الطيارة F-16 .. هل هي أحسن طيارة مقاتلة تصنيع أمريكاني تتعمل؟

موضوعنا النهاردة اللي حنتكلم عنه هو المقاتلة F-16 Fighting Falcon اللي تعتبر العمود الفقري للقوات الجوية المصرية و اللي الطيارين الأمريكان بيسموها The Viper أو الأفعي .. فيه شوية حاجات لازم تكون عارفها لما تيجي سيرة المقاتلة F-16 Fighting Falcon قدامك:

• دي تعتبر واحدة من أفضل المقاتلات اللي إتصنعت و بأقل التكاليف في التاريخ و دي ميزة بيتقال عليها في الهندسة Cost Efficient يعني انت مش دافع فيها فلوس كتير بس إمكانياتها حلوة أوي بالمقارنة بسعرها .. فيه ناس رأيهم فيها إنها صحيح مقاتلة سريعة و ليها قدرة مذهلة علي المناورة و خفيفة الوزن بس عيبها إن مدي طيرانها قصير و مش بتقدر تشيل تسليح كتير مقارنة مثلاً بالمقاتلة الأكبر منها شوية F-15 Strike Eagle اللي بتمتلك محركين نفاثين مش محرك واحد زي F-16 Fighting Falcon .. لكن العيب ده بيترمي في الزبالة لما تعرف إن ثمن المقاتلة F-16 Fighting Falcon الواحدة يعتبر حوالي نص ثمن المقاتلة F-15 Strike Eagle لإن حالياً ثمن المقاتلة F-16 Fighting Falcon الواحدة يدوبك 27 مليون دولار.
• انت بتتكلم عن أكثر المقاتلات شعبية في العالم .. شركة General Dynamics اللي بتصنع المقاتلات F-16 Fighting Falcon أنتجت منها لحد دلوقتي 4500 مقاتلة منها حالياً 2700 مقاتلة في الخدمة منتشرين في 26 دولة .. المقاتلة دي تعتبر من مقاتلات الجيل الرابع و رغم إنها من تصنيع الثمانينات إلا إن التوقعات بتقول إنها لسه حتكمل معانا شوية و حتفضل في الخدمة يمكن ل10 سنين كمان علي الأقل.

لإن الحكمة بتقول الحاجة أم الإختراع ففكرة المقاتلة F-16 Fighting Falcon ظهرت بعد ما القوات الجوية الأميريكية لقت نفسها في مشكلة كبيرة بعد حرب فيتنام .. حرب فيتنام كانت تقريباً في نفس وقت حرب أكتوبر و في الفترة دي كانت القوات الجوية سواء الأميريكية أو الإسرائيلية عمودها الفقري كانت مقاتلات F-4 Phantom .. الإسرائيليين و الأمريكان إكتشفوا إن مقاتلات F-4 Phantom أضعف من نظيرتها السوفيتيه زي MiG-23 مثلاً اللي كانت القوات الجوية المصرية و الفيننامية بتستخدمها بسبب حاجتين:

• الأولي هي إن قدرة المقاتلة F-4 Phantom علي المناورة ضعيفة أوي لإنها مقاتلة تقيلة تصميمها إتبني علي مبدأ إنها لازم يبقي ليها القدرة علي إنها تشيل تسليح كتير أوي و ده خلاها بطة بلدي في المناورات الجوية و في معارك الإشتباك المباشرة مع المقاتلات المعادية و اللي بيسموها في الطيران Dogfighting أو خناقة الكلاب.
• الثانية إن مقاتلات F-4 Phantom كانت فيها إضافة جديدة لانج و هي القدرة علي إطلاق صواريخ جو-جو بعيدة المدي .. المشكلة إن دي تكنولوجيا كانت جديدة و مش متجربة و ظهرت ليها مشاكل كتير أوي.

