تابعونا

الميركافا .. دبابة مثالية جداً لإسرائيل بس مش لحد تاني.

فيه ناس كتير بتتخيل سيناريوهات إن لو حصلت حرب بين مصر و إسرائيل إيه اللي ممكن يحصل؟ .. تخيل معايا إن حرب أكتوبر 1973 قامت دلوقتي بحيث حصلت نفس معركة الدبابات الرهيبة اللي دارت في سيناء تاني يوم الحرب.

20 فبراير، 2018 4.9 ألف

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/j37sbzfucerp?utm_source=clipboard&utm_medium=text&utm_campaign=social_sharing

موضوعنا النهاردة اللي حنتكلم عنه هو الدبابة الإسرائيلية ميركافا Merkava و دي كلمة عبرية معناها الحنطور .. اه و الله زي ما بقولك كده .. تخيل إن الجيش المصري صنع مدرعة ولا دبابة و سماها الحنطور و فكر في كم الكوميكس اللي حتطلع تريقة علي الإسم .. بس الحقيقة إن الميركافا تعتبر حالة مميزة أوي إن إزاي دولة تلاقي نفسها محتاجة سلاح يلبي إحتياجات محددة و ظروف معينة فتبدأ بدل ما تدور علي حد تشتري منه السلاح ده من بره فتقرر إنها تصنعه بنفسها .. ده يخليك إنك لما تيجي تبص علي إمكانيات الميركافا تلاقي إنها تقريباً نفس الإمكانيات العامة للدبابات الحديثة اللي بتتباع في السوق زي دبابات Leopard 2 الألمانية أو M1A1 Abrams الأميريكية بس في نفس الوقت حتلاقي فيها شوية مواصفات و إمكانيات مش موجودة في أي دبابة تانية و ده لإن زي ما قلتلك الإسرائيليين صمموا دبابة ليهم هم بس بالإحتياجات اللي هم عايزينها و مكنش فكرهم إنهم يصنعوا دبابة تتباع بره.

ناس كتير متعرفش هو إزاي فكرة الميركافا إتولدت؟ و الحقيقة إن دي قصة محتاجه تتحكي .. البداية خالص كانت فكرة في دماغ جنرال في الجيش الإسرائيلي إسمه (إسرائيل تال Israel Tal) كان من ضمن الناس اللي حضرت معركة الدبابات الرهيبة اللي قامت تاني و تالت يوم حرب أكتوبر 1973 .. تجربة الحرب اللي الجنرال ده شافها بعينه خلته يفكر إن إسرائيل محتاجة يبقي عندها دبابة أهم حاجة فيها هي حماية أرواح الطاقم بتاعها .. الرجل ده فضل يسعي في الموضوع لحد ما فعلاً رؤيته دي تحولت لحقيقة سنة 1978 يعني بعد 5 سنين بس من نهاية الحرب لما دخلت الدبابة Merkava-I الخدمة و الإسرائيليين جربوها في حرب لبنان سنة 1982 اللي هم بيسموها عملية سلام الجليل Operation Peace for Galilee .. الحقيقة إن دي كانت تجربة مهمة أوي لتقييم الدبابة خصوصاً إنها دخلت في معارك دبابات مباشرة ضد دبابات سورية من طراز T-62 الروسية الصنع .. الحرب دي بينت شوية عيوب في تصميم Merkava-I أهمها إن درعها كان ضعيف و ده كان سبب إن كتير منها إتدمر في الحرب .. ده خلي الإسرائيليين يبدأوا يشتغلوا علي الموديل الجديد Merkava-II اللي أهم ميزة فيها إن الدروع بتاعتها بقت أقوي .. في التسعينات الإسرائيليين نزلوا الدبابة Merkava-III و دي إتعمل عليها تطوير كبير علي المدفع الأساسي اللي هو عيار 120 مليمتر .. و مؤخراً دخلت للخدمة الدبابة Merkava IV اللي فيها إضافات مهمة زي إنهم ركبوا عليها محرك قوي و إتحطلها نظام جديد إسمه Active Protection System أو APS و ده نظام إتحط علي دبابات M1A2 Abrams الأميريكية و T-14 Armata الروسية.

