لينك التسجيل الصوتي للمقالة علي ساوند كلاود:
https://on.soundcloud.com/ichbf
شهر يوليو 2018 كان عدي 10 سنين علي عرض فيلم The Dark Knight .. صحيح إن أنا إتأخرت 3 شهور عشان أكتب المقالة دي بس معلش سامحوني أولاً و ثانياً مش معني إني إتأخرت كام شهر إني أفوت فرصة إني أتكلم عن فيلم عبقري زي ده .. خليني أجيبهالك علي بلاطة .. فيلم The Dark Knight في رأيي و رأي ناس كتير هو أحسن فيلم في فئة الأفلام بتاعة الأبطال الخارقين Superheroes إتعمل لحد دلوقتي .. خليني أزيدك من الشعر بيت و أقولك إني بعتبره من أحسن الأفلام اللي إتعملت في تاريخ البشر .. فيه ناس حتبصلي و تقولي إيه الهبد ده؟ و ده حقهم بس خليني لو إنت من الناس دي أثبتلك وجهة نظري.
لو حتتكلم عن الفلوس ففيلم The Dark Knight هو أول فيلم Superhero أرباحه تعدي المليار دولار و حالياً هو سادس أكتر فيلم جاب فلوس في التاريخ .. لو حتتكلم عن الجوايز ففي حفلة الأوسكار الفيلم مروح بجايزة أوسكار أحسن ممثل مساعد ل(هيث ليدجر Heath Ledger) عن دور الجوكر و ياعيني زي ما كتير عارف هو مات قبل عرض الفيلم و كمان خد أوسكار أحسن مونتاج صوت ده غير 6 ترشيحات تانية اللي هم أحسن ديكور و أحسن تصوير و أحسن مونتاج و أحسن مونتاج صوت و أحسن مكياج و أحسن مؤثرات بصرية .. مش كده و بس .. الفيلم كان عليه كلام كبير أوي إنه حيترشح لأوسكار أحسن فيلم و أحسن إخراج بس بسبب طريقة فرز الأصوات وقتها و إن كان فيه 5 أفلام بس هي اللي لازم توصل للمرحلة النهائية فده خلي لجنة التحكيم تستبعد الفيلم و لما ده إتعرف حصلت موجة غضب إنت لا تتخيلها أجبرت أكاديمية علوم السينما اللي بتنظم جوايز الأوسكار إنها تعدل في نظامها بحيث إنها تسمح ب10 أفلام يوصلوا للمرحلة النهائية مش خمسة بس .. أظن أنا لما أقولك إن الفيلم ده من أحسن الأفلام اللي إتعملت في التاريخ يبقي أنا مش بهبد و عندي حق.
من كواليس تصوير الفيلم .. كريستيان بايل و هو علي سطح ناطحة سحاب في مدينة شنغهاي الصينية.
لما عرفت إن السنة دي حيكون عدي 10 سنين علي عرض فيلم The Dark Knight قلت لنفسي لازم أشوفه تاني .. نزلته من علي Torrent زي أي حد و إتفرجت عليه .. فاكرين المشهد مش الإفتتاحي بتاع الجوكر و هو بيسرق البنك إنما المشهد اللي وراه لما كان فيه صفقة بيع مخدرات بتتم بين تاجر مخدرات كبير في مدينه جوثام و بين شخصية سكيركرو Scarecrow اللي بيلبس علي وشه خرقه ده و ده كان ظهر في الجزء اللي قبله Batman Begins؟ .. في المشهد ده الصفقة بتبوظ لما شوية شباب من المدينة لابسين شبه لبس Batman بس معاهم بنادق دخلوا عليهم .. هم شباب عايزين ينظفوا مدينتهم و واخدين Batman مثل أعلي بس الدنيا باظت عليهم و كانوا حيتنفخوا كلهم لحد ما فجأة المدرعة بتاعه Batman بتوصل .. في اللحظة دي شخصية سكيركرو Scarecrow بيجري يستخبي ورا عربية و يقول لنفسه That’s more like it يعني هو ده Batman الحقيقي مش شوية العيال اللي مش فاهمه هي بتعمل إيه .. فاكرين المشهد ده؟ .. أهو المشهد ده بيعبرلك عن الحالة اللي زي الخرا اللي وصلت ليها افلام DC Comics .. عد من أول Man of Steel و إنت طالع مرورا بBatman V Superman و Justice League و Wonder Woman و Suicide Squad اللي هم شبه العيال اللي مش فاهمه هي بتعمل إيه و خربت الدنيا .. لما بتفرج علي سلسلة The Dark Knight بقول لنفسي نفس اللي قاله سكيركرو .. That’s more like it.