ده خلي إن فيه تكتل بدأ يظهر جوه قيادة القوات الجوية الأميريكية إتسمي مافيا المقاتلات Fighter Mafia و دول عدد من قادة سلاح الجو الأميريكي بدأوا يقولوا إن المبدأ بتاع تصميم المقاتلات الأميريكية فيه حاجة غلط .. التكتل ده بدأ ينادي بإن جه الوقت إن القوات الجوية تشتغل علي تصميم مقاتلات خفيفة الوزن و رخيصة السعر يكون هدفها إنها تطير بسرعات عالية أوي بهدف إنها تستخدم في المعارك الجوية Dogfighting .. وجهة نظرهم إن في الفترة دي كانت القوات الجوية الأميريكية شغالة فعلاً في مرحلة تطوير فكرة المقاتلة F-15 Strike Eagle و دي مقاتلة تعتبر تطوير لF-4 Phantom في إنها مقاتلة تقيلة بمحركين نفاثين تصميمها بيخليها تشيل تسليح كتير أوي بس برده التصميم أهمل شوية قدرة المقاتلة علي المناورة .. صوت الناس بتوع مافيا المقاتلات بدأ يعلي و يتسمع لما قيادة القوات الجوية الأميريكية لقت إن تكلفة المقاتلة F-15 Strike Eagle بقت أعلي بكتير من المتوقع و إن فعلياً بقي شبه مستحيل إنهم يطلبوا شراء عدد كبير منها عشان كل الأسراب المقاتلة الأميريكية المنتشرة حول العالم يبقي من ضمنها عدد من المقاتلات الحديثة دي … هنا حسبة الفلوس أثبتت إن الناس بتوع Fighter Mafia عندهم حق .. السؤال دلوقتي .. نبدأ نتصرف إزاي؟

القوات الجوية الأميريكية طلبت من الشركات اللي شغالة في مجال تصنيع المقاتلات إنهم يبعتوا Prototypes أو نسخ أولية لمقاتلات تبقي سريعة أوي و ليها قدرة عالية علي المناورة و تكون بمحرك واحد و إتعملت لجنة لتقييم الPrototypes اللي إتقدمت .. سنة 1974 اللجنة دي وصلت إن فيه تصميمين بس هم اللي ينفعوا:

• الأول كان Prototype من تصنيع شركة Northrop إسمها YF-17
• الثاني كان Prototype من تصنيع شركة General Dynamics و إسمها YF-16

بعد إختبارات مكثفة اللجنة قالت إن الPrototype اللي إسمها YF-16 هي الأنسب و اللي قرروا يشتغلوا عليها .. الPrototype الثاني اللي هو YF-17 القوات البحرية الأميريكية أعجبت بيها جداً و بدأت تطورها لحد ما بقت المقاتلات F/A-18 Hornets اللي شغالة حالياً علي متن حاملات الطائرات الأميريكية .. مرحلة التطوير و التصنيع إستمرت من سنة 1974 لحد سنة 1980 و دي السنة اللي تم فيها إنتاج أول مقاتلة F-16A و في نفس السنة برده أنتجت نسخة تانية هي F-16B .. الفرق إن F-16B كابينة القيادة فيها كرسيين واحد للطيار و الثاني للملاح و عشان كده بيتقال عليها Two-Seat F-16B .. النسخة اللي فيها كرسي واحد اللي هي F-16A إتصممت بحيث ركزوا أوي علي إن قدرتها علي المناورة تبقي عالية و عشان كده خلي بالك من نقاط التصميم دي:

• زي ما قلتلك المقاتلة دي فيها محرك نفاث واحد بس موديل F100 من تصنيع شركة Pratt & Whitney و حتلاحظ إن فتحة دخول الهواء حتلاقيها تحت جسم المقاتلة .. النقطة دي مع معلومة إن كتلة المقاتلة F-16A أساساً صغيرة فانت بتعلي حاجة إسمها Thrust to Weight Ratio أو نسبة قوة الدفع بالنسبة لوزن المقاتلة .. ده بيخلي المقاتلة F-16 Fighting Falcon و هي علي إرتفاعات عالية أوي بتقدر تطير بسرعات توصل ضعف سرعة الصوت.

• لو أخدت بالك حتلاقي إن فيه زعانف صغيرة طالعه من جسم المقاتلة من تحت بيسموها Strakes .. لو أخدت بالك كمان من شكل الجناح فحتلاقيه عامل شكل دلتا .. الحاجتين دول مع بعض بيحسنوا أوي من Aerodynamics أو قدرة المقاتلة علي المناورة و بيخلوها تقدر تلف حول محورها كذا مرة ورا بعض.