الجنرال (إسرائيل تال Israel Tal) الأب الروحي لمشروع دبابة الميركافا Merkava.

فيه ناس كتير بتتخيل سيناريوهات إن لو حصلت حرب بين مصر و إسرائيل إيه اللي ممكن يحصل؟ .. تخيل معايا إن حرب أكتوبر 1973 قامت دلوقتي بحيث حصلت نفس معركة الدبابات الرهيبة اللي دارت في سيناء تاني يوم الحرب .. دلوقتي العمود الفقري لسلاح الدبابات و المدرعات المصري هو دبابات M1A1 Abrams الأميريكية و العمود الفقري لسلاح الدبابات الإسرائيلي هو دبابات ميركافا Merkava .. اللي حنعمله النهاردة إننا حنقارن بين الدبابتين زي ما إنت بالضبط لما تكون محتار تشتري Smartphone فتبدأ تقارن بين بين الموديلات اللي إنت بتفكر تشتريها بس عشان تقارن بين دبابتين فإحنا نقينا 3 حاجات نقيس عليهم و ال3 حاجات هم:

  • القدرة التدميرية Firepower.
  • القدرة علي المناورة و سهولة الحركة Mobility.
  • الدروع الواقية Armor.

مهم تكون فاهم إن الدبابة M1A1 Abrams واخدة سمعة إسطورية رغم إنها مبنية علي تصميم إلي حد ما قديم لإنها إتصنعت في الثمانينات و السمعة دي لزقت في دماغ العالم لما شاف إنها إزاي سحقت إسطول الدبابات العراقية في حرب الخليج الثانية سنة 1991 .. الفكرة إن العراقيين كان عندهم أسطول كبير من الدبابات السوفيتية و إتعرضوا لخسائر فادحة من غير ما يقدروا يدمروا دبابة أميريكية واحدة .. اللي الناس مقدرتش تفهمه إن سبب أساسي في تفوق الM1A1 Abrams كان إن الغطاء الجوي الأميريكي بيدمر كتائب الدبابات العراقية قبل ما حتي تشتبك مع الدبابات الأميريكية و عشان كده سمعة الدبابة M1A1 Abrams بدأت تبان علي حقيقتها لما إتعرضت لخسائر محترمة في حرب العراق سنة 2003 و في اليمن لما كتير من الدبابات السعودية من نفس الطراز إتدمرت .. حتي لو قلنا إن الدبابة M1A1 Abrams مش هي الدبابة السوبر اللي مجاش زيها زي ما الأمريكان ما بيسوقوا ليها بس مينفعش ننكر إنها تعتبر نقلة في تصميم الدبابات و مفيش دبابات كتير في السوق دلوقتي ليها نفس إمكانياتها .. خلينا منطولش عليك و نخش في المقارنة علي طول بين الدبابتين Merkava-IV و M1A1 Abrams.

الدبابة الإسرائيلية ميركافا 4 باراك Merkava IV Barak العمود الفقري لسلاح المدرعات الإسرائيلية
الدبابة الأميريكية M1A1 Abrams اللي تعتبرالعمود الفقري لسلاح الدبابات المصري.

أولاً .. القدرة التدميرية Firepower:

  • من الحاجات المشتركة بين الإتنين هو إن ليهم نفس المدفع الأساسي عيار 120 مليمتر اللي دانته تقدر تدمر دروع أي دبابة سوفيتية قديمة .. الفرق إن الميركافا ملهاش نفس دانات المدفع اللي معمولة باليورانيوم المستنفذ Depleted Uranium عكس دبابات M1A1 Abrams و ده بيخليها تقدر تخترق دروع الدبابات الروسية الحديثة و ده سببه إن زي ما قلتلك في البداية الميركافا متصممة علي أساس إحتياجات الجيش الإسرائيلي اللي كل مواجهاته في الفترة اللي فاتت كانت إما قصاد حزب الله أو حماس و الإتنين معندهمش دبابات عشان يخلي الإسرائيليين يفكروا يخلوا الميركافا تقدر تستخدم الدانات المعمولة باليورانيوم المستنفذ .. فلو إنت بتتكلم عن مواجهة بين دبابة ميركافا و دبابة M1A1 Abrams فالM1A1 Abrams ليها الأفضلية في حالة إنها أستخدمت دانات باليورانيوم المستنفذ .. غير كده فالإتنين ليهم نفس الإمكانيات.
  • الدبابتين سواء الميركافا أو M1A1 Abrams فيهم حساسات أو Sensors متقدمة أوي و الإتنين فيهم أنظمة إطلاق نار Fire Control Systems حديثة و الإتنين فيهم مدفع رشاش بيتحكم فيه عن بعد عشان متعرضش حياة أي حد من طاقم الدبابة لخطر إنه يتعرض لنيران العدو عشان و هو قاعد جوه الدبابة بيقدر عن طريق شاشة و Joy Stick زي بتاع الVideo Games يتحكم في المدفع الرشاش.
المدفع الرشاش الكبير شوية اللي علي الشمال ده لو خدت بالك فيه سلكين طالعين منه .. السلكين دول هم بتوع التحكم في الJoystick اللي بيمسكها عسكري المدفع و هو باصص علي شاشة كومبيوتر بحيث ميخاطرش بحياته و يطلع يبص من بره الدبابة.
  • فيه ميزة في الميركافا مش موجودة في أي دبابة حديثة هو إن فيها مدفع هاون اللي بيسموها Mortar بيقدر يطلق قذائف عيار 60 مليمتر بحيث إن لو مثلاً الدبابة واقفة جنب تل و فيه شوية جنود من العدو علي الناحية الثانية خالص من التل فإنت بسهولة أوي طاقم الميركافا يقدر يطلق عليهم دانات هاون من غير ما حتي يكون شايفهم .. الميزة دي خلت إن الدبابة بقي عندها وسيلة تانية غير المدفع الأساسي يقدروا يستخدموه ضد العدو لإن متنساش إن الدانة بتاعة المدفع الأساسي للدبابة القدرة التدميرية بتاعته كبيرة أوي و لازم عشان تستخدمه الهدف يكون قصادك و منشن عليه.
  • فرق تاني هو إن الميركافا بتقدر إنها بدل ما تطلق دانات من المدفع بتاعها فهي بتقدر تطلق صواريخ مضادة للدبابات و دي ميزة مش موجودة في الM1A1 Abrams .. الميركافا كمان بتستخدم صواريخ اسمها LAHAT و دي صواريخ بتقدر إنك تطلقها ضد الدبابات و ضد الطيارات الهليكوبتر و ليها مدي طيران كبير أوي أكتر بكتير من المدي اللي بتقدر توصله دانات المدفع .. بس في نفس الوقت دي ميزة تقدر تقول عليها إنها إكسسوار ملوش لازمة و مش مؤثر لدرجة إن الأمريكان مثلاً رافضين يحطوه في دبابات M1A2 Abrams و الألمان مش حاطينه في دبابات Leopard 2 و حتي الروس دباباتهم الجديدة T-14 Armata مفيهاش الميزة دي.
ملخص تسليح الميركافا .. مدفع أساسي عيار 120 مليمتر .. مدفع رشاش عيار 0.5 بوصة Browning M2 .. مدفع رشاش تاني عيار 7.62 مليمتر من تصنيع شركة FN-FAL البلجيكية .. قاذف دخان Smoke Grenades للتمويه.

ثانياً .. القدرة علي المناورة و سهولة الحركة Mobility:

  • الأمريكان لما جم يصمموا الدبابة M1A Abrams كانوا بيفكروا إنهم يعملوا دبابة بتقدر تشتبك مع دبابات معادية في ميدان مفتوح زي الصحراء مثلاً و ده فعلاً اللي حصل في حربي الخليج الثانية و الثالثة سواء عملية عاصفة الصحراء Desert Storm أو حرب العراق اللي الأمريكان بيسموها عملية تحرير العراق Iraqi Freedom .. العكس مع الميركافا .. الميركافا متصممة علي أساس الإحتياجات بتاعة إسرائيل يعني حرب دفاعية ضد جيش غازي أو عمليات ضد جماعات مسلحة قاعدة في مدن زي حزب الله و حماس مثلاً .. ده يفرق فيه إيه؟ .. يفرق في إن إذا كانت السرعة القصوي لM1A1 Abrams هي حوالي 63 كيلومتر في الساعة فالميركافا يدوبك أخرها تجيب 50 كيلومتر في الساعة بس العيب ده بدأ يتعالج في الدبابة Merkava-IV اللي إتحطلها موتور وحش 1500 حصان بيقدر يديلها سرعة قصوي 60 كيلومتر في الساعة. 
  • نقطة مهمة و هي إن M1A1 Abrams الموتور بتاعها تربيني يعني مش زي موتور العربية فده بيخليه بيستهلك كمية وقود جبارة و نفس نفس الوقت مداه مش كبير .. يعني مثلاً الدبابة M1A1 Abrams أخرها تمشي 397.5  كيلومتر بعد تملالها التانك بس الميركافا بتقدر تمشي 465 كيلومتر  .. الإسرائيليين بيقولوا إن السوست و المساعدين اللي هم بيشكلوا نظام التعليق Suspension System بتاع الميركافا متصمم بحيث تقدر تمشي في المناطق الجبلية الوعرة عكس الM1A1 Abrams اللي متصممة عشان تمشي في أرض مسطحة.
  • فيه ميزة موجودة في الميركافا و مش موجودة في أي دبابة حديثة تانية هي إن الجزء اللي بيتخزن فيه الذخيرة بتقدر بسهولة أوي تحوله لمكان فاضي يشيل 4 أفراد .. الفكرة إن لو عندك دبابة ميركافا إتصابت او إتعطلت فإنت ممكن تحط الطاقم بتاعها جوه دبابة تانية.

ثالثاً .. الدروع الواقية Armor:

لما الأمريكان في الثمانينات عملوا الدبابة M1A1 Abrams كانت أول مرة يتعمل الدرع بتاعها من حاجة إسمها Composite Material اللي هي مادة جديدة إتعملت بإنك ضربت مواد تانية في الخلاط و الComposite Material اللي إتعملت منها الدبابة سموها تشوبام Chobham .. دي كانت نقلة في مجال هندسة دروع الدبابات .. الدروع الأمامية للدبابة لما نزلت كانت قوية أوي و مش بتتأثر بأي من قذائف الصواريخ المضادة للدبابات اللي بتتشال علي الكتف زي RPG .. حتي دانات مدافع الدبابات T-62 السوفيتية القديمة عيار 125 مليمتر اللي كانت القوات العراقية معتمدة عليها خلال حرب الخليج الثانية سنة 1991 مكنتش بتأثر في الدروع بتاعة الM1A1 Abrams .. دلوقتي الوضع إتغير .. دانات عيار 125 مليمتر برده اللي في الدبابات الروسي الحديثة بتقدر إنها تخترق دروع الM1A1 Abrams لو أُطلقت عليها من مسافات قصيرة.

لما الإسرائيليين عملوا الميركافا في نفس التوقيت تقريباً .. بفكرك إن أول إستخدام للميركافا Merkava-I كان في حرب لبنان سنة 1982 فالإسرائيليين مكنش لسه عندهم فكر عن تكنولوجيا Composite Material و مكنوش يعرفوا عنها حاجة .. فكر الدروع بتاع الإسرائيلين كان إن برج الدبابة يبقي بزاوية حادة زي ما إنت شايف في الصور عشان زاوية الميل دي بتخلي سمك الدرع بتاع الدبابة يزيد شوية .. دلوقتي Merkava-IV فيها دروع معمولة من Composite Material .. و إن كان فيه رأي بيقول إن الدروع بتاعة M1A2 Abrams عشان معمولة من اليورانيوم المستنفذ فهي أقوي بكتير من الدروع بتاعة الميركافا  .. ده معناه إن لو حصلت مواجهة مباشرة بين M1A1 Abrams و بين الميركافا فغالباً الغلبة حتكون لM1A1 Abrams بس مش ده اللي بيفكر فيه الإسرائيليين دلوقتي.

زاوية الميل الكبيرة في برج الدبابة الميركافا سببه إنه يحميها من قذائف الدانات بتاعة الدبابات المعادية لإن الSlope أو الميل ده بيكبر من سمك دروعها.