اللي عمله (كريستوفر نولان Christopher Nolan) اللي في حالة إنك متعرفش هو مين فده اللي أخرج ثلاثية The Dark Knight اللي هم Batman Begins و The Dark Knight و The Dark Knight Rises إنه حط نموذج الإجابة بتاع إزاي تعمل فيلم Superhero نظيف؟ .. أنا عارف إن جيل الألفينات ممكن ميكونوش فاكرين أنا بتكلم عن إيه بس سنة 1997 لما نزل فيلم Batman & Robin كان كارثة لدرجة إن شركة Warner Bros اللي أنتجته دفنت سلسلة Batman و قالت مش عايزه حد يفتحلي سيرة الاسم ده تاني لحد ما جه (كريستوفر نولان) قالهم أنا عايزها و ملكوش دعوة .. وقتها هو كان حط لنفسه اسم إنه مخرج كويس أوي بيعرف يعمل أفلام تقعدك علي أعصابك و مش متكلفه فلوس كتير زي Memento و Insomnia .. سنة 2005 طلعلنا فيلم Batman Begins اللي الحقيقة فيلم حلو أوي و جاب فلوس حلوة بس الفلوس دي و النجاح ده ميجيش حاجة جنب نجاح الجزء الثاني The Dark Knight.
المخرج (كريستوفر نولان) و هو بيوجه (كريستيان بايل) في أحد المشاهد من فيلم The Dark Knight.
الفيلم كتبه 3 بني أدمين اللي هم (كريستوفر نولان) شخصياً و معاه أخوه (جوناثان Jonathan) اللي بالمناسبة هو اللي ورا مسلسل Westworld و معاهم كمان (ديفيد جوير David Goyer) .. اللي الثلاثة دول عملوه إنهم بصوا لأفلام Superheroes اللي إتعملت قبلهم و بدأوا يشوفوا هي المشكلة فين؟ .. أول فيلم Superhero يتعمل كان X-Men سنة 2000 و اللي كان فيلم حلو بس الجرافيك فيه مكنش قد كده و دي كانت أكبر مشكلة فيه .. جه وراه Spiderman سنة 2002 و كان من إخراج (سام رايمي Sam Raimi) و رغم إن الفيلم نجح بشكل كبير تجارياً بس النقاد مسكوه غسيل و مكواة بسبب إنه كان فيلم اهبل لإنه فيلم معمول للمراهقين اللي لسه في ثانوية عامة .. و بعد كده طلعلنا X2 اللي هو الجزء الثاني من فيلم X-Men و اللي كان أحلي بكتير من الجزء الأولاني بس بعد كده الكيرف بدأ يقع جامد لأفلام Superheroes عموماً .. من 2003 لحد 2008 طلعلنا شوية أفلام زبالة متتشفش زي Daredevil و Fantastic Four و Ghost Rider و Catwoman .. بالورقة و القلم الثلاثي اللي كتب The Dark Knight حددوا 3 نقط لازم تتغير:
- مبدأياً إتفقوا إن أفلام Superheroes مينفعش تبقي متصورة بالشكل المبهج ده .. إنت حتلاحظها بنفسك و إنت بتتفرج علي Spiderman إن الفيلم نفسه مبهج من حيث إختيار الألوان أو الBrightness بتاع الشاشة .. بإختصار شديد (كريستوفر نولان) صور The Dark Knight زي ما المخرج (مايكل مان Michael Mann) صور فيلمه Heat .. فيلم متصور بإضاءة خافتة كئيبة تخوف أحياناً.