• أهم نقطة في تصميم المقاتلة F-16 Fighting Falcon هو شكل قمرة القيادة اللي شبه الفقاعة و دي فكرتها إنك تدي للطيار Panorama View لساحة المعركة .. كمان لإن كرسي الطيار مايل بزواية 30 درجه و دي أنسب زاوية علشان جسم الطيار يقدر يستحمل قوة الجاذبية لما المقاتلة بتطير بسرعات عالية و بتعمل مناورات معقدة .. لسنين طويله كانت المقاتلة F-16 Fighting Falcon الوحيدة علي مستوي العالم اللي بتقدر تعمل مناورة إنها تزود من Acceleration أو العجلة بتاعتها ل9 أضعاف الجاذبية الأرضية .. مكنتش فيه مقاتلة في العالم بتقدر تعمل المناورة دي لحد ما شركة Lockheed Martin أنتجت المقاتلة F-22 Raptor .. ده يفسرلك كمان ليه كل فرق الإستعراضات الجوية بتستخدم المقاتلات F-16 Fighting Falcon.

• لما جم يصمموا المقاتلة F-16 Fighting Falcon حبوا يزودوا أوي من قدرتها علي المناورة بحيث تتفوق علي أي مقاتلة تانية في العالم .. عشان يوصلوا لده تعمدوا في تصميمها إنها تبقي Aerodynamically Unstable يعني غير مستقرة هندسياً عن طريق إنهم زودوا فيها برنامج مكنش موجود قبل كده إسمه Fly-by-Wire Control Scheme .. بمعني .. عصاية التحكم اللي بيطير بيها الطيار شبه الدريسكيون بتاع عربيتك .. زي ما فيه حاجه إسمها إسكاترة اللي بتنقل حركة الدريكسيون للعجل فيه كمان نظام ميكانيكي اللي هو إما بأسلاك كهرباء أو بدواير هيدروليك عشان المقاتلة تعمل اللي الطيار بيطلبه .. المختلف في المقاتلة F-16 Fighting Falcon هو إن فيه برنامج كومبيوتر هو اللي بيترجم اللي الطيار عايز يعمله.

• حاجة كمان إن زي ما العربيات فيها Power Steering إن يبقي عندك دايرة هدروليك أو موتور كهرباء عشان و انت بتلف الدريكسيون يبقي خفيف في إيدك ففي المقاتلات F-16 Fighting Falcon الJoystick أو عصاية التحكم في إيد الطيار حطولها نظام جديد إسمه Hands-On Throttle and Stick إختصاراً بيسموه HOTAS بيخلي التحكم في الJoystick أسهل بكتير .. و علي فكرة من بعدها و نظامي Fly-by-Wire  Control Scheme و HOTAS بقوا مستخدمين في كل المقاتلات الحديثة.

الحقيقة إن سبب عشق الطيارين المقاتلين حول العالم للمقاتلة F-16 Fighting Falcon مش بس قدرتها المذهلة علي المناورة إنما كمان إنها إتصممت بحيث تبقي مقاتلة متعددة المهام Multirole Fighter .. تصميم المقاتله بيخلي عندها حاجة إسمها Headpoints أو نقاط تحميل و دي نقاط القوة في الجناحين و جسم المقاتلة اللي ينفع يتركب عليهم صواريخ و قنابل .. المقاتلة F-16 Fighting Falcon عندها 11 مكان من اللي بيتقال عليهم Headpoints ينفع تركب عليهم أكثر من 8000  كيلوجرام إما ذخيرة أو معدات تشويش أليكتروني أو صواريخ جو-جو موجهة بالليزر زي Maverick أو قنابل موجهة بالليزر .. ده غير إن فيها مدفع رشاش عيار 20 مليمتر من طراز فولكان Vulcan بيفيد أوي في معارك الDogfighting.

من الحاجات الغريبة أوي إن لما تكتل Fighter Mafia كان بيحارب عشان يقنعوا قيادة القوات الجوية الأميريكية إنهم يصنعوا مقاتلة بمواصفات ال F-16 Fighting Falcon وقتها تكنولوجيا صواريخ جو-جو الموجهة بالليزر كانت لسه مولوده و أثبتت فشلها في المقاتلات F-4 Phantom .. بس في الوقت لما إتصنعت أول مقاتلة F-16 Fighting Falcon كانت تكنولوجيا صواريخ جو-جو الموجهة بالليزر إتحسنت كتير أوي .. زود علي كده إن الرادار الموجود في المقاتلة F-16 Fighting Falcon من طراز APG-66 Doppler و كانت أول مرة يتعمل خوذة طيار فيها شاشه شبه شاشه الكومبيوتر … كل ده خلي المقاتلة دي تحفة هندسية متكررتش لحد دلوقتي و ده بان أوي لما المقاتلة F-16 Fighting Falcon إتجربت في ميدان القتال:

• يوم 7 يونيو سنة 1981 يعني بعد دخولها للخدمة بسنة واحدة .. القوات الجوية الإسرائيلية شنت غارة ب8 مقاتلات F-16 Fighting Falcon علي مفاعل تموز العراقي في عملية عسكرية مشهوره اوي إتسمت العملية أوبرا Operation Opera و دي العملية اللي أدت لإجبار الرئيس العراقي وقتها (صدام حسين) الله يرحمه إنه يوقف البرنامج النووي العراقي.

