ما بتعطل عامله صداع في دماغ البحرية الروسية .. الحاملة دي فيها مشكلتين .. لا مشكلتين إيه قول مصيبتين .. المصيبة الأولانية هي الرفاصات بتاعتها اللي تعتبر قديمة لدرجة إن حق ربنا يعني إن الرفاصات بالمواتير بتاعتها تترمي في أي متحف .. أي حاملة طائرات في الدنيا غالباً بتمشي بمفاعل نووي صغير .. المشكلة إن اللي بيحرك رفاصات الأدميرال كوزينتسوف هي تربينة بتشتغل ب8 غلايات يعني عايزك تتخيل محطة كهرباء Steam Power Station كاملة معمولة جوه الحاملة عشان تحرك رفاصاتها وطبعاً دي مشاكلها كتير .. المصيبة الثانية هي حاجة إسمها كابلات الفرملة Arresting Cables .. بص يا سيدي .. الطيارات اللي بتطلع وتهبط من علي حاملات الطائرات عموماً بيتركبلها إكسسوار إضافي كده عبارة عن خطاف في أخر الطيارة عشان وهي بتهبط الخطاف يمسك في الكابلات اللي المفروض إنها بتمسك في الطيارة وهي بتهبط عشان تفرملها وتخليها تقف قبل ما تقع من علي سطح الحاملة .. عشان المشاكل دي كلها تتحل الحاملة حيتعملها عمرة كاملة ممكن تكمل 3 سنين وحتتعمل في الترسانة البحرية رقم 35 في مدينة إسمها ميرمانسك Murmansk فوق خالص في شمال شرق روسيا .. الكلام اللي بيتقال إن العمرة دي حتشمل إن ال8 غلايات اللي فيها حيترموا في الزبالة وحيتركب غيرهم.
في التسعينات أيام ما كنا بنسمع (محمد فؤاد) و(إيهاب توفيق) كان الروس محتاسين حوسة البلجيك عشان يحلوا مشاكل الأدميرال كوزينتسوف .. السفينة بدأت تخرف وبقوا في كل مرة تطلع بره الميناء بتاعها سواء لمناورة أو لتنفيذ مهمة عسكرية كانت بتبحر وراها سفينة محطوط فيها عدة صيانة ومواسير وقطع غيار للغلايات في حالة إنها عطلت وسط البحر .. لقوا الموضوع مش نافع فإضطروا في كل مرة الحاملة تتحرك يخلوا وراها مركب قطر Tugboat عشان تقطرها لأقرب ميناء عشان تتصلح لو عطلت.
عشان بس تعرف قد إيه الحاملة دي حالتها تصعب علي الكافر إن خلال 30 سنة قضتها في الخدمة مشتركتش في ولا مهمة عسكرية إلا في أكتوبر 2016 لما إتبعتت سوريا وخلال رحلتها عدت في بحر المانش أو القنال الإنجليزي اللي بيفصل بين فرنسا وإنجلترا .. المهم وهي بتبحر إتصورت وهي طول السكة بتطلع دخان أسود من محركاتها ولا كأنها ميكروباص ماشي علي كوبري أكتوبر وبيطلع دخان أسود من الشكمان .. لو سمعت كلام الروس فحيقولوك كفاية إفترا بقي .. خلال الفترة اللي حاملة الطائرات إشتركت في العمليات العسكرية في سوريا إتعملت 420 غارة جوية منها 117 غارة إتعملوا بليل ودي أرقام محترمة أوي .. بس علي الناحية الثانية في أول يوم خالص للعمليات يعني لسه طاقم الحاملة بيقول يا رحمن يا رحيم هوبا طيارة ميج تسعة وعشرين MiG-29K وقعت وإتدمرت في أول طلعة .. بعدها بإسبوعين طيارة سوخوي تلاتة وتلاتين SU-33 وقعت برده وهي بتهبط بسبب مشكلة في كابلات الفرملة Arresting Cables .. مشكلة الكابلات دي وسعت أوي لدرجة إن جت أوامر إن كل الطيارات اللي علي متن الحاملة تطير لقاعدة جوية روسية في سوريا وإن حاملة الطائرات الأدميرال كوزينتسوف ترجع تاني لروسيا عشان تتصلح.