- هم قالوا لنفسهم إن فيلم Superhero مش لازم يبقي كئيب بس لازم يبقي جد و يحسسك إن الدنيا بايظة .. (كريستوفر نولان) خد أفلام الSuperheroes لفكرة الواقعية الأوفر إن Batman مش هو المحارب المثالي اللي يحسسك إنه عامل زي شخصية (ونيس) بس بيعرف يضرب إنما أكتر شبه شخصية (كلبش) بس مصروف عليه شوية و يشيل ميتين أم الشنب بتاعه ده .. إنت متخيل Batman يبقي بشنب يااااااااع.
- نقطة مهمة كمان في نموذج الإجابة بتاع The Dark Knight إن صحيح Batman هو الشخصية اللي علي الأفيش بتاع الفيلم و صحيح إن (كريستيان بايل Christian Bale) هو بطل الفيلم و إسمه أول اسم يطلع بس فعلياً الفيلم كله قايم علي الشرير اللي هو الجوكر و اللي جسده بعبقرية (هييث ليدجر) الله يرحمه .. إنت كنت أول مرة تشوف شرير دماغه فيها حاجة غلط زي الجوكر .. شخصية إتوصفت في مرحلة من مراحل الفيلم إنه ارهابي .. في مشهد مهم أوي بتشوفه و هو بيحرق فلوس تجار المخدرات عشان يثبتلهم إن الحرب بينه و بين النظام هي حرب علي مبدأ مش علي فلوس .. أنا شخصياً شايف إن الجوكر بالشكل اللي قدمها به (هييث ليدجر) هو أحلي و أمتع شخصية شرير مش بس إتعملت في أفلام Superheroes إنما في تاريخ السينما.
أحياناً تحس إن شخصية الجوكر اللي قدمها الراحل (هيث ليدجر) كانت هي بطل الفيلم الحقيقي مش باتمان.
في رأيي إن أكتر حاجة خلت The Dark Knight ينجح بالشكل ده و يطلع بالمستوي ده إن شركة الإنتاج سابت (كريستوفر نولان) يعمل اللي هو عايزه .. الStunts أو المشاهد الخطيرة في الفيلم مش كتير و مش معمولة بجرافيك عالي .. أكبر Stunt في الفيلم كله لما الترلة إتقلبت في الشارع .. (كريستوفر نولان) و هو بيصور The Dark Knight مكنش شاغل دماغه بالجزء الثالث و مكنش شاغل دماغه يا تري المنتج حيقول إيه؟ أو رأيه حيكون إيه؟ .. هو إتساب يعمل اللي هو عايزه .. هو كان مقتنع إن فيلم Superhero اللي بحق و حقيقي لازم يبقي فيلم واقعي.