• في يونيو 1982 حصلت سلسلة من الإشتباكات الجوية علي مدي 3 أيام بين القوات الجوية الإسرائيليه و السورية أستخدمت القوات الجوية الإسرائيلية مقاتلات F-15 Strike Eagle و F-16 Fighting Falcon و القوات الجوية السورية إستخدمت مقاتلات MiG-21 و MiG-23 و إنتهت المعارك دي بإسقاط 44 مقاتلة سورية من غير أي خسائر إسرائيلية.

• في حرب الخليج الثانية سنة 1991 مقاتلات F-16 الأميريكية نفذت أكثر من 13,000غارة جوية علي أهداف عراقية من ضمنها أكبر غارة جوية في العصر الحديث اللي إستهدفت بغداد و خلال الغارة دي فيه مقاتلتين F-16 أميريكيتين أسقطوا و تم أسر الطيارين .

• بعد حرب الخليج ما خلصت فرضت القوات الجوية الأميريكية منطقة حظر طيران فوق المجال الجوي العراقي و في مرة حصل إشتباك بين مقاتلة F-16 أميريكية مع مقاتلة MiG-25 عراقية و قدرت الF-16 إسقاط الMiG-25 بصاروخ جو-جو بعيد المدي من طراز AIM-120 Scorpion و دي كانت أول مرة الF-16 Fighting Falcon تسقط مقاتلة MiG-25 روسية.
• في حرب البلقان في التسعينات مقاتلات F-16 أميريكية و بلجيكية إشتبكت و أسقطت عدد من المقاتلات الصربية و حصل فعلاً إن مقاتلتين F-16 تم إسقاطهم بصواريخ أرض-جو صربية.

بداية من 1985 دخلت للخدمة نسختين جداد من مقاتلات F-16 Fighting Falcon اللي هم F-16C و F-16D الفرق بينهم و بين بعض إن F-16C بكرسي واحد بس F-16D بكرسيين .. أما الفرق بينهم و بين النسخ الأقدم اللي هم F-16A  و F-16B هو إن النسختين الأحدث إتعملهم شوية تطوير زي إنهم حطوا شاشات مصنوعة من الكريستال السايل Liquid Crystals و الرادار القديم إتشال و إتحط مكانه رادار أحدث موديل APG-68 و ده خلي النسخ الأحدث تقدر تستخدم صواريخ جو-جو حديثة زي AIM-7 Sparrow و AIM-120 AMRAAM .. في السنين اللي بعد كده الموديلات F-16C و F-16D إتعمل عليهم تطوير تاني إنه إتركب فيها صواريخ جو-جو من طراز AIM-9X Sidewinder و دي صواريخ فيها خاصية Heat Seeking يعني الصاروخ بيطارد المقاتلة المعادية بإنه بيجري ورا حرارة محركاتها مش زي الصواريخ القديمة إنك كطيار لازم تفضل منشن علي المقاتلة اللي قدامك لحد ما تضربها بصاروخ بيطير في خط مستقيم.

من المعلومات اللي ممكن تبقي غريبة عليك إن أحدث نسخة من مقاتلات F-16 Fighting Falcon مش موجودة ضمن سلاح الجو الأميريكي ولا حتي الإسرائيلي … حضرتك الإمارات العربية المتحدة طلبت شراء مقاتلات F-16E و F-16F و دول أحدث نسختين .. الفرق بينهم و بين النسخ الأقدم هو الأتي:

• خزان الوقود تصميمه جديد و سعته أكبر و بالتالي انت تقدر تزود مدي طيران المقاتلة F-16 من غير ما تخسر حاجة من قدرتها علي المناورة أو سرعتها.

• رادار جديد لانج من طراز APG-80 Active Electronically Scanned Array و إختصاراً بيسموها AESA.

المصدر:

مقالة بعنوان Why Russia and China Still Fear the F-16 Fighting Falcon نشرت في مجلة The National Interest الأميريكية و ده لينك المقالة الأصلية:
http://nationalinterest.org/blog/the-buzz/why-russia-china-still-fear-the-f-16-fighting-falcon-21976