فكر فيها كده .. مين أقوي جيش في المنطقة العربية؟ .. مصر .. مين أكثر جيش في العالم العربي بيملك دبابات M1A1 Abrams؟ .. برده مصر .. بس العلاقات بين مصر و إسرائيل عمرها ما كانت بالدفء ده ولا بالحلاوة بتاعة الأيام دي .. خلينا نكون صرحاء مع بعض إن من وجهة نظر السلطات المصرية دلوقتي فإسرائيل تحولت من عدو أزلي لشريك مرحلة .. ده مخلي الإسرائيليين مش قلقانين من خطر M1A1 Abrams قد ما هم قلقانين من خطر الصواريخ المحمولة علي الكتف و خطر العبوات الناسفة و الحقيقة إنك لو بصيت علي الأمور من وجهة نظرهم حتلاقي إن عندهم حق.

سنة 2006 أحب أفكرك إن إسرائيل دخلت حرب مفتوحة مع حزب الله في لبنان و في الحرب دي إسرائيل أستخدمت موديلات متنوعة من الميركافا سواء Merkava II أو Merkava III أو Merkava IV .. إسرائيل خلال الحرب دي إتصابلها 50 دبابة سواء بصواريخ مضادة للدبابات أو بعبوات ناسفة و من أصل 50 دبابة إتصابوا فيه 21 دبابة دروعها إتخرمت و فيه 6 دبابات إتدمرت بالكامل .. لو إنت بتطلع لسانك للإسرائيليين و بتقول خلي الميركافا تنفعكم فإحب أقولك إن السعودية اتعرضت لخسائر فادحة برده في حرب اليمن و كتير من دبابات M1A1 Abrams بتاعتها إتدمرت بسبب الصواريخ المضادة للدبابات اللي إستخدمها المتمردين الحوثيين.

بعد حرب لبنان سنة 2006 الإسرائيليين نزلوا موديل جديد من الميركافا سموه Merkava IVM Windbreaker و الجديد في الموديل ده إنهم ركبوا عليه نظام حماية إسمه Trophy Active Protection System .. البتاع ده فكرته إن لو أنا معايا مدفع RPG و ضربت صاروخ علي دبابة ميركافا ففيه رادار علي الدبابة بيلقط الصاروخ و هو جاي و بيحسب الصاروخ جاي منين؟ و مساره إيه؟ و بيرمي عليه حاجة زي ألواح معدن صغيرة عشان الصاروخ يخبط فيها و ينفجر بعيد قبل ما يقرب من الدبابة .. مش كده و بس .. الرادار بيقول للطاقم الصاروخ ده جه منين عشان اللي مسئول عن المدفع الرشاش يوجه نيران مدفعه ناحيتي .. خلي بالك إن Trophy Active Protection System مش مجرد فكرة جايبينها من أفلام الخيال العلمي لإن ده موجود فعلاً و مطبق و إتجرب فعلاً في معارك .. عندك مثلاً الإسرائيليين جربوه في حربهم سنة 2008 و سنة 2014 ضد حركة حماس في قطاع غزة و أثبت إنه بيقدر يحمي الدبابة من صواريخ RPG-29 و AT-14 Kornet .. الأمريكان عجبتهم فكرة Active Protection System بس هم محتارين بين إنهم يشتروا نظام Trophy الإسرائيلي ولا يطوروا من نظام تاني هم اللي عاملينه إسمه Quick Kill APS؟

طريقة شغل نظام Trophy .. الرادار بيلقط إن فيه قذيفة أو صاروخ جاي علي الدبابة .. الكومبيوتر بيبدأ يرسم المسار اللي القذيفة أو الصاروخ بيطير عليه و بيبدأ يقيم هل القذيفة أو الصاروخ ده بيشكل تهديد لحياة الطاقم أو لا .. لو الإجابة اه فهو بيرمي أجسام مضادة عشان تخبط في الصاروخ و هو جاي.