فكرة الواقعية الأوفر في فيلم The Dark Knight عملت صدمة لناس كتير من اللي شغالين في الأفلام .. خد عندك سلسلة X-Men مثلاً .. السلسلة دي ماتت بشكل مؤقت لما نزل الفيلم الكارثي X-Men: The Last Stand سنة 2006 .. لما نزل The Dark Knight بواقعيته قالوا لنفسهم طب ليه منعملش فيلم X-Men بنفس الدماغ دي؟ فكانت النتيجة فيلم حلو أوي إسمه X-Men: First Class اللي أخرجه حد بيفهم إسمه (ماثيو فون Mathew Vaughn) .. متفهمش ليه شركة الإنتاج لما جت تكمل السلسلة مشته و رجعت تاني المخرج (برايان سينجر Bryan Singer) اللي كان عمل الجزئين الأولانيين خالص من السلسلة عشان يعمل فيلم X-Men: Days of Future Past و ترجع تاني ريما لعادتها القديمة و تبوظ السلسلة بعد ما كانت ماشية حلو ليه؟ عارف ليه سلسلة X-Men باظت تاني بعد ما كانت إتعدلت؟ لإن (براين سينجر) بطل يمشي علي نموذج الإجابة بتاع The Dark Knight و رجع تاني للطريقة القديمة لأفلام Superheroes زي فيلم Spiderman الأولاني خالص .. فين و فين لما إتعمل فيلم Logan السنة دي علي نفس الرتم بتاع The Dark Knight و حطوا التاتش بتاعتهم و خلوه R-Rated يعني للكبار فقط و الفيلم نجح تجارياً و فنياً و ناس كتير من اللي شافته قالت عليه أحسن فيلم إتعمل في سلسلة X-Men كلها .. ليه؟ .. عشان مشي علي نفس نموذج الإجابة بتاع The Dark Knight.
المشكلة إن لما DC Comics حبت تكمل علي شغل (كريستوفر نولان) جابت واحد جحش اسمه (زاك سنايدر Zack Snyder) معملش إنجاز في حياته كمخرج إلا فيلم 300 و اللي فعلياً فشخ الدنيا بس إنت محتاج تفهم ليه؟ .. ليه أنا بيتقال عليا إني متحامل أوي علي (زاك سنايدر)؟ .. لما DC Comics جت تعمل Man of Steel اللي هو أول فيلم في DC Cinematic Universe أو العالم السينمائي بتاع DC بحيث يقلدوا Marvel كانت الخطة إنك لأول مرة تشوف شخصية Superman بنفس الإسلوب اللي إنت شفت به Batman .. الفيلم كتبه و أنتجه (كريستوفر نولان) و معاه (ديفيد جوير) بس المخرج كان (زاك سنايدر) .. فلسفة (كريستوفر نولان) هي إنه مكنش عايز يقلد Marvel .. هو كان عايز يقدملك Man of Steel بنفس الإسلوب بتاع Batman Begins و بعد كده يجبلك صدمة نفسية بفيلم Man of Steel 2 بحيث يبقي شبه The Dark Knight و بعد كده تشوف فيلم Wonder Woman و بعد كده يبدأ يعرفك علي إزاي ممكن Superman يقابل Wonder Woman و Batman بس براحة و علي نار هادية أوي .. الحقيقة إن الفيلم كان حلو بس مش اوي و دي المشكلة .. الفيلم منجحش تجارياً النجاح المطلوب و دي كانت نقطة إتكلم فيها (زاك سنايدر) مع شركة الإنتاج .. هو قالهم أنتوا جربتوا تمشوا بدماغ (كريستوفر نولان) و أديكوا شفتوا النتيجة .. أدوني الفرصة بقي أبهركوا بدماغي و ياريتهم ما سمعوا كلامه.
المخرج (كريستوفر نولان) و هو بيتابع التصوير لفيلم The Dark Knight في مشهد للراحل (هيث ليدجر) بشخصية الجوكر.