عشان بس نكون صرحا وواضحين مع بعض .. الروس مش حيقدروا يعملوا حاملات طائرات جديدة بسبب إنها مكلفة أوي وهم معهمش فلوسها .. ده مبدأياً .. القوات البحرية الروسية إتصممت عشان تبقي دفاعية .. هي مش معمولة عشان تحارب بره المياة الإقليمية الروسية .. فلو الروس إفترضنا إنهم ورثوا قرشين وبقي معاهم فلوس يعملوا حاملة طائرات فهم مش حيقدروا يصمموا واحدة زي الحاملات الأمريكاني لسبب بسيط جداً هو إنهم ساعتها حيضطروا يرموا كل أسطولهم في الزبالة ويبنوا أسطول من أول وجديد بنفس شكل وتقسيمة البحرية الأمريكية .. طب يا سيدي إفترض جدلاً إن الروس بقي معاهم فلوس حيعملوا حاملة طائرات جديدة ولتكن بنفس مواصفات الأدميرال كوزينتسوف ساعتها حيلاقوا نفسهم قدام مشكلة جديدة وهي إن الحاملة دي إتصنعت من 30 سنة في أوكرانيا مش في روسيا أيام ما كانت أوكرانيا تبع الإتحاد السوفيتي .. دلوقتي أوكرانيا متخانقة مع روسيا بسبب إحتلال روسيا لحتة من أوكرانيا اللي هي شبه جزيرة القرم وبسبب الغزو الروسي لأوكرانيا .. فده معناه إن واحدة من الترسانات البحرية الروسية هي اللي حتصنع الحاملة وهي دي المشكلة إن المهندسين والفنيين الروس معندهمش خبرة بناء حاملة طائرات من الصفر .. الأوكرانيين هم اللي عندهم الخبرة دي .. فوق ده كله إن عشان ترسانة بحرية روسية تصنع حاملة طائرات فهي محتاجة تتجهز والتجهيزات دي لو إتعملت من الصفر خالص محتاجة 7 سنين زود عليهم كمان 10 سنين عشان تبني الحاملة نفسها .. كل ده هري وفلوس كتير فشخ بتتصرف.
الصين علي الناحية الثانية شرخت شوية .. اللي حصل إن السوفييت لما جم يصنعوا حاملة الطائرات الأدميرال كوزينتسوف عملوا منها إتنين منها الأدميرال كوزينتسوف و التانية إسمها فارياج Varyag وزي ما قلتلك الإتنين إتصنعوا في أوكرانيا .. لما الإتحاد السوفيتي إنهار والتورتة بتاعته إتقسمت كانت الأدميرال كوزينتسوف من نصيب روسيا وفارياج من نصيب أوكرانيا .. سنة 1998 أوكرانيا باعت فارياج للصين والصين خدتها عدلت فيها لحد ما في سنة 2012 دخلت الخدمة في البحرية الصينية وغيروا إسمها وبقت لياو-نينج Liaoning .. سنة 2013 الصين بدأت تصنع أختها حاملة طائرات جديدة لانج متصممه علي نفس الأساس بتاع الأدميرال كوزينتسوف والصينيين سموها Type 001A كإسم مؤقت .. ومتوقع إن سنة 2019 إن شاء الله الحاملة الجديدة حتخش الخدمة في البحرية الصينية بعد 6 سنين تصنيع زود عليهم قبل كده 14 سنة بيجهزوا في الترسانة البحرية اللي حتصنعها .. الوقت خلاص سرق الروس فهم معندهمش حل غير إنهم يحاولوا يصلحوا في الحاملة الوحيدة اللي حيلتهم لإنهم عارفين إنهم مش حيعملوا غيرها.
المصدر:
- مقالة بعنوان Russia is desperately trying to save its only aircraft carrier- that’s outdated and plagued with problems يعني روسيا بتحاول علي قد ما تقدر إنها تنقذ حاملة الطائرات الوحيدة اللي عندها واللي قدمت ومليانة مشاكل .. نشرت في مجلة Business Insider وده لينك المقالة الأصلية:
https://www.businessinsider.com/russia-aircraft-carrier-admiral-kuznetsov-outdated-problems-2018-4