في بداية المقال قلتلك إن الفكر اللي إتبني عليه تصميم الميركافا زي ما حطه الجنرال (إسرائيل تال Israel Tal) هو إنك توفر أقصي حماية ممكنة لطاقم الدبابة و عشان كده الميركافا فيها شوية حاجات في تصميمها إنت ممكن تشوفها غريبة شوية:

  • علي عكس أي دبابة حديثة إنك بتحط موتور الدبابة ورا فالميركافا تصميمها إن موتورها قدام و ده فكرته إنه يوفر حماية إضافية لطاقم الدبابة من أي قذائف دبابة معادية .. نفس فكرة إنك تحط موتور العربية قدام إنك عشان لو خبطت في حاجة لا قدر الله فالشاسيه الأمامي و الموتور يمتص جزء من الصدمة قبل ما توصلك كسواق.
  • جسم الدبابة من ورا فيه فتحة هروب لطاقم الدبابة في حالة الخطر و كمان عشان لو فيه عندك جنود مصابة عايز تدخلهم لجوه الدبابة من غير ما تضطر انك تشيلهم لفوق البرج و تدخلهم من الفتحة العلوية في البرج.
فتحة الهروب في مؤخرة الدبابة الميركافا و اللي مش حتلاقيها في أي دبابة حديثة تانية.
  • لو أخدت بالك ففيه زي ما يكون فيه شبكة من الكرات المعدنية بتغطي الفراغ الرفيع بين البرج و بين جسم الدبابة .. الفراغ ده أخطر جزء في الدبابة و لو واحد معاه صاروخ RPG قدر إنه يطلق صاروخ في الفراغ ده فإنت تقدر تقول علي اللي في الدبابة الله يرحمهم .. عشان كده الشبكة دي وظيفتها إنها تخلي الصاروخ ينفجر فيها قبل ما يوصل فعلياً للفراغ ده.
الكور المعدنية اللي نازلة من برج الدبابة دي وظيفتها إنها تحمي الفراغ الصغير بين البرج و جسم الدبابة نفسه و اللي يعتبر أضعف حتة في جسم الدبابة كلها.
  • فيه شوية حاجات إنت ممكن تشوفها تافهة و ملهاش لازمة زي مثلاً إن الميركافا فيها نظام تكييف و فيها حمام صغير عشان طاقم الدبابة ميخاطرش إنه يخرج بره الدبابة عشان يعمل حمام.

الفكرة كلها إن سواء M1A1 Abrams أو الميركافا فالإتنين إتصمموا عشان يلبوا إحتياجات مختلفة .. الM1A1 Abrams إتعملت عشان حرب دبابات مفتوحة في حين إن الميركافا إتعملت عشان عمليات مكافحة الإرهاب و حرب المدن .. فعلياً صعب أوي تقارن الإتنين ببعض .. في الوقت اللي الM1A1 Abrams إتبنت بإستخدام تكنولوجيا متطورة زي اليورانيوم المستنفذ و دي تكنولوجيا مش متاحة أوي للميركافا بس الميركافا فيها إضافات لحماية الطاقم بتاعها مش موجودة في M1A1 Abrams .. يمكن النقص الوحيد اللي في M1A1 Abrams هو إن مفيهاش حاجة تحميها من الصواريخ المحمولة علي الكتف زي مثلاً أنظمة APS و لو النقص ده إتعالج فإنت كده قدرت تتفوق في كل حاجة علي دبابات ميركافا .. لو معركة الدبابات بتاعة حرب أكتوبر إتكررت تاني بكرة الصبح اللي هي معركة بين دبابات في ميدان مفتوح فده هو السيناريو المثالي اللي دبابات M1A1 Abrams إتصممت عليه و ده حيخلي كفة الميزان تميل ناحية الجيش المصري .. بس لو بتتكلم عن حرب مدن و شوارع و مناطق جبلية وعرة فكده إنت بتحكم علي M1A1 Abrams بالموت لإن ده هو السيناريو المثالي لتصميم الميركافا.

المصدر:

مقالة بعنوان Merkava: Israel’s Super Tank (And Perhaps The World’s Best?) نشرت في مجلة The National Interest و ده لينك المقالة الأصلية:
http://nationalinterest.org/blog/the-buzz/merkava-israels-super-tank-perhaps-the-worlds-best-23521

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!