شايف ال3 نقط اللي أنا قلتلك عليهم و اللي أنا شايفهم سر نجاح The Dark Knight؟ .. أهو اللي عمله (زاك سنايدر) إنه عملك شوية أفلام ظلمة زي ما تكون متصورة علي شمعة و إن اغلب الشخصيات اللي فيها عندها إكتئاب حاد .. (بين أفليك Ben Afflick) فعلياً في الفيلمين اللي قدمهم كBatman مكنش بيبتسم قال يعني هو لازم يفضل مكشر في وشنا طول النهار ولا كإنه كابتن (حسام البدري) عشان يحسسنا إنه مهموم و شايف شغله .. و مش لوحده .. (زاك سنايدر) شخصية كئيبة و قرر إنه يجيبلنا كلنا إكتئاب .. في حين إن The Dark Knight بدأ معاك بشعاع من الأمل إن خلاص (هارفي دينت Harvey Dent) اللي قدمه الممثل (أرون ايكهارت Aaron Eckhart) خلاص سجن كل تجار المخدرات في المدينة و توتة توتة حتخلص الحدوتة و فجأة الدنيا إتطربقت فوق دماغنا كلنا .. الأفلام اللي عملها (زاك سنايدر) من أولها لأخرها ظلمة و ناس مبتضحكش ولا بتبتسم و حاجة صباح الإكتئاب يعني الصراحة .. الشخصيتين الوحيدتين اللي يرفعوا الروح المعنوية هما Wonder Woman و ده في رأيي سببه إن الفيلم نفسه أخرجته واحدة ست اللي هي (باتي جينكينز Patty Jenkins) و بالتالي الشخصية نفسها كانت حلوة و شخصية The Flash اللي قدمها الممثل (إيزرا ميلر Ezra Miller) و حتي دوره مكنش كبير زي ما يكون كان بيضحكنا سرقة عشان (زاك سنايدر) مياخدش باله.
اللي فعلاً مشي علي نفس نموذج الإجابة بتاع The Dark Knight كان فيلم The Avengers اللي نزل سنة 2012 و أخرجه (جوس وييدون Joss Whedon) .. فاكر الفيلم كويس؟ فاكر لما (لوكي Luki) إتأسر و كان عايز يتأسر عشان يدمر السفينة اللي قاعد فيها الAvengers و يفرقهم عن بعض؟ هو مش ده نفس المشهد بتاع The Dark Knight لما الجوكر كان قاصد إنه يتمسك عشان يهرب من جوه السجن؟ .. بلاش دي .. فاكر فيلم Skyfall بتاع سلسلة (جيمس بوند James Bond) لما شخصية الشرير (سيلفا Silva) كان عايز يتمسك عشان المخابرات البريطانية تفتح الLaptop بتاعه يقوم مفيرسلهم السيرفرات بتاعتهم كلها؟ .. برده غاشينها من The Dark Knight .. إذا كان الإصدار الأولاني خالص لسلسلة Batman سنة 1989 كان هو الشرارة اللي طلعلتنا أفلام متصورة شبهه في التسعينات زي Dick Tracy و The Shadow و The Phantom .. برده الإصدار الجديد لسلسة Batman و اللي بدأ مع Batman Begins سنة 2005 هو اللي طلعلنا افلام Superheroes واقعية أوي اهمها Iron Man .. هي بس المشكلة إن اللي كمل في السكة دي كانت Marvel في وقت DC Comics اللي بدأت التريند ده مكملتش عليه.
المصادر:
- مقالة بعنوان The Dark Knight at 10: how Christopher Nolan reshaped superhero cinema .. فيلم The Dark Knight عدي عليه 10 سنين: ازاي (كريستوفر نولان) اعاد صياغه افلام السوبرهيرو .. نشرت في جريدة The Guardian البريطانية و ده لينك المقالة الأصلية:
https://www.theguardian.com/film/2018/jul/18/the-dark-knight-at-10-how-christopher-nolan-reshaped-superhero-cinema - مقالة بعنوان The Cultural Impact of ‘The Dark Knight’ 10 years later .. الأثر الثقافي لفيلم The Dark Knight بعد عرضه ب10 سنين .. نشرت في مجلة Forbes و ده لينك المقالة الأصلية:
https://www.forbes.com/sites/markhughes/2018/07/25/the-cultural-impact-of-the-dark-knight-10-years-later/#1c3dd30e65cb
- مقالة بعنوان The Dark Knight changed Hollywood movies forever .. فيلم The Dark Knight غير أفلام هوليوود للأبد .. نشرت في مجلة The Atlantic الأميريكية و ده لينك المقالة الأصلية:
https://www.theatlantic.com/entertainment/archive/2018/07/the-dark-knight-legitimized-the-superhero-movie-for-better-and-worse/565448